Litrato ni Eliseo nga ginapakita sa iya alagad ang mga karwahe sang kalayo, © Review & Herald Publishing/lisensyado sa goodsalt.com

Hulyo 4–10

2 Mga Hari 2–7

“May Propeta sa Israel”

Sa imo pagbasa sang balaan nga mga kasulatan, mahimo nga dalhon sang Balaan nga Espiritu ang imo atensyon sa pila ka mga dinalan ukon bersikulo. Pamensara nga isulat kon ngaa makahulugan sa imo inang mga dinalan.

Isulat Ang Imo Mga Panghunahuna

Ang mayor nga misyon sang propeta amo ang magtudlo kag magsaksi parte sa Manluluwas nga si Jesucristo. Ugaling, ang aton rekord parte sa propeta nga si Eliseo, wala nagalakip sang madamo sa iya pagpanudlo ukon pagpanaksihon. Ang unod sang kasulatan amo ang mga milagro nga ginhikot ni Eliseo, lakip na ang pagbanhaw sang bata nga napatay (tan-awa sa 2 Mga Hari 4:18–37), pagpakaon sang kadam-an paagi sa diutay lang nga pagkaon (tan-awa sa 2 Mga Hari 4:42–44), kag pagpaayo sang aruon (tan-awa sa 2 Mga Hari 5:1–14). Gani bisan nga wala kita masyado sang mga tinaga ni Eliseo nga nagapamatuod kay Cristo, may ara kita, sa bilog nga pag-alagad ni Eliseo, sang mabaskog nga mga pagpahayag sang nagahatag-kabuhi, nagapabaskog, kag nagapang-ayo nga gahum sang Ginuo. Ining mga pagpahayag mas madamo sa aton kabuhi sangsa aton kon kis-a nga narealisar. Para makita ang mga ini, kinahanglan naton nga pangayuon ang milagro nga ginpangayo ni Eliseo sang magpangamuyo sia para sa iya mahinadlukon nga lamharon nga alagad, “Ginuo, ginaampo ko sa imo, buksi ang iya mga mata, agud nga makakita sia” (2 Mga Hari 6:17).

Mga Ideya para sa Personal nga Pagtuon sang Balaan nga mga Kasulatan

2 Mga Hari 2–6

Ang Dios sarang maghikot sang mga milagro sa akon kabuhi.

Ang mga milagro masami nagabulig sa aton nga malampuwasan ang mga kabudlayan sa kabuhi sa duta—sang tiyempo ni Eliseo, may duta nga wala nagapatubas nga nagakinahanglan sang puro nga tubig kag may nadula nga wasay nga kinahanglan makita (tan-awa sa 2 Mga Hari 2:19–22; 6:4–7). Pero ang mga milagro nagaliso man sang aton mga tagipusuon sa Ginuo kag nagatudlo sa aton sang espirituhanon nga mga leksyon. Samtang imo ginabasa ang 2 Mga Hari 2–6, pamensara ang paghimo sang listahan sang mga milagro nga imo makita, kag binagbinaga ang espirituhanon nga mga leksyon nga imo matun-an sa kada isa. Ano ang ginatudlo sining mga milagro sa imo parte sa Ginuo kag sa Iya mahimo sa imo kabuhi?

Tan-awa man sa 2 Nefi 26:12–13; 27:23; Mormon 9:7–21; Moroni 7:35–37.  

2 Mga Hari 4:8–17; 7:1–16

Matuman ang mga pulong sang Ginuo paagi sa Iya mga propeta.

Sa nasulat sa 2 Mga Hari 4:8–17; 7:1–16, gin-inspirar sang Ginuo si Eliseo nga magpropesiya sang mga butang nga magaabot—mga butang nga daw, sa perspektibo sang iban, indi gid matabo. Samtang imo ginabasa ining mga bersikulo, pamensara kon paano mo aktuhan ang pulong sang Ginuo paagi sa Iya mga propeta sa karon. Ano nga mga pinanudlo, mga propesiya, ukon mga promisa ang imo nabatian halin sa buhi nga mga propeta? Ano ang imo ginahimo para aktuhan ining mga promisa nga may pagtuo?

Tan-awa man sa 3 Nefi 29:6; Doktrina kag mga Kasugtanan 1:37–38.

2 Mga Hari 5

Kon mapainubuson ako kag matinumanon, mapaayo ako ni Jesucristo.

Kon kaisa mas mahapos nga makakita sang personal nga kahulugan sa balaan nga mga kasulatan kon imo ikumparar ang pisikal nga mga butang sa istorya sa espirituhanon nga mga butang. Halimbawa, samtang ginabasa ang 2 Mga Hari 5, pwede mo ikumparar ang aro ni Naaman sa espirituhanon nga hangkat nga imo ginaatubang. Pareho kay Naaman, siguro nagalaum ka man sa Ginuo “sa paghimo sang dakong butang” (bersikulo 13) para buligan ka. Ano ang ginatudlo sang eksperiyensya ni Naaman sa imo? Sa imo kabuhi, ano ang katumbas sang pagsunod sa simple nga laygay nga “panghugas, kag magmatinlo”?

