Dagat nga Pula

Ang Dagat nga Pula

Abril 4–10

Exodo 14–17

“Pahimunong, kag Tan-awa ang Kaluwasan sang Ginuo”

Ginsugo sang Dios si Moises nga isulat ang iya mga eksperiyensya “sa tulun-an subong nga handumanan kag basahon ini” kay Josue (Exodo 17:14). Sa amo man, ang pagsulat sang imo espirituhanon nga mga eksperiyensya makabulig sa imo kag sa imo mga mahal sa kabuhi nga madumduman ang kaayo sang Ginuo.

Isulat Ang Imo Mga Panghunahuna

Nakibon ang mga Israelnon. Ang Dagat nga Pula ara sa pihak nga bahin, kag ang kasuldadohan ni Faraon nagaabante man sa pihak. Ang ila pagpalagyo sa Egipto, daw ang naggwa, indi magalawig. Pero may mensahe ang Dios sa mga Israelnon nga gusto Niya nga ila dumdumon sa mga henerasyon: “Dili kamo magkahadlok. … Ang Ginuo magapakig-away tungod sa inyo” (Exodo 14:13–14).

Sugod sadto, kon kinahanglan sang katawhan sang Dios sang pagtuo kag kaisog, masami sila nga nagadangop sa sining istorya sang milagroso nga paghilway sang Israel. Sang gusto ni Nefi nga papagsikon ang iya kauturan, nagsiling sia, “Magpakalig-on kita subong kay Moises; kay sia matuod nagsugo sa mga tubig sang Pula nga Dagat kag natunga ang mga ini diri kag didto, kag ang aton mga katigulangan nag-agi sa tunga, pa-gwa sa pagkabihag, sa mamala nga duta” (1 Nefi 4:2). Sang gusto ni Haring Limhi nga “ibayaw ang [ila] mga ulo, kag magkasadya,” ang iya nabihag nga katawhan, ginpadumdom niya sila sining pareho nga istorya (Mosias 7:19). Sang gusto ni Alma nga magpamatuod sa iya anak parte sa gahum sang Dios, ginsambit man niya ining istorya (tan-awa sa Alma 36:28). Kag kon kinahanglan naton sang paghilway—kon kinahanglan naton sang dugang pa nga pagtuo, kon kinahanglan naton nga “[mag]pahimunong, kag [tan-awon] ang kaluwasan sang Ginuo”—pwede naton dumdumon kon paano “ang pagluwas sang Ginuo sa Israel sadtong adlaw sa kamot sang mga Egiptohanon” (Exodo 14:13, 30).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Exodo 14

Ang Dios may gahum sa paghilway sa akon.

Samtang imo ginabasa ang Exodo 14:1–10, hunahunaa kon ano ayhan ang nabatyagan sang mga Israelnon sang makita nila nga amat sila nga ginapalibutan sang mga soldado ni Faraon. Siguro pamatyag mo kinahanglan mo sing milagro para malampuwasan ang mabudlay nga hangkat nga imo ginaatubang. Ano ang imo matun-an sa Exodo 14:13–31 nga makabulig sa imo sa pagpangayo sang kahilwayan sang Dios sa imo kabuhi? Ano ang imo natun-an parte sa mga pamaagi nga nagahatag ang Dios sang paghilway sa kabudlayan? Binagbinaga kon paano mo nakita ang Iya nagapanghilway nga gahum sa imo kabuhi.

Tan-awa man sa Doktrina kag mga Kasugtanan 8:2–3.

Exodo 15:22–27

Sarang himuon sang Ginuo ang mga mapait nga matam-is.

Samtang imo ginabasa sa Exodo 15:22–27 ang pagpanglakaton sang Israel padulong sa duta nga ginpangako, hunahunaa ang mga butang sa imo kabuhi nga daw “mapait” pareho sang tubig sang Mara. Pamensara ang masunod nga mga pamangkot samtang imo ginabinagbinag ining mga bersikulo: Paano himuon sang Ginuo ang mga mapait sa imo kabuhi nga matam-is? Ano ang balor sining mga eksperiyensya sa imo kabuhi? Ano ang ginapanugyan sang mga bersikulo 26 kag 27 parte sa kon paano kita ginabugayan sang Ginuo kon pamatian naton ang Iya tingug?

Exodo 15:23–27; 16:1–15; 17:1–7

Makasalig ako sa Ginuo, bisan sa panahon sang kabudlayan.

Makatelintar nga mangin kritiko sang mga Israelnon tungod nagkumod-kumod sila ukon nagreklamo sang nagbudlay ang ila mga sirkumstansya, sa pihak sang tanan nga ginhimo sang Dios para sa ila. Pero samtang imo ginabasa ang Exodo 15:23–27; 16:1–15; 17:1–7, pamensara kon bala ginhimo mo man ang pareho nga butang. Ano ang imo matun-an sa mga eksperiyensya sang mga Israelnon nga makabulig sa imo nga buhinan ang pagkumod kag mas magsalig sa Dios sing lubos? Halimbawa, ano ang mga kinalain nga imo natalupangdan sa pamaagi nga nagresponde ang mga Israelnon sa mga kabudlayan kag sa paagi nga nagresponde si Moises? Ano ang ginatudlo sining mga bersikulo sa imo parte sa Dios?

