Jisas Kraes i stap prijim gospel long spirit wol

Kraes I stap Prij long Spirit Wol, i kam long Robert T. Barrett

20–26 Novemba

1 mo 2 Pita

“Yufala I Stap Bilif long Hem, Nao Yufala I Stap Harem Gud Tumas, we Yufala I Glad we I Glad, we I No blong Talem”

Statem stadi blong yu long 1 mo 2 Pita wetem prea. Tingbaot se bes wei blong rere blong tij, bae i kam tru long eksperiens blong yuwan mo famli stadi.

serem pikja aekon

Invaetem Ol Pikinini blong Serem Wanem Oli Gat

Soem ol pikja blong Pita long aotlaen blong wik ia long Kam Folem Mi—Blong Wanwan Man, Woman, mo Famli, mo invaetem ol pikinini blong talem wan samting we oli save abaot Pita. Rimaenem olgeta se Pita i bin lida blong Jos afta we Jisas i bin laef bakegen long ded mo eksplenem se 1 Pita mo 2 Pita oli ol leta blong hem we i go long ol memba blong Jos long ol taem blong hem.

tijing pikja bokis

Tijim Doktrin: Ol Smol Pikinini

1 Pita 1:6–7; 3:14

Mi save stap hapi nomata ol hadtaem.

Tingting long olsem wanem yu save tijim ol ves ia long wan wei bae i helpem ol pikinini blong tanem olgeta i go long Sevya taem oli fesem ol hadtaem.

Samfala Aktiviti we Yu Save Mekem

• Helpem ol pikinini blong tingting long ol eksampol blong ol had samting we Jisas i bin go tru long hem olsem taem oli jikim mo laf long Hem. Eksplenem se bae yumi gat ol hadtaem long laef blong yumi. Ridim 1 Pita 1:6–7; 3:14 tugeta, mo serem wan eksperiens taem yu fesem wan “tes blong fet” mo Sevya i helpem yu blong faenem glad. O yu save serem prea blong Josef Smit long Libeti Kalabus mo kamfot we God i bin givim long hem (luk long Doktrin mo Ol Kavenan 121:1–8; 123:17).

Josef Smit long Libeti Kalabus

Josef Smit long Libeti Kalabus, i kam long Greg K. Olsen

• Soem wan pikja we i soem Jisas mo ol narafala pipol (long Gospel Art Buk i gat plante, mo tu long Kam Folem Mi—Blong Wanwan Man, Woman, mo Famli). Askem ol pikinini blong lukaotem ol Jisas long pikja. Testifae se sapos yumi lukluk long Sevya, Hem i save helpem yumi blong faenem glad long laef blong yumi.

1 Pita 2:9–12

Papa long Heven i wantem mi blong stap olsem wan eksampol long ol narafala wan.

Pita i bin tijim se yumi ol “pipol blong God” mo we ol wok blong yumi i save “leftemap nem blong God.”

Samfala Aktiviti we Yu Save Mekem

• Tokbaot ol samting we i oli save luksave we i stap raon long olgeta, o soem pikja blong ol samting olsem ia. Eksampol, wan tempol we i stanap long medel blong ol bilding we oli raonem o wan bigfala hil i stanap antap long wan flat ples. Eksplenem se taem yumi obei long ol komanmen, mo stanap long klia ples, we ol pipol oli save luk ol eksampol blong yumi. Tokbaot ol “gudfala wok” we yu bin luk ol pipol oli bin mekem. Eksplenem se, gudfala wok i olsem “leftemap nem blong God”—oli helpem ol narafalawan blong oli filim moa lav blong God mo wantem blong givim seves long Hem.

• Finisim aktiviti pej ia wetem ol pikinini. ?Olsem wanem nao ol pipol we oli faenem long ol pikja oli stap leftemap nem blong God?

1 Pita 3:18–20; 4:6

Ol Spirit long spirit wol oli stap lanem abaot gospel.

Afta we Hem i ded, Jisas i go long spirit wol mo sendem olgeta spirit we oli stret mo gud blong tijim ol narafala spirit we oli no bin akseptem gospel yet.

Samfala Aktiviti we Yu Save Mekem

• Tokbaot wetem ol pikinini wan man we yu save, we i ded finis. Eksplenem se taem ol pipol oli ded, spirit blong olgeta i lego bodi blong olgeta mo i go long spirit wol. Ridim 1 Pita 3:19 mo eksplenem se taem Jisas i bin ded, Hem i bin go visitim spirit wol. Long ples ia, Hem i tijim ol spirit we oli stret mo gud blong tijim gospel i go long ol spirit we oli no bin akseptem gospel (luk long Doktrin mo Ol Kavenan 138:30).

• Soem wan pikja blong wan tempol. Eksplenem long ol pikinini se taem bae oli kam bigwan inaf, oli save go long tempol mo kasem baptaes blong ol bubu blong olgeta we oli no bin kasem baptaes long wol ia. Helpem ol pikinini blong fulumap wan simbol famli tri (luk wan eksampol long “Family History Coloring Pages,” ChurchofJesusChrist.org).

tijing pikja bokis

Tijim Doktrin: Ol Bigfala Pikinini

1 Pita 3:12–17; 4:13–14, 16

Mi save faenem glad mo pis, iven long ol taem we oli had.

