Si Jehova nga nagapakita kay Moises kag sa mga tigulang sang Israel

Litrato ni Jehova nga nagapakita kay Moises kag sa 70 ka mga tigulang sang Israel, ni Jerry Harston

Abril 25–Mayo 1

Exodo 24; 31–34

“Ang Akon Presensya Magaupod sa Imo”

Indi tanan nga makahulugan nga prinsipyo sa balaan nga mga kasulatan ang sarang mahatagan pagtamod sa sining mga outline. Magpamati sa Espiritu para mabuligan ka nga magtutok sa mga kamatuoran nga kinahanglan mo.

Isulat Ang Imo Mga Panghunahuna

May rason nga maglaum nga magapabilin nga tampad sa Dios ang mga anak sang Israel matapos nga Iya ginpahayag ang Iya layi sa ila (tan-awa sa Exodo 20–23). Bisan pa nga nagkumod sila kag nagduha-duha sang una, sang ginbasa ni Moises ang layi sa tiilan sang Bukid Sinai, naghimo sila sining kasugtanan: “Ang tanan nga napamulong sang Ginuo himuon namon, kag kami magmatinumanon” (Exodo 24:7). Dayon gintawag sang Dios si Moises sa bukid, nga ginasilingan sia nga magpatindog sang santuaryo “agud nga ako makapuyo sa tunga nila” (Exodo 25:8; tan-awa sa mga kapitulo 25–30).

Pero samtang ato si Moises sa ibabaw sang bukid nagatuon kon paano makaupod sang mga Israelnon ang presensya sang Dios sa tunga nila, ang mga Israelnon sa idalom sang bukid nagahimo sang bulawan nga dios-dios nga simbahon. Bag-o lang sila nagpromisa nga “dili maghupot sing iban nga mga dios,” pero “sa madali naglipas sila sa dalanon” sang mga kasuguan sang Dios (Exodo 20:3; 32:8; tan-awa man sa Exodo 24:3). Wala ini ginapaabot nga hitabo, pero nahibal-an naton sa eksperiyensya nga ang pagtuo kag pangako kon kaisa ginadaog sang kawala-sing-pasensya, kahadlok, kag pagduha-duha. Samtang ginahandum naton ang presensya sang Ginuo sa aton mga kabuhi, makapaisog sang buot ang mahibaloan nga ang Ginuo wala nangampo sa dumaan nga Israel kag indi Sia magpangampo sa aton—kay Sia “maluluy-on kag mainayuhon, [mahinay] sa pagpangakig, kag bugana sa malig-on nga paghigugma kag sa pagkatutom” (Exodo 34:6).

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Exodo 24:1–11

Ang akon mga kasugtanan nagapakita sang akon kahanda sa pagtuman sang layi sang Dios.

Samtang imo ginabasa ang Exodo 24:3–8 parte sa mga Israelnon nga nagapakighisugot nga tumanon ang layi sang Dios, mahimo nga magliso ang imo pamensaron sa mga kasugtanan nga imo ginhimo sa Dios. Ang kasugtanan sang Israel nagalakip sang mga ritwal nga lain sa ginapangayo sang Dios sa karon, pero basi may matalupangdan ka nga pagpalareho, labi na kon hunahunaon mo ang wala katapusan nga mga kamatuoran nga ginasimbolo sining mga ritwal.

Halimbawa, ang mga bersikulo 4, 5, kag 8 nagamitlang sang altar, sang sapat nga mga halad, kag dugo. Ano ayhan ang ginasimbolo sang mga ini, kag ano ang relasyon sini sa imo mga kasugtanan? Sa ano makabulig sa imo ang imo mga kasugtanan nga himuon “ang tanan nga napamulong sang Ginuo”? (bersikulo 7).

Tan-awa man sa Moises 5:4–9.

Exodo 32–34

Ang sala amo ang pagtalikod sa Dios, pero nagtanyag Sia sang dalan pabalik.

Sa pagbinagbinag kon ngaa ang mga Israelnon madali kaayo nga “nagdunot sang ila kaugalingon” (Exodo 32:7) paagi sa paglapas sang ila mga kasugtanan, malikawan naton ang pareho nga mga sayop. Samtang imo ginabasa ang Exodo 32:1–8, tilawi nga ibutang ang imo kaugalingon sa lugar sang mga Israelnon—ara ka sa kamingawan, 40 ka adlaw na nga wala si Moises, wala ka makahibalo kon bala makabalik pa sia ukon kon san-o sia mabalik, kag sa palaabuton magainatubangay kamo sang mga taga-Canaan bangud sa duta nga ginpangako (tan-awa sa Exodo 23:22–31). Ngaa sa banta mo nga gusto sang mga Israelnon sang bulawan nga dios-dios? Ngaa tama ka seryoso sang sala sang mga Israelnon? Mahimo nga itulod ka sining mga bersikulo nga binagbinagon ang mga paagi nga matentar ka nga magsalig sa tawo ukon butang magluwas sa Manluluwas. May ginainspirar bala sa imo nga imo himuon para mas unahon mo sing lubos ang Dios sa imo kabuhi? Ano ang nanamian mo sa pangabay ni Moises sa Ginuo sa Exodo 33:11–17?