Pat-ini kon paano naapektuhan sang eksperiyensya ni Naaman ang iya pagtuo sa Dios sang Israel (tan-awa sa bersikulo 15). Ano nga mga eksperiyensya ang nagpabakod sang imo pagtuo sa Dios?

Tan-awa man sa Lucas 4:27; 1 Pedro 5:5–7; Alma 37:3–7; Eter 12:27.

2 Mga Hari 6:8–23

“Ang mga nagaupod sa aton madamo pa sa nagaupod sa ila.”

Nakabatyag ka na bala nga nadaog kag nahadlok, nga nagapanghunahuna, pareho sang lamharon nga alagad ni Eliseo, “Ano bala ang himuon ta?” (tan-awa sa 2 Mga Hari 6:8–23). Ano ang nanamian mo sa sabat ni Eliseo? Paano ginabag-o sining panaysayon ang imo panghunahuna kag balatyayon parte sa imo mga pagtilaw, sa imo mga responsibilidad, ukon sa imo mga pagpaninguha nga ipangabuhi ang ebanghelyo?

Samtang imo ginabinagbinag, pamensara ang mga pulong ni Pangulong Henry B. Eyring: “Pareho sinang alagad ni Eliseo, mas madamo ang nagaupod sa imo sangsa nagakontra sa imo. Ang pila sa mga nagaupod sa imo indi makita sang imo mortal nga mga mata. Pagaalsahon ka sang Ginuo kag kon kaisa ginahimo Niya ini paagi sa pagtawag sa iban nga magtindog upod sa imo” (“O Ye That Embark,” Liahona, Nob. 2008, 58).

Tan-awa man sa Salmo 121; Doktrina kag mga Kasugtanan 84:88.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

2 Mga Hari 2:1–14.Pamensara ang mga tawo nga nakakita kay Eliseo nga “ginpulot” ang kunop ni Elias (kunop—simbolo sang iya tulumanon bilang propeta). Paano sini naapektuhan ang ila reaksyon sa pag-alagad ni Eliseo? (Tan-awa man sa 1 Mga Hari 19:19.) Mahimo nga magbulos-bulos ang mga miyembro sang pamilya sa pagsuksok sang “kunop” kag magpamatuod sa mga paagi nga nakita nila ang Ginuo nga ginasuportahan kag ginapabakod ang mga ginatawag sa pagserbisyo sa Iya Simbahan.

2 Mga Hari 4.Pwede mo hagaron ang mga miyembro sang pamilya nga basahon sing matunog ang parte sa isa sang mga milagro sa 2 Mga Hari 4 (tan-awa sa mga bersikulo 1–7, 14–17, 32–35, 38–41, 42–44) kag magsulat sang palatandaan para buligan ang iban nga mga miyembro sang pamilya nga mapaktan kon ano nga milagro ang iya ginalaragway. Ano ang aton matun-an parte sa Ginuo kag sa Iya mga milagro sa sining kapitulo? Ano nga mga milagro—dalagko ukon magagmay—ang nakita naton sa aton mga kabuhi?

2 Mga Hari 5:1–15.Samtang inyo ginabasa ining mga bersikulo kag ginabinagbinag ang simple nga butang nga ginapangayo kay Naaman, pamensara ang simple nga mga butang nga ginapangayo sang propeta nga aton himuon. Paano sundon sing mas maayo sang aton pamilya ang iya laygay?

2 Mga Hari 5:20–27.Paano ayhan makabenepisyo si Geizi sa pagbasa sang “Pagkamatinud-anon kag Integridad” sa Para sa Kusog sang mga Lamharon? (pahina 19). Paano makahalit sa aton ang pagbinutig? Paano kita ginabugayan sa pagkamatinud-anon?

2 Mga Hari 6:13–17.Mahimo nga masadyahan ang mga miyembro sang pamilya sa pagdrowing sang litrato sang eksperiyensya ni Eliseo kag sang iya alagad nga nalaragway sa sining mga bersikulo. Paano makabulig sa aton ang ining mga bersikulo kon ginasuboan kita ukon daw ginapangluyahan?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Paisoga ang pagpamangkot. Ang mga pamangkot halin sa kabataan isa ka indikasyon nga handa na sila nga magtuon. Kon wala ka makahibalo sang mga sabat sa ila mga pamangkot, pangitaa ang mga sabat upod sa ila. (Tan-awa sa Teaching in the Savior’s Way, 25–26.)

Litrato ni Naaman nga nagaayo sa aro, ni Paul Mann