Oel blong Giliad, i kam long Annie Henrie

30 Oktoba –5 Novemba

Hibrus 1–6

Jisas Kraes, “I Prapa Man blong Sevem Man”

Blong raetemdaon ol filing mo tingting long saed blong spirit i helpem yu blong luksave wanem we Tabu Spirit i wantem tijim yu. Blong tekem aksen folem ol filing mo ol tingting blong yu i soemaot fet o bilif blong yu se ol kwaet toktok blong Spirit ia oli ril.

Raetemdaon Ol Filing mo Tingting blong Yu

Wanwan long yumi i mas givap long wan samting blong save akseptem gospel blong Jisas Kraes—ol nogud evri dei fasin, ol rong bilif, ol frensip we oli no gud, o ol nara samting. Long OI Jentael long ol eli dei blong Jos, fasin blong jenisim laef i stap minim blong lego ol giaman god. Long Ol Hibru (o Jiu), fasin blong jenisim laef, i moa had long olgeta, mo i moa fasfas. Long en, ol bilif mo tradisen blong olgeta oli bin gat rus insaed long wosip ia blong tru God mo ol tijing blong ol profet blong Hem, we i gobak plante taosen yia i go. Be yet, Ol Aposol oli stap tijim se loa blong Moses i kamtru tru long Jisas Kraes, mo naoia, i gat wan loa we i moa hae, we i standet blong ol man blong biliv. ?Weswe? ?Bae fasin blong Kristin man i minim se Ol Hibrus oli mas givap long fasfala bilif mo histri blong olgeta? Leta we i go long Ol Hibru oli blong help blong sotemaot ol kwestin olsem taem oli stap tijim se loa blong Moses, ol profet, mo ol odinens, evriwan i impoten, be Jisas Kraes i hae moa (luk long Hibrus 1:1–4; 3:1–6; 7:23–28). Wanem i tru, i we, evri samting ia oli poen i go long Kraes, mo oli testifae abaot Kraes olsem Pikinini blong God mo Mesaea ia we God i bin promesem, we Ol Jiu oli bin stap wet long hem.

Fasin blong jenisim laef, long ol dei ia mo tedei, i minim se yumi tekem Jisas i stap long senta blong wosip mo laef blong yumi. Hem i minim blong stap holemtaet gud trutok mo lego wanem i stap pulumaot yumi long Hem, from se Hem i “prapa man blong sevem man, hem i save sevem olgeta we oli obei long hem, i save holemgud olgeta, gogo i no save finis” (Hibrus 5:9).

Sam Aedia blong Skripja Stadi blong Yuwan

?Huia i raetem Leta i go long Ol Hibru?

Sam man blong skul oli bin kwestinim se Pol o no i bin raetem Leta i go long Ol Hibru? Stret stael blong raet blong Ol Hibru i defren smol long stael blong ol nara leta blong Pol, mo ol fas vesen blong raeting, i no gat wan man i saenem nem blong hem. Be, from ol aedia we oli talem long lanwis Hibru oli semmak long ol nara tijing blong Pol, ol Ol Lata-dei Sent, blong kipim tradisen blong Ol Kristin man, oli bin akseptem se maet Pol i bin raetem leta ia.

Luk tu long Gaed long Ol Skripja, “Leta blong Pol, Ol.”

Hibrus 1–5

Jisas Kraes i “stret pikja” blong Papa long Heven.

Plante long ol Jiu oli bin faenem i had blong akseptem Jisas Kraes olsem Pikinini blong God. Luk olsem wanem Leta i go long Ol Hibru i stap testifae abaot Hem. Eksampol, taem yu stap ridim ol fas faevfala japta, maet i gud yu mekem wan lis blong ol taetol, ol rol, ol kwaliti fasin, mo ol wok blong Jisas Kraes, we yu faenem we oli tokbaot. ?Wanem nao ol ves ia oli stap tijim yumi abaot Sevya? ?Wanem nao ol ves ia oli tijim yu abaot Papa long Heven?

?Wanem nao, toktok ia we i kam long Elda Jeffrey R. Holland i ademap long save blong yu abaot ol tijing we oli stap long ol japta ia? “Jisas i kam blong mekem lukluk blong man abaot God i kam gud moa, mo blong askem strong long olgeta blong lavem Papa blong olgeta long Heven, olsem we Hem i bin oltaem, mo bambae oltaem i lavem olgeta. Mekem se, blong fidim olgeta we oli hanggri, hilim olgeta we oli sik, sakemaot fasin blong gat tu fes, mo askem man blong gat fet, o blong biliv—hemia i Kraes we i stap soem yumi, fasin blong Papa” (“The Grandeur of God,” Liahona, Nov. 2003, 72).

Hibrus 2:9–18; 4:12–16; 5:7–8

Jisas Kraes i bin safa evri samting blong mekem se Hem i save andastanem mo save helpem mi taem mi stap safa.

