2–8 Oktoba

Efesas

Blong Ol Sent Oli Kam Stret Gud Evriwan

?Yu yu stap luk eni koneksen bitwin ol mesej blong jeneral konfrens, mo leta blong Pol i go long Ol Man Efesas?

Raetemdaon Ol Filing mo Tingting blong Yu

Taem we gospel i stat blong go olbaot long Efesas, “i gat wan bigfala rao i kamaot” (Ol Wok 19:23) long medel blong Ol Man Efesas. Ol lokol man we oli wokem ol handikraf we oli stap wokem ol aedol blong wosip, i luk se Kristin fasin i kam blong spolem laef blong olgeta, mo i no longtaem afta, “oli bin kros tumas,” … mo mekem bigfala taon ia i fulap long tingting we i fasfas” (luk long Ol Wok 19:27–29). Traem tingting long maen blong yu se yu yu wan niu konvet long gospel, mo yu stap long wan ples olsem. Plante Man Efesas oli bin akseptem gospel, mo oli bin stap laef folem gospel long medel blong “bigfala rao” (Ol Wok 19:40), mo Pol i talem kwaet long olgeta se Kraes i tekem pis i kam long olgeta (Efesas 2:13–14). Olgeta toktok ia, wetem invitesen blong hem blong “Yufala i mas lego olgeta fasin blong kros. Yufala i no mas holem kros, mo yufala i no mas kros kwik. Mo taem yufala i kros, yufala i no mas sakem tok blong yufala i go antap, mo yufala i no mas tok nogud long yufala. Mo yufala i mas finis long fasin ya we yufala i stap badfren long yufala” (Efesas 4:31), i luk se i kam long stret taem, mo i givim kamfot tedei, semmak olsem bifo. Long Ol Man Efesas, semmak olsem long wanwan long yumi, paoa blong fesem wanem i kam agens i kam “long Masta … mo [tru] long paoa blong hem” (luk long Efesas 6:10–13).

Sam Aedia blong Skripja Stadi blong Yuwan

Efesas 1:4–11, 17–19

God i bin jusum, o i bin odenem mi finis, blong mekem samfala responsabiliti long wol ia.

Pol i tokbaot Ol Sent we God i putum olgeta i stap, mo i jusum olgeta bifo wol ia i stanap, blong oli stap ol pipol blong Hem. Be, olsem we Presiden Henry B. Eyring i bin talem, se hemia i no minim se “God i mas putum finis bifo se wijwan long ol pikinini blong Hem bae Hem i sevem, mo bae i givim gospel long olgeta, be ol narawan we oli neva harem gospel ia, bae Hem i no jusum olgeta nomo. … Plan blong God i gat moa lav mo i moa stret bitim hemia. Papa blong yumi long Heven i wantem mo i wari tumas blong mekem evriwan long famli blong Hem oli kam tugeta, mo blesem olgeta” (“Pulum Tugeta Famli blong God,” Jeneral Konfrens, Epril 2017, ChurchofJesusChrist.org/general-conference/conferences?lang=bis). Evriwan long ol pikinini blong God oli save akseptem gospel blong ol odinens blong hem from wok ia we oli save mekem long bihaf blong ol dedman insaed long ol tabu tempol.

Nomata se, i no gat wan long yumi we oli putum se bae God i sevem o no sevem, revelesen blong tedei i tijim se samfala long ol pikinini blong God, Hem i bin jusum olgeta, o Hem i bin “odenem olgeta finis,” long laef bifo laef long wol ia blong mekem samfala responsabiliti blong mekem ol stamba tingting blong God long wol ia oli hapen. Taem yu stap ridim Efesas 1 mo Gospel Topics, “Foreordination” (topics.ChurchofJesusChrist.org), tingting hevi long olsem wanem nao trutok ia i blong yu tu.

Efesas 1:10

God bambae i mekem evriwan oli kam wan oli joen long Kraes.

Long tingting blong yu, ?from wanem nao oli singaotem taem blong yumi tedei se hem i “dispensesen ia blong taem blong evri wok blong God i kamtru”? ?Hem i minim wanem blong “olgeta samting bambae oli kam joen long Kraes”? Taem yu stap tingting hevi long ol sentens ia, ridim olgeta skripja ia: Efesas 4:13; 2 Nifae 30:7–8; Doktrin mo Ol Kavenan 110:11–16; 112:30–32; 128:18–21. Maet bae yu filim insperesen blong raetem hao bae yu eksplenem ol sentens ia.

Luk tu long Elda David A. Bednar, “Olgeta Samting Bambae Oli Kam Joen long Kraes,” Liahona, Novemba 2018, 21–24.

Efesas 2:19–22; 3:1–7; 4:11–16

Jos i stap stanap long fandesen blong ol aposol mo ol profet, mo Jisas Kraes hem i jif konaston.

