Litrato ni Debora nga nagapanguna sa kasoldadohan sang Israel, © Lifeway Collection/lisensyado sa goodsalt.com

Mayo 30–Hunyo 5

Mga Hukom 2–4; 6–8; 13–16

“Ang Ginuo Magabangon sang Manluluwas”

Ang balaan nga mga kasulatan nagapamatuod kay Jesucristo. Binagbinaga kon paano ka ginabuligan sang mga istorya nga imo mabasa sa Mga Hukom nga magpalapit pa gid sa Iya.

Isulat Ang Imo Mga Panghunahuna

Tanan kita nakahibalo kon daw ano ang makahimo sang sayop, maglain ang buot tungod sini, kag dayon maghinulsol kag magdesisyon nga bag-uhon ang aton mga pangginawi. Pero sa pila ka mga kaso nagakalipat kita sang aton desisyon sang nagligad, kag, kon nagapangatubang kita sang tentasyon, mahimo nga suliton naman naton ang aton sayop. Ining masubo nga pagsulit-sulit masami makita sa mga eksperiyensya sang mga Israelnon nga ginlaragway sa libro nga Mga Hukom. Nga ginaimpluwensyahan sang mga pagpati kag pamaagi sang pagsimba sang mga taga-Canaan—nga ila dapat gintabog pagwa sa duta—ginlapas sang mga Israelnon ang ila kasugtanan sa Ginuo kag nagtalikod sa pagsimba sa Iya. Bilang resulta, nawad-an sila sang Iya proteksyon kag nahulog sa pagkabihag. Pero sa tagsa nga matabo ini, ginahatagan sila sang Ginuo sang tsansa nga maghinulsol kag nagabangon sang manluluwas, isa ka lider sa militar nga ginatawag “hukom.” Indi tanan nga mga hukom sa libro nga Mga Hukom matarong, pero ang pila sa ila naggamit sang dako nga pagtuo sa pagluwas sa mga anak sang Israel kag sa pagbalik sa ila sa ila kaangtanan sa kasugtanan upod sa Ginuo. Ining mga istorya nagapadumdom sa aton nga bisan ano pa ang nagdala sa aton palayo kay Jesucristo, Sia ang Manunubos sang Israel kag handa pirme nga luwason kita kag abiabihon pabalik sa Iya.

 

Mga Ideya para sa Personal nga Pagtuon sang Balaan nga mga Kasulatan

Mga Hukom 2:1–19; 4:1–16

Ang Ginuo nagatanyag sang kaluwasan kon magtalang ako.

Ang libro nga Mga Hukom makaserbe nga paandam sa aton: bisan pagkatapos nga maeksperiyensyahan naton ang gahum sang Ginuo sa aton mga kabuhi, posible gid pirme nga magtalikod sa Iya. Makahatag man sang pagpaisog ang libro sa mga nagtalikod na, kay ang Ginuo nagatanyag sang dalan pabalik. Halimbawa, samtang imo ginabasa ang Mga Hukom 2:1–19, pangitaa ang mga aksyon nga nagdala sa mga Israelnon palayo sa Ginuo kag kon paano sila ginluwas sang Ginuo. Ano ang ginatudlo sa imo sining mga bersikulo parte sa Ginuo? Ano ang sarang mo himuon para magpabilin nga padayon nga nagatuo sa Iya?

Makita mo ang sulit-sulit nga pagrebelde, kasubo, kag pagluwas sa bilog nga Mga Hukom (tan-awa partikular na sa mga kapitulo 3, 4, 6, kag 13). Samtang imo ginabasa ang libro nga Mga Hukom, binagbinaga kon ano ang ginhimo sang mga hukom para luwason ang Israel kag kon paano ka ginabuligan sang Manluluwas kon kinahanglan mo sing kaluwasan.

Isa ka matahum nga halimbawa sang tawo nga nagbulig luwas sang Israel amo si Debora. Basaha ang parte sa iya sa Mga Hukom 4:1–16, kag tandai ang iya impluwensya sa mga tawo sa iya palibot. Ano nga mga tinaga ukon aksyon ni Debora ang nagapakita sa imo nga may pagtuo sia sa Ginuo? Ano sa pamatyag mo ang buot silingon ni Debora sa iya pamangkot sa bersikulo 14: “Wala bala maggwa ang Ginuo sa una nimo?”

Tan-awa man sa Alma 7:13; Doktrina kag mga Kasugtanan 84:87–88.

Mga Hukom 2:13

Sin-o sanday Baal kag Astarot?

Si Baal amo ang dios sang bagyo sang Canaan, kag si Astarot amo ang diosa sang Canaan sa pagpanganak. Ang pagsimba sa sining duha ka dios-dios nagapakita kon daw ano kaimportante ang katambok sang duta kag ang pagpamata sa mga taga-Canaan. Ang pamaagi nga ginasimba sining katawhan ini kag ang iban pa nga dios-dios—nga nagalakip, kon kaisa, sang sekswal nga imoralidad kag paghalad sang kabataan—tama ka makailinsulto sa Ginuo.

