Templo sang São Paulo Brazil

Mayo 2–8

Exodo 35–40; Levitico 1; 16; 19

“Balaan sa Ginuo”

Sa imo pagtuon sang balaan nga mga kasulatan, tutoki ang espirituhanon nga mga pagpabatyag nga imo mabaton parte sa mga paagi nga sarang ka mangin mas pareho sa Amay nga Langitnon kag kay Jesucristo.

Isulat Ang Imo Mga Panghunahuna

Ang pagbiya sa Egipto—bisan importante kag milagroso pa ini—wala nagpahanabo sang tanan nga mga katuyuan sang Dios para sa mga anak sang Israel. Bisan ang palaabuton nga kabuganaan sa duta nga ginpangako wala sa pinakamataas nga katuyuan sang Dios para sa ila. Mga tikang lamang ini paabante sa kon ano gid ang luyag sang Dios para sa Iya katawhan: “Magpakabalaan kamo: kay Ako ang Ginuo nga inyo Dios balaan” (Levitico 19:2). Paano ginhandum sang Dios nga himuon ang Iya katawhan nga balaan kon ang ila lamang nahibal-an amo ang pagkabihag sa sulod sang madamo nga henerasyon? Ginsugo Niya sila nga maghimo sang lugar sang pagkabalaan sa Ginuo—isa ka tabernakulo sa kamingawan. Ginahatagan Niya sila sang mga kasugtanan kag mga layi para giyahan ang ila mga aksyon, kag, sa ulihi, bag-uhon ang ila mga tagipusuon. Kag sang nagkabos sila sa ila pagpaninguha nga tumanon ining mga layi, ginsugo Niya sila nga maghalad sang mga sapat bilang simbolo sang pagbayad sang ila mga sala. Ini tanan gintuyo nga itudlo ang ila mga kaisipan, ang ila mga tagipusuon, kag ang ila mga kabuhi padulong sa Manluluwas kag sa pagtubos nga Iya ginatanyag. Sia ang matuod nga dalan padulong sa pagkabalaan, para sa mga Israelnon kag para sa aton. Tanan kita naghinguyang sang tiyempo sa pagkabihag sa sala, kag tanan kita ginaagda nga maghinulsol—nga bayaan ang sala kag sundon si Jesucristo, nga nagpromisa, “Sarang ko kamo pakabalaanon” (Doktrina kag mga Kasugtanan 60:7).

 

Learn More image

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Exodus 35–40; Levitico 19

Gusto sang Ginuo nga himuon ako nga balaan pareho nga Sia balaan.

Nasulat sa Exodo 25–31 ang mga panulin sang Ginuo sa mga Israelnon kon paano ipatindog ang tabernakulo, kon diin sila buligan sang mga ordinansa nga mangin balaan nga katawhan. Ginalaragway sa Exodo 35–40 ang mga pagpaninguha sang mga Israelnon nga tumanon ining mga panulin. Samtang imo ginabasa ang mga kapitulo 35–40, pangitaa ang mga ginpangayo sang Ginuo nga ibutang sa tabernakulo, kag binagbinaga kon ano ang ginarepresentar sining mga butang kag kon ano ang ginapanugyan sini sa imo parte sa pagpatubo sang pagkabalaan. Mas pamensara kon paano ining mga butang nagaliso sang imo mga panghunahuna sa Manluluwas. Mahimo nga makabulig sa imo ang tsart nga pareho sini:

Ano nga butang ang imo nakita?	Ano ang ginarepresentar sini?
Ano nga butang ang imo nakita? Kaban sang pagpamatuod (Exodo 37:1–9; 40:20–21)	Ano ang ginarepresentar sini? Presensya sang Dios; ang Iya mga kasugtanan kag mga kasuguan
Ano nga butang ang imo nakita? Halaran sang incienso (Exodo 40:26–27; tan-awa man sa Exodo 30:1, 6–8)	Ano ang ginarepresentar sini? Mga pangamuyo nga nagasaka sa Ginuo
Ano nga butang ang imo nakita? Candelero ukon candelabra (Exodo 37:17–24)
Ano nga butang ang imo nakita? Altar nga halaran (Exodo 38:1–7; tan-awa man sa Exodo 27:1; 29:10–14)
Ano nga butang ang imo nakita? Batiya (palanghinawan) sang tubig (Exodo 30:17–21)

Kon nakapartisipar ka na sa mga ordinansa sa templo, ano ang imo matun-an parte sa tabernakulo sa Exodo 35–40 nga nagapadumdom sa imo sang imo eksperiyensya didto? (tan-awa man sa “Mga Dapat Tandaan: Ang Tabernakulo kag Halad”). Binagbinaga kon paano ka ginabuligan sang mga kasugtanan sa templo nga mangin balaan pareho sa Amay nga Langitnon kag kay Jesucristo.