Folem wanem i stap long Efesas 2:19–22; 3:1–7; 4:11–16, ?from wanem yumi gat ol profet mo ol aposol? Tingting long ol mesej we oli kam long ol profet mo ol aposol we yu bin harem long taem blong jeneral konfrens. ?Olsem wanem nao, ol tijing blong olgeta, oli mekem ol stamba tingting we Pol i tokbaot, oli kamtru? Eksampol: ?Long wanem wei nao, ol tijing ia oli bin helpem yu blong yu no folfolem eni kaen win blong doktrin?

?Olsem wanem nao Jisas Kraes i stap olsem konaston blong Jos? ?Olsem wanem nao Hem i konaston blong laef blong yu?

Luk tu long Ol Wok 4:10–12.

Jisas Kraes i konaston blong Jos.

Efesas 5:21–6:4

Blong stap laef folem ol eksampol blong Sevya i save helpem mi long famli rilesensip blong mi.

Taem yu stap ridim Efesas 5:21–6:4, tingabaot hao nao kaonsel insaed long ol ves ia oli save mekem ol famli rilesensip blong yu oli kam strong moa.

Hem i impoten blong teknot se ol toktok blong Pol, insaed long Efesas 5:22–24, oli bin raetem olgeta folem ol sosol kastom blong taem ia bifo. Ol profet mo ol aposol tedei, oli tijim se ol man oli no antap moa long ol woman, mo ol hasban mo waef oli stap olsem ol “ikwol patna” (luk long “Famli: Wan Ofisol Toktok I Go long Wol,” ChurchofJesusChrist.org/study?lang=bis). Iven sapos i olsem, yu save faenem yet ol gudfala kaonsel insaed long Efesas 5:25–33. Eksampol: ?Olsem wanem Kraes i soem lav blong Hem long Ol Sent? ?Hemia i stap talem wanem abaot wei we, ol hasban mo ol waef, olsem ol ikwol patna, oli mas tritim wanwan long olgeta? ?Wanem mesej yu yu faenem blong yuwan insaed long ol ves ia?

Efesas 6:10–18

Klos blong faet blong God bae i helpem yumi blong stanap agensem ivel.

Taem yu stap ridim Efesas 6:10–18, tingting long from wanem nao Pol i talemaot nem blong wanwan pis blong klos blong faet, long wei we hem i bin mekem. Ful klos blong faet ia, “?hem i protektem yu long wanem? ?Wanem moa yu save mekem blong putum fulwan wanwan pis blong klos blong faet, evri dei?

Luk tu long 2 Nifae 1:23; Doktrin mo Ol Kavenan 27:15–18.

Ol Aedia blong Famli Skripja Stadi mo Haos Naet

Efesas 1:10.Blong tij abaot ves ia, Elda David A. Bednar i yusum eksampol blong wan rop (luk long “Olgeta Samting Bambae Oli Kam Joen long Kraes”). Tingting blong soem wan rop long ol memba blong famli, mo letem olgeta oli holem mo luklukgud rop ia, long semtaem we yu stap serem sam pat blong mesej blong Elda Bednar. ?Long wanem wei nao, God i stap joenem evri samting i kam long Kraes? ?Olsem wanem yumi kasem blesing from kam tugeta ia i stap?

Efesas 2:4–10; 3:14–21.Invaetem ol memba blong famli blong serem ol eksperiens we, insaed long ol, oli bin filim lav mo sore blong God mo Jisas Kraes, we oli stap tokbaot insaed long ol ves ia.

Efesas 2:12–19.Maet famli blong yu i laekem blong bildimap ol wol i go antap wetem ol pilo, o ol nara samting we yu gat insaed long haos, mo afta, kilimdaon ol wol ia. Pol i stap tokbaot wol we i stanap i stap bitwin Ol Jentael mo Ol Jiu; ?be wanem kaen wol ia i stap seperetem ol pipol tedei? ?Olsem wanem Jisas Kraes i bin brekemdaon ol wol ia? ?Long wanem wei nao Hem i stretem yumi blong yumi joen long God? (ves 16).

Efesas 6:10–18.Famli blong yu i save mekem klos blong faet blong yufala; yusum ol samting insaed long haos nomo. Vidio ia: “The Armour of God” (ChurchofJesusChrist.org) i save helpem ol memba blong famli blong gat wan pikja, long maen blong olgeta, blong wanem i klos ia, mo oli save faenem ol simpol eksplenesen insaed long: “The Whole Armor of God” (Friend, June 2016, 24–25). ?Olsem wanem nao, wanwan pis blong klos blong faet, i stap protektem yumi long saed blong spirit? ?Wanem nao yumi save mekem blong helhelpem wanwan long yumi blong putum ful klos blong faet blong God (Efesas 6:11) evri dei?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Hope of Israel,” Hymns, namba 259.

Stap Kam Antap long Stadi blong Yuwan

Letem Spirit i lidim yu long stadi blong yu. Stap lisingud long ol kwaet toktok blong Spirit taem Hem i stap lidim yu i go long ol samting we yu nidim blong lanem evri dei, iven sapos hemia i lidim yu blong stadi long wan defren topik we yu no plan long hem long fas ples.

Taem yumi putum klos blong faet blong God, i save protektem yumi long saed blong spirit.