Elias Contends against the Priests of Baal [Si Elias nga Nagapaindis-indis sa mga Pari ni Baal], ni Jerry Harston

Hunyo 27–Hulyo 3

1 Mga Hari 17–19

“Kon ang Ginuo Among Dios, Sunda Sia”

Kon magbasa ka sang balaan nga mga kasulatan, nagapakita ka sang pagtuo, nga nagahanda sang imo tagipusuon kag kaisipan nga magpamati sa “tingug nga mahinay” sang Espiritu (1 Mga Hari 19:12).

Isulat Ang Imo Mga Panghunahuna

Ang panimalay sang Israel nagakinagamo. Ang pag-isa kag kauswagan nga nalab-ot sa idalom nanday David kag Salomon madugay na nga nagligad, kag ang relasyon sa kasugtanan sang nasyon sa Ginuo, para sa madamo, malayo na nga handurawan. Ang Ginharian sang Israel natunga, ang pulo ka tribo ang nagporma sang Norte nga Ginharian sang Israel kag ang duha ka mga tribo ang nagporma sang Sur nga Ginharian sang Juda. Ang duha ka mga ginharian indi mabakod sa espirituhanon, ginapamunoan sang mga hari nga naglapas sa ila mga kasugtanan sa Ginuo kag nagaimpluwensya sa iban nga himuon ang amo man (tan-awa sa 1 Mga Hari 11–16). Pero mas malala ang apostasiya sa Norte nga Ginharian, kon diin ginapaisog ni Haring Acab ang Israel nga magsimba sa dios-dios nga si Baal.

Sa amo sini nga kahimtangan nga gintawag si propeta Elias para magwali. Ang rekord sang iya pag-alagad nagaklaro nga ang personal nga pagtuo sa Ginuo sarang magpadayon sa mga matarong bisan napalibutan sang kalainan. Kon kaisa ang Ginuo nagasabat sa amo nga pagtuo sang matahum, pangpubliko nga mga milagro, pareho sang kalayo nga nagatupa halin sa langit. Pero nagahikot man Sia sing matinong, pribado nga mga milagro, pareho sang pagpuno sang personal nga mga pangihanglan sang matinuohon nga balo kag sang iya anak nga lalaki. Kag sa masami ang Iya mga milagro tama ka indibidwal nga ikaw lamang ang nakahibalo sang mga ini—halimbawa, kon ipahayag sang Ginuo ang Iya Kaugalingon kag ang Iya pagbuot paagi sa “tingug nga mahinay” (1 Mga Hari 19:12).

Mga Ideya para sa Personal nga Pagtuon sang Balaan nga mga Kasulatan

1 Mga Hari 17:1–16

Ang imbitasyon nga magsakripisyo isa ka oportunidad para ipakita ang akon pagtuo.

Sa primero mahimo nga daw kabudlay intiendihon kon ngaa ginpangabay sang propeta nga si Elias ang balo sa Sarepta nga hatagan sia sing pagkaon kag tubig antes niya pakan-on ang iya kaugalingon kag ang iya ginagutom nga anak. Pero ang pangabay ni Elias makabig man nga bugay para sa sining gamay nga pamilya. Kinahanglan nila ang mga bugay sang Ginuo, kag ang sakripisyo masami nagadala sang mga bugay—lakip na ang bugay sang mas mabaskog nga pagtuo.

Samtang ginabasa mo ining istorya, ibutang ang imo kaugalingon sa lugar sining dalayawon nga balo. Ano ang nanamian mo sa iya? Pamensara ang imo mga oportunidad para ipakita ang imo pagtuo—lakip na ang mga oportunidad nga magsakripisyo. Paano ka mangin mas pareho sining balo?

Tan-awa man sa Mateo 6:25–33; Lucas 4:24–26.

1 Mga Hari 18

“Kon ang Ginuo among Dios, sunda sia.”

Mahimo nga sa pamatyag sang mga Israelnon maayo ang ila mga rason para magsimba kay Baal wala sapayan sang sugo sang Ginuo nga, “Dili ka maghupot sing iban nga dios sa atubangan ko” (Exodo 20:3). Ginakilala si Baal bilang dios sang mga bagyo kag ulan, kag pagligad sang tatlo ka tuig nga tig-ilinit, kinahanglanon na gid nila sing bagyo. Kag ang pagsimba kay Baal ginabaton sa sosyedad kag ginaendorso sang hari kag rayna. Samtang imo ginabasa ang 1 Mga Hari 18, pamensara ang bisan ano nga sitwasyon sa imo kabuhi nga makumpara sa sitwasyon sang mga Israelnon. Nakita mo na bala ang imo kaugalingon nga nagaalang-alang sa pagsunod sa Ginuo bangud kay ang mga alternatibo daw maayo man kag makagalanyat? (tan-awa sa 1 Mga Hari 18:21). Sa mga hitabo nga makita sa sining kapitulo, ano sa banta mo ang gusto itudlo sang Ginuo sa katawhan parte sa Iya Kaugalingon kag parte kay Baal? Ano nga mga eksperiyensya ang nagtudlo sa imo sang pareho nga mga kamatuoran?

