“Mga Dapat Tandaan: Ang Tabernakulo kag Halad,” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)
“Mga Dapat Tandaan: Ang Tabernakulo kag Halad,” Dali, Magsunod sa Akon—Para sa Mga Indibidwal kag Mga Pamilya: 2022
Mga Dapat Tandaan
Ang Tabernakulo kag Halad
Samtang aton ginabasa ang Daan nga Katipan, kon kaisa makakita kita sang malagba nga mga dinalan parte sa mga butang nga maathag nga importante sa Ginuo pero daw indi dayon magamit sa aton sa karon. Ang Exodo 25–30; 35–40; Levitico 1–9; 16–17 mga halimbawa sini. Ang ining mga kapitulo nagadetalye sang tabernakulo sang Israel sa kamingawan kag sang halad nga mga sapat nga pagahimuon didto.1 Ang tabernakulo isa ka masaylo-saylo nga templo, ang puluy-an sang Ginuo sa tunga sang Iya katawhan.
Ang aton moderno nga mga templo may anggid sa tabernakulo sang Israel, pero piho nga indi ini pareho sa ginlaragway sa Exodo. Kag wala kita nagapatay sang mga sapat sa aton mga templo—ang Pagbayad-Sala sang Manluluwas ang nagtapos sang halad nga sapat masobra 2,000 na katuig ang nagligad. Pero wala sapayan sining mga kinalain, may dako nga bili sa sining panahon ang pagbasa parte sa dumaan nga klase sang pagsimba sang Israel, labi na kon tan-awon naton ini sa panan-aw sang katawhan sang Dios sa Libro ni Mormon—bilang paagi “sa pagpabakod sang ila pagtuo kay Cristo” (Alma 25:16; tan-awa man sa Jacob 4:5; Jarom 1:11). Kon aton maintiendihan ang simbolismo sang tabernakulo kag sang halad nga sapat, makabaton kita sang espirituhanon nga mga paghangop nga makapabakod man sang aton pagtuo kay Cristo.
Litrato sang mga Israelnon nga nagadala sang karnero sa tabernakulo, ni Robert T. Barrett
Ang Tabernakulo Nagapabakod sang Pagtuo kay Jesucristo
Sang ginsugo sang Dios si Moises nga magtukod sang tabernakulo sa guban sang mga Israelnon, ginsiling Niya ang katuyuan sini: “agud nga ako makapuyo sa tunga nila” (Exodo 25:8). Sa sulod sang tabernakulo, ang presensya sang Dios ginarepresentar sang kaban sang pagpamatuod—kaban nga kahoy, nga naputos sa bulawan, nga nagaunod sang sinulat nga kasugtanan sang Dios sa Iya katawhan (tan-awa sa Exodo 25:10–22). Ang kaban ginabutang sa pinakabalaan, sa pinakasulod nga kuwarto, nga separado sa iban nga bahin sang tabernakulo gamit ang belo. Ining belo nagasimbolo sang aton pagkaseparar sa presensya sang Dios tungod sang Pagkahulog sa Sala.
Magluwas kay Moises, isa lang ka tawo ang nahibal-an naton nga makasulod sa sinang “pinakabalaan nga lugar” (Exodo 26:34)—ang pinakamataas nga pari. Pareho sa iban nga mga pari, kinahanglan niya anay nga mahugasan kag mahaplasan (tan-awa sa Exodo 40:12–13) kag magsuksok sang sagrado nga bayo simbolo sang iya palangakuan (tan-awa sa Exodo 28). Kis-a kada tuig, sa adlaw nga ginatawag Adlaw sang Katumbasan, ang pinakamataas nga pari nagatanyag sang mga halad para sa mga tawo antes magsulod nga sia lang isa sa tabernakulo. Sa belo, magasunog sia sang incienso (tan-awa sa Levitico 16:12). Ang mahamot nga aso nga nagasaka pa-langit nagarepresentar sang mga pangamuyo sang katawhan nga nagasaka pakadto sa Dios (tan-awa sa Salmo 141:2). Dayon ang pinakamataas nga pari, dala ang dugo sang sapat nga halad, magatabok sa pihak sang belo kag magapalapit sa trono sang Dios, nga ginasimbolo sang kaban sang pagpamatuod (tan-awa sa Levitico 16:14–15).
