“2–8 Oktoba. Efesas: ‘Blong Ol Sent Oli Kam Stret Gud Evriwan,’” Kam Folem Mi—Blong Praemeri: Niu Testeman 2023 (2022)
“2–8 Oktoba. Efesas,” Kam Folem Mi—Blong Praemeri: Niu Testeman 2023
2–8 Oktoba
Efesas
Blong Ol Sent Oli Kam Stret Gud Evriwan
Taem yu stap stadi long Leta blong Efesas, tingting long ol prinsipol we yu save tokbaot bigwan, blong blesem ol pikinini we yu tijim. Raetemdaon eni aedia we i kam long maen blong yu taem yu stap rid.
Invaetem Ol Pikinini blong Serem Wanem Oli Gat
Invaetem ol pikinini blong stanap long wan laen. Stat long fored blong laen, givim janis long wanwan pikinini blong serem wan samting we hem i bin lanem i no longtaem i pas, abaot gospel longtaem blong famli skripja stadi, long Praemeri o wan nara ples.
Tijim Doktrin: Ol Smol Pikinini
Ol memba blong Jos oli mas stap olsem ol fren mo ol “olgeta we oli gat raet insaed long ples blong God.”
Ol pikinini long klas blong yu, ?oli olsem ol “strenja” o “olgeta we oli gat raet long ples blong God” wetem olgeta wanwan mo wetem ol memba blong wod? Helpem olgeta blong andastanem se nomata se yumi gat wiknes, Sevya i helpem yumi blong kam wan mo lavlavem yumi wanwan.
Samfala Aktiviti we Yu Save Mekem
-
Putum wan pikja blong Sevya long medel blong rum. Invaetem ol pikinini blong stanap long ol defdefren pat blong rum blong ripresentem ol “strenja” o “man blong defren kantri.” Helpem olgeta blong andastanem se ol toktok ia i minim ol pipol we yumi no save yet. Taem yu ridim Efesas 2:19, invaetem olgeta blong muv i go fored long pikja blong Kraes, kasem taem we oli stap stanap kolosap tugeta. Talem long olgeta se taem yumi kam kolosap long Sevya, yumi save kam wan wetem ol narafala man olsem “olgeta we oli gat raet long ples blong God,” o ol fren.
-
Faenem ol pikja blong ol pikinini blong ol defdefren pat blong wol, mo haedem olgeta raon long rum. Putum wan pikja blong Sevya long fored blong rum. Invaetem klas blong yu blong wok tutu olsem ol misinari mo gat wanwan janis blong stap faenem wan pikja blong wan “strenja” blong putum kolosap long pikja blong Sevya. Helpem olgeta blong andastanem se taem ol pipol oli kasem baptaes, oli kam pat blong famli blong Jos, o “famli blong God.” ?Long wanem wei nao yumi save helpem wan we i jes kam, i filim welkam?
Papa long Heven i wantem mi blong obei long papa mo mama blong mi.
Taem yu stap ridim Efesas 6:1–3, tingting long wei we yu save helpem ol pikinini blong oli andastanem from wanem i impoten blong obei long papa mo mama blong olgeta.
Samfala Aktiviti we Yu Save Mekem
-
Ridim Efesas 6:1 long klas, o helpem wan long ol pikinini long klas blong ridim. Helpem olgeta blong tingting long ol taem we oli bin obei long papa mo mama blong olgeta. Askem olgeta blong serem wanem ol blesing we oli bin kasem from we oli bin obei mo oli filim olsem wanem taem oli stap obei. ?From wanem i impoten blong obei long papa mo mama blong yumi?
-
Singsing tugeta long wan singsing abaot fasin blong stap obei, olsem “Quickly I’ll Obey” (Children’s Songbook, 197). Letem ol pikinini blong wanwan i gat janis blong talem nem blong wan samting we papa mo mama blong olgeta i bin askem olgeta blong mekem, mo invaetem olgeta blong mekem olsem se oli stap mekem samting ia.
-
Soem wan pikja blong Jisas Kraes we i kasem baptaes (luk long Gospel Art Buk, namba 35), mo tokbaot olsem wanem Sevya i obei long Papa long Heven, tru long baptaes blong Hem (luk long 2 Nifae 31:6–7). Serem wan eksperiens we yu bin obei long papa mo mama blong yu, mo yu bin kasem blesing from. ?From wanem nao Papa long Heven i wantem yumi blong obei long papa mo mama blong yumi?
Klos blong faet blong God i save protektem mi long ivel.
?Olsem wanem nao bae yu helpem ol pikinini blong andastanem se, taem oli stap mekem ol stret mo gud samting, i olsem se oli stap putum klos blong faet?
Samfala Aktiviti we Yu Save Mekem
-
Soem wan pikja blong wan man we i werem klos blong faet, olsem hemia long aktiviti pej blong wik ia o aotlaen blong wik ia long Kam Folem Mi—Blong Wanwan Man, Woman mo Famli. Taem yu talem long sot toktok, wanem i stap long Efesas 6:10–18, soem long ol pikinini, olsem wanem ol defdefren pis blong klos blong faet, i protektem ol defren pat blong bodi. (Luk long “The Whole Armor of God,” Friend, June 2016, 24–25.)
