Melkesedek i blesem Ebram, i kam long Walter Rane. Talen blong wan man blong dro

6–12 Novemba

Hibrus 7–13

Wan Hae Pris blong Ol Gud Samting we Bae Oli Kam

Taem yu luklukbak mo tingting hevi long aotlaen ia, lisin gud long kwaet voes blong spirit, we yu kasem abaot ol pikinini we yu tijim. Spirit bae i helpem yu blong faenem ol mesej blong olgeta long Hibrus 7–13.

Invaetem Ol Pikinini blong Serem Wanem Oli Gat

Askem ol pikinini blong serem ol samting we olgeta mo ol famli blong olgeta oli stap mekem blong lanem gospel long hom. Invaetem olgeta blong serem sam long ol fevret eksperiens blong olgeta taem oli stap lanem gospel wetem ol famli blong olgeta.

Tijim Doktrin: Ol Smol Pikinini

Hibrus 7:1–6

Prishud i save helpem yumi long plante wei.

Hibrus 7:1–6 i save givim wan janis blong presentem ol blesing blong prishud long ol pikinini.

Samfala Aktiviti we Yu Save Mekem

• Talem long sot toktok huia i Ebraham, mo afta, yusum Hibrus 7:1–6 blong tijim se Ebraham i bin pem taeting i go long Melkesedek (luk tu long Josef Smit Translesen, Jenesis 14:36–40 [long Bible appendix]). Eksplenem se Melkesedek i bin gat prishud, we i paoa blong God, mo Melkesedek i yusum blong blesem Ebraham. ol pikinini bae oli laekem blong aktem stori wetem ol pepa stik we i simpol, olsem wan hat blong king mo wan taeting envlop.

• Invaetem wan Aronik mo wan Melkesedek Prishud blong visitim klas mo talem long ol pikinini, olsem wanem oli bin yusum prishud blong blesem ol narawan. Afta, soem long ol pikinini ol pikja blong ol defdefren odinens blong prishud (eksampol, luk long ol pikja 103–108 long Gospel Art Buk). Helpem ol pikinini blong talemaot wijwan prishud oli nidim blong wanwan odinens mo givim pikja ia long stret man we i gat prishud ia.

Hibrus 11:1–32

Fet i blong stap biliv long ol samting we yumi no save luk.

Nomata se yumi no save luk Papa long Heven mo Jisas Kraes, yumi save developem fet long Tufala mo ol promes blong Tufala, blong stap folem ol eksampol blong ol fetful pipol we oli tokbaot long Hibrus 11.

Samfala Aktiviti we Yu Save Mekem

• Soem wan pikja blong Jisas. Putum raon long rum sam samting blong ripresentem “ol pruf” se Hem i ril, nomata se yumi no save luk Hem (olsem ol skripja, wan pikja blong Fas Visen mo wan pikja blong planet wol). Invaetem ol pikinini blong talem nem blong ol samting ia, afta, serem wetem olgeta olsem wanem wanwan samting ia i helpem yumi blong gat fet long Jisas se Hem i stap laef.

• Karem wan pepa fan, mo letem wanwan long ol pikinini blong gat janis blong filim fan i blo long win krosem fes blong olgeta. Tijim olgeta se yumi no save luk ea, be yumi save filim. I semmak nomo se yumi no save luk Papa long Heven mo Jisas Kraes, be yumi save filim lav blong Tufala mo gat fet se Tufala i ril.

• Serem stori blong wan o moa long ol pipol we oli tokbaot olgeta long Hibrus 11:4–32. Yu save faenem tu ol stori abaot ol pipol ia long OlTesteman Stori. ?Wanem nao ol pipol ia oli mekem blong soem se oli gat fet long wan samting we oli no save luk? Tokbaot sam blesing we yu bin kasem from fet blong yu.

Hibrus 13:5–6

Papa long Heven mo Jisas Kraes, bae Tufala i helpem yumi mo neva livim yumi.

?Wanem ol hadtaem we ol pikinini oli stap fesem? ?Olsem wanem nao mesej blong Hibrus 13:5–6 i save helpem olgeta?

Samfala Aktiviti we Yu Save Mekem

• Luklukbak long Niu Testeman Stori, we ol pikinini oli bin lanem long yia ia, we Sevya i bin helpem ol narafala man olsem, taem Hem i hilim man ia we i paralaes (luk long Luk 5:18–26) o bin fidim 5,000 man (luk long Matiu 14:15–21). Helpem ol pikinini blong lanem sentens ia “Hae God i stap givhan long mi” (Hibrus 13:6).

• Invaetem ol pikinini blong dro wan pikja blong wan taem we wan i givim kamfot long olgeta taem we oli bin fraet. Ridim Hibrus 13:5–6 long olgeta, mo testifae se Papa long Heven bae i helpem yumi mo neva livim yumi. Helpem ol pikinini blong katemaot bigwan pepa hat blong i inaf blong kavremap ol droing. ?Wanem sam long ol samting we i helpem yumi blong filim se yumi stap kolosap long Papa long Heven? Raetemdaon sam long ol samting ia long ol pepa hat.

