Ol sista misinari oli stap toktok long yang man

16–22 Oktoba

1 mo 2 Tesalonaeka

“Mekem Bilif blong Yufala I Strong Moa, long Wanem Samting we Yufala I Sot long Hem”

Taem yu rid wetem prea 1 mo 2 Tesalonaeka tingting long ol pikinini long maen blong yu, bae yu faenem ol prinsipol we oli nidim blong andastanem.

serem pikja aekon

Invaetem Ol Pikinini blong Serem Wanem Oli Gat

Long lesen blong las wik, ?yu bin invaetem ol pikinini blong yusum wanem we oli lanem long sam wei? Letem ol pikinini oli yusum ol fas minit blong klas long wik ia blong serem ol eksperiens blong olgeta.

tijing pikja bokis

Tijim Doktrin: Ol Smol Pikinini

1 Tesalonaeka 5:1–6

Taem mi folem ol komanmen blong God, bae mi stap rere from Seken Kaming blong Jisas Kraes.

Yumi no save wetaem bae Sevya bae i kambak long wol ia. Be yumi save stap wet mo stap rere from taem we Hem i kam.

Samfala Aktiviti we Yu Save Mekem

• Invaetem wan mama blong tokbaot smol, olsem wanem hem i filim taem hem i stap wet long bebi blong hem blong i bon i kam long wol ia. Ridim 1 Tesalonaeka 5:2–3, mo talem long ol pikinini se Jisas Kraes bae i kambak long wol ia bakegen be, i no gat wan i save stret taem we bae Hem i kam—semmak olsem we wan mama i no save stret taem we bebi blong hem bae i bon i kam long wol ia.

• Askem ol pikinini blong tokbaot wan taem we oli stap rere blong go long rod trip o wan samting we bae i hapen. ?Wanem nao oli mekem blong stap rere? Karem wan sutkes o basket, mo letem ol pikinini oli mekem olsem se oli stap fulumap ol tingting blong rere blong go long wan trip. Taem oli stap fulumap wanwan samting, helpem ol pikinini blong tingting long wan wei we yumi save rere from Jisas Kraes blong i kam bakegen.

• Ridim long ol pikinini 1 Tesalonaeka 5:6 mo eksplenem se, sapos yumi no stap rere from Jisas we bae i kam bakegen, i olsem se yumi stap long wan dip slip, mo no stap rere from Hem. Invaetem ol pikinini blong mekem olsem se oli stap silip. Eksplenem se sapos yumi rere, i olsem se yumi stap wekap mo stap wet from Hem. Invaetem olgeta blong wekap.

• Singsing tugeta wan singsing abaot Seken Kaming, olsem “When He Comes Again” (Children’s Songbook, 82–83).

2 Tesalonaeka 2:1–3

Pol i bin tijim se wan apostasi bae i kam bifo Jisas Kraes bae i kambak.

Jos we Jisas Kraes i stanemap, long en i foldaon long apostasi, minim se prishud atoriti mo ol trutok oli bin karem long wol ia. Pol i profesae se apostasi ia o “foldaon ia,” bae i hapen bifo Seken Kaming blong Sevya.

Samfala Aktiviti we Yu Save Mekem

• Afta we yu ridim 2 Tesalonaeka 2:3 wetem ol pikinini, letem olgeta oli helpem yu blong bildimap wan taoa, long ol plastik kap o brikis. Talem long ol pikinini se ol kap o ol brikis i ripresentem ol impoten pat blong tru Jos olsem, ol trutok blong gospel, prishud, ol siling long tempol mo ol profet. Afta we Pol mo ol narafala Aposol oli ded, ol samting ia oli lus, mo tru Jos i nomo stap long wol blong plante yia. Invaetem wan pikinini blong kilimdaon taoa ia, mo eksplenem se hemia oli singaotem, Apostasi, o “foldaon.” Taem ia we Jisas Kraes i karembak Jos blong Hem i kambak, oli singaotem Restoresen.

• Soem wan Buk blong Momon mo pikja blong ol profet mo wan tempol. Invaetem ol pikinini blong talem “Apostasi” taem yu haedem ol samting long wan basket mo talem “Restoresen” taem yu karemaot ol samting aot long basket bakegen.

• Singsing ol singsing we i tijim trutok ia we i bin lus long taem blong Apostasi mo kambak bakegen long taem blong yumi, olsem “The Church of Jesus Christ,” “The Priesthood Is Restored,”mo “I Love to See the Temple” (Children’s Songbook, 77, 89, 95).

tijing pikja bokis

Tijim Doktrin: Ol Bigfala Pikinini

1 Tesalonaeka 5:1–6

Taem mi folem ol komanmen blong God, bae mi stap rere from Seken Kaming blong Jisas Kraes.

Kaonsel blong Pol i save helpem yumi blong stap rere, mo stap wet long bigfala dei ia taem we Sevya bae i kam long wol bakegen.

