“Mbudzi 6–12. VaHeberu 7–13: ‘Mupirisita Mukuru weZvinhu Zvakanaka Zvinozouya,’” Huyai, Munditevere—Bhuku reVanhu Pachavo neMhuri: Testamente Itsva 2023 (2022)
“Mbudzi 6–12. VaHeberu 7–13,” Huyai, Munditevere—Bhuku reVanhu Pachavo neMhuri: 2023
Melchizedek Blesses Abram, (Merkizedeki Anoropafadza Abramu), naWalter Rane Zvipo venyanzvi dzemifananidzo
Mbudzi 6–12
VaHeberu 7–13
“Mupirisita Mukuru weZvinhu Zvakanaka Zvinozouya”
Apo paunoverenga VaHeberu 7–13, ungangotambira manzwiro kuburikidza neMweya Mutsvene. Funga nzira dzaunokwanisa kuanyora pasi, somuenzaniso, ungangoanyora pasi muchirongwa chechidzidzo chino, mumicheto yamapeji emagwaro matsvene ako, kana munotibhuku kana mujenari.
Nyora Pasi Manzwiro Ako
Kunyangwe Vatendi vakatendeka pane dzimwe nguva vanotambura “nokuzvidzwa nokutambudzwa” izvo zvinokwanisa kuzungunusa chivimbo chavo (ona VaHeberu 10:32–38). Pauro aiziva kuti vatendeuki vechiJuda kuchiKristu vaiva vachisangana nekutambudzwa kukurusa nokuda kwetendero yavo itsva. Kuitira kuvakurudzira kuti varambe vari muchokwadi kuzvapupu zvavo, akavayeuchidza nezve tsika yaivapo kubvira kare yavatendi vakatendeseka kubva munhoroondo yavo pachavo: Aberi, Enoki, Noa, Abrahama, Sara, Josefa, Mosesi—“gore rezvapupu” kuti vimbiso dzaMwari ndedzechokwadi uye dzinokodzera kumirira (ona VaHeberu 11; 12:1). Tsika iyi ndeyenyuwo. Inhaka yerutendo rwaigoverwana naavo vaitarira “kuna Jesu somuvambi uyemukwanisi wokutenda kwedu” (VaHeberu 12:2). Nokuda Kwake, apo pose nhamo painoita kuti tide “kudzokera shure,” panokudaro tinokwanisa “kuswedera nomwoyo wezvokwadi, nokutenda kwakasimba” (VaHeberu 10:22, 38). Kwatiri, sezvazvaiva kuVatendi vechinyakare, Jesu Kristu ndiye “mupirisita mukuru wezvinhu zvakanaka zvinozouya” wedu (VaHeberu 9:11).
Mazano eKunzvera Magwaro Matsvene Kwako Wega
Hupirisita hwaMerkizedeki hwunondinongedzera kuna Jesu Kristu.
Kwamazana amakore, vaJuda vakanga vachishandisa Hupirisita hwaRevi, uhwu hunozikanwawo seHupirisita hwaAroni. Asi nokuzara kwevhangeri raJesu Kristu kwakauya kudzorerwa kweHupirisita hwaMerkizedeki hunova hukurusa, uhwo hwakapa maropafadzo makurusa. Chii chaunodzidza pamusoro peHupirisita hwaMerkizedeki kubva muna VaHeberu 7? Uchichengeta mupfungwa kuti chinangwa chemwadhi iyi—sezvimwe zvinyorwa zvitsvene—ndechokuvaka rutendo muna Jesu Kristu, ungangonyora pasi ndima idzo dzinopupura neZvake.
Heino mimwe mienzaniso yezvimwe zvokwadi zvaungangowana:
-
Dudziro yaJoseph Smith, VaHeberu 7:3, 21: Avo vanogadzwa kuHupirisita hwaMerkizedeki “vanoitwa mukufananidzwa neMwanakomana waMwari” uye “[vapirisita] nariinhi wose.”
-
VaHeberu 7:11: Hupirisita hwaRevi hahupi “kukwaniswa” uye naizvozvo hwakatsiviwa nehwaMerkizedeki (ona Dzidziso neZvibvumirano 84:18–22).
-
VaHeberu 7:20–21: Hupirisita hwaMerkizedeki hwunotambirwa kuburikidza “nemhiko nechibvumirano” (ona Dzidziso neZvibvumirano 84:33–44).
Ndeapi maropafadzo awakagamuchira kubva kuHupirisita hwaMerkizedeki uye “zvisungo zvahwo”? (Dzidziso neZvibvumirano 84:20). Hupirisita hwaMerkizedeki hwakakubatsira sei kuuya kuna Kristu?
Onawo Aruma 13:1–13; Dzidziso neZvibvumirano 121:36–46; Misoro yeNyaya yeVhangeri, “Hupirisita hwaMerkizedeki,” topics.ChurchofJesusChrist.org; Nhungamiro kuMagwaro Matsvene, “Merkizedeki,” scriptures.ChurchofJesusChrist.org; Russell M. Nelson, “Pfuma yeZvepamweya,” Liahona, Mbudzi 2019, 76–79; Dallin H. Oaks, “Hupirisita hwaMerkizedeki uye Makiyi,” Liahona, Chivabvu 2020, 69–72.
