“Gumiguru 30–Mbudzi 5. VaHeberu 1–6: ‘Jesu Kristu, Muvambi woRuponeso rwoKusingaperi’”,’” Huyai, Munditevere—Bhuku reVanhu Pachavo neMhuri: Testamente Itsva 2023 (2022)

“Gumiguru 30–Mbudzi 5. VaHeberu 1–6,” Huyai, Munditevere—Bhuku reVanhu Pachavo neMhuri: 2023

Mufananidzo

Kristu akamira nemusikana muduku

Balm of Gilead [Barsami yeGiradi], naAnn Adele Henrie

Gumiguru 30–Mbudzi 5

VaHeberu 1–6

Jesu Kristu, ‘Muvambi woRuponeso Rwokusingaperi”

Kunyora pasi manzwiro ezvepamweya kunokubatsira kuziva izvo Mweya Mutsvene zvaunoda kukudzidzisa. Kuita chinhu pamanzwiro ako kunoratidza rutendo rwako rwokuti femero idzodzo ndedzechokwadi.

Nyora Pasi Manzwiro Ako

Mumwe nomumwe wedu anofanira kuregera chimwe chinhu kuitira kutambira vhangeri raJesu Kristu—tsika dzakaipa, tendero dzisiri dzechokwadi, hushamwari husina kunaka, kana chimwe chinhu. KuvaJentairi mumazuva ekutanga eChechi yechiKristu, rutendeuko kazhinji rwaireva kusiya vanamwari venhema. KuvaHeberu (kana vaJuda), rutendeuko, kana rwaiva rusina kunyanya kugozha, rwaiva rwakanyanya kuoma. Mushure mazvose, tendero netsika dzavo dzavaikoshesa dzaiva dzakamisirwa mukunamata Mwari wechokwadi uye nedzidziso dzavaporofita Vavo, zvichidzokera kumashure nezviuru zvamakore. Asi zvakadaro vaApositora vakadzidzisa kuti mutemo waMosesi wakanga wazadzikiswa muna Jesu Kristu uye kuti mutemo wapamusoro wakanga zvino wava iwo mwero wavatendi. Kutambira chiKristu kwaizoreva here kuti VaHeberu vaifanira kusiya tendero dzavo dzakare nenhoroondo yavo yakare. Mwadhi kuvaHeberu yakatsvaga kupindura mibvunzo yakadaro nokudzidzisa kuti mutemo waMosesi, vaporofita, uye zvisungo zvaiva zvakakosha zvose, asi Jesu Kristu aiva mukuru kupfuura zvose (ona VaHeberu 1:1–4; 3:1–6; 7:23–28). Chokwadi chaicho ndechokuti, zvinhu zvose izvi zvinonangisa uye zvinopupura nezvaKristu seMwanakomana waMwari uye saMesia akavimbiswa uyo vaJuda wavakanga vakamirira.

Rutendeuko, mumazuva iwawo okutanga uye nanhasi, rwunoreva kuita Jesu Kristu nangiso yekushumira kwedu uye youpenyu hwedu. Rwunoreva kubatirira zvakasimba kuchokwadi uye kusiya izvo zvinotitsausa kubva kwaAri, nokuti Ndiye “muvambi weruponeso rwokusingaperi kuna vose vanomuteerera” (VaHeberu 5:9).

Mufananidzo

mufananidzo wekunzvera kwako wega

Mazano eKunzvera Magwaro Matsvene Kwako Wega

Ndiani akanyora Mwadhi kuvaHeberu?

Dzimwe nyanzvi dzezvidzidzo dzakabvunza kana chiri chokwadi kuti Pauro akanyora Mwadhi yacho kuvaHeberu. Mutoo wamanyorerwe aVaHeberu wakati siyanei kubva kune dzimwe tsamba dzaPauro, uye mhando dzokutangisisa dzezvinyorwa hadzina kutaura munyori. Zvisinei, nokuda kwokuti pfungwa dzakataurwa muVaHeberu dzinoenderana nedzimwe dzidziso dzaPauro, Vatendi vaMazuva Ekupedzisira, mukuenderana netsika dzechiKristu, vakatambira kuti Pauro aiva atora chinhanho mukunyora mwadhi iyi.

Onawo Nhungamiro kuMagwaro “Mwadhi dzaPauro.”

VaHeberu 1–5

Jesu Kristu ndiye “mufananidzo chaiwo” waBaba Vokudenga.

VaJuda vakawanda vakazviwona zvakaoma kutambira Jesu Kristu seMwanakomana waMwari. Cherechedza kuti Mwadhi kuvaHeberu inopupura sei neZvake. Somuenzaniso apo paunoverenga zvitsauko zvokutanga zvitatu, ungangoita mudorongodzwa wamazita, zvinzvimbo, hunhu, uye mabasa zvaunowana zvakataurwa. Zvinhu izvi zvinokudzidzisa chii pamusoro peMuponesi? Zvinodzinokudzidzisa chii pamusoro paBaba Vokudenga?

Shoko rinotevera rakabva kuna Gosa Jeffrey R. Holland rinowedzera chii kunzwisiso yako yedzidziso dziri muzvitsauko izvi? “Jesu … akauya kuzonatsurudza maoenero anoita vanhu Mwari uye kuzovateterera kuti vade Baba Vokudenga vavo samadiro Ivo avakagara vachivaita uye avanozogara vachivaita. … Saka kupa zvokudya kune vane nzara, kuporesa vanorwara, kutsiura hunyengeri, kutetererera rutendo—uyu aiva Kristu achitiratidza nzira kuna Baba” (“The Grandeur of God,” Liahona,, Mbudzi 2003, 72).

