“Hunyo 20–26. 2 Samuel 5–7; 11–12; 1 Mga Hari 3; 8; 11: ‘Ang Imo Ginharian Papag-unon sing Dayon,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)

“Hunyo 20–26. 2 Samuel 5–7; 11–12; 1 Mga Hari 3; 8; 11,” Dali, Magsunod sa Akon—Para sa Mga Indibidwal kag Mga Pamilya: 2022

Litrato

Si Haring David nga nagapungko sa trono

King David Enthroned [Si Haring David sa Trono], ni Jerry Miles Harston

Hunyo 20–26

2 Samuel 5–7; 11–12; 1 Mga Hari 3; 8; 11

“Ang Imo Ginharian Papag-unon sing Dayon”

“Ang bug-os nga kasulatan ginbugna sang Dios, kag mapuslanon sa pagpanudlo, sa pagsabdong, sa pagsaway, kag sa paghanas sa pagkamatarong” (2 Timoteo 3:16).

Isulat Ang Imo Mga Panghunahuna

Ang pagdumala ni Haring David nagsugod nga mataas kaayo ang ginapaabot. Indi matupungan ang iya wala kahadlok nga pagtuo sa pagpierde kay Goliat. Bilang hari, ginseguro niya ang Jerusalem bilang iya kapitolyo kag gin-isa ang Israel (tan-awa sa 2 Samuel 5). Mas nangin mabaskog pa gid ang ginharian. Wala sapayan sini nagpadala si David sa tentasyon kag nawad-an sia sing espirituhanon nga gahum.

Ang pagdumala sang anak ni Haring David nga si Salomon nagsugod man nga mataas kaayo ang ginapaabot. Ang diosnon niya nga bugay sang kaalam kag paghangop dalayawon. Bilang hari, ginpalapad niya ang mga dulunan sang Israel kag nagpatindog sang matahum nga templo para sa Ginuo. Mas nangin mabaskog pa gid ang ginharian. Wala sapayan sini gintugtan ni Salomon nga magliso ang iya tagipusuon sa iban pa nga mga dios.

Ano ang aton matun-an sa sining masubo nga mga istorya? Ayhan isa ka leksyon amo nga wala sapayan sang aton nagliligad nga mga eksperiyensya, ang aton espirituhanon nga kusog nagadepende sa mga pagpili nga aton ginahimo sa karon. Makita man naton sa sining mga kasulatan nga indi ang aton kaugalingon nga kusog ukon kaisog ukon kaalam ang magaluwas sa aton—ang iya sang Ginuo. Ang ining mga istorya nagapakita sa aton nga ang matuod-tuod nga paglaum sang Israel—kag naton—wala kay David, Salomon, ukon sa bisan sin-o nga mortal nga hari, kundi sa isa pa ka “anak ni David”: si Jesucristo (Mateo 1:1), ang Wala Katapusan nga Hari nga “[magapatawad sang] sala sang [Iya] katawhan” kon kita “magbalik liwat sa [Iya]” (1 Mga Hari 8:33–34).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

2 Samuel 5:17–25

Mahatagan ako sang Ginuo sang direksyon.

Sang mahiusa ni David ang Israel (tan-awa sa 2 Samuel 5:1–5), kinahanglan niya nga pangapinan ang iya katawhan batok sa mga Filistinhon. Samtang imo ginabasa ang 2 Samuel 5:17–25, pamensara kon paano ka mabuligan sang ehemplo ni David sa mga hangkat nga imo ginaatubang (tan-awa man sa 1 Samuel 23:2, 10–11; 30:8; 2 Samuel 2:1). Paano mo ginapangayo ang direksyon sang Ginuo sa imo kabuhi? Paano ka ginabugayan paagi sa pag-akto sa rebelasyon nga imo mabaton?

Tan-awa man sa 1 Mga Cronica 12.

2 Samuel 7

Ano ang “balay” nga ginpromisa sang Ginuo kay David?

Sang magtanyag si David nga magpatindog sang balay, buot silingon templo, para sa Ginuo (tan-awa sa 2 Samuel 7:1–3), nagsabat ang Ginuo nga sa matuod ang anak ni David ang magapatindog sini (tan-awa sa mga bersikulo 12–15; tan-awa man sa 1 Mga Cronica 17:1–15). Nagsiling man ang Ginuo nga kabaylo sini patindugan Niya si David sang “panimalay,” buot silingon kaliwatan, kag ang iya trono magadugay tubtob sa katubtuban (tan-awa sa 2 Samuel 7:11, 16, 25–29; Salmo 89:3–4, 35–37). Ining promisa natuman kay Jesucristo, ang aton Wala Katapusan nga Hari, nga kaliwat ni David (tan-awa sa Mateo 1:1; Lucas 1:32–33; Juan 18:33–37).