Ol pikinini we yu stap tijim, maet oli bin fesem taem we wan i jikim o laf long olgeta, hemia from bilif blong olgeta. Ol ves ia i save helpem olgeta long ol taem olsem.

Samfala Aktiviti we Yu Save Mekem

• Talem long sot toktok sam long ol stori blong Jisas we i stap fesem ol hadtaem mo invaetem ol pikinini blong ridim olgeta—luk eksampol long, Matiu 12:9–14 o Luk 22:47–54. Askem ol pikinini sapos eniwan i bin jikim o laf long olgeta from se oli laef folem ol tijing blong Jisas Kraes. ?Hemia i mekem oli filim olsem wanem? Afta, ridim tugeta 1 Pita 3:12–14; 4:13–14, 16, mo askem ol pikinini blong lukaotem wanem we Pita i bin talem abaot safaring “blong olgeta we oli stret mo gud.” ?From wanem yumi save hapi taem ol narafala pipol oli jikim yumi from yumi stap mekem samting we i raet?

• Serem wan eksperiens taem yu bin faenem glad o pis long wan hadtaem, o serem olsem wanem Profet Josef Smit i bin faenem pis taem hem i bin stap long Libeti Kalabus (luk long Doktrin mo Ol Kavenan 121:1–8; 123:17). ?Olsem wanem nao yumi save fanem glad mo pis long Kraes, long taem we yumi stap fesem ol hadtaem?

1 Pita 3:15

Mi save rere oltaem blong serem gospel.

Ol pikinini we yu tijim bae oli gat plante janis truaot long laef blong olgeta blong ansarem ol kwestin long ol narafala pipol abaot bilif blong olgeta. Tingting hevi long wanem yu save mekem blong help olgeta “blong stap rere oltaem blong givim wan ansa.

Samfala Aktiviti we Yu Save Mekem

• Talem abaot wan taem we wan i bin askem wan kwestin long yu abaot Jos, mo tokbaot se yu bin rere blong ansa o no gat. Askem ol pikinini blong tokbaot eni taem we ol pipol oli bin askem olgeta ol kwestin abaot Jos. Ridim tugeta 1 Pita 3:15. ?Olsem wanem nao yumi save folem kaonsel blong Pita long ves ia?

• Helpem ol pikinini blong tingting long sam kwestin we sam pipol maet oli askem abaot Jisas Kraes o Jos blong Hem. Letem ol pikinini blong gat janis blong eksplenem olsem wanem bae oli ansarem ol kwestin ia, mekem se oli “save rere oltaem.” Ol Toktok blong Bilif oli givim ol simpol trutok we ol pikinini oli save yusum blong ansarem ol kwestin abaot Jos.

1 Pita 3:18–20; 4:6

Ol Spirit long spirit wol oli lanem abaot gospel.

Taem wan we i stret mo gud i ded, oli go tijim gospel long spirit wol, long olgeta we oli no bin kasem taem oli bin stap long wol ia.

Samfala Aktiviti we Yu Save Mekem

• Dro wan sekol long bod, we i gat wan laen we i gotru long medel. Raetem Spirit Paradaes long wan haf blong sekol mo Spirit Kalabus long nara haf blong sekol. Invaetem wan long ol pikinini blong ridim 1 Pita 3:18–20; 4:6 (luk long 1 Pita 4:6, futnot a, blong kasem ol revisen long Josef Smit Translesen). Eksplenem se taem Jisas i ded, spirit blong Hem i bin go long spirit paradaes. Hem i givim instraksen long ol spirit we oli stret mo gud long ples ia, blong tijim gospel long ol spirit long spirit kalabus.

• Invaetem wan papa o mama, o bigfala brata o sista blong wan long ol pikinini, blong tokbaot taem we oli stap go long tempol, mo kasem ol odinens blong wan long ol bubu blong olgeta.

• Invaetem ol pikinini blong fulumap wan simpol famli tri (luk long wan eksampol long “Family History Coloring Pages,” ChurchofJesusChrist.org).

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong serem ol famli tri blong olgeta wetem ol memba blong famli blong olgeta mo askem help long olgeta blong stap ademap ol nem i go long hem.

Stap Kam Antap long Fasin blong Yumi blong Stap Tij

Lukaotem blong andastanem ol pikinini we yu stap tijim. Yu save ol pikinini we yu stap tijim, so yu stretem ol aedia long aotlaen ia, sapos i nid, blong lukluk long ol nid blong olgeta. Yu save yusum eni aktiviti we oli putum long aotlaen blong wik ia, be i no blong olgeta we oli raetem folem ol yia blong ol grup we yu tijim. (Luk long Teaching in the Savior’s Way, 7.)

aktiviti pej: Papa long Heven i wantem mi blong stap eksampol long ol narafala man.