23–29 Oktoba.

Fas mo Seken Timoti; Taetas; Filimon

“Oltaem Yu Mas Soemaot Gudfala Eksampol long Ol Kristin Man”

Samtaem, hem i help blong gat wan, o moa long wan kwestin taem yu wantem mekem skripja stadi blong yu. Invaetem Spirit blong i lidim yu blong yu kasem ol ansa taem yu stap stadi, mo raetemdaon eni insperesen we yu kasem.

Raetemdaon Ol Filing mo Tingting blong Yu

Long ol leta we Pol i bin raetem i go long Timoti, long Taetas, mo long Filimon, yumi luk smol insaed long hat blong wan wokman blong Lod. Olgeta ia, oli no olsem ol leta we Pol i bin raetem i go long wan ful kongregesen, be ol leta ia, hem i raetem i go long wanwan man—ol fren blong hem we oli kolosap long hem long wok ia blong God—mo blong ridim olgeta, i olsem blong stap lisin long wan storian bitwin tu man. Yumi luk se Pol i stap leftemap tingting blong Timoti mo Taetas, tufala lida ia blong ol kongregesen ia, long saed blong Jos seves blong olgeta. Yumi luk hem i askem gud long fren blong hem, Filimon, blong i stretem hem bakegen wetem wan Sent, mo tritim hem olsem wan brata insaed long gospel. Ol toktok blong Pol oli no go stret long yumi, mo maet bae hem i neva ting se plante pipol olsem bae oli ridim ol toktok ia wan dei. Be yet, yumi faenem, insaed long ol leta ia, sam advaes mo sam toktok blong leftemap tingting, we yumi save yusum, nomata wanem nao i seves blong yumi long Kraes.

Sam Aedia blong Skripja Stadi blong Yuwan

?Huia nao oli Timoti mo Taetas?

Timoti mo Taetas, tufala i bin givim seves wetem Pol long sam misinari wokbaot. Long taem blong seves blong olgeta, Pol i kam blong respektem mo trastem tufala. Timoti, sam taem afta, oli bin singaotem hem i kam wan lida blong Jos long Efesas, mo Taetas, oli singaotem hem olsem wan lida long Krit. Long ol leta ia, Pol i givim sam instraksen mo toktok blong leftemap tingting long Timoti mo Taetas, long saed blong ol responsabiliti blong tufala, we i blong prijim gospel mo blong stap singaotem sam man oli kam stap olsem ol bisop.

Luk tu long Gaed long Ol Skripja, “Leta blong Pol, Ol,” “Timoti,” “Taetas.”

“Yu yu wan yang man nomo, be i nogud yu letem ol man oli luklukdaon long yu from samting ya. Oltaem yu mas soemaot gudfala eksampol long ol Kristin man” (Fas Timoti 4:12).

1 Timoti 4:10–16

“Yu mas soemaot gudfala eksampol blong ol Kristin Man.”

Timoti i bin wan yang man. Be Pol i bin save se hem i save stap olsem wan bigfala lida blong Jos, nomata se hem i yangfala. ?Wanem advaes nao Pol i givim long Timoti long 1 Timoti 4:10–16? ?Olsem wanem kaonsel ia i save helpem yu blong lidim ol narawan i go long Sevya mo gospel blong Hem?

Luk tu long Alma 17:11.

2 Timoti

“Spirit we God i givim long yumi, i no blong mekem yumi fraet… i blong mekem yumi gat paoa, blong mekem yumi lavem man, mo i blong mekem yumi naf blong blokem [ol nogud tingting].”

2 Timoti ia, oli biliv se hem i las leta blong Pol we hem i bin raetem, mo i luk se hem i bin save se taem blong hem long wol ia i blong sot taem (luk long 2 Timoti 4:6–8). ?Olsem wanem nao Timoti i bin filim, taem hem i save se i no longtaem, bae hem i no stap wetem mento we hem i trastem, mo lida blong hem? ?Wanem nao Pol i talem blong leftemap tingting blong hem? Maet yu save rid tu wetem ol jalenj mo fraet blong yu i stap long maen blong yu. ?Wanem mesej nao, blong hop mo leftemap tingting, we Lod i gat blong givim long yu long 2 Timoti?

Luk tu long Kelly R. Johnson, “Paoa blong Stanap Strong Kasem En,” Liahona, Novemba 2020, 112–14.

2 Timoti 3

Blong stap laef folem gospel, hem i givim wan sef ples aot long ol denja long saed blong spirit, long laef.

Yumi stap laef long ol las dei we Pol i stap tokbaot, mo ol taem blong denja, oli kam finis (2 Timoti 3:1). Taem yu stap ridim 2 Timoti 3, raetemdaon ol denja blong ol las dei we oli tokbaot long (luk tu long 1 Timoti 4:1–3):

?Yu yu save tingting abaot sam eksampol blong ol denja ia insaed long wol we oli stap raonabaot long yu—o insaed long laef blong yu? ?Olsem wanem, ol denja ia, olsem we ol pipol oli tokbaot insaed long ves 6, oli wokbaot sloslo i kam insaed long haos blong yu, mo lidim yu i go prisena? ?Wanem kaonsel nao yu faenem insaed long 2 Timoti 3, mo long ol nara leta, we oli save helpem yu mo famli blong yu i stap sef long ol denja ia long saed blong spirit? (Eksampol, luk long 1 Timoti 1:3–11; 2 Timoti 2:15–16; Taetas 2:1–8).