Mahimo nga makawiwili nga tandaan ang mga butang nga ginsiling kag ginhimo ni Elias sa sining kapitulo nga nagapakita sang iya pagtuo sa Ginuo. Ano ang imo matun-an kay Elias parte sa pagtuo?

Tan-awa man sa Josue 24:15; 2 Nefi 2:26–28

Simboliko nga paglaragway sang 1 Mga Hari 19:11–12. The Prophet [Ang Propeta], © Robert Booth Charles/Bridgeman Images

1 Mga Hari 19:1–18

Ang Ginuo masami nagahambal sa mahinay, simple nga mga paagi.

Sang mabatian ni Rayna Jezabel ang natabo sa iya mga pari sa Bukid nga Carmelo, wala sia mahaylo—naakig sia. Nga ginakulbaan para sa iya kabuhi, nagpalagyo si Elias sa kamingawan kag nanago sa isa ka kuweba. Didto, samtang nagapakigbato sa kasubo kag kapaslawan, nakaeksperiyensya sia upod sa Ginuo sang lain kaayo sangsa natabo sa Bukid nga Carmelo. Ano ang ginatudlo sa imo sang eksperiyensya ni Elias sa 1 Mga Hari 19:1–18 parte sa kon paano nagapakig-angot sa imo ang Ginuo sa tion sang imo panginahanglan? Binagbinaga ang mga tinion sa imo kabuhi sang naeksperiyensyahan mo ang Iya tingug. Ano ang kinahanglan mo himuon para mas masami mo nga mabaton ang Iya giya?

Binagbinaga ang mga tinaga kag mga dinalan sa masunod nga mga bersikulo para ilaragway kon paano nagapakighambal sa aton ang Ginuo: Helaman 5:30; 3 Nefi 11:3–7; Doktrina kag mga Kasugtanan 6:22–23; 8:2–3; 9:8–9; 11:12–14; 36:2.

Tan-awa man sa Salmo 46:10; 1 Nefi 17:45.

1 Mga Hari 19:19–21

Ang pagserbisyo sa Ginuo may prayoridad sangsa kalibutanon nga mga kabalaka.

Ang kamatuoran nga si Eliseo may 12 ka pares sang baka nagapakita nga siguro manggaranon sia nga tawo. Anong nanamian mo sa iya mga aksyon nga narekord sa 1 Mga Hari 19:19–21? Paano mo sundon ang ehemplo ni Eliseo?

Tan-awa man sa Mateo 4:18–22.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

1 Mga Hari 17:1–16.Ang litrato sa sining outline makabulig sa imo pamilya nga mapanan-aw ang sinulatan sa 1 Mga Hari 17:1–16. Pagkatapos nga basahon ang mga bersikulo kag tan-awon ining mga bulig, pwede ilista sang tagsa ka miyembro sang pamilya ang makainspirar nga mga kinaiya sang balo. Ano ang ginapangayo sang Ginuo sa aton para ipakita ang aton pagtuo?

1 Mga Hari 18.  May mga butang bala nga nagapugong sa aton nga mangin lubos nga komitido sa Ginuo? Paano naton ipakita ang aton kahanda sa pagpili sa Iya? (tan-awa sa bersikulo 21).

1 Mga Hari 19:11–12.Ano ang makabulig sa imo pamilya nga maintiendihan ang importansya sang pagpamati sa “tingug nga mahinay”? Pwede ninyo basahon ang 1 Mga Hari 19:11–12 sing ululupod sa mahinay nga tingug.  Pwede mo man dugangan sang diutay nga mga gahod sa palibot para ipakita kon paano kita ginapunggan ni Satanas sa pagpamati sa gamay, mahinay nga tingug. Pwede nga iistorya sang mga miyembro sang pamilya kon ano ang ila ginahimo para mangin sensitibo sa mga pagpabatyag sang Espiritu.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

  

Pagpauswag sang Personal nga Pagtuon

Isulat ang imo mga panghunahuna. Kon mabatyagan mo ang Espiritu nga nagahambal sa imo, pamensara nga isulat ang imo nabatyagan nga Iya ginahambal sa imo. Ang panghunahuna nga nagatulod sa imo nga isulat ining mga impresyon makabulig sa imo nga binagbinagon kag hatagan ini sang balor.

Widow of Zarephath [Ang Balo sang Sarepta], ni Rose Datoc Dall