• Tijim long ol pikinini wan singsing abaot olsem wanem Papa long Heven mo Jisas oli lavem mo helpem yumi olsem, “Tell Me, Dear Lord” (Children’s Songbook, 176). ?Long wanem wei nao bae yumi save se Papa long Heven mi Jisas Kraes oli stap kolosap long yumi? Tokbaot wan taem we yu bin filim “Lod [i bin] givhan long yu.”

Tijim Doktrin: Ol Bigfala Pikinini

Hibrus 7:1–4

Ol lida blong Jos oli folem Sevya.

?Olsem wanem nao yu save yusum ol ves ia blong helpem ol pikinini blong andastanem se, olgeta we oli singaotem olgeta blong givim seves insaed long Jos blong Lod, oli mas stap fetful mo givim seves long ol narafala man olsem we Hem i bin mekem?

Samfala Aktiviti we Yu Save Mekem

• Helpem ol pikinini blong mekem lis blong ol samting we oli save abaot tufala bigfala lida ia, Ebraham mo Melkesedek. Oli save faenem help long Hibrus 7:1–4; Abraham 1:1–2; mo Josef Smit Translesen, Jenesis 14:25–40 (long Baebol apendiks). ?Wanem nao ol fasin olsem hemia blong Kraes, we ol man ia oli gat we i helpem olgeta blong ona long prishud?

• Askem ol pikinini blong ridim Hibrus 7:1–2 mo lukaotem ol taetol we oli yusum blong tokbaot Melkesedek. ?Olsem wanem nao ol taetol ia oli rimaenem yumi long Jisas Kraes? Helpem olgeta blong tingting long ol wei we i mekem se Jisas i wan “King blong pis.” Invaetem olgeta blong tokbaot, ol narafala man we oli gat prishud, we oli ol eksampol tu blong folem Sevya.

• Serem wan eksperiens we fet blong yu long Sevya i bin kam strong moa from seves blong wan stret mo gud prishud man. Helpem ol pikinini blong tingbaot sam wei we Lod i bin blesem olgeta.

Hibrus 11

Papa long Heven i givim riwod long olgeta we oli gat fet.

Hibrus 11 i gat plante eksampol blong ol pipol we oli bin kasem blesing taem oli tekem aksen folem fet. ?Wijwan long ol stori bae i givim moa insperesen o bae i help bigwan long ol pikinini we yu tijim?

Samfala Aktiviti we Yu Save Mekem

• Invaetem ol pikinini blong mekem wan lis abaot ol samting we oli bin lanem abaot fet long bod, long Hibrus 11:1–3, 6. Givim long evri pikinini nem blong wan we oli talemaot hem long Hibrus 11, mo invaetem olgeta blong ridim ol ves we i tokbaot man ia. Askem olgeta blong givim ol toktok blong givhan abaot man ia, mekem se ol narafala pikinini oli save traem blong talem se hem huia. ?Olsem wanem nao ol pipol ia oli soem fet, mo long wanem wei nao Papa long Heven i givim riwod long olgeta. (Blong karem pikja blong ol pipol ia luk long OlTesteman seksen blong Gospel Art Buk.)

• Afta we yu ridim abaot sam long ol fetful eksampol ia long Hibrus 11, askem ol pikinini blong raet abaot wan man o woman we i bin soem fet. Invaetem sam long ol pikinini blong serem ol eksampol blong olgeta wetem klas.

Hibrus 12:5–11

Lod i stretem olgeta we Hem i lavem.

Ol ves ia i save helpem ol pikinini blong andastanem se Papa long Heven, ol papa mo mama blong olgeta, mo ol narafala man oli stretem olgeta from se oli lavem olgeta mo wantem olgeta blong lanem samting aot long ol mistek blong olgeta.

Samfala Aktiviti we Yu Save Mekem

• Ridim tugeta Hibrus 12:5–11, mo askem ol pikinini blong faenem sam risen from wanem Papa long Heven i stretem yumi (korektem o givim disiplin long yumi). ?Wanem nao hemia i tijim long yumi abaot from wanem ol papa mo mama blong yumi long wol ia tu oli save stretem ol pikinini blong olgeta? ?Olsem wanem nao yumi ansa long ol toktok we oli kam blong stretem yumi, we i kam wetem lav?

• Serem sam eksampol blong ol pipol long ol skripja we Lod i bin stretem olgeta mo oli bin sakem sin (eksampol, luk long 1 Nifae 16:25–27; Ita 2:13–15). ?Olsem wanem nao ol eksampol ia oli gud long ol prinsipol long Hibrus 12:5–11?

• Afta we yufala i ridim Hibrus 12:5–11, invaetem ol pikinini blong raetemdaon sam samting we bae oli wantem blong tingbaot taem oli korektem olgeta from ol mistek blong olgeta.

Stap Leftemap Tingting blong Lanem Samting long Hom

Invaetem ol pikinini blong raetem o dro wan pikja blong wan samting we oli bin lanem long klas. Leftemap tingting blong olgeta blong yusum blong serem wanem we oli bin lanem wetem ol famli blong olgeta.

Stap Kam Antap long Fasin blong Yumi blong Stap Tij

Yusum ol aktiviti pej. Taem ol pikinini oli komplitim ol aktiviti pej long taem blong klas, yusum taem we i stap blong luklukbak long ol prinsipol blong lesen.