“Abril 18–24. Exodo 18–20: ‘Ang Tanan nga Napamulong sang Ginuo Himuon Namon,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)

“Abril 18–24. Exodus 18–20,” Dali, Magsunod sa Akon—Para sa Mga Indibidwal kag Mga Pamilya: 2022

Litrato

bukid

Ang bukid sa Egipto nga sa kasaysayan ginapatihan nga amo ang Bukid nga Sinai.

Abril 18–24

Exodo 18–20

“Ang Tanan nga Napamulong sang Ginuo Himuon Namon”

Si Sister Michelle Craig nagtudlo, “Bilang matutom nga disipulo [ni Jesucristo], makabaton ka sang personal nga inspirasyon kag rebelasyon nga nagasanto sa Iya mga kasugoan, nga husto gid sa imo” (“Spiritual Capacity,” Liahona, Nob. 2019, 21). Isulat kag aksyoni ang inspirasyon nga imo mabaton samtang imo ginabasa ang Exodo 18–20.

Isulat Ang Imo Mga Panghunahuna

Ang pagpanglakaton sang mga Israelnon halin sa Egipto padulong sa tiilan sang Bukid nga Sinai napun-an sang mga milagro—indi manegar nga mga pagpahayag sang wala tupong nga gahum, pagpalangga, kag kaluoy sang Ginuo. Ugaling, may natigana nga mga bugay ang Ginuo sa ila nga masobra pa sa paghilway sa ila sa Egipto kag pagbusog sang ila pisikal nga kagutom kag kauhaw. Gusto Niya nga sila mangin Iya katawhan sa kasugtanan, Iya “[pinasahi nga manggad],” kag “pungsod nga balaan” (Exodo 19:5–6). Sa karon, ang mga bugay sining kasugtanan nagasakop indi lamang sang isa ka nasyon ukon katawhan. Gusto sang Dios nga ang tanan Niya nga kabataan mangin Iya katawhan sa kasugtanan, nga “magtuman sang [Iya] tingug, kag magbantay sang [Iya] katipan” (Exodo 19:5), kay Iya ginapakita ang Iya kaluoy “sa linibo sang mga nagahigugma sa [Iya], kag nagabantay sang [Iya] mga sugo” (Exodo 20:6).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Exodo 18:13–26

Makabulig ako “dala sang lulan” sang pag-obra sang buluhaton sang Ginuo.

Samtang imo ginabasa ang laygay nga nabaton ni Moises halin sa iya ugangan, nga si Jetro, binagbinaga kon sa ano ka mangin pareho sang “mga tawo nga matinud-anon” (kon kaisa ginalubad nga “masaligan” nga mga tawo) nga ginlaragway sa bersikulo 21. Paano ka makabulig “dala sang lulan” sang imo mga lider sa Simbahan? (bersikulo 22). Halimbawa, paano ayhan magamit ining laygay sa imo mga pagpaninguha sa ministering?

Mahimo mo man pamensaron kon bala ikaw, kon kaisa, pareho kay Moises, nga nagatinguha sa paghimo sang madamo kaayo. Paano ayhan magamit ang laygay ni Jetro sa imo?

Tan-awa man sa Mosias 4:27.

Ang pag-minister sa iban isa sa paagi nga nagapakigbahin kita sa buluhaton sang Ginuo.

Exodo 19:3–6

Ang katawhan sang Ginuo sa kasugtanan mga manggad sa Iya.

Pamensara kon ano ang buot silingon sa imo sang mangin “pinasahi nga manggad” sa Ginuo (Exodo 19:5). Si Pangulong Russell M. Nelson nagtanyag sang isa ka paathag sa sining dinalan: “Sa Daan nga Katipan, ang tinaga sa Hebreo kon sa diin ginlubad ang pinasahi amo ang segullah, nga buot silingon ‘malahalon nga propyedad,’ ukon ‘manggad.’ … Ang kilalahon kita sang mga alagad sang Ginuo nga iya pinasahi nga katawhan isa ka pagdayaw nga may pinakamataas nga importansya” (“Children of the Covenant,” Ensign, Mayo 1995, 34). Paano nagaimpluwensya sa imo pagpangabuhi ang ihibalo nga ang pagtuman sang imo mga kasugtanan nagahimo sa imo nga “pinasahi nga manggad”?

Exodo 19:10–11, 17

Ang sagrado nga mga eksperiyensya nagakinahanglan sang paghanda.