Mga Hukom 6–8

Makahikot ang Ginuo sang mga milagro kon magsalig ako sa Iya pamaagi.

Para mabaton ang mga milagro sang Ginuo sa aton mga kabuhi, kinahanglan naton nga magsalig sa Iya pamaagi, bisan sa pamatyag naton daw indi kinaandan ang Iya pamaagi. Ang istorya ni Gideon, nga makita sa Mga Hukom 6–8, isa ka maayo nga ehemplo sini. Paano ginhikot sang Ginuo ang wala ginapaabot nga milagro sang ginpierde sang mga soldado ni Gideon ang mga Midianhon? Ano sa pamatyag mo ang gusto itudlo sa imo sang Ginuo? Paano mo nakita ang Ginuo nga ginahimo ang Iya buluhaton sa pamaagi nga daw wala ginapaabot?

 

Mga Hukom 13–16

Ang kusog resulta sang pagkamatinumanon sa akon mga kasugtanan sa Dios.

Nadula kay Samson ang iya pisikal nga kusog kag ang iya espirituhanon nga kusog tungod iya ginlapas ang iya mga kasugtanan sa Dios, lakip na inang para gid sa mga Nazareo, (para sa impormasyon parte sa mga Nazareo, tan-awa sa Numeros 6:1–6; Mga Hukom 13:7). Samtang imo ginabasa ang istorya ni Samson sa Mga Hukom 13–16, binagbinaga ang tagsa ka kasugtanan nga imo ginhimo. Sa ano ka ginbugayan sang kusog tungod nga gintuman mo inang mga kasugtanan? Ano ang imo matun-an sa istorya ni Samson nga nagainspirar sa imo nga magpabilin nga tampad sa imo mga kasugtanan sa Dios?

Samson Puts Down the Pillars [Gintumba ni Samson ang mga Haligi], ni James Tissot kag iban pa

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Mga Hukom 2:10.Sang mapatay si Josue, ang madason nga henerasyon sang mga Israelnon “wala makakilala sa Ginuo.” Hambali upod sa imo pamilya kon paano nila nakilala ang Ginuo kag ang “mga buhat nga iya nahimo [na]” para sa ila. Paano mo siguruhon nga matipigan ining ihibalo para sa palaabuton nga mga henerasyon?

Mga Hukom 3:7–10.Ining mga bersikulo nagapalip-ot sang pagsulit-sulit nga masami nagakatabo sa bilog nga libro nga Mga Hukom. Samtang ginabasa sang mga miyembro sang imo pamilya ining mga bersikulo, pwede nila pangitaon kon ano ang ginhimo sang Israel para magpalayo sa Ginuo kag kon ano ang ginhimo sang Ginuo para luwason sila. Ano ayhan ang magtulod sa aton nga kalimtan ang Ginuo? Paano Niya kita luwason? Paano kita padayon nga mangin mas matinuohon sa Iya?

Mga Hukom 6:13–16, 25–30.Nagpakita si Gideon sang dako nga kaisog sa pagtuman sa Ginuo, bisan pa nga indi popular ang iya mga aksyon. Ano ang ginapangayo sa aton sang Ginuo nga posible wala ginaugyunan sang iban? Paano kita mainspirar sang mga pulong sang Ginuo kay Gideon sa mga bersikulo 13–16 nga himuon ang husto?

Mga Hukom 7.Pwede ka bala maggamit sang role play ukon iban pa nga masadya nga aktibidades para buligan ang imo pamilya nga makatuon sa eksperiyensya sang kasoldadohan ni Gideon sa sining kapitulo? Paano magamit ang mga pulong sang Ginuo sa sining kapitulo (tan-awa halimbawa, sa mga bersikulo 2 and 15) sa aton mga kabuhi?

Mga Hukom 13:5.Ang mga kasugtanan ni Samson sa Ginuo ang naghatag sa iya sing kusog, pareho nga ang aton mga kasugtanan nagahatag sa aton sing kusog. Mahimo nga masadyahan ang imo pamilya sa paghimo sang pisikal nga mga ehersisyo kag hambalan kon paano makabulig sa aton ining mga ehersisyo nga mangin makusog. Ano ang pwede naton himuon nga makabulig sa aton nga mangin mas makusog sa espirituhanon? Para sa pila ka mga ideya, pwede nga basahon sang mga miyembro sang pamilya ang Mosias 18:8–10; Doktrina kag mga Kasugtanan 20:77, 79. Paano nagahatag sa aton sang espirituhanon nga kusog ang pagtuman sang aton mga kasugtanan?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Redeemer of Israel [Manunubos sang Israel],” Mga Himno kag mga Ambahanon sang Kabataan, no. 5.

Pagpauswag sang Personal nga Pagtuon

Aktuhi ang imo natun-an. Samtang nagatuon ka, pamangkuta ang imo kaugalingon kon paano mo gamiton ang imo ginatun-an, kag mangako nga himuon ini. Tugoti ang Espiritu nga maggiya sa imo. (Tan-awa sa Teaching in the Savior’s Way, 35.)

Gideon’s Army [Ang Kasoldadohan ni Gideon], ni Daniel A. Lewis