Wala sapayan nga seryoso ang sala sang mga Israelnon, nagalakip man ining istorya sang mensahe sang kaluoy kag kapatawaran sang Dios. Anong ginatudlo sang Exodo 34:1–10 sa imo parte sa Manluluwas? Ano ang ginapadumdom sa imo sang mga aksyon ni Moises para sa mga Israelnon sa ginhimo ni Jesucristo para sa tanan nga katawhan? (tan-awa sa Exodo 32:30–32; Mosias 14:4–8; 15:9; Doktrina kag mga Kasugtanan 45:3–5).

Exodo 34:1–2

Ano ang kinalain sang duha ka grupo sang tapi-tapi nga bato nga ginhimo ni Moises?

Sang magpanaog si Moises sa bukid, gindala niya ang layi nga nasulat sa mga tapi-tapi nga bato. Sang makita nga ginlapas sang mga Israelnon ang ila kasugtanan, ginbuka ni Moises ang mga tapi-tapi (tan-awa sa Exodo 31:18; 32:19). Sang ulihi, ginsugo sang Dios si Moises nga maghimo sang lain nga pares sang tapi-tapi nga bato kag dalhon liwat pasaka sa bukid (tan-awa sa Exodo 34:1–4). Ang Paglubad ni Joseph Smith sang Exodo 34:1–2 nagaklaro nga ang una nga pares sang tapi-tapi nga bato nagalakip sang mga ordinansa sa “balaan nga paagi,” ukon sa Pagkapari ni Melquisedec. Ang ikaduha nga pares nagalakip sang “kasuguan sa lawasnon nga kaliwatan.” Ining mas manubo nga layi ginadumalahan paagi sa “mas manubo nga priesthood” (tan-awa sa Doktrina kag mga Kasugtanan 84:17–27), nga nagatuyo nga ihanda ang mga Israelnon para sa mas mataas nga layi kag mas mataas nga priesthood para mas makasulod sila sa presensya sang Dios.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Exodo 31:12–13, 16–17.Matapos basahon ining mga bersikulo, ayhan pwede ninyo hambalan sa pamilya ang pamangkot ni Pangulong Russell M. Nelson parte sa aton pamatasan sa Adlaw nga Inugpahuway: “Ano nga tanda ang imo ihatag sa Ginuo para ipakita ang imo pagpalangga sa Iya?” (“The Sabbath Is a Delight,” Liahona, Mayo 2015, 130). Pwede nga mag-obra ang imo pamilya sang mga karatula nga ibutang sa palibot sang inyo balay para padumdumon kamo kon paano ninyo ipakita ang inyo pagpalangga sa Ginuo sa Adlaw nga Inugpahuway.  

mga tawo nga nagalakat sa atubang sang simbahan

Paagi sa pagtahod sa Adlaw nga Inugpahuway, ginapakita naton ang aton pagpalangga sa Ginuo.

Exodo 32:1–8.Para buligan ang imo pamilya nga hambalan kon paano nagtalikod ang mga Israelnon sa Dios, pamensara ang paghimo sang alagyan sa salog (ukon magpangita sang alagyan malapit sa inyo balay). Samtang nagalakat sa alagyan, pwede nga hambalan sang mga miyembro sang pamilya ang mga tentasyon nga aton ginaatubang nga magliko “palayo sa dalanon nga ginsugo sang [Ginuo].” Paano kita magpabilin sa alagyan? Kon nagtalang kita, paano kita makabalik? Paano kita ginabuligan sang Manluluwas?

Exodo 32:26.Matapos nga makita ang mga Israelnon nga nagasimba sa dios-dios, namangkot si Moises, “Sin-o ang dampig sa Ginuo?” Paano naton ipakita nga kadampig kita sang Ginuo?

Exodo 33:14–15.Pwede nga mag-istorya ang mga miyembro sang pamilya sang mga eksperiyensya sang ila mabatyagan ang ginpromisa sang Dios kay Moises: “Ang akon [presensya] magaupod sa imo, kag papahuwayon ko ikaw.” Pwede kamo magkanta sang himno parte sa aton pagsalig sa Dios, pareho sang “Sa Tanan nga Tion [I Need Thee Every Hour]” (Mga Himno kag mga Ambahanon sang Kabataan, no. 12.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

   

Pagpauswag sang Aton Pagpanudlo

Agdaha ang Espiritu. Pamensara kon paano nagaimpluwensya ang sagrado nga musika, litrato, kag mga pagpahayag sang pagpalangga sa espirituhanon nga kapalibotan sang imo puluy-an samtang imo ginatudloan ang imo pamilya (tan-awa sa Teaching in the Savior’s Way, 15).

Si Moises nga nagabuka sang mga tapi-tapi nga bato

Worship of the Calf [Pagsimba sang Tinday], ni W. C. Simmonds