16–22 Oktoba

Fas mo Seken Tesalonaeka

“Mekem Bilif blong Yufala I Strong Moa, long Wanem Samting we Yufala I Sot long Hem”

Sapos yumi no stap raetemdaon ol filing mo ol tingting we yumi kasem long Spirit, maet bae yumi fogetem olgeta. ?Wanem nao Spirit i talem long yu blong raetemdaon taem yu stap ridim 1 mo 2 Tesalonaeka?

Raetemdaon Ol Filing mo Tingting blong Yu

Long Tesalonaeka, Pol mo Saelas, oli talem se tufala i rong from tufala i “mekem tumas trabol” (Ol Wok 17:6). Prijing blong tufala i mekem samfala lida long medel blong Ol Jiu ia, oli kros, mo ol lida ia oli tanem tingting blong ol pipol blong oli mekem bigfala rao (luk long Ol Wok 17:1–10). Long en, Pol mo Saelas oli kasem advaes blong oli mas aot long Tesalonaeka. Pol i bin wari abaot ol niu konvet blong Tesalonaeka, mo hadtaem we oli bin stap fesem, be hem i no bin save gobak blong visitim olgeta. Hem i raetem: “Taswe mi sanem Timoti i kam blong luk yufala, from we mi mi wari tumas long yufala. Mi mi wantem blong kasem sam nius blong yufala, se yufala i stap stanap strong long bilif blong yufala no nogat.” Ansa blong hem, Timoti, wokman blong Pol, we i bin stap mekem wok long Tesalonaeka “i kambak long mifala finis. Mo nius ya we hem i talemaot long mifala, we bilif blong yufala i strong, mo yufala i lavem ol man tumas, hem i mekem mifala i glad tumas.” (1 Tesalonaeka 3:5–6). Wanem i tru, i we, Ol Sent long Tesalonaeka, oli bin save olgeta olsem ol eksampol blong man we i stap biliv (1 Tesalonaeka 1:7), mo nius abaot biliv blong olgeta, i go kasem ol nara taon longwe. Traem tingting long glad blong Pol, mo harem gud blong hem blong harem se wok blong hem long medel blong olgeta ia i no blong nating (1 Tesalonaeka 2:1). Be Pol i bin save se, long taem bifo, fasin blong stap fetful i no inaf blong no stap ded long saed blong spirit, long fiuja; mo hem i stap wari long paoa blong ol giaman tija long medel blong Ol Sent (luk long 2 Tesalonaeka 2:2–3). Mesej blong hem long olgeta mo long yumi, i blong gohed blong “mekem bilif blong yufala i strong moa, long wanem samting we yufala i sot long hem,” wetem lav (luk long 1 Tesalonaeka 3:10; 4:10).

Sam Aedia blong Skripja Stadi blong Yuwan

1 Tesalonaeka 1–2

Ol disaepol blong Kraes oli givim seves long ol narawan wetem tru tingting mo lav.

Long 1 Tesalonaeka, ol toktok blong Pol oli talemaot wari ia mo glad ia blong wan we i givim hemwan fulwan blong givim seves long ol pikinini blong God. Speseli long ol fas tufala japta blong 1 Tesalonaeka, bae yu faenem ol toktok mo ol sentens we oli tokbaot ol fasin mo ol aksen blong wan disaepol blong Lod. Eksampol: ?Wanem nao yu yu lanem aot long 1 Tesalonaeka 1:5–8; 2:1–13 abaot fasin blong givim seves long Lod?

Tingting abaot ol janis we yu gat blong wok blong God mo ol pikinini blong Hem. ?Wanem nao yu faenem insaed long ol seksen ia we i givim insperesen long yu blong yu kam antap long seves blong yu? Tingting blong askem yuwan ol kwestin folem wanem yu faenem, olsem “?Mi mi wan eksampol, o no, blong ol samting we mi mi save finis?” (luk long 1 Tesalonaeka 1:7).

1 Tesalonaeka 3:7–13; 4:1–12

Stap kam antap mo gat fulap lav.

Pol i bin glad tumas long fasin blong Ol Sent long Tesalonaeka blong oli stap fetful (luk long 1 Tesalonaeka 3:7–9). Be hem i bin wantem tu blong oli groap moa long fetful fasin ia (1 Tesalonaeka 4:1). Taem yu stap ridim 1 Tesalonaeka 3:7–13; 4:1–12, tingting hevi long ol wei we yu save groap i kam antap moa mo moa long saed blong spirit (1 Tesalonaeka 4:10). Eksampol: tek not se Pol i yusum ol toktok olsem “klin” mo “kam tabu.” ?Wanem nao yu lanem aot long ol raeting blong Pol long saed blong ol mining blong ol toktok ia? ?Olsem wanem nao Sevya i save helpem yu blong kam klin moa, mo tabu moa?

Luk tu long Gaed long Ol Skripja, “Tabu,” “Tabu, Fasin blong Mekem I Kam,” olskripja.ChurchofJesusChrist.org.

