“Mayo 16–22. Deuteronomio 6–8; 15; 18; 29–30; 34: ‘Mag-andam Ka Basi nga Malipat Ka sa Ginuo,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)
“Mayo 16–22. Deuteronomio 6–8; 15; 18; 29–30; 34,” Dali, Magsunod sa Akon—Para sa Mga Indibidwal kag Mga Pamilya: 2022
Litrato ni Moises sa Bukid Nebo, © Providence Collection/lisensyado sa goodsalt.com
Mayo 16–22
Deuteronomio 6–8; 15; 18; 29–30; 34
“Mag-andam Ka Basi nga Malipat Ka sa Ginuo”
Ginsugo ni Moises ang mga anak sang Israel nga itudlo ang mga pulong sang Ginuo sa ila kabataan (tan-awa sa Deuteronomio 6:7). Samtang imo ginatun-an ang Deuteronomio sining semana, magpangita sang mga paagi nga mapaambit sa mga miyembro sang imo pamilya ang imo natun-an.
Isulat Ang Imo Mga Panghunahuna
Ang dutan-on nga pag-alagad ni Moises nagsugod sa bukid, sang nakighambal sa iya ang Dios halin sa nagakalayo nga sapinit (tan-awa sa Exodo 3:1–10). Natapos man ini sa bukid, masobra 40 ka tuig ang nagligad, sang ginpakita sang Dios kay Moises ang hitsura sang duta nga ginpangako halin sa ibabaw sang Bukid Nebo (tan-awa sa Deuteronomio 34:1–4). Naghinguyang si Moises sang iya kabuhi sa paghanda sang mga anak sang Israel nga magsulod sa sinang duta nga ginpangako, kag nasulat sa libro nga Deuteronomio ang iya katapusan nga mga panulin, mga pahanumdom, mga laygay, kag mga pangabay sa mga Israelnon. Sa pagbasa sang iya mga pulong maathag ang tunay nga katuyuan sang pag-alagad ni Moises—ang paghanda nga kinahanglan sang katawhan—indi agud makatibawas sa pagpangabuhi sa kamingawan, magpierde sang mga nasyon, ukon magtukod sang komunidad. Parte ini sa pagtuon nga palanggaon ang Dios, tumanon Sia, kag magpabilin nga tampad sa Iya. Amo ina ang preparasyon nga kinahanglanon naton tanan para makasulod sa ginpangako nga duta sang wala katapusan nga kabuhi. Gani bisan nga wala makatapak si Moises sa “duta nga nagailig sing gatas kag dugos” (Exodus 3:8), tungod sa iya pagtuo kag katutom, nakasulod gid sia sa duta nga ginpangako nga ginhanda sang Dios para sa tanan nga magasunod sa Iya.
Mga Ideya para sa Personal nga Pagtuon sang Balaan nga mga Kasulatan
Deuteronomio 6:4–7; 8:2–5, 11–17; 29:18–20; 30:6–10, 15–20
Gusto sang Ginuo nga palanggaon ko Sia sa bug-os ko nga tagipusuon.
Sa iya katapusan nga pinanudlo, ginpadumdom ni Moises ang mga anak sang Israel nga, “Sini nga kap-atan ka tuig ang Ginuo nga imo Dios nag-upod sa imo; wala sing bisan ano nga butang nga nakulang sa imo,” bisan pa nga samtang ara sa kamingawan (Deuteronomio 2:7). Karon nga nagapasulod na ang mga Israelnon sa duta nga ginpangako, sing “kabanwaanan, nga wala [nila] pagpatinduga, kag mga balay nga puno sang tanan nga maayo nga butang, nga wala [nila] pagpun-a” (Deuteronomio 6:10–11), nahadlok si Moises nga patig-ahon nila ang ila mga tagipusuon kag kalimtan ang Ginuo.
Pamensara ang kondisyon sang imo kaugalingon nga tagipusuon samtang imo ginabasa ang laygay ni Moises. Pwede mo tutokan ang masunod nga mga bersikulo kag isulat ang imo panghunahuna:
Ano ang sarang mo himuon para malikawan mo ang pagtig-a sang imo tagipusuon kag para palanggaon ang Ginuo sa bug-os mo nga tagipusuon? Ano ang koneksyon nga imo makita sa tunga sang Deuteronomio 6:5–6 kag Mateo 22:35–40? (tan-awa man sa Levitico 19:18).
“Mag-andam ka basi nga malipat ka sa Ginuo.”
Madamo sa henerasyon sang mga Israelnon nga magasulod sa duta nga ginpangako ang wala makasaksi sa mga kalalat-an sa Egipto ukon nagtabok sa Dagat nga Pula. Nakahibalo si Moises nga kinahanglan nila—kag sang palaabuton nga mga henerasyon—nga dumdumon ang mga milagro sang Dios kag ang mga layi sang Dios kon luyag nila nga magpabilin nga katawhan sang Dios.