Tan-awa man sa 1 Nefi 2:11–12.

babayi nga nagatipon sang mana

Ang mana halin sa Dios nagpakaon sa mga Israelnon sa pisikal; kinahanglan man naton sang adlaw-adlaw nga espirituhanon nga pagkaon. Fresco ni Leopold Bruckner

Exodo 16

Dapat ako magpangita sang adlaw-adlaw nga espirituhanon nga pagkaon.

Madamo kita sang matun-an nga espirituhanon nga mga leksyon sa milagro sang mana, nga makita sa Exodo 16. Pat-ini ang detalyado nga mga instruksyon nga ginhatag sa mga Israelnon kon paano tipunon, gamiton, kag taguon ang mana (tan-awa sa Exodo 16:16, 19, 22–26). Ano ang imo makita sa sining mga instruksyon nga magamit mo samtang adlaw-adlaw ka nga nagapangita sang espirituhanon nga pagkaon?

Tan-awa man sa Juan 6:31–35, 48–58 .

Exodo 17:1–7

Si Jesucristo amo ang akon espirituhanon nga bato kag tubig nga buhi.

Pamensara ang Manluluwas samtang imo ginabasa ang Exodo 17:1–7. Sa ano si Jesucristo nangin daw pareho sang bato sa imo? (tan-awa sa Salmo 62:6–7; Helaman 5:12). Paano Sia mapaanggid sa tubig? (tan-awa sa Juan 4:10–14; 1 Mga Taga-Corinto 10:1–4; 1 Nefi 11:25).

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Exodo 14:13–22.Mahimo nga masadyahan ang mga miyembro sang imo pamilya sa pagtilaw nga “tungaon” ang tubig sa yahong ukon labador, pareho sang pagtunga ni Moises sang Dagat nga Pula. Buligi sila nga maintiendihan nga ang Dagat nga Pula indi matunga kon wala ang gahum sang Dios. Paano naton nakita ang gahum sang Dios sa aton mga kabuhi kag sa mga kabuhi sang aton katigulangan?

Exodo 15:1–21.Sang milagroso nga makatabok sa Dagat nga Pula, nagkanta ang mga Israelnon sang kanta sang pagdayaw nga ginkilala bilang ambahanon ni Moises, nga makita sa Exodo 15:1–21. Bilang pamilya, pangitaa sa sining mga bersikulo ang mga dinalan nga nagapamatuod sang ginhimo sang Dios para sa mga Israelnon kag iban pa nga makahulugan nga mga dinalan. Dayon pwede kamo magkanta sang himno nga nagapadumdom sa inyo pamilya sang ginhimo sang Dios para sa inyo.

Exodo 16:1–5; 17:1–7.Ang pagbasa sang Exodo 16:1–5 kag 17:1–7 sarang magpadulong sa diskusyon parte sa Manluluwas bilang ang Tinapay sang Kabuhi, bilang Tubig nga Buhi, kag bilang aton Bato. Paano kita ginapadumdom sining mga istorya sang ginhimo ni Jesucristo para sa aton? Bilang bahin sang inyo paghambalanay, pwede ninyo basahon ang Juan 4:10–14; 6:29–35, 48–51; Helaman 5:12; Doktrina kag mga Kasugtanan 20:77, 79.

Exodo 17:8–16.Mahimo ninyo drama-dramahon ang istorya ni Aaron kag Hur nga ginabayaw ang mga kamot ni Moises kag hambali kon paano sini ginasimbolo kon paano naton ginasakdag ang mga gintawag sang Dios nga magpanguna sa aton. Pwede man ninyo ipaanggid ang ehemplo ni Aaron kag Hur sa pagkumod sang mga Israelnon batok kay Moises (nga ginlaragway sa bilog nga mga kapitulo 15–17). Ano ang pila ka mga paagi nga mabuligan naton kag masakdag ang aton mga lider? Ano nga mga bugay ang nagaabot sa aton kag sa aton mga lider kon himuon naton ini?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Manunubos sang Israel [Redeemer of Israel],” Mga Himno kag mga Ambahanon sang Kabataan, no. 5.

Pagpauswag sang Personal nga Pagtuon

Pangitaa ang imo kaugalingon nga espirituhanon nga paghangop. Sa imo personal kag pang-pamilya nga pagtuon, indi paglimitahi ang imo kaugalingon sa mga bersikulo nga gintutokan sa sining tulun-an nga mga outline. Mahimo nga ang Ginuo may mga mensahe para sa imo sa sining mga kapitulo nga wala mahatagi sing bug-at diri. Mainampuon nga magpangita sing inspirasyon.

Si Moises nga ginatunga ang Dagat nga Pula

Larawan ni Moises nga ginatunga ang Dagat nga Pula, ni Robert T. Barrett