Samfala Aktiviti we Yu Save Mekem

• Invaetem wan pikinini blong ridim 1 Tesalonaeka 5:1–6 mo ol narafala pikinini bae oli rid folem. Afta long wanwan ves, askem wan pikinini blong talem long sot toktok, wanem hem i tingting se ves ia i stap talem. Bae yu wantem blong eksplenem se “dei blong Lod” i minim Seken Kaming blong Jisas Kraes. ?From wanem Seken Kaming oli komperem wetem wan stilman long naet mo wan woman we kolosap bae i bonem wan bebi long hospital?

• Talem long ol pikinini blong pikjarem long maen blong olgeta se Sevya bae i visitim klas blong olgeta tedei? ?Olsem wanem nao yumi save rere from visit blong Hem? Helpem ol pikinini blong oli tingting long ol samting we oli save mekem blong rere long yumiwan from dei we Jisas Kraes bae i kambak. Eksampol, yumi save sakem sin, fogiv, mekem ol rilesensip wetem ol famli blong yumi i kam antap, folem ol profet, lukaotem paoa blong Tabu Spirit mo obei long ol kavenan blong yumi. Leftemap tingting blong ol pikinini blong jusum wan samting we bae oli mekem olgetawan ol rere blong save mitim Sevya long Kaming blong Hem.

2 Tesalonaeka 2:1–3

Pol i tijim se bae i gat wan apostasi bae i hapen bifo Jisas Kraes i kambak bakegen

Sapos ol pikinini oli andastanem se Jos blong Jisas Kraes mo gospel blong Hem i bin lus long wol long taem blong Bigfala Apostasi, i minim se bae i nidim wan Restoresen, mo hemia nao bae i mekem se i moa klia long olgeta.

Samfala Aktiviti we Yu Save Mekem

• Invaetem wan long ol pikinini blong ridim 2 Tesalonaeka 2:1–3. Folem olgeta ves ia, ?wanem i mas hapen bifo “dei blong Kraes,” we i minim Seken Kaming? ?Wanem nao sentens ia “foldaon” i minim? Mekem sua se ol pikinini oli andastanem se, hem i minim Bigfala Apostasi, we i bin hapen afta long ded blong ol Aposol. Maet yu wantem serem toksave long “Apostasi” long Gaed long Ol Skripja (olskripja.ChurchofJesusChrist.org).

• Helpem ol pikinini blong mekem wan lis long bod blong sam long ol trutok mo ol blesing we yumi stap glad long olgeta from gospel. Waepemaot wanwan long ol samting ia, mo askem ol pikinini se laef blong olgeta bae i olsem wanem sapos i no bin gat ol samting ia. Eksplenem se ol trutok ia oli bin lus long taem blong Bigfala Apostasi. ?From wanem hem i impoten se Jos Ia blong Jisas Kraes i mas kambak bakegen long wol ia long ol las dei ia? Invaetem ol pikinini blong “putumbak” o raetem bakegen ol trutok mo ol blesing ia long bod.

2 Tesalonaeka 3:7–13

Papa long Heven i wantem mi blong wok.

?Olsem wanem nao yu save helpem ol pikinini blong oli luk se wok i wan blesing, be i no wan samting blong stap ronwe long hem?

Samfala Aktiviti we Yu Save Mekem

• Invaetem ol pikinini blong rid, wan afta wan, ol ves ia long 2 Tesalonaeka 3:7–13 mo lukaotem ol problem we Ol Sent oli stap fesem. ?From wanem nao Papa long Heven i wantem yumi blong wok? ?Wanem bae i hapen sapos yumi neva lanem blong wok had? Letem wanwan pikinini blong gat janis blong aktem se oli stap mekem ol simpol wok blong haos, mo ol nara pikinini blong traem talemaot wanem we oli stap mekem ia.

• Invaetem ol pikinini blong tokbaot wan taem we oli bin wok had long wan asaenmen, wan projek o wan gol. ?Oli bin filim olsem wanem long olgetawan afta we oli finis? ?Wanem i minim blong “no mas kam slak long ol gudfala wok”? (2 Tesalonaeka 3:13). ?Wanem nao i helpem yumi blong gohed taem wok i had long yumi?

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong talem long wan memba blong famli o wan fren, wan risen from wanem oli talem tangkyu blong gat gospel long wol tedei (aktiviti pej blong wik ia i save givim sam aedia).

Stap Kam Antap long Fasin blong Yumi blong Stap Tij

Sapotem ol papa mo mama blong ol pikinini. “Ol papa mo mama oli ol gospel tija long ol pikinini blong olgeta, mo oli ol moa impoten tija—tufala i gat tugeta bigfala wok mo bigfala paoa blong lidim tingting blong ol pikinini blong olgeta (luk long Dutronome 6:6–7 Taem yu tijim ol pikinini long jos, prea from ol wei we yu save sapotem ol papa mo mama blong olgeta long stamba rol we i blong olgeta” (Teaching in the Savior’s Way, 25).

aktiviti pej: : Apostasi i hapen bifo Seken Kaming