?Yu yu filim se yu save “kam long fes blong God” mo askem blong kasem sore? (Hibrus 4:16). Wan mesej blong Leta i go long Ol Hibru, i we, i nomata ol sin mo ol wiknes blong yumi, yumi save kam kolosap long God mo yumi save kasem gladhat blong Hem. ?Wanem nao yu yu faenem long Hibrus 2:9–18; 4:12–16; 5:7–8 we i mekem tras blong yu i kam strong moa, se Jisas Kraes bae i helpem yu wetem ol jalenj blong yu long laef ia? Tingting blong raetem insaed long wan jenol ol tingting mo ol filing blong yu abaot wanem we Sevya i bin mekem blong yu.

Luk tu long Mosaea 3:7–11; Alma 7:11–13; 34; Matthew S. Holland, “Naesfala Presen Ia we Pikinini blong God I givim,” Liahona, Novemba 2020, 45–47.

Hibrus 3:7–4:11

Ol blesing blong God oli stap blong olgeta we oli no mekem hat blong olgeta i kam strong.

Taem we hem i bin talem bakegen stori blong Ol Man Isrel blong bifo, Pol i bin hop se bae hem i winim tingting blong Ol Jiu blong no mekem mistek ia we ol bubu blong olgeta i bin mekem—oli sakemaot ol blesing blong God from se oli no biliv. (Yu save ridim stori we Pol i stap tokbaot long Namba 14:1–12, 26–35.)

Tingting long olsem wanem nao, Hibrus 3:7–4:11 hem i blong yu tu. Blong mekem hemia, yu save tingting hevi long ol kwestin ia:

• ?Olsem wanem Ol Man Isrel oli bin traem Lod? (luk long Hibrus 3:8–11). ?Wanem nao risal blong gat wan hat we i stronghed?

• ?Wetaem nao mi bin letem hat blong mi i kam strong moa? ?I gat eni blesing we God i wantem givim long mi we mi mi no kasem from se mi nomo biliv?

• ?Wanem nao mi save mekem blong developem wan hat we i sofsof mo i wantem sakem sin? (luk long Ita 4:15; Ol Proveb 3:5–6; Alma 5:14–15).

Luk tu long 1 Nifae 2:16; 15:6–11; Jekob 1:7–8; Alma 12:33–36; Neill F. Marriott, “Givim Hat Blong Yumi Long God,” Jeneral Konfrens, Okt 2015, ChurchofJesusChrist.org/general-conference/conferences?lang=bis.

Ol Aedia blong Famli Skripja Stadi mo Haos Naet

Hibrus 1:8–9.??Long wanem wei nao Jisas i i bin soem se Hem i lavem stret mo gud fasin mo i no laekem nating fasin we i no stret? ?Sapos yumi wantem ol samting we oli no stret mo oli nogud, wanem nao yumi save mekem blong jenisim olgeta?

Hibrus 2:1–4.?Yu yu save tingting long wan lesen we i yusum wan samting blong helpem famli blong yu blong andastanem we i minim wanem blong hang strong long ol trutok blong gospel we yu mi bin harem finis? Maet bae yu soem hemia wetem wan samting we i had blong stap hang o holemtaet. ?Olsem wanem nao ol hadwok blong yumi blong holemtaet testemoni blong yumi oli olsem blong stap kasem mo stap holem samting ia? ?Olsem wanem nao yumi meksua se ol samting we yumi bin harem, oli no glis oli ronwe long yumi? (ves 1).

Hibrus 2:9–10.Blong lukluk gud insaed long sentens ia “kapten blong fasin blong kam olsem god,” maet yu save stat blong tokbaot wanem nao wan kapten i stap mekem. ?Fasin blong sevem man, i minim wanem? ?Olsem wanem nao, Jisas Kraes, i olsem kapten blong yumi, mo i kapten blong fasin blong sevem man?

Hibrus 5:1–5.Ol ves ia oli save helpem yumi blong toktok raon long wanem i minim blong God i singaotem wan we i gat atoriti. ?Wanem nao yumi lanem aot long eksampol blong Jisas Kraes abaot fasin blong stap kasem mo stap mekem ol koling?

“I no gat man we hem nomo i save jusumaot hae nem ya, se hem bambae i hae pris. God nomo i save singaot man blong i tekem wok blong hae pris, olsem we hem i singaot Eron bifo” (Hibrus 5:4). Moses I Singaotem Eron long Seves, i kam long Harry Anderson.

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Mi Nidim Yu Oltaem,” STSP, pej 22.

Stap Kam Antap long Stadi blong Yuwan

Traem defren wei blong mekem stadi. Traem blong jenisim wei blong stadi long ol skripja, mo tingting long sam nara aedia blong stadi. Blong kasem sam moa help, luk long “Sam Aedia blong Kam Antap long Skripja Stadi blong Yuwan” we i stap long stat blong buk ia.

Laet blong Wol, long Walter Rane