Jesu Kristu achiparidza vhangeri munyika yemweya

Christ Preaching in the Spirit World [Jesu Kristu Achiparidza Vhangeri muNyika yeMweya], naRobert T. Barrett

Mbudzi 20–26

1 2 Petro

“Muchifara Zvikuru noMufaro Usingagoni Kutaurwa Uzere noKubwinya”

Apo paunoverenga Mwadhi dzaPetro, ungangogamuchira manzwiro ezvepamweya. Anyore pasi nokukurumidza apo paunenge “uchiri muMweya” (Dzidziso neZvibvumirano 76:80) kuitira kuti ukwanise kunyora nemazvo izvo Mwari zvavanokudzidzisa.

Nyora Pasi Manzwiro Ako

Chinguva chipfupi mushure meKumuka Kuvakafa Kwake, Muponesi akaita huporofita hunofanira kunge hwakanga huchinetsa kuna Petro. Akafanotaura kuti Petro aizourayirwa chitendero chake, achitakurwa “kuiswa kwaasingadi … , achifananidza kufa kwaaizokudza Mwari nako” (Johane 21:18–19). Mushure memakore mazhinji, apo Petro paakanyora mwadhi dzake, akaziva kuti kufira chitendero kwake kwakaporofitwa kwaiva kwava pedyo: “Ndinoziva kuti kubvisa kwetabernakeri yangu kwava pedyo, sezvandakaratidzwa naShe wedu Jesu Kristu.”(2 Petro 1:14). Asi zvakadaro mashoko aPetro aiva asina kuzadzwa nekutya kana kusava netariro. Pane kudaro, akadzidzisa Vatendi kuti “vafare zvikuru,” kunyangwe zvazvo vakanga vari “kuchemedzwa nomiidzo mizhinji.” Akavaraira kuyeuka kuti “kuidzwa kwokutenda [kwavo]” kwaizotungamirira “kukurumbidzwa nokukudzwa nokubwinya pakuonekwa kwaJesu Kristu” uye “kuruponeso rwemweya [yavo]” (1 Petro 1:6–7, 9). Rutendo rwaPetro runofanira kunge rwainyaradza kuVatendi vekutanga ivavo, sekukurudzira kwarwunoita kuVatendi nhasi, avo vanovawo “vagovani naKristu pakutambudzika kwake; kuti pakuonekwa kwokubwinya kwake, [isu] tifarewo nomufaro mukuru”(1 Petro 4:13).

mufananidzo wekunzvera kwako wega

Mazano eKunzvera Magwaro Matsvene Kwako Wega

1 Petro 1:3–9; 2:19–24; 3:14–17; 4:12–19

Ndinokwanisa kuwana mufaro munguva dzemiedzo nematambudziko.

Nguva yemushure meKurovererwa paMuchinjikwa kwaKristu yaiva isiri nguva iri nyore yekuva muKristu, uye mwadhi yekutanga yaPetro inoratidza izvozvo. Muzvitsauko zvina zvekutanga, uchaona mashoko nendevo zvinotsanangura kuomerwa: kuremerwa; zviedzo; marwadzo; muedzo wakanyanyisa, uye matambudziko (ona 1 Petro 1:6; 2:19; 4:12–13). Asi uchaonawo mashoko anoratidzika seanofadza—ungangoda kuita mudorongodzwa weizvo zvaunowana. Somuenzaniso, apo paunoverenga 1 Petro 1:3–9; 2:19–24; 3:14–17; uye 4:12–19, chii chinokupa tariro yekuti unokwanisa kuwana mufaro kunyangwe pakati pemamiriro ezvinhu akaoma?

Ungangoverengawo shoko reMutungamiri Russell M. Nelson “Joy and Spiritual Survival” (Liahona, Mbudzi 2016, 81–84) uye wotsvaga fanano iri pakati pezvakadzidziswa naPetro uye nezvakadzidziswa neMutungamiri Nelson. Chii chiri pamusoro pechirongwa cheruponeso nevhangeri raJesu Kristu chinokupa mufaro?

 

1 Petro 3:18–20; 4:1–6

Vhangeri rinoparidzwa kuvafi kuti vagotongwa zvakarurama.

Rimwe zuva munhu mumwe nomumwe achamira padare rokutongwa uye “achazvidavirira kuna iye wakazvigadzirira kutonga vapenyu navakafa” (1 Petro 4:5). Mwari vangatonga vanhu vose zvakanaka sei kana mikana yavo yekunzwisisa nekurarama vhangeri yakasiyana? Cherechedza mabatsiriro anoita dzidziso yakadzidziswa naPetro muna 1 Petro 3:18–20; 4:6 kupindura mubvunzo uyu. Ndima idzi dzinosimbisa sei rutendo rwako muruenzaniso uye norururamiso rwaMwari?

Kuti uongorore dzidziso iyi zvakare, nzvera Dzidziso neZvibvumirano 138, chakazarurwa icho Mutungamiri Joseph F. Smith chavakagamuchira apo paifungisisa zvinyorwa zvaPetro izvi. Ndezvipi zvimwe zvokwadi izvo Mutungamiri Smith zvavakadzidza?