VaHeberu 2:9–18; 4:12–16; 5:7–8

Jesu Kristu akatambudzika muzvinhu zvose kuitira kuti Agokwanisa kunzwisisa uye nokundibatsira apo pandinotambudzika.

Unonzwa here kuti unokwanisa “kuswedera usingatyi kuchigaro chovushe chenyasha” uye wotsvaga ngoni? (VaHeberu 4:16). Rimwe shoko reMwadhi kuvaHeberu ndero kuti zvisinei nezvivi zvedu uye neutera hwedu, Mwari vanotaurika navo uye nyasha Dzavo dzinowanikwa. Chii chaunowana muna VaHeberu 2:9–18; 4:12–16; 5:7–8 chinosimbisa ruvimbo rwako rwokuti Jesu Kristu anozokubatsira nezvinetso zveupenyu hwenyama zvako? Funga kunyora pasi mujenari pfungwa dzako uye manzwiro ako pamusoro peizvo Muponesi zvaakakuitira.

Onawo Mosaya 3:7–11; Aruma 7:11–13; 34

VaHeberu 3:7–4:11

Maropafadzo aMwari anowanikwa naavo “vasingaomesi mwoyo [yavo].”

Nokutaura zvakare nyaya yavaIsraeri vechinyakare, Pauro aitarisira kupwisa vaJuda kuti vadzivirire zvikanganiso izvo madziteteguru avo zvavakaita—vachiramba maropafadzo aMwari nokuda kwekusatenda. (Unokwanisa kuverenga nyaya iyo Pauro yaaitaura nezvayo muna Numeri 14, 1–12, 26–35.)

Funga pamusoro pokuti VaHeberu 3:7–4:11 dzingashanda sei kwauri. Kuita izvi, ungangofungisisa mibvunzo yakaita seiyi:

VaIsraeri vakatsamwisa Ishe sei? (ona VaHeberu 3:8–11). Ndedzipi mhedzisiro dzokuva nemwoyo wakaoma?
Ndiriini wandakabvumira mwoyo wangu kuva wakaoma? Pane maropafadzo here ayo Mwari avanoda kundipa andisiri kutambira nokuda kwekushaya rutendo?
Chii chandingaita kukudziridza mwoyo munyoro uye unodemba? (ona Eta 4:15; Zvirevo 3:5–6; Aruma 5:14–15).

Onawo 1 Nifai 2:16; 15:6–11; Jakobho 1:7–8; Alma 12:33–36

Mufananidzo

mufananidzo wekunzvera kwemhuri

Mazano ekuNzvera Magwaro Matsvene kweMhuri uye eNguva yeMhuri Pamba Manheru

VaHeberu 1:8–9.Inzira dzipi idzo Jesu dzaakaratidza kuti Anoda ururami uye Anovenga zvitema? Kana tiine zvido zvisina kururama, chii chatinokwanisa kuita kuzvishandura?

VaHeberu 2:1–4.Unokwanisa here kufunga nezve chidzidzo chinoshandisa zvinhu zvinobatwa kuitira kubatsira mhuri yako kunzwisisa zvazvinoreva kuramba vakabatirira pazvokwadi zvechokwadi “zvatakanzwa”? Ungangoratidza izvi nechinhu chinonetsa kubatirira pachiri. Kuedza kwedu kuchengeta uchapupu hwedu kwakafanana sei nokubata nokubatirira pachinhu ichi? Tingaita sei chokwadi chokuti “zvinhu izvo zvatakanzwa” “hazvikukurwi” kubva patiri? (ndima 1).

VaHeberu 2:9–10.Kuti uwongorore ndevo inoti “mutungamiriri woruponeso rwavo,” unokwanisa kutanga nokukurukura izvo zvinoitwa nomutungamiri. Ruponeso runorevei? Jesu Kristu akafanana sei nomutungamiri kwatiri uye kuruponeso rwedu?

VaHeberu 5:1–5.Ndima idzi dzinokwanisa kukubatsirai kuva nehurukuro pamusoro pezvazvinoreva kudaidzwa naMwari nemumwe munhu ane mvumo. Chii chatinokwanisa kudzidza kubva kumuenzaniso waJesu Kristu pamusoro pokutambira nokuzadzikisa daidzo?

“Hakuno munhu ungazvitorera rukudzo paari, asi kana achidanwa naMwari, sezvaiva zvakaita Aroni” (VaHeberu 5:4). Moses Calls Aaron to the Ministry [Mosesi Anodaidza Aroni kuHushumiri], naHarry Anderson

Kuti uwane mamwe mazano ekudzidzisa vana, ona chirongwa chevhiki ino chiri muHuyai, Munditevere—Bhuku reVana Vadiki.

Rumbo rwakapuwa: “Ndinokudai Nguva Dzose,” Nziyo nedzeVana Vadiki, nhamba 22.

Kunatsurudza Kunzvera Kwako Wega

Edza kushandisa nzira dzakasiyana siyana. Pane kunzvera magwaro matsvene nguva dzose nenzira imwecheteyo, funga mamwe mazano okunzvera akasiyana siyana. Kuti uwane mamwe mazano, ona “Mazano eKunatsa Kunzvera Magwaro Matsvene Kwako Wega” kumavambo kwebhuku rino.