-
Karem sam samting i kam long klas we i save ripresentem ol pis blong klos blong faet we oli talemaot long Efesas 6:14–17 (eksampol, wan hat o epron), o mekem ol simpol pis blong ol klos blong faet long pepa Letem ol pikinini, wanwan i gat janis blong putum “klos blong faet.” Helpem ol pikinini blong andastanem olsem wanem yumi putum klos blong faet blong God (eksampol, tru long stadi long ol skripja, givim seves long ol narafala man, stap prea, stap obei mo sam moa). Toktok raon long olsem wanem, taem yumi stap mekem ol samting ia, i stap protektem yumi long ivel.
Tijim Doktrin: Ol Bigfala Pikinini
Yumi ol “man we yumi gat raet long ples blong God ” insaed long famli blong God.
Ol pikinini oli gat moa paoa taem oli gat ol gudfala fren long gospel. ?Olsem wanem nao yu save helpem olgeta blong developem gudfala frensip wetem olgeta wanwan?
Yumi ol “man we yumi gat raet long ples blong God ” wetem O Sent blong God.
Samfala Aktiviti we Yu Save Mekem
-
Ridim tugeta Efesas 2:19 mo tokbaot wanem i minim blong stap olsem wan strenja o man we i kam long wan defren kantri. Serem wan eksperiens we yu bin filim olsem wan strenja o wan man defren ples we i kam mo wan i bin helpem yu filim welkam mo we oli akseptem yu. Invaetem ol pikinini blong serem ol eksperiens we i semmak olsem. ?Wanem nao yumi save mekem blong kam ol “man we oli raet long ples blong God” be i no ol strenja? ?I gat eni pikinini long klas blong yu we oli no stap atendem klas blong yu oltaem, ating from oli filim se oli ol strenja? Helpem ol pikinini blong mekemap wan plan blong helpem ol memba ia blong oli filim welkam.
-
Taem yu helpem ol pikinini blong mekem rilesensip blong olgeta we ol narawan i kam moa strong, raetem sam kwestin long bod we oli tingting long hem, blong oli serem wan samting abaot olgeta wanwan, olsem ?Wetaem nao yu kasem wan ansa long prea blong yu? o ?Wanem nao fevret samting blong yu we yu laekem blong mekem wetem famli blong yu? Serem ol pikinini long tutu, mo invaetem olgeta blong askem wanwan long olgeta ol kwestin. ?Wanem nao yumi lanem abaot wanwan long yumi?
Papa long Heven i wantem mi blong obei mo ona long papa mo mama blong mi.
Tingting long ol wei we yu save helpem ol pikinini blong andastanem from wanem i impoten blong obei long ol papa mo mama blong olgeta.
Samfala Aktiviti we Yu Save Mekem
-
Invaetem ol pikinini blong ridim olgetawan Efesas 6:1–3 mo talemaot ol sentens we oli klia gud long olgeta. Invaetem olgeta blong serem ol sentens ia mo from wanem oli filim se ol sentens ia oli impoten.
-
Helpem ol pikinini blong faenem mo tokbaot ol eksampol blong ol pipol insaed long ol skripja, we oli bin obei mo ona long papa mo mama blong olgeta (luk long Luk 2:42–52), Rut (luk long Rut 1), o Nifae (luk long 1 Nifae 3:1–8). ?From wanem hem i impoten blong obei mo ona long papa mo mama blong yumi?
-
Givim long wanwan pikinini, wan pepa we i gat toktok ia ona long top blong pepa. Toktok raon long wanem toktok ia i stap minim. Invaetem ol pikinini blong raetem o droem wan samting long pepa blong olgeta, we oli save mekem blong soem se oli ona long papa mo mama blong olgeta.
Klos blong faet blong God i save protektem mi long ivel.
Taem yu ridim Efesas 6:10–18, tingting long sam denja long saed blong spirit, we ol pikinini oli fesem mo olsem wanem yu save helpem blong mekem ol pikinini oli kam moa strong blong agensem.
Samfala Aktiviti we Yu Save Mekem
-
Taem wan pikinini i ridim Efesas 6:10–18, askem wan narafala pikinini blong mekem wan lis o droem ol pis blong klos blong faet we oli talemaot, long bod. ?From wanem klos blong faet i impotem long wan faet? ?Olsem wanem nao yumi save werem klos blong faet long saed blong spirit, evri dei?
-
Givim wok long wan pikinini blong droem mo makem wan pis blong klos blong faet we oli tokbaot long Efesas 6:14–17. ?Olsem wanem nao ol pis blong klos blong faet i save protektem yumi long ivel? ?Wanem nao Lod i promes long olgeta we oli putum ol klos blong faet blong Lod? (luk long Efesas 6:13). ?Wanem i minim blong “yufala i save stanap agensem rabis dei ia”?
Stap Leftemap Tingting blong Lanem Samting long Hom
Invaetem ol pikinini blong wajem sapos bae i gat wan we maet i filim olsem wan strenja long wik ia. Givim jalenj long olgeta blong go aot mo givhan long man o woman ia.
Stap Kam Antap long Fasin blong Yumi blong stap Tij
Helpem ol smol pikinini blong lanem samting aot long skripja. Ol yangfala pikinini oli lanem samting aot long ol skripja ia, be oli nidim blong lukluk nomo long wan singgel ves o wan ki toktok nomo. Maet yu wantem invaetem ol pikinini blong stanap taem oli harem wan spesifik toktok o sentens. (Luk long Teaching in the Savior’s Way, 25–26.)