Litrato ni Moises nga nagaordin kay Josue, ni Darrell Thomas

Mayo 23–29

Josue 1–8; 23–24

“Magpakabakod kag Magpakaisog”

Samtang imo ginatun-an ang libro nga Josue, pamensara kon paano ginapatubo ang imo pagtuo kay Jesucristo sang mga butang nga imo matun-an parte sa mga Israelnon.

Isulat Ang Imo Mga Panghunahuna

Nalab-utan sang pila ka henerasyon, pero ang promisa sang Ginuo malapit na lang matuman: madali na lang gid mapanubli sang mga anak sang Israel ang duta nga ginpangako. Pero nagabalabag sa ila ang Suba sang Jordan, ang mga pader sang Jerico, kag ang malain pero makusog nga katawhan nga nagsikway sa Ginuo (tan-asa sa 1 Nefi 17:35). Dugang pa sina, wala na ang ila pinalangga nga lider nga si Moises. Mahimo nga nagpaluya kag nagpahadlok ining sitwasyon sa pila ka mga Israelnon, pero nagsiling ang Ginuo, “Magpakabakod kag magpakaisog.” Ngaa amo sini dapat ang ila batyagon? Indi bangud sa ila kaugalingon nga kusog—ukon kay Moises ukon kay Josue—kundi tungod “kay ang Ginuo nga imo Dios nagaupod sa imo bisan diin ka makadto” (Josue 1:9). Kon may kaugalingon kita nga mga suba nga dapat tabukon kag mga pader nga dapat rumpagon, sarang matabo ang matahum nga mga butang sa aton kabuhi, tungod kay “ang Ginuo [amo ang] magahimo sa tunga [naton] sing mga kalatingalahan” (Josue 3:5).

Mga Ideya para sa Personal nga Pagtuon sang Balaan nga mga Kasulatan

Josue 1:1–9

Ang Dios magaupod sa akon kon matinuohon ako sa Iya.

Hunahunaa kon daw ano ayhan kay Josue nga tawgon para magbulos kay Moises. Tandai ang ginsiling sang Ginuo sa Josue 1:1–9 para paisugon sia. Hunahunaa ang mabudlay nga mga hangkat nga imo ginaatubang; ano sa sining mga bersikulo ang nagahatag sa imo sing kaisog?

Mahimo nga makawiwili nga tandaan nga ang ngalan nga Josue (Yehoshua ukon Yeshua sa Hebreo) nagakahulugan sang “si Jehova nagapangluwas.” Kag ang ngalan nga Jesus naghalin sa Yeshua. Gani samtang imo ginabasa ang Josue, pamensara kon paano ang iya misyon nga pangunahan ang mga anak sang Israel pakadto sa duta nga ginpangako nagapadumdom sa imo sang misyon sang Manluluwas.

Josue 2

Ang pagtuo kag mga buhat pareho nga kinahanglanon para sa kaluwasan.

Ang una nga mga Kristiyano nagkabig kay Rahab bilang halimbawa sang gahum sang pareho nga pagtuo kag mga buhat (tan-awa sa Mga Hebreo 11:31; Santiago 2:25). Samtang imo ginabasa ang Josue 2, pamensara ang papel sang pagtuo kag mga buhat ni Rahab sa pagluwas sang iya kaugalingon, sang iya pamilya, kag sang Israelnon nga mga espiya. Ano ang ginatudlo sini sa imo parte sa kon paano nagaimpluwensya ang imo pagtuo kay Cristo kag ang imo mga buhat sa imo kaugalingon kag sa iban?

Mahimo nga interesado ka nga mahibal-an nga si Rahab himata ni Haring David kag ni Jesucristo (tan-awa sa Mateo 1:5). Ano ang posible nga mga leksyon nga matun-an naton diri?

Si Rahab sa iya bintana. Waiting for the Promise [Nagahulat sa Promisa], ni Elspeth Young.

Josue 3–4

Sarang ko maeksperiyensyahan ang “mga kalatingalahan” sang Dios kon may pagtuo ako kay Jesucristo.

Gusto sang Ginuo nga “ang tanan nga mga katawhan sang duta makakilala sang kamot sang Ginuo nga gamhanan” (Josue 4:24). Samtang imo ginabasa ang Josue 3–4, binagbinaga kon paano mo nahibal-an nga ang kamot sang Ginuo gamhanan. Paano naghimo ang Ginuo sang “mga kalatingalahan” sa imo kabuhi? (Josue 3:5). Paano mo maeksperiyensyahan -—ukon makilala—pirme inang mga kalatingalahan? (halimbawa, tan-awa sa Josue 3:17).