2 Samuel 11; 12:1–14

Dapat nga magbantay ako pirme batok sa sala.

Ang pagkamatinuohon ni David sa Ginuo sang nagliligad wala nagkakas sa iya sang tentasyon sang sia “nagdayandayan sa atop sang balay sang hari” kag “nakita niya ang babayi nga nagapaligos” (2 Samuel 11:2). Pamensara kon ano nga mga leksyon ang imo matun-an sa iya mga eksperiyensya? Ang mga pamangkot pareho sang mga ini mahimo nga makabulig sa imo nga matun-an ining kasulatan:

Ano nga mga pagpili ang ginhimo ni David nga nagdala sa iya paidalom sa dalan sang pagpakasala? Ano kuntani ang matarong nga mga pagpili ang iya ginhimo?
Paano ayhan nagatinguha ang kaaway nga dalhon ka paidalom sa dalan sang kasal-anan sa imo kaugalingon nga kabuhi? Ano nga mga pagpili ang sarang mo himuon karon para makabalik sa kahilwayan?

Tan-awa man sa 2 Nefi 28:20–24.

1 Mga Hari 3:1–15

Ang dulot sang paghangop nagabulig sa akon nga makilala ang husto sa sayop.

Kon ang Ginuo magsiling sa imo, “Pangayo ka sang akon ihatag sa imo” (1 Mga Hari 3:5), ano ang imo pangayuon? Ano ang nanamian mo sa ginpangayo ni Salomon? Binagbinaga kon ngaa malahalon nga regalo ang “tagipusuon nga mahangpanon” sa “[paghibalo] sang maayo kag malaut” (bersikulo 9). Ano ang sarang mo himuon para mabaton ining regalo?

Tan-awa man sa 2 Mga Cronica 1; Moroni 7:12–19.

1 Mga Hari 8:12–61

Ang templo amo ang balay sang Ginuo.

Sa ginatos ka tuig, ang presensya sang Dios ginarepresentar sang masaylo-saylo nga tabernakulo nga gintukod ni Moises. Bisan pa nga gusto ni David nga magpatindog sang mas permanente nga puluy-an para sa Dios, ginpili sang Dios nga ang anak ni David nga si Salomon amo ang magpatindog sang templo sang Ginuo. Samtang imo ginabasa ang pangamuyo ni Salomon kag ang mga tinaga nga iya ginhambal sa iya katawhan sang matapos ang templo, pat-ini kon ano ang iya nabatyagan para sa Ginuo kag sa Iya balay. Pwede mo man ilista ang mga bugay nga ginpangayo ni Salomon sa iya pangamuyo. Ano ang imo natalupangdan sa sining mga bugay? Paano ka ginbugayan sang balay sang Ginuo sa aton panahon?

Tan-awa man sa 2 Mga Cronica 6.

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

2 Samuel 5:19, 23.Sang san-o kita “nagpamangkot sa Ginuo” sang giya kag direksyon? Paano Niya kita ginsabat?

2 Samuel 7:16.Sang ginsiling sang Ginuo kay David, “Ang imo ginharian papag-unon sing dayon,” ginatumod Niya ang palaabuton nga hari sa linyada sang panimalay ni David nga magahari sa katubtuban: si Jesucristo. Basi masadyahan ang imo pamilya sa paghimo sang kulu-korona samtang ginahambalan kon ngaa nagapasalamat kamo nga si Jesucristo ang inyo Wala Katapusan nga Hari.

2 Samuel 11.Ang pagbasa parte sa masubo nga mga sala ni David mahimo nga maayo nga oportunidad para hambalan ang mga peligro sang pornograpiya, mahigko nga panghunahuna, kag imoralidad. Pwede ang mga miyembro sang pamilya magplano kon ano ang ila himuon kon makasugata sila ng pornograpiya.

1 Mga Hari 11:9–11.Ano ang “iban nga mga dios” (bersikulo 10) nga mahimo magliso sang aton mga tagipusuon palayo sa Ginuo? Paano naton padayunon ang aton mga tagipusuon nga nasentro sa Amay nga Langitnon kag kay Jesucristo?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Magtutok sa mga prinsipyo nga magabugay sa imo pamilya. Samtang mainampuon mo nga ginatun-an ang pulong sang Dios, pamangkuta ang imo kaugalingon, “Anong makita ko diri nga mangin makahulugan gid sa akon pamilya?” (tan-awa sa Teaching in the Savior’s Way, 17).