“Hunyo 13–19. 1 Samuel 8–10; 13; 15–18: ‘Ang Inaway Iya sang Ginuo,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)
“Hunyo 13–19. 1 Samuel 8–10; 13; 15–18,” Dali, Magsunod sa Akon—Para sa Mga Indibidwal kag Mga Pamilya: 2022
David and Goliath [Si David kag si Goliat], ni Steve Nethercott
Hunyo 13–19
1 Samuel 8–10; 13; 15–18
“Ang Inaway Iya sang Ginuo”
Ang mga panugyan sa sining outline makabulig sa imo nga mahibal-an ang pila sa importante nga mga prinsipyo sa sining mga kapitulo. Mahimo nga makakita ka sang iban pa nga mga prinsipyo samtang nagatuon.
Isulat Ang Imo Mga Panghunahuna
Halin sang nagplastar ang mga tribo sang Israel sa duta nga ginpangako, nangin padayon nga katalagman sa ila kaluwasan ang mga Filistinhon. Madamo nga beses sang nagliligad, nga ginluwas sang Ginuo ang mga Israelnon sa ila mga kaaway. Pero karon ang mga tigulang sang Israel pilit nga nagpangayo, “Buot kami nga may hari … [nga] maggwa sa una namon, kag mag-away sang amon mga inaway” (1 Samuel 8:19–20). Nagpasugot ang Ginuo, kag ginpili si Saul nga hari. Pero sang ginhangkat sang makahaladlok nga higante nga si Goliat ang kasoldadohan sang Israel, si Saul—pareho sang iya kasoldadohan—“nagkahadlok sing dako” (1 Samuel 17:11). Sina nga adlaw, indi si Haring Saul ang nagluwas sa Israel kundi ang kubos nga manugpahalab nga ginhingalanan David, nga wala nagasuksok sang panaming pero nagasuksok sang indi malutsan nga pagtuo sa Ginuo. Ginpamatud-an sining inaway sa Israel, kag sa tanan nga may ginaaway nga espirituhanon nga mga giyera, nga “ang Ginuo wala nagaluwas sa espada kag bangkaw” kag nga “ang inaway iya sang Ginuo” (1 Samuel 17:47).
Mga Ideya para sa Personal nga Pagtuon sang Balaan nga mga Kasulatan
Si Jesucristo amo ang akon Hari.
Samtang imo ginabasa ang 1 Samuel 8, pat-ini kon ano ang nabatyagan sang Ginuo sa handum sang mga Israelnon nga makaangkon sing hari magluwas sa Iya Mismo. Ano ang buot silingon sang pilion ang Ginuo nga “maghari sa [imo]”? (1 Samuel 8:7). Mahimo mo man pamensaron ang mga paagi nga ginatentar ka nga sundon ang indi matarong nga mga uso sa kalibutan imbes nga sundon ang Ginuo. Paano mo ipakita nga gusto mo si Jesucristo nga mangin imo Wala Katapusan nga Hari?
Tan-awa man sa Mga Hukom 8:22–23; Mosias 29:1–36.
1 Samuel 9:15–17; 10:1–12; 16:1–13
Nagatawag ang Dios sang mga tawo paagi sa propesiya sa pag-alagad sa Iya ginharian.
Ginpili sang Dios si Saul kag David nga mangin mga hari paagi sa propesiya kag rebelasyon (tan-awa sa 1 Samuel 9:15–17; 10:1–12; 16:1–13). Amo man ini ang paagi nga Iya ginatawag ang mga lalaki kag babayi sa pag-alagad sa Iya Simbahan sa karon. Ano ang imo matun-an sa sining mga sinulatan parte sa kahulugan sang “pagatawgon sang Dios, paagi sa [propesiya]”? (Mga Artikulo sang Pagtuo 1:5). Ano nga mga bugay ang mabaton kon tawgon kag iset apart sang awtorisado nga mga alagad sang Ginuo?
Litrato ni Samuel nga ginahaplasan si Saul, © Lifeway Collection/lisensyado sa goodsalt.com
“Ang pagtuman maayo pa sang sa halad.”
Bisan pa nga mataas si Saul sa panglawason, pamatyag niya “diutay [sia] sa [iya] kaugalingon nga [panulukan]” sang sia mangin hari (1 Samuel 15:17). Ugaling, sang ginbugayan sia sing kadalag-an, nagsugod sia nga mas magsalig sa iya kaugalingon kag mas diutay sa Ginuo. Ano ang ebidensya nga imo nakita parte diri sa 1 Samuel 13:5–14; 15? Kon nangin kaupod mo si Saul sadto, ano tani ang imo isiling sa iya nga mahimo nakabulig sa iya nga malampuwasan ang iya “pagbato” kag “pagkabatinggilan”? (1 Samuel 15:23).