Base sa imo nahibal-an parte kay Jesucristo kag sa Iya papel sa plano sang Amay nga Langitnon, makita mo bala kon paano kita ginatudlo sang tabernakulo padulong sa Manluluwas? Pareho sang tabernakulo, kag sang kaban sa sulod sini, nga nagarepresentar sang presensya sang Dios sa tunga sang Iya katawhan, si Jesucristo amo ang presensya sang Dios sa tunga sang Iya katawhan (tan-awa sa Juan 1:14). Pareho sang pinakamataas nga pari, si Jesucristo amo ang Tagpatunga sa aton kag sa Dios nga Amay. Nagtabok Sia sa belo para magpakitluoy para sa aton paagi sa gahum sang dugo sang Iya kaugalingon nga halad (tan-awa sa Mga Hebreo 8–10).
Mahimo nga pamilyar sa imo ang pila ka mga aspeto sang tabernakulo sang Israel, labi na gid kon nakakadto ka na sa templo para magbaton sang imo kaugalingon nga mga ordinansa. Pareho sang pinakabalaan nga lugar sa tabernakulo, ang selestiyal nga kuwarto sa templo nagarepresentar sang presensya sang Dios. Para makasulod, kinahanglan naton anay nga mahugasan kag mahaplasan. Nagasuksok kita sang sagrado nga biste. Nagapangamuyo kita sa altar kon sa diin ang mga pangamuyo nagapasaka sa Dios. Kag sa ulihi nagatabok kita sa belo pakadto sa presensya sang Dios.
Siguro ang pinakaimportante nga pagkaanggid sang moderno nga mga templo kag dumaan nga tabernakulo amo nga ang duha, kon maintiendihan sing husto, nagapabakod sang aton pagtuo kay Jesucristo kag nagapuno sa aton sang kapasalamatan sa Iya nagabayad-sala nga halad. Gusto sang Dios nga makasulod ang tanan Niya nga kabataan sa Iya presensya; gusto Niya sang “ginharian [sang] mga [pari]” kag mga pari nga babayi (Exodo 19:6). Pero ginapunggan kita sang aton mga sala sa pagbaton sinang bugay, kay “wala sing di-matinlo nga butang nga makapuyo upod sa Dios” (1 Nefi 10:21). Gani ginpadala sang Dios nga Amay si Jesucristo, ang aton “pinakamataas nga [pari] sang maayong mga butang nga [magaabot]” (Mga Hebreo 9:11). Ginabuksan Niya ang belo para sa aton kag ginahatagan sang gahum ang tanan nga katawhan sang Dios nga “magpalapit nga may pagsalig sa trono sang bugay, agud nga makabaton kita sing kaluoy” (Mga Hebreo 4:16).
Sa karon nga panahon, ang katuyuan sang mga templo masobra pa sangsa pagbaton sang pagkahitaas para sa aton mga kaugalingon. Pagkatapos nga mabaton ang aton kaugalingon nga mga ordinansa, nagatindog kita para sa aton mga katigulangan, nga nagabaton sang mga ordinansa para sa ila. Sa isa ka bahin, daw mangin pareho kita sang dumaan nga pinakamataas nga pari—kag ang Dako nga Pinakamataas nga [Pari]—nga nagabukas sang alagyan padulong sa presensya sang Dios para sa iban.
Ang Halad Nagapabakod sang Pagtuo kay Jesucristo
Ang mga prinsipyo sang pagbayad-sala kag pag-uliay mabaskog nga ginatudlo sa dumaan nga ritwal sang paghalad sang sapat, nga ara na ngadaan antes pa sa layi ni Moises. Bangud sang ginpanumbalik nga ebanghelyo, nahibal-an naton nga si Adan kag Eva naghimo sang halad, nakaintiendi sang simbolismo sini sa halad sang Manluluwas, kag gintudlo ini sa ila kabataan (tan-awa sa Moises 5:4–12; tan-awa man sa Genesis 4:4).