Ano nga laygay ang ginhatag ni Moises sa Deuteronomio 6:4–12, 20–25 nga makabulig sa imo sa pagpanumdom sang dalagko nga mga butang nga ginhimo sang Dios para sa imo? Ano ang ginainspirar sa imo nga himuon para ang pulong sang Ginuo “manginsa imo tagipusuon” adlaw-adlaw? (bersikulo 6).
Paano mo ipasa ang imo pagtuo sa palaabuton nga mga henerasyon?
Tan-awa man sa Deuteronomio 11:18–21.
Ang pagbulig sa nagakinahanglan nagalakip sang maalwan nga mga kamot kag handa nga mga tagipusuon.
Ang Deuteronomio 15:1–15 nagahatag sang laygay parte sa pagbulig sa imol kag nagakinahanglan, lakip na ang pila ka partikular nga mga kostumbre nga wala na ginasunod sa karon. Pero pat-ini ang ginatudlo sining bersikulo kon ngaa dapat naton buligan ang imol kag kon paano nga may bili sa Ginuo ang aton pamatasan sa pagbulig sa ila. Ano sa pamatyag mo ang gusto sang Ginuo nga imo matun-an sa sining mga bersikulo parte sa pagbulig sa iban?
Si Jesucristo ang Propeta nga pagabangunon nga daw pareho kay Moises.
Si Pedro, Nefi, Moroni, kag ang Manluluwas Mismo ang nagkomentar sa propesiya sa Deuteronomio 18:15–19 (tan-awa man sa Mga Binuhatan 3:20–23; 1 Nefi 22:20–21; Joseph Smith—Kasaysayan 1:40; 3 Nefi 20:23). Ano ang imo matun-an parte sa Manluluwas sa sining mga bersikulo? Sa ano nangin “kaangay” sa Manluluwas si Moises? (Deuteronomio 18:15).
Si Jesucristo isa ka propeta pareho kay Moises.
Ano ang natabo kay Moises?
Bisan pa nga ginsiling sa Deuteronomio 34:5–8 nga napatay si Moises, ang paghangop sa ulihing-adlaw nagaklaro nga natigbaylo sia, ukon ginbag-o para indi sia mag-antos sang kasakit ukon kamatayon tubtob nga mabanhaw (tan-awa sa Alma 45:18–19. Kinahanglan ni Moises nga matigbaylo bangud nga kinahanglan niya nga makaangkon sang pisikal nga lawas para mahatag ang mga yabi sang priesthood kay Pedro, Santiago, kag Juan sa Bukid sang Pagbalhin sang Dagway (tan-awa sa Mateo 17:1–13).
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Deuteronomio 6:10–15.Ining mga bersikulo mahimo nga magtandog sa mga miyembro sang imo pamilya sa pagpamensar sang mga paagi nga ginbugayan ang inyo pamilya. Paano naton sundon ang laygay nga “mag-andam ka basi nga malipat ka sa Ginuo”? (Deuteronomio 6:12). Pwede man ninyo isulat ang inyo mga balatyagon parte sa inyo nga bugay, ayhan sa journal ukon sa FamilySearch.
-
Deuteronomio 6:13, 16; 8:3.Ang ining mga bersikulo nagbulig sa Manluluwas sa isa ka importante nga tion sa Iya kabuhi; para nahibal-an, basaha sing ululupod ang Mateo 4:1–10. Ano nga mga dinalan sa balaan nga mga kasulatan ang nakabulig sa aton sa tion sang panginahanglan?
-
Deuteronomio 7:6–9.Maghimo sang butang nga makabulig pabatyag sa mga miyembro sang imo pamilya nga pinasahi, pareho sang paghanda sang paborito nga pagkaon. Dayon pwede ninyo basahon ang Deuteronomio 7:6–9 kag hambalan kon ano sa pamatyag ninyo ang kahulugan sang mangin “labaw sa tanan nga katawhan” (bersikulo 6) sa Ginuo.
-
Deuteronomio 29:12–13.Ang paghambalanay parte sa Deuteronomio 29:12–13 nagahatag sang oportunidad para sa imo pamilya nga hambalan ang mga kasugtanan nga ila himuon ukon ginhimo na upod sa Amay nga Langitnon. Ano ang buot silingon sang mangin katawhan sang Dios? Sa ano ang aton mga kasugtanan “magapalig-on sa [aton] … nga isa ka katawhan sa [Dios]”? (bersikulo 13).
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Personal nga Pagtuon
Pangitaa ang imo kaugalingon nga espirituhanon nga paghangop. Ining outline nagapanugyan sang mga dinalan kag mga prinsipyo nga tutokan, pero indi pagtugoti nga limitahan sini ang imo pagtuon. Sa imo pagtuon, mahimo nga makatuon ka parte sa isa ka prinsipyo nga wala mamitlang diri. Tugoti ang Espiritu nga maggiya sa imo sa kinahanglan mo matun-an.
The Lord Shewed Him All the Land [Ginpakita sang Ginuo sa Iya ang Tanan nga Kadutaan], ni Walter Rane