1 Tesalonaeka 4:16–18; 5:1–10; 2 Tesalonaeka 1:4–10

Sapos mi mi stap fetful mo mi stap lukaotgud, bae mi rere from Seken Kaming blong Sevya.

Long 1 Tesalonaeka 5:1–10, Pol i bin yusum plante pikja toktok blong tij abaot taem ia we Jisas bae i kambak long wol ia. Taem yu stap stadi long ol pikja toktok ia, tingting blong raetemdaon ol tingting mo filing we oli kam long yu abaot Seken Kaming blong Jisas Kraes.

• “wan stilman long naet”:

• “woman i harem we bak blong hem i soa blong i bonem pikinini”:

• I gat ol nara pikja toktok we bae yu faenem:

?Wanem moa trutok nao bae yu yu lanem aot long 1 Tesalonaeka 4:16–18; 5:1–10; 2 Tesalonaeka 1:4–10? ?Wanem nao Spirit i talem long yu blong mekem blong lukaot mo rere from taem we bae Sevya i kam?

Luk tu long D. Todd Christofferson, “Stap Rere from Kambak blong Lod,” Liahona, Mei 2019, 81–84.

Seken Tesalonaeka 2

Wan apostasi, o blong foldaon, o stap longwe long trutok, i wan samting we bae i hapen mo oli talem long profesi, mo bae i kam bifo long Seken Kaming.

Long medel blong ol hadtaem, plante Sent long Tesalonaeka oli bin bilivim se Seken Kaming blong Sevya i kam kolosap. Be Pol i bin save se, bifo Jisas i kambak long wol ia, bae i gat wan apostasi—wan fasin blong agens, o foldaon longwe long trutok (luk long 2 Tesalonaeka 2:1–4). Yu save kam blong save moa abaot Bigfala Apostasi—mo glad from Restoresen—taem yu tingting hevi long sam long olgeta samting ia:

• Ol skripja we oli tokbaot finis Apostasi ia: Aesea 24:5; Amos 8:11–12; Matiu 24:4–14; 2 Timoti 4:3–4

• Ol skripja we oli soem se Apostasi i bin stat finis long taem blong Pol: Ol Wok 20:28–30; Galesia 1:6–7; 1 Timoti 1:5–7

• Samfala tingting abaot Bigfala Apostasi we sam Kristin rifoma oli bin raetem.

  Martin Luther: “Mi no lukaot wan samting moa; be blong mekembak Jos blong i folem wanem i stap long Ol Tabu Skripja. … Mi stap talem nomo se Kristin fasin, hem i stop finis long medel blong olgeta ia we oli sapos blong holemtaet gud” (insaed long E. G. Schweibert, Luther and His Times: The Reformation from a New Perspective [1950], 590).

  Roger Williams: “Apostasi … i prapa spolem gud evri samting we i no gat samting we yu save tekembak long apostasi ia kasem taem we Kraes i sendem ol niu aposol i kam, blong oli stanemap ol jos bakegen” (insaed long Philip Schaff, The Creeds of Christendom [1877], 851).

Luk tu long 2 Nifae 28; Gospel Topics, “Apostasy,” topics.ChurchofJesusChrist.org.

Ol Aedia blong Famli Skripja Stadi mo Haos Naet

1 Tesalonaeka 3:9–13.?Wanem nao i tajem yu abaot ol filing we Pol i gat long ol fren blong hem? ?Olsem wanem nao, yumi stap kam antap mo gat fulap lav long wanwan long yumi? (ves 12).

1 Tesalonaeka 4:13–18.?Wanem sentens nao insaed long ol ves ia abaot Laef Bakegen long Ded, i givim yu kamfot?

1 Tesalonaeka 5:14–25.Taem yu stap luklukbak long kaonsel blong Pol long 1 Tesalonaeka 5:14–25, invaetem wanwan memba blong famli blong faenem wan sentens we famli i save lukluk long hem. Faenem samfala gud wei blong soemaot ol sentens ia long ol wol blong hom blong yu, blong mekem yu yu tingbaot. Eksampol: wanwan i save faenem o droem ol pikja we i soem o sapotem sentens ia we hem i bin jusum.

2 Tesalonaeka 3:13.?i gat sam taem we yumi filim se yumi taet blong mekem ol gud samting—we yumi gat fulap samting tumas, wetem wanem we wok blong stap disaepol i askem? ?Wanem i save helpem yumi taem yumi stap filim olsem? (Luk long Galesia 6:9; Doktrin mo Ol Kavenan 64:33.) ?Olsem wanem nao yumi save sapsapotem yumi taem samting ia i stap hapen?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Mi Traem blong Kam Olsem Jisas,” Liahona, Epril 2012, 64.

Stap Kam Antap long Stadi blong Yuwan

Lukaotem blong kasem revelesen evri dei. “Revelesen i stap kam ‘tijing folem tijing’ (2 Nifae 28:30), i no kam evriwan wantaem. … Yu no tekem se, gospel stadi, i wan samting we yu mas “mekem taem from”, be tekem se i wan samting we yu stap mekem oltaem (Teaching in the Savior’s Way,12

Kraes we I Laef Bakegen long Ded, i kam long Robert T. Barrett