“Mayo 9–15. Numeros 11–14; 20–24: ‘Dili Kamo Magrebelde sa Ginuo, Dili Magkahadlok,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)
“Mayo 9–15. Numeros 11–14; 20–24,” Dali, Magsunod sa Akon—Para sa Mga Indibidwal kag Mga Pamilya: 2022
Mayo 9–15
Numeros 11–14; 20–24
“Dili Kamo Magrebelde sa Ginuo, Dili Magkahadlok”
Ining outline nagatutok sa madamo nga malahalon nga mga prinsipyo sa libro nga Numeros. Magmangin bukas man sa iban nga mahimo ipakita sa imo sang Espiritu.
Isulat Ang Imo Mga Panghunahuna
Bisan pa nga lakton, sa kinaandan indi gid malab-utan sang 40 ka tuig nga biyahion ang kamingawan sang Sinai pakadto sa duta nga ginpangako sa Canaan. Pero amo sina kalawig ang kinahanglan sang mga anak sang Israel, indi para malab-ot ang pisikal nga kalayuon kundi ang espirituhanon nga kalayuon: ang distansya sang kon sin-o sila kag kon ano ang luyag sang Ginuo nga mangin sila bilang Iya katawhan sa kasugtanan.
Ginalaragway sa libro nga Numeros ang pila sa nagkalatabo sa sinang 40 ka tuig, lakip na ang mga leksyon nga kinahanglan matun-an sang mga anak sang Israel antes magsulod sa duta nga ginpangako. Natun-an nila ang mangin matinuohon sa pinili nga mga alagad sang Ginuo (tan-awa sa Numeros 12). Natun-an nila ang pagsalig sa gahum sang Ginuo, bisan pa nga daw wala na sing paglaum ang palaabuton (tan-awa sa Numeros 13–14). Kag natun-an nila nga ang pagkawala sing pagtuo ukon pagsalig nagadala sang espirituhanon nga peligro, pero pwede sila maghinulsol kag magtulok sa Manluluwas para mag-ayo (tan-awa sa Numeros 21:4–9).
Kita daw pareho man sa mga Israelnon sa pila ka bahin. Tanan kita nakahibalo kon daw ano ang magpangabuhi sa espirituhanon nga kamingawan, kag ang mga leksyon nga ila natun-an makabulig man sa aton nga maghanda sa pagsulod sa aton kaugalingon nga duta nga ginpangako: ang kabuhi nga wala katapusan upod sa aton Amay nga Langitnon.
Mga Ideya para sa Personal nga Pagtuon sang Balaan nga mga Kasulatan
Ang rebelasyon para sa tanan, pero ginagiyahan sang Dios ang Iya Simbahan paagi sa Iya propeta.
Sa Numeros 11:11–17, 24–29, tandai ang problema nga ginapangatubang ni Moises kag ang solusyon nga ginpanugyan sang Dios. Ano sa banta mo ang buot silingon ni Moises sang magsiling sia nga kuntani “ang bug-os nga katawhan sang Ginuo mga manalagna”? (bersikulo 29). Samtang imo ginabinagbinag ining mga bersikulo, pamensara ining mga pulong ni Pangulong Russell M. Nelson: “Ang Dios bala gusto gid nga mag-istorya sa imo? Huo! … O, kadamo pa kaayo sang gusto sang imo Amay sa Langit nga imo mahibal-an” (“Revelation for the Church, Revelation for Our Lives,” Liahona, Mayo 2018, 95).
Ugaling, ang pagsiling nga ang tanan pwede mangin propeta wala nagakahulugan nga tanan sila pwede nga magpanguna sa katawhan sang Dios pareho sa ginhimo ni Moises. Ang insidente nga nasulat sa Numeros 12 nagaathag sini. Samtang imo ginabasa ining kapitulo, ano nga mga paandam ang imo nakita? Ano sa pamatyag mo ang buot ipahangop sa imo sang Ginuo parte sa personal nga rebelasyon kag pagsunod sa propeta?
Tan-awa man sa 1 Nefi 10:17; Doktrina kag mga Kasugtanan 28:1–7.
Upod ang pagtuo sa Ginuo, sarang ako maglaum sa palaabuton.
Samtang imo ginabasa ang Numeros 13–14, tilawi nga ibutang ang imo kaugalingon sa lugar sang mga Israelnon. Ngaa sa banta mo nga gusto nila nga “magbalik sa Egipto”? (Numeros 14:3). Isa ka man bala sadtong mga nagaduha-duha sa pagsulod sa duta nga ginpangako? Paano mo ilaragway ang lain nga “espiritu” nga ara kay Caleb? (Numeros 14:24). Ano ang nanamian mo sa pagtuo ni Caleb kag Josue, kag paano mo gamiton ang ila nga ehemplo sa mga sitwasyon nga imo ginaatubang?
