The Flight of the Prisoners [Ang Pagpalagyo sang mga Bilanggo], ni James Tissot kag iban pa

Hulyo 11–17

2 Mga Hari 17–25

“Sia Nagsalig sa [Ginuong] Dios sang Israel”

Sang mabatian ni Oseas ang mga pulong sa libro sang layi, nag-akto sia nga may pagtuo. Paano ka mag-akto nga may pagtuo sa imo mabasa sa 2 Mga Hari 17–25?

Isulat Ang Imo Mga Panghunahuna

Wala sapayan sang dalayawon nga pag-alagad ni propetang Eliseo, ang espiritwalidad sang Norte nga Ginharian sang Israel padayon nga nag-usmod. Ginaduso sang malain nga mga hari ang pagsimba sa dios-dios, kag ang giyera kag apostasya nagbaskog. Sang ulihi napierde kag ginlapta sang Asirianhon nga Imperyo ang napulo ka tribo sang Israel.

Samtang, ang Sur nga Ginharian sang Juda amo man; malapnagon man ang pagsimba sa dios-dios didto. Pero sa tunga sining tanan nga espirituhanon nga pagkadunot, ang kasaysayan sa balaan nga mga kasulatan nagmitlang sang duha ka matarong nga mga hari nga, sa isa ka tion, nagliso sang ila katawhan pabalik sa Ginuo. Ang isa amo si Ezequias. Sa iya paghari, ang mga Asirianhon, nga bag-o lang nagdaog sa norte, nagsakop sang kalabanan sa sur. Pero nagpakita si Ezequias kag ang iya katawhan sang pagtuo sa Ginuo, nga nagluwas sa Jerusalem sa milagroso nga paagi. Sang ulihi, pagkatapos sang isa pa ka tion sang apostasya, nagsugod nga maghari si Oseas. Bangud inspirado sang pagkadiskubre liwat sang libro sang layi, nagpatuman si Oseas sang mga reporma nga nagbuhi sang relihiyoso nga pagpangabuhi sa madamo sa iya katawhan.

Ano ang matun-an naton sa sining duha ka masanag nga tinion sa makabig madulom nga tinuig sa kasaysayan sang Juda? Upod sang iban pa, mahimo mo binagbinagon ang gahum sang pagtuo kag sang pulong sang Dios sa imo kabuhi. Pareho sa Israel kag Juda, tanan kita nagahimo sang pareho maayo kag malain nga mga pagpili. Kag kon mabatyagan naton nga kinahanglanon na ang mga reporma sa aton mga kabuhi, ayhan ang mga ehemplo nanday Ezequias kag Oseas makainspirar sa aton nga “magsalig sa Ginuo nga aton Dios” (2 Mga Hari 18:22).

Tan-awa man sa 2 Mga Cronica 29–35; sa seksyon nga “Mga Dapat Tandaan” “Si Jesus Magasiling, ‘Kari Ka sa Akon.’”

Mga Ideya para sa Personal nga Pagtuon sang Balaan nga mga Kasulatan

2 Mga Hari 18–19

Sarang ako magpabilin nga tampad sa Ginuo sa panahon sang kabudlayan.

Madamo sa aton ang nakaeksperiyensya sang tinion nga naghangkat sang aton pagtuo. Para kay Ezequias kag sa iya katawhan, isa sinang tinion amo sang ginsulong sang kasoldadohan nga Asirianhon ang Juda, ginguba ang madamo nga mga siyudad, kag nagpadulong sa Jerusalem. Samtang imo ginabasa ang 2 Mga Hari 18–19, hunahunaa nga nagapangabuhi ka sa Jerusalem sining panahon. Ano ayhan ang imo mabatyagan, halimbawa, kon imo mabatian ang mga pagpanggarit-garit sang mga Asirianhon nga nasulat sa 2 Mga Hari 18:28–37 kag 19:10–13? Ano ang imo matun-an sa ginhimo ni Ezequias bilang sabat? (tan-awa sa 2 Mga Hari 19:1–7, 14–19). Paano ginsustiner sang Ginuo si Ezequias? (tan-awa sa 2 Mga Hari 19:35–37). Binagbinaga kon paano ka Niya ginsustiner sa tinion sang kabudlayan.