 

2 Petro 1:1–11

Kuburikidza nesimba raJesu Kristu, ndinokwanisa kukudziridza hunhu hwangu hwehumwari.

Unombonzwa here kuti kuva saJesu Kristu uye kukudziridza hunhu Hwake hazvikwanisike? Gosa Robert D. Hales vakapa pfungwa inokurudzira iyi pamusoro pemakwanisiro atingaite kukudziridza hunhu hwakafanana nehwaKristu: “Hunhu hweMuponesi … itsika dzakarukwa zvinopindirana, dzinowedzerwa imwe pamusoro peimwe, idzo dzinokura matiri nenzira dzekudyidzana. Nemamwe mashoko, hatikwanise kuwana tsika imwechete yakafanana neyaKristu tisinawo kuwana uye nekukurudzira vamwe. Apo tsika imwechete painova yakasimba, saizvozvowo nedzimwe zhinjisa dzinosimba”(“Becoming a Disciple of Our Lord Jesus Christ,” Liahona, Chivabvu 2017, 46).

mucheka wakarukirwa mufananidzo zvakatsindirana

Hunhu hwega hwega hwakafanana nehwaKristu hwatinokudziridza hunotibatsira kuruka chirukwa chezvepamweya chehudzidzi.

Apo paunoverenga 2 Petro 1:1–11, fungisisa hunhu “hwohumwari” hwakadorongodzwa mundima idzi. Muruzivo rwako, “hwakarukwa zvinopindirana,” sei, sekutsanangura kwakaita Gosa Hales? Hunozvivaka sei humwe pamusoro pehumwe? Chii chimwe chaunodzidza kubva mundima idzi pamusoro pezvinhanho zvekuva saKristu zvakanyanya?

Ungangofungisisawo “zvipikirwa zvinokosha zvakakura kwazvo” izvo Mwari zvavanopa Vatendi Vavo—kusanganisira iwe (2 Petro 1:4).  

mufananidzo wekunzvera kwemhuri

Mazano ekuNzvera Magwaro Matsvene kweMhuri uye eNguva yeMhuri Pamba Manheru

2 Petro 2:5–10.Apo paunoverenga ndima idzi nemhuri yako, funga pamusoro pekushandisa matombo kubatsira nhengo dzemhuri kuona dzidziso dzaPetro dzekuti Muponesi ndiye “ibwe guru rapakona” redu. Takafanana sei “nemabwe mapenyu [anorarama]” ayo ari kushandiswa naMwari kuvaka umambo Hwavo? Chii chatinodzidza kubva kuna Petro pamusoro peMuponesi nebasa redu muumambo Hwake? Shoko raPetro kumhuri yako nderekuti kudii?

1 Petro 3:8–17.Tingakwanisa sei kuti “tigare takagadzirira kupindura” avo vanotibvunza pamusoro perutendo rwedu? Mhuri yako ingangonakidzwa nekuita mutambo wemamiriro ezvinhu ayo mumwe munhu aanouya kwavari nemubvunzo pamusoro pevhangeri.

1 Petro 3:18–20; 4:6.Chii chingakwanisa kuitwa nemhuri yako kuti munzwe kabatana nemadziteteguru enyu? Pamwe munokwanisa kupemberera mazuva ekuzvarwa emadziteteguru akafa nekugadzira kudya kwavaifarira, kutarisa mifananidzo, kana kutaura nyaya dzeupenyu hwavo. Kana zvichibvira, munokwanisawo kuronga kugamuchira zvisungo zvemadziteteguru enyu mutemberi.

2 Petro 1:16–21.Mundima idzi, Petro akayeuchidza Vatendi nezve chiitiko chake paGomo reKushandurwa (onawo Mateo 17:1–9). Chii chatinodzidza kubva mundima idzi pamusoro pedzidziso dzevaporofita? (onawo Dzidziso neZvibvumirano 1:38). Chii chinotipa chivimbo chekutevera muporofita wedu anorarama nhasi?

Kuti uwane mamwe mazano ekudzidzisa vana, ona chirongwa chevhiki ino chiri muHuyai, Munditevere—Bhuku reVana Vadiki.

 

Kunatsurudza Kudzidzisa Kwedu

“Garai makagadzirira.” Nguva dzekudzidzisa pamba dzisina kurongwa dzinokwanisa kuuya uye nekuenda nekukurumidza, naizvozvo zvakakosha kuti utore mukana wadzo apo padzinomuka. Ungakwanisa sei “kugara wakagadzirira” kudzidzisa nhengo dzemhuri yako chokwadi chevhangeri uye kugovera “tariro iri mukati menyu” (1 Petro 3:15) apo nguva dzekudzidzisa padzinomuka? (Ona Teaching in the Savior’s Way, 16.)

Petro achiparidza kuchikwata chevanhu

Kunyange zvazvo Petro akatarisana norutambudzo uye norupikiso rukuru, akaramba asingazungunuki muuchapupu hwake hwaKristu.