Si Rut kag Noemi

Whither Thou Goest [Bisan Diin Ka Makadto], ni Sandy Freckleton Gagon

Hunyo 6–12

Rut; 1 Samuel 1–3

“Ang Akon Tagipusuon Nagakasadya sa Ginuo”

Samtang imo ginatun-an ang mga kabuhi nanday Rut, Noemi, Ana, kag sang iban pa sining semana, pamatii sing maayo ang Espiritu kag isulat ang bisan ano nga panghunahuna nga imo mabaton. Ano ang ginpabatyag sa imo nga imo himuon?

Isulat Ang Imo Mga Panghunahuna

Kon kaisa ginapanumdom naton nga ang aton kabuhi dapat magsunod sang klaro nga dalan halin sa umpisa hasta sa katapusan. Ang pinakamalip-ot nga distansya sa tunga sang duha ka punta amo ang tadlong nga linya, kon pamensaron gid. Ugaling ang kabuhi masami puno sang pagkaatrasar kag mga likuon nga nagadala sa aton sa wala ginapaabot nga mga direksyon. Mahimo nga matalupangdan naton nga medyo lain ang aton mga kabuhi sangsa aton ginahunahuna.

Sigurado nga naintiendihan ini ni Rut kag Ana. Indi Israelnon si Rut, pero namana sia sang Israelnon, kag sang mapatay ang iya bana, kinahanglan niya nga magdesisyon. Mabalik bala sia sa iya pamilya kag sa iya daan, pamilyar nga pangabuhi, ukon batunon bala niya ang pagtuo sang Israel kag ang bag-o nga puluy-an upod sa iya ugangan nga babayi? (tan-awa sa Rut 1:4–18). Ang plano ni Ana sa iya kabuhi amo ang magpamata, kag ang iya kakulangan nga himuon ini nagbilin sa iya nga “may [kapait] sa kalag” (tan-awa sa 1 Samuel 1:1–10). Samtang imo ginabasa ang parte sa ila ni Rut kag Ana, pamensara ang pagtuo nga ara sa ila para isalig ang ila mga kabuhi sa kamot sang Ginuo kag magpanglakaton sa wala nila ginapaabot nga dalanon. Dayon mahimo mo man pamensaron ang imo kaugalingon nga pagpanglakaton. Mangin lain ini sangsa ila ni Rut kag Ana—kag sa iban pa. Pero sa tanan nga mga pagtilaw kag sorpresa sa tunga sang karon kag sang imo wala katapusan nga destinasyon, matun-an mo nga magsiling upod kay Ana, “Ang akon tagipusuon nagakasadya sa Ginuo” (1 Samuel 2:1).

 

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Rut

Sarang ni Cristo baylohan sang kadalag-an ang trahedya.

Sang mapatay ang bana ni Rut, may mga konsikwensya ining trahedya para sa iya nga mas malala pa sangsa mahimo atubangon sang isa ka balo sa karon nga panahon. Sa Israelnon nga kultura sadtong panahon, ang babayi nga wala sing bana ukon kabataan nga lalaki wala sing kinamatarong sa propyedad kag wala sing paagi nga makakita sang palangitan-an. Samtang imo ginabasa ang istorya ni Rut, tandai kon paano ginbaylohan sang Ginuo ang trahedya sang dalagko nga mga bugay. Ano ang imo natalupangdan kay Rut nga mahimo nakabulig sa iya? Ano ang papel ni Boaz sa pagtubos kay Rut sa iya mabudlay nga sitwasyon? (tan-awa sa Ruth 4:4–7). Ano nga Cristohanon nga mga kinaiya ang imo nakita sa ila ni Rut kag Boaz?

Rut; 1 Samuel 1

Makasalig ako nga giyahan ako kag buligan sang Ginuo bisan ano pa ang akon sitwasyon.

Makita mo bala ang imo kaugalingon sa mga istorya nanday Rut, Noemi, kag Ana? Basi nakaangkon ka man sing dako nga kawad-an, pareho sa ila ni Rut kag Noemi (tan-awa sa Rut 1:1–5). Ukon basi, pareho kay Ana, nagahandum ka man sang mga bugay nga wala mo pa nabaton (tan-awa sa 1 Samuel 1:1–10). Binagbinaga kon ano nga mga mensahe ang imo matun-an sa mga halimbawa sining matinuohon nga mga babayi. Paano ginpakita nanday Rut kag Ana ang pagtuo sa Dios? Ano nga mga bugay ang ila nabaton? Paano mo sundon ang ila mga ehemplo? Pamensara kon paano ka “nagkari sa pagdangop” sa Ginuo (Rut 2:12) bisan pa nga daw mabudlay ang kabuhi.