Kon magtulok ako kay Jesucristo nga may pagtuo, sarang Niya ako paayuhon sa espirituhanon.
Nahibal-an sang mga propeta sa Libro ni Mormon ang istorya nga nasulat sa Numeros 21:4–9 kag nakaintiendi sang espirituhanon nga importansya sini. Ano ang ginadugang sang 1 Nefi 17:40–41; Alma 33:18–22; kag Helaman 8:13–15 sa imo pag-intiendi sa sining istorya? Samtang ginatun-an mo ining mga dinalan, hunahunaa ang espirituhanon nga pagpang-ayo nga imo ginalauman. Kinahanglan sang mga Israelnon nga “[magtulok] sa man-og nga saway” (Numeros 21:9) para mag-ayo. Ano ang ginainspirar sa imo nga imo himuon para mas lubos nga “magtulok sa Anak sang Dios nga may pagtuo”? (Helaman 8:15).
Tan-awa man sa Juan 3:14–15; Doktrina kag mga Kasugtanan 6:36.
Nag-ayo ang mga Israelnon paagi sa pagtulok sa man-og nga saway.
Sarang ko nga sundon ang pagbuot sang Dios, bisan pa nga kumbinsihon ako sang iban nga indi.
Sang nahibal-an ni Balac, ang hari sang Moab, nga nagapadulong na ang mga Israelnon, ginpatawag niya si Balaam, ang lalaki nga kilala sa pagsambit sang mga bendisyon kag mga sumpa. Gusto ni Balac nga paluyahon niya ang mga Israelnon paagi sa pagsumpa sa ila. Tandai kon paano ginkumbinsi ni Balac si Balaam (tan-awa sa Numeros 22:5–7, 15–17), kag pamensara ang mga tentasyon nga imo atubangon para supakon ang pagbuot sang Dios. Ano ang nanamian mo sa mga sabat ni Balaam sa Numeros 22:18, 38; 23:8, 12, 26; 24:13?
Ang masubo, daw nadala gid si Balaam sang ulihi kag ginluiban ang Israel (tan-awa sa Numeros 31:16; Judas 1:11). Binagbinaga kon paano ka magpabilin nga tampad sa Ginuo wala sapayan sang pagpangumbinsi sang iban.
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Numeros 11:4–6.Ang aton pamatasan bala nangin pareho sa pamatasan sang mga Israelnon nga ginpahayag sa Numeros 11:4–6? Paano makabulig ang laygay sa Doktrina kag mga Kasugtanan 59:15–21?
-
Numeros 12:3.Paano ginpakita ni Moises nga “tama gid [sia] kamapainubuson” sa Numeros 12 ukon sa iban pa nga mga dinalan sa balaan nga kasulatan nga imo nabasa? Ano ang aton matun-an parte sa kon paano kita mangin mas mapainubuson? Ano nga mga bugay ang mahimo mag-abot kon himuon naton ini?
-
Numeros 13–14.Pwede ang duha (ukon masobra pa) ka mga miyembro sang inyo pamilya ang maghampang nga kuno abi “magaespiya” (Numeros 13:17) sang isa pa ka bahin sang inyo balay nga kuno abi amo ini ang duta nga ginpangako. Dayon ang kada isa sa ila magareport base sa Numeros 13:27–33 ukon Numeros 14:6–9. Ano ang aton matun-an parte sa pagtuo halin sa duha ka lainlain nga mga report sa sining mga bersikulo? Paano kita mangin mas pareho kanday Caleb kag Josue?
-
Numeros 21:4–9.Matapos nga basahon ang Numeros 21:4–9, upod ang 1 Nefi 17:40–41; Alma 33:18–22; kag Helaman 8:13–15, pwede maghimo ang inyo pamilya sang man-og nga papel ukon daga kag sulatan ini ukon sa papel sang simple nga mga butang nga pwede ninyo himuon para “magtulok sa Anak sang Dios nga may pagtuo” (Helaman 8:15).
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Aton Pagpanudlo
Buligi ang imo pamilya nga magpatubo sang espirituhanon nga pagsalig-sa-kaugalingon. “Imbes nga maghatag lamang sang impormasyon, buligi [ang mga miyembro sang imo pamilya] nga madiskubrehan ang mga kamatuoran sang ebanghelyo sa balaan nga mga kasulatan kag sa mga pulong sang mga propeta nga sila lang” (Teaching in the Savior’s Way, 28).
Moses and the Brass Serpent [Si Moises kag ang Man-og nga Saway], ni Judith A. Mehr