Mahimo mo man binagbinagon ang paglaragway kay Ezequias sa 2 Mga Hari 18:5–7. Ano ang ginapanugyan sining mga bersikulo kon paano nagpabilin si Ezequias nga matinuohon sang mag-abot ang mga hangkat? Paano mo sundon ang iya ehemplo?

Tan-awa man sa 3 Nefi 3–4.

2 Mga Hari 19:20–37

Ang tanan nga butang ara sa mga kamot sang Ginuo.

Si Senaquerib, ang hari sang Asiria, may maayo nga rason para magpati nga mapierde sang iya kasoldadohan ang Jerusalem. Madamo na nga mga nasyon ang napierde sang Asiria, lakip na ang Israel—ngaa abi nga ang Jerusalem indi? (tan-awa sa 2 Mga Hari 17; 18:33–34; 19:11–13). Pero may mensahe ang Ginuo kay Senaquerib, nga ginhatag paagi kay propetang Isaias, kag nasulat ini sa 2 Mga Hari 19:20–34. Paano mo palip-uton ining mensahe? Ano nga mga kamatuoran ang imo makita sa sining mga bersikulo nga makabulig sa imo nga mag-angkon sing pagtuo sa Ginuo kag sa Iya plano?

Tan-awa man sa Helaman 12:4–23; Doktrina kag mga Kasugtanan 101:16.

2 Mga Hari 21–23

Sarang lisuon sang balaan nga mga kasulatan ang akon tagipusuon sa Ginuo.

Nakabatyag ka na bala nga may kulang sa imo sa espirituhanon? Mahimo nga nabatyagan mo nga pwede pa nga mangin mas mabaskog ang imo relasyon sa Dios. Ano ang nagbulig sa imo nga magbalik sa Iya? Binagbinaga ining mga pamangkot samtang imo ginabasa kon paano nagtalikod sa Ginuo ang Ginharian sang Juda sa idalom ni Haring Manases (tan-awa sa 2 Mga Hari 21) kag kon paano sila ginbuligan ni Haring Oseas nga magpangako liwat sa Iya (tan-awa sa 2 Mga Hari 22–23). Ano ang nag-inspirar kay Oseas kag sa iya katawhan? Ang ining kasaysayan makainspirar sa imo nga pabakuron ang imo pangako nga “magsunod sa Ginuo … sa bug-os [mo] nga tagipusuon kag sa bug-os [mo] nga kalag” (2 Mga Hari 23:3).

Si Pangulong Spencer W. Kimball nagpanugyan nga ang istorya ni Haring Oseas “isa sa pinakamatahum nga istorya sa bilog nga balaan nga mga kasulatan” (Teachings of Presidents of the Church: Spencer W. Kimball ([2006], 62). Ngaa ayhan nga amo sadto ang pamatyagan ni Pangulong Kimball? Ano ang imo nakita sa mga pulong ni Pangulong Kimball, labi na gid sa iya mga komentaryo parte kay Haring Oseas, nga nagabulig sa imo nga ipangabuhi ang 2 Mga Hari 22–23?

Tan-awa man sa Alma 31:5.

Makabulig ang balaan nga mga kasulatan nga lisuon ang aton mga tagipusuon sa Ginuo.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

2 Mga Hari 19:14–19.Ano ang aton matun-an sa ehemplo ni Ezequias nga makabulig sa aton kon may mabudlay kita nga mga problema ukon mga pamangkot? Paano ginsabat sang Ginuo ang aton mga pagpangamuyo para sa bulig? Basi pwede maghimo ang tagsa ka miyembro sang pamilya sang butang nga pwede i-display sa balay nga makapadumdom sa ila nga magliso sa Ginuo.

2 Mga Hari 22:3–7.Ang mga trabahador nga ginlaragway sa 2 Mga Hari 22:3–7 ginsaligan sang kuwarta para ipatindog liwat ang templo “kay sila nagagawi sing matutom” (bersikulo 