Tan-awa man sa Reyna I. Aburto, “Thru Cloud and Sunshine, Lord, Abide with Me! [Sa Gal-um kag Kasanag sang Adlaw, Ginuo, Updi Ako!]” Liahona, Nob. 2019, 57–60.

Si Ana kag Samuel

For This Child I Prayed [Tungod Sini nga Bata Nagpangamuyo Ako], ni Elspeth Young

1 Samuel 2:1–10

Ang akon tagipusuon sarang nga magkasadya sa Ginuo.

Sang gindala ni Ana ang hubin pa nga si Samuel sa templo, nagsambit sia sang matahum nga mga tinaga sa pagdayaw sa Ginuo, nga nasulat sa 1 Samuel 2:1–10. Ining mga tinaga mas nangin makatalandog pa gid tungod sang malip-ot nga tion antes sina, “sia may kapaitan sa kalag, … kag naghibi sing tama” (1 Samuel 1:10). Samtang ginatun-an mo ining mga bersikulo, ano nga mga mensahe ang imo nakita nga nagapatubo sang imo mga balatyagon sang pagdayaw kag kapasalamatan sa Ginuo? Ayhan makainspirar sa imo ang kanta ni Ana nga magpangita sang matugahon (creative) nga paagi para ipahayag ang imo pagpasalamat sa Ginuo—sa kanta, pagpinta, buhat sang pag-alagad, ukon bisan ano nga nagapalab-ot sang imo balatyagon sa Iya.

Siyempre, indi tanan nga hugot nga pangamuyo ginasabat sa paagi nga pareho kay Ana. Ano ang nagabulig sa imo nga magpabilin nga matinuohon kon ang imo mga pangamuyo wala ginasabat sa paagi nga imo ginapaabot? 

1 Samuel 3

Sarang ko nga mabatian kag tumanon ang tingug sang Ginuo.

Pareho sa aton tanan, kinahanglan ni Samuel nga matun-an kon paano kilalahon ang tingug sang Ginuo. Samtang imo ginatun-an ang 1 Samuel 3, ano ang imo matun-an sa sining lamharon nga bata nga lalaki parte sa pagpamati kag pagtuman sang tingug sang Ginuo? Ano ang imo mga eksperiyensya sa pagpamati sa Iya tingug? Ano nga mga oportunidad ang ara sa imo, pareho kay Eli, nga makabulig sa iban nga mahibal-an kon ang Ginuo nagahambal sa ila? (tan-awa sa 1 Samuel 3:7).

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Rut 1:16–18; 2:5–8, 11–12.Pwede nga pangitaon sang imo pamilya ang mga halimbawa sang kaayo kag katampad sa ining mga bersikulo. Paano naton ipakita ang kaayo sa aton pamilya kag sa iban kag ang katampad kay Jesucristo?  

1 Samuel 1:15.Basi pwede ka mag-ula sang bisan ano halin sa isa ka suludlan para buligan ang mga miyembro sang pamilya nga mapanan-aw kon ano ang buot silingon ni Ana sang magsiling sia, “Gin-ula … ko ang akon kalag sa atubangan sang Ginuo.” Ngaa maayo ini nga paagi para ilaragway kon daw ano dapat ang aton mga pangamuyo? Paano naton pauswagon ang aton personal kag pang-pamilya nga mga pangamuyo?

1 Samuel 2:1–10.Ang binalaybay ni Ana sa pagdayaw sa Ginuo mahimo nga magpadumdom sa inyo sang mga kanta nga inyo ginagamit para dayawon ang Ginuo. Pwede ninyo ini kantahon sing ululupod. Pwede man nga magpamensar ang mga miyembro sang imo pamilya sang iban pa nga mga paagi para ipahayag ang ila mga balatyagon kay Jesucristo. Halimbawa, pwede sila magdrowing sang mga litrato nga nagapakita kon ngaa palangga nila ang Manluluwas.

1 Samuel 3:1–11.Basi mangin masadya nga idrama-drama ang istorya sang gintawag sang Ginuo si Samuel. Pwede nga hambalan sang mga miyembro sang pamilya ang tinion nga nabatyagan nila nga nagahambal ang Ginuo sa ila kag kon paano nila gin-aktuhan ang Iya mga pulong.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

 

Pagpauswag sang Personal nga Pagtuon

Tugoti ang Espiritu nga giyahan ang imo pagtuon. Magpangamuyo nga ang Balaan nga Espiritu magagiya sa imo sa mga butang nga kinahanglan mo matun-an. Mangin mabinatyagon sa Iya mga paghutik, bisan pa nga magatulod ini sa imo nga magbasa parte sa topiko nga wala mo ginapaabot ukon magtuon sa lain nga paagi.

ang bata nga Samuel sa tolda

Litrato ni Samuel nga nagapamati sa Ginuo, ni Sam Lawlor