Ang simbolismo sang paghalad sang sapat daw makabig nga makatalandog sa dumaan nga selebrasyon sang Israel nga Adlaw sang Katumbasan (“Yom Kippur” sa Hebreo). Ang kakinahanglan sining tuigan nga seremonya ginpahayag sa Levitico 16:30: “Sa sining adlaw himuon ang katumbasan tungod sa inyo, sa pagtinlo sa inyo, gikan sa tanan ninyo nga sala tinloan kamo sa atubangan sang Ginuo.” Gani ang presensya sang Dios magapabilin sa tunga sang katawhan. Ining katumbasan ginahimo paagi sa nagkalain-lain nga mga seremonya. Sa isa sini, ginpatay ang kanding bilang halad para sa mga sala sang katawhan, kag ginadala sang mataas nga pari ang dugo sang kanding sa pinakasagrado nga lugar. Sa ulihi, ginatungtong sang mataas nga pari ang iya mga kamot sa buhi nga kanding kag ginakumpisar ang mga sala sang mga anak sang Israel—simbolo sang pagsaylo sinang mga sala sa kanding. Dayon ginatabog ang kanding pagwa sa guban sang Israel.
Sa sining ritwal, ginasimbolo sang mga kanding si Jesucristo, nga nagatindog sa lugar sang makasasala nga katawhan. Ang sala indi kinahanglan pagpasugtan sa presensya sang Dios. Pero imbes nga laglagon ukon tabugon ang mga makasasala, naghatag ang Dios sang isa pa ka paagi—ang kanding amo ang patyon ukon tabugon. “[Kag] ang kanding magadala sa iya sang tanan nga kalautan nila” (Levitico 16:22).
Ang simbolismo sining mga ritwal nagatudlo sang alagyan nga ginhatag sang Dios para dalhon kita pabalik sa Iya presensya—si Jesucristo kag ang Iya Pagbayad-Sala. “Ginpas-an [sang Manluluwas] ang aton mga kalisud, kag gindala ang aton mga kasubo,” bisan “ang kalautan naton tanan” (Isaias 53:4, 6). Nagtindog Sia sa aton lugar, naghatag sang Iya kabuhi para bayaran ang sala, kag dayon ginlampuwasan ang kamatayon paagi sa Iya Pagkabanhaw (tan-awa sa Mosias 15:8–9). Ang halad ni Jesucristo amo ang “dako kag katapusan nga halad; huo, indi isa ka halad sang tawo, ukon indi man sang sapat” kundi “isa ka wala’y dulonan kag wala’y katapusan nga halad” (Alma 34:10). Sia ang katumanan sang tanan nga ginatudlo sang dumaan nga mga halad.
Sa sining rason, sang makompleto na ang Iya halad, Sia nagsiling, “Indi na kamo magdulot sa akon sang pagpaagay sang dugo; huo, ang inyo mga halad … pagadulaon na. … Kag magadulot kamo bilang isa ka halad sa akon sang isa ka buong nga tagipusuon kag isa ka mahinulsulon nga espiritu” (3 Nefi 9:19–20).
Gani kon makakita ka sang mga dinalan sa Daan nga Katipan nga parte sa mga halad kag sang tabernakulo (ukon sa ulihi, sang templo)—kag madamo ka sang makita nga amo sini—tandai nga ang mayor nga katuyuan sini amo nga pabakuron ang imo pagtuo sa Mesias, nga si Jesucristo. Tugoti ang imo tagipusuon kag ang imo kaisipan nga magliso sa Iya. Binagbinaga kon ano ang Iya ginhimo para dalhon ka pabalik sa presensya sang Dios—kag kon ano ang imo himuon para sundon Sia.