Zvisungo zvechinyakare uye zvanhasi zvinondinongedzera kuna Jesu Kristu.
Varavi vokutanga vechiHeberu vemwadhi iyi vaizova vaiziva zvikuru tabanakeri yechinyakare uye zvisungo Pauro zvaakatsanangura. Asi vamwe havana kuziva zvakazara kuti chinangwa chezvisungo izvi chaiva chokunongedzera pfungwa kukuzvipira kwerudzikinuro kwaJesu Kristu.
Munguva dzebhaibheri, pazororo yegore roga roga yaidaidzwa kuti Zuva reRudzikinuro, mupirisita mukuru aipinda munzvimbo yaiva tsvene zvikurusa (kana Tsvene yeTsvene) mutemberi yeJerusarema uye obayira mbudzi kana gwayana kuitira kudzikinura zvivi zveIsraeri.
Apo paunoverenga tsananguro yaPauro yezvisungo izvi, tsvaga zviratidzo nedzidziso zvinokubatsira kunzwisisa zviri nani basa rorudzikinuro reMuponesi.
Zvisungo zvatinotora chinhano mazviri nhasi zvakasiyana kubva kune izvo zvemunguva yaPauro, asi chinangwa chazvo chimwechetecho. Zvisungo zvanhasi zvinopupura sei kwauri nezva Jesu Kristu?
Rutendo runoda kuvimba muvimbiso dzaMwari.
Kana mumwe munhu akakubvunza kutsanangura rutendo, chii chaunozotaura? Sisita Anne C. Pingree vakatora pamutauro kubva muna VaHeberu 11 kuti vape tsananguro iyi yerutendo: “Kwaniso yezvepamweya yokupwiswa nezve vimbiso dzinoonekwa ‘nokure kure’ asi idzo dzingangotadzwa kuwanikwa muupenyu huno ” (“Seeing the Promises Afar Off,” Liahona,; Mbudzi 2003, 14).
Funga kuuya netsananguro yako pachako yerutendo apo paunenge uchifungisisa mazano ari muna VaHeberu 11. Mienzaniso yavanhu vakataurwa muzvitsauko izvi inokudzidzisa chii pamusoro perutendo? (Onawo Eta 12:6–22.)
Ndedzipi vimbiso dzaunoona “nokure kure”? Ungakwanisa kuratidza sei Ishe kuti “wakapwiswa nezvadzo, uye kuti wakadzitambira”? (VaHeberu 11:13).
Onawo Aruma 32:21, 26–43
Mazano ekuNzvera Magwaro Matsvene kweMhuri uye eNguva yeMhuri Pamba Manheru
-
VaHeberu 10:32–36.Ungangokoka nhengo dzemhuri kuti dzigovere zviitiko zvepamweya apo pavakanzwa “kuvhenekerwa” nechokwadi. Zviitiko izvi zvinokubatsira sei “kusarasha kusatya kwedu” munguva dzezviedzo kana dzokusava nechokwadi?
-
VaHeberu 11.Ungakwanisa kubatsira sei nhengo dzemhuri yako kudzidza kubva mumienzaniso yakatendeka yakataurwa muna VaHeberu 11? Zvingangova zvinonakidza kuita mutambo wenyaya dzemimwe yemienzaniso iyi. Munokwanisa kuwongorora dzimwe dzenyaya idzi muNyaya dzeTestamente Yakare. Kana kuti pamwe mhuri yenyu inokwanisa kukurukura mienzaniso yevamwe vanhu vakatendeka vamunoziva—kusanganisira madziteteguru, vatungamiri veChechi, uye nhengo dzemunzanga menyu. Munokwanisawo kuimba rumbo pamusoro porutendo.
-
VaHeberu 12:2.Maererano nendima iyi, sei Jesu aida kushingirira marwadzo uye nokutambura kwepamuchinjikwa? Izvi zvinotidzidzisa chii pamusoro pamashingiriro atinokwanisa kuita pazviedzo zvedu?
-
VaHeberu 12:5–11.Sei Ishe vachitiranga nokutiruramisa? Chii chatinocherechedza mundima idzi pamusoro penzira Ishe yavanoona nayo chirango? Ndima idzi dzinoshandura sei nzira yaunopa nayo kana yaunotambira nayo chirango?
Kuti uwane mamwe mazano ekudzidzisa vana, ona chirongwa chevhiki ino chiri muHuyai, Munditevere—Bhuku reVana Vadiki.
Kunatsurudza Kudzidzisa Kwedu
Shandisa mumhanzi kukoka Mweya uye kudzidza dzidziso. Vatungamiri Vokutanga vakati, “mumhanzi unesimba risina muganhu rokutiswededza pedyo nezvomweya zvikurusa” (“First Presidency Preface,” Hymns, x). Pamwe rumbo pamusoro perutendo rwungangowedzera kuhurukuro yemhuri kubva muna VaHeberu 11.
Zviratidzo nezvisungo zvetemberi yechinyakare zvakadzidzisa pamusoro pebasa raJesu Kristu.