Siyempre, ang simple nga pagkadto sa balaan nga mga lugar wala nagapakabalaan sa aton. Ginalaragway sa Levitico 19 ang mga layi kag kasuguan nga ginhatag sang Ginuo para buligan ang mga Israelnon nga magdugang sa pagkabalaan. Ano ang imo makita sa sining mga kasuguan nga makabulig sa imo nga mangin mas balaan? Ano ang nabatyagan mo nga dapat mo himuon para mas ipangabuhi ining mga prinsipyo sing lubos?

 

Exodo 35:4–36:7

Ginapangayo sang Ginuo sa akon nga maghatag sang akon mga halad nga halog sa akon tagipusuon.

Sang madason nga tuig pagkatapos nga magbiya sa Egipto, ang relasyon sang mga anak sang Israel kay Jehova malaragway nga indi tayuyon. Pero, samtang imo ginabasa ang Exodo 35:4–36:7, pat-ini kon paano nagresponde ang mga Israelnon sa kasuguan nga magpatindog sang tabernakulo. Ano ang imo matun-an sa mga Israelnon nga makabulig sa imo nga mas mag-alagad sa Ginuo?

Si Pangulong Bonnie L. Oscarson nagtudlo: “Ang tagsa ka miyembro dapat makahibalo kon daw ano sia kakinahanglanon. Ang tagsa ka tawo may importante nga maamot kag may pinasahi nga mga talento kag abilidad nga makabulig duso sining importante nga buluhaton” (“Young Women in the Work,” Liahona, Mayo 2018, 37). Samtang imo ginabasa ang Exodo 36:1–4, binagbinaga kon ano ang “ginbutang” sang Ginuo sa imo. Pamensara nga pamangkuton ang Amay nga Langitnon kon ano ang Iya ginhatag sa imo para makapakigbahin ka sa Iya buluhaton.

dumaan nga mga tawo nga nagadala sang mga halad sa tabernakulo

Naghatag ang mga anak sang Israel sang mga halad nga may “maalwan nga tagipusuon” (Exodo 35:5). Litrato ni Corbert Gauthier, © Lifeway Collection/lisensyado sa goodsalt.com

Levitico 1:1–9; 16

Paagi sa Pagbayad-sala ni Jesucristo, sarang ako mapatawad.

Madamo sang ara sa libro sang Levitico ang daw lain sa aton—paghalad sang mga sapat, mga ritwal nga nagagamit sang dugo kag tubig, kag mga layi nga nagadumala sang magagmay nga mga detalye sang kabuhi. Pero ining mga ritwal kag mga layi gintuyo nga magtudlo sang mga prinsipyo nga pamilyar—paghinulsol, pagkabalaan, kag ang Pagbayad-Sala sang Manluluwas. Para makita ining mga prinsipyo samtang imo ginabasa ang Levitico 1:1–9; 16, pamensara ang mga pamangkot pareho sini: Ano ang akon matun-an sa sining mga halad parte kay Jesucristo kag sa Iya nagabayad-sala nga sakripisyo? Sa ano ako nangin pareho sa mga nagahimo sining mga halad? Pwede mo man rebyuhon ang “Mga Dapat Tandaan: Ang Tabernakulo kag Halad” sa sining manwal.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Exodo 36:1–7.Sa Exodo 36:1–7, ano ang aton matun-an sa paagi nga nagresponde ang mga Israelnon sa sugo nga magpatindog sang tabernakulo? Bilang pamilya, pwede kamo magpamensar sang mga paagi nga gin-agda kamo sang Ginuo nga magpartisipar sa Iya buluhaton. Paano naton sundon ang ehemplo sang mga Israelnon?

Exodo 40.Samtang inyo ginabasa ang Exodo 40 sing ululupod, pwede mo agdahon ang mga miyembro sang pamilya nga alsahon ang ila mga kamot tagsa nga mabatian nila ang dinalan pareho sang “suno sa ginsugo sang Ginuo.” Ano ang aton matun-an sa sining kapitulo parte sa pagkamatinumanon sa Ginuo?

Exodo 40:1–34.Samtang inyo ginabasa ang parte sa pagtililipon sa tabernakulo sa Exodo 40, pwede ninyo bululigan nga kilalahon ang lainlain nga mga parte sang tabernakulo, nga ginagamit ang litrato nga nakalakip sa sining outline.  

Levitico 19.Pwede pangitaon sang mga miyembro sang pamilya ang bersikulo sa sining kapitulo nga pamatyag nila makabulig sa ila nga “magpakabalaan” (Levitico 19:2) kag iistorya ini sa pamilya.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

 

Pagpauswag sang Personal nga Pagtuon

Pangitaa si Jesucristo. Ang tanan nga balaan nga mga kasulatan, bisan pa ang Daan nga Katipan, nagapamatuod kay Jesucristo. Samtang imo ginabasa ang Daan nga Katipan, pamensara kon ano ang matudlo sa imo sang mga simbolo, mga tawo, kag mga hitabo parte sa Manluluwas.

tabernakulo

The Ancient Tabernacle [Ang Dumaan nga Tabernakulo], ni Bradley Clark