Ngaa sa banta mo nga kinahanglan sang mga Israelnon nga pakabalaanon ang ila kaugalingon antes sila magtabok sa Suba sang Jordan? Ano ang kahulugan nga imo nakita sa kamatuoran nga nagtunga lamang ang suba pagkatapos nga ang “mga tiil sang mga pari … nakatusmog sa bibi sang tubig”? (Josue 3:13, 15).

Para sa iban nga makahulugan nga mga hitabo nga natabo sa Suba sang Jordan, tan-awa sa 2 Mga Hari 2:6–15; 5:1–14; kag Marcos 1:9–11. Samtang imo ginabinagbinag ining balaan nga mga kasulatan, ano ang koneksyon nga imo makita sa sining mga hitabo?

Josue 6–8

Ang pagkamatinumanon nagadala sang gahum sang Dios sa akon kabuhi.

Ining mga kapitulo nagatalakay sang mga giyera sa kadutaan sang Jerico kag Ai. Samtang ginabasa mo ini, pamensara kon paano mo ginaaway ang tentasyon sa imo kaugalingon nga kabuhi (halimbawa, tan-awa sa Josue 7:10–13). Ano ang imo matun-an parte sa kon paano ka ginabuligan sang Dios kag kon ano ang kinahanglan mo himuon para mabaton ang Iya gahum? Halimbawa, ano ang nanamian mo sa mga instruksyon sang Ginuo para makuha ang Jerico? (tan-awa sa Josue 6:1–5). Basi makainspirar sa imo ang sinulatan sa Josue 7 nga hibaluon kon bala may “[malain] nga butang” sa imo kabuhi nga kinahanglan mo kakason (Josue 7:13).

Josue 23–24

“[Magpanguyapot] sa Ginuo nga imo Dios.”

Matapos nga tungaon ang duta nga ginpangako sa dose ka mga tribo sang Israel (tan-awa sa Josue 13–21), ginhatag ni Josue sa ila ang iya katapusan nga mga panudlo. Samtang imo ginabasa ining mga pinanudlo sa Josue 23–24, mahimo ka magtago sang listahan sang mga paandam, mga laygay, kag ginpromisa nga mga bugay nga imo makita. Sa tanan nga inagyan sang mga Israelnon, ngaa sa banta mo nga ginpili ni Josue nga ihambal ini sa ila sa katapusan sang iya kabuhi? Ano ang imo nakita nga nagainspirar sa imo nga “[magpanguyapot] sa Ginuo”? (Josue 23:8).

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Josue 1:8.Ano ang ginapanugyan sining bersikulo parte sa kon paano naton himuon ang aton pagtuon sang balaan nga mga kasulatan, pareho sa indibidwal kag bilang pamilya? Paano ginhimo sang balaan nga mga kasulatan nga “bugana ang [aton] dalanon” kag naghatag sa aton sing “maayo nga kauswagan”?

Josue 4:3, 6–9.Pagkatapos nga basahon kon ano ang gusto nga ipahimo sang Ginuo sa mga Israelnon sa mga bato sa Suba sang Jordan, pwede ninyo hambalan sang imo pamilya ang pila sa dalagko nga mga butang nga ginhimo sang Ginuo para sa inyo. Dayon pwede ninyo hatagan ang tagsa ka miyembro sang pamilya sang bato kag agdahon sila nga sulatan ukon drowingan ini sang butang nga ginhimo sang Ginuo para sa ila.

Josue 6:2–5.Mahimo nga masadyanan ang imo pamilya sa pagdrama-drama sang mga instruksyon nga ginhatag sang Ginuo sa mga Israelnon para mapierde ang Jerico. Ano ayhan ang gusto sang Ginuo nga matun-an naton sa sining istorya?

Josue 24:15.Pagkatapos nga basahon ining bersikulo, pwede mag-istorya ang mga miyembro sang pamilya sang mga eksperiyensya sang ila ginpili nga mag-alagad sa Ginuo bisan pa nga mabudlay. Ngaa importante nga magdesisyon na nga mag-alagad sa Iya “sini nga adlaw” imbes nga hulaton pa kag magdesisyon kon ara na sa sitwasyon? Paano naton suportahan ang mga miyembro sang aton “panimalay” samtang nagatinguha kita nga “mag-alagad sa Ginuo”?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Do What Is Right [Himoa Ang Husto],” Mga Himno kag mga Ambahanon sang Kabataan, no. 34–35.

Pagpauswag sang Aton Pagpanudlo

Magpaambit sang imo testimonya pirme. Ang imo sinsero nga saksi sang kamatuoran mabaskog nga makaimpluwensya sang imo pamilya. Indi ini kinahanglan nga matahum ukon malaba. Ang testimonya pinakamabaskog kon direkta ini kag hugot sa balatyagon. (Tan-awa sa Teaching in the Savior’s Way, 11.)

Ginpahanabo sang Ginuo nga marumpag ang mga pader sang Jerico. © Providence Collection/lisensyado sa goodsalt.com