?Huia hem i Filimon?

Filimon i wan Kristin man we Pol i bin helpem hem blong hem i jenisim laef blong hem i kam long gospel. Filimon i bin gat wan slef, nem blong hem, Onesimas, we i luk se i ronwe long Rom. Longwe, Onesimas i bin mitim Pol, mo i jenisim laef blong hem i kam long gospel. Pol i bin sendem Onesimas i gobak long Filimon, wetem wan leta we i stap leftemap tingting blong Filimon blong tekem Onesimas “hem i no wan slef nomo, be hem i moa long slef. !Hem i wan gudfala brata blong yumi!” (Filimon 1:16).

Filimon

Ol disaepol blong Kraes, oli tritim wanwan long olgeta olsem ol brata mo sista.

Taem yu stap ridim leta blong Pol i go long Filimon, tingting hevi long hao yu save yusum kaonsel ia blong hem long ol rilesensip wetem ol narawan. Andanit ia, i gat samfala kwestin we yu save lukluk long hem:

• Ol ves 1–7: ?ol toktok olsem “gudfala fren … we i stap long sem wok nomo” mo “soldia blong wan kampani nomo” oli stap talem long yu abaot ol rilesensip long medel blong Ol Sent? ?Wetaem nao yu bin filim we wan brata mo sista long Kraes i bin mekem tingting blong yu i harem gud?

• Ol ves 8–16: ?Hem i minim wanem blong “talem wanem samting we i stret blong yu yu mekem” mo “talemgud”? ?From wanem Pol i bin jusum blong talemgud long Filimon be i no blong talem wanem samting i stret blong hem i mas mekem ? ?Wanem nao Pol i bin hop blong mekem i hapen taem hem i sendem Onesimas i gobak long Filimon?

• Ves 16: ?Hem i minim wanem blong “hem i wan brata [o sista] from we hem i joen finis long Masta blong yumi”? ?Yu yu save wan we yu nidim blong akseptem long wei ia?

Ol Aedia blong Famli Skripja Stadi mo Haos Naet

1 Timoti 2:9–10.?Hem i minim wanem blong “flasem yumi … wetem ol gudfala wok”? ?Wanem nao oli sam gudfala wok we famli blong yumi save mekem long wik ia? Maet bae yufala i save singsing wan singsing tugeta abaot fasin blong mekem ol gud samting, olsem “Have I Done Any Good?” (Hymns, namba 223).

1 Timoti 4:12.Blong helpem famli blong yu blong wantem stap wan eksampol blong ol man we oli biliv, tingting blong invaetem olgeta blong droem ol pikja blong ol pipol we oli bin stap olsem ol gudfala eksampol long olgeta. ?Olsem wanem nao, ol pipol ia oli bin givim insperesen long yumi blong folem Jisas Kraes? Mesej blong Presiden Thomas S. Monson: “Be an Example and a Light” (Liahona, Nov. 2015, 86–88) i save givim sam aedia long wei blong stap wan eksampol long ol nara pipol.

1 Timoti 6:7–12.?From wanem nao yu yu ting se “fasin blong laekem mane tumas, hem i stamba blong olgeta fasin nogud”? ?Wanem nao ol denja blong mekem laef blong yumi i lukluk long mane o ol samting blong kasem? ?Olsem wanem nao yumi save stap glad wetem ol blesing we yumi gat?

2 Timoti 3:14–17.Folem wanem i stap long ol ves ia, ?wanem blesing nao i kam long olgeta we oli save mo stadi long ol skripja? Maet ol memba blong famli oli save serem ol skripja we oli bin faenem se oli gud tumas.

Filimon 1:17–21.?Wanem nao oli rere blong mekem long bihaf blong Onesimas? ?Long wanem wei nao, hemia i semmak long wanem we Sevya i bin glad blong mekem blong yumi? (luk tu long 1 Timoti 2:5–6; Doktrin mo Ol Kavenan 45:3–5). ?Olsem wanem yumi save folem ol eksampol blong Pol, mo blong Sevya?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Shine On,” Children’s Songbook, 144.

Stap Kam Antap long Fasin blong Yumi blong Stap Tij

Tijim klia mo simpol doktrin. Gospel blong Lod i naes tumas from se hem i simpol (luk long Doktrin mo Ol Kavenan133:57). Yu no traem blong entetenem famli blong yu wetem ol lesen we oli askem fulap taem blong yu, be traehad blong tijim doktrin we i stret gud mo i simpol (luk long 1 Timoti 1:3–7).

“Mo yu save tu we taem yu pikinini yet, kam kasem naoia, be yu yu savegud ol tok blong Baebol. Tok ya i save mekem yu yu waes, mo i save lidim yu blong yu save stanap strong long bilif blong yu long Jisas Kraes, blong God i save sevem yu.” (2 Timoti 3:15).