Ginsiling sang Ginuo kay Moises nga kinahanglan sang mga anak sang Israel nga magmangin handa sila antes “sa pagsugata sa Dios” (Exodo 19:10–11, 17) kag magbantay sang Iya [kasugtanan] (tan-awa sa Exodo 19:5). Ano ang imo ginahimo para maghanda para sa sagrado nga mga eksperiyensya sa imo kabuhi, pareho sang pagtambong sang templo ukon pag-ambit sang sakramento? Ano ang pwede mo himuon para mas maghanda para sa sining mga eksperiyensya? Pamensara ang iban pa nga espirituhanon nga mga aktibidades nga nagakinahanglan sang pagpanghanda, kag binagbinaga kon sa ano maapektuhan sang imo paghanda ang klase sang imo mangin eksperiyensya.

Exodo 20

Ang Dios maluluy-on.

Samtang imo ginabasa ang Exodo 20, pamensara nga tandaan kon diin sa Napulo ka Sugo ang pamatyag mo ginatuman mo na kag kon diin ang pamatyag mo dapat mo nga mas tumanon. Pwede ka magpili sang isa ka kasuguan nga tutokan kag tun-an ini sing mas detalyado paagi sa pagbasa sang naangot nga balaan nga mga kasulatan (tan-awa sa Guide to the Scriptures sa scriptures.ChurchofJesusChrist.org) ukon sa mga mensahe sang komperensya (tan-awa sa seksyon sang mga topiko sang conference.ChurchofJesusChrist.org). Pamensara nga ilakip sa imo pagtuon ang mga bugay nga nagaabot sa mga nagatuman sang kasuguan. Paano ining mga bugay nagapakita sang kaluoy kag pagpalangga sang Dios sa imo?

Exodo 20:1–7

Importante nga unahon ang Ginuo sa akon kabuhi.

Mahimo nga ang pagbasa sang Exodo 20:1–7 magatulod sa imo nga hunahunaon ang imo mga prayoridad sa kabuhi—pwede mo man ini ibutang sa isa ka listahan. Ano ang pila ka posible mga “dios” ukon “[mga] larawan nga tinigban” (Exodo 20:3–4) nga matentar ka nga unahon sangsa Dios? Paano ang pag-una sa Ginuo makabulig sa imo sa iban nga importante nga mga butang sa imo kabuhi? Ano ang ginainspirar sa imo nga himuon agud madugangan ang imo pagtutok sa Amay nga Langitnon kag kay Jesucristo?

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Exodo 18:8–12.Ano ang nangin epekto kay Jetro sang testimonya ni Moises sang paghilway sang Dios? Ano nga dalagko nga mga butang ang ginhimo sang Ginuo para sa aton pamilya? Kay sin-o naton pwede ipaambit ang aton mga eksperiyensya? Paano naton matipigan inang mga eksperiensya para sa palaabuton nga mga henerasyon?

Exodo 18:13–26.Mahimo nga mainspirar sining mga bersikulo ang imo pamilya sa pagpanumdom parte sa pag-alagad sang inyo lokal nga mga lider, pareho sang bishop, mga lider sang mga lamharon, ukon mga titser sa Primary. Ano ang ila mga responsibilidad nga mahimo daw “tama kabug-at” (Exodo 18:18) nga dalahon sang isa lang ka tawo? Ano ang pwede naton himuon para makabulig alsa sang ila mga ginapas-an?

Exodo 20:3–17.Magpanumdom sang makahulugan nga paagi para hambalan ang Napulo ka Sugo bilang pamilya. Halimbawa, pwede ninyo isulat ang mga kasuguan sa Exodo 20:3–17 sa napulo ka panid sang ginunting nga papel. Pwede dayon ini klasehon sang mga miyembro sang pamilya sa duha ka kategorya: (1) pagtahod sa Dios kag (2) pagpalangga sa iban (tan-awa man sa Mateo 22:36–40). Pamensara ang pagpili sang isa ukon duha ka kasuguan tagsa ka adlaw sini nga semana kag hambali ini sing ululupod sing mas detalyado. Halimbawa, paano pabakuron sang pagtuman sining kasuguan ang aton pamilya? Paano ini gintuman sang Manluluwas?

Exodo 20:12.Para mas maintiendihan ang Exodo 20:12, basi makabulig kon pangitaon sang imo pamilya ang mga kahulugan sang tinaga nga “pagtahod.” Dayon pwede maghimo ang mga miyembro sang pamilya sang lista sang mga butang nga pwede naton himuon para tahuron ang aton mga ginikanan.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Magpangita sang oras nga bagay sa imo. Masami nga mas mahapos magtuon sang balaan nga mga kasulatan kon matun-an mo ini nga wala sang istorbo. Magpangita sang oras nga bagay sa imo, kag himoa ang tanan para tayuyon nga magtuon sa amo sina nga oras kada adlaw.