Tan-awa man sa 2 Nefi 9:28–29; Helaman 12:4–5; Doktrina kag mga Kasugtanan 121:39–40.
“Ang Ginuo nagatulok sa tagipusuon.”
Ano ang pila ka mga paagi nga nagahusga ang mga tawo sa iban paagi “sa gwa nga dagway”? Ano ang kahulugan sang magtulok “sa tagipusuon,” pareho sa Ginuo? (1 Samuel 16:7). Pamensara kon paano mo ipangabuhi ining prinsipyo sa paagi nga ginatulok mo ang iban—kag ang imo kaugalingon. Paano makaapekto sa imo mga inter-aksyon ukon mga relasyon ang paghimo sini?
Sa bulig sang Ginuo, malampuwasan ko ang bisan ano nga hangkat.
Samtang imo ginabasa ang 1 Samuel 17, binagbinaga ang mga pulong sang lainlain nga mga tawo sa sining kapitulo (tan-awa ang listahan sa idalom). Ano ang ginapakita sang ila mga pulong parte sa ila? Paano ginpakita ni David sa pulong ang iya kaisog kag pagtuo sa Ginuo?
-
Goliat: mga bersikulo 8–10, 43–44
-
Eliab: bersikulo 28
-
Saul: bersikulo 33
Binagbinaga ang personal nga mga giyera nga imo ginaatubang. Ano ang imo makita sa 1 Samuel 17 nga nagapabakod sang imo pagtuo nga mabuligan ka sang Ginuo?
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
1 Samuel 9:15–21; 16:7.Mahimo nga makainspirar sang paghinambalanay ang pagbasa sining mga bersikulo upod ang masunod nga mga pulong ni Elder Dieter F. Uchtdorf kon ngaa ginpili sang Ginuo si Saul kag David: “Kon tulukon lang naton ang aton kaugalingon sa aton mortal nga panulukan, mahimo nga wala naton ginakabig ang aton kaugalingon nga hustohan na. Pero ginatulok kita sang aton Amay nga Langitnon suno sa kon sin-o gid kita kag kon ano kita sarang mangin” (“It Works Wonderfully!” Liahona, Nob. 2015, 23). Basi pwede magbulos-bulos ang mga miyembro sang pamilya sa paghambal kon ano ang maayo nga mga kinaiya nga ila nakita sa tagipusuon sang kada isa (tan-awa sa 1 Samuel 16:7).
-
1 Samuel 10:6–12.Sang san-o naton nakita nga ginbugayan sang Dios ang isa ka tawo sang espirituhanon nga gahum para tumanon ang isa ka tulumanon ukon calling pareho sang ginbugayan Niya si Saul? Ano nga mga eksperiyensya ang mapaambit naton sang ang “Dios nagbalhin sang [aton] tagipusuon” ukon “ang Espiritu sang Dios nag-abot sa [aton]” samtang nagaserbisyo sa Iya? (mga bersikulo 9–10).
-
1 Samuel 17:20–54.Mahimo nga masadyahan ang imo pamilya sa pagbasa sing ululupod sang istorya ni David kag Goliat. Mahimo nga magpadulong ini sa paghinambalanay parte sa mga hangkat nga aton ginaatubang nga daw “Goliat” para sa aton. Pwede man ninyo isulat ang pila sining mga hangkat sa target ukon drowing nga Goliat kag magbulos-bulos sa paghaboy sini sang mga bagay (pareho sang ginkumos nga mga papel).
Mahimo nga masadya man basahon ang parte sa mga taming kag mga armas ni Goliat (tan-awa sa mga bersikulo 4–7). Ano ang iya ni David ? (tan-awa sa mga bersikulo 38–40, 45–47). Ano ang gintigana sang Ginuo nga makabulig sa aton nga mapierde ang aton mga Goliat?
-
1 Samuel 18:1–4.Paano nangin maayo nga mag-abyan sanday David kag Jonatan sa isa kag isa? Paano kita ginbugayan sang maayo nga mga abyan? Ano ang sarang naton himuon para mangin maayo nga mga abyan—lakip na sa mga miyembro sang aton pamilya?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Ginapanugyan nga kanta: “Dare to Do Right [Magmaisog],” Mga Himno kag mga Ambahanon sang Kabataan, no. 64–65.
Pagpauswag sang Aton Pagpanudlo
Masami nga magpaambit sang imo testimonya. “Ang imo simple, sinsero nga saksi sang espirituhanon nga kamatuoran may mabaskog nga impluwensya sa [imo pamilya]. Ang testimonya pinakamabaskog kon direkta ini kag hugot sa tagipusuon. Indi ini kinahanglan nga matahum ukon malaba” (Teaching in the Savior’s Way, 11).
Litrato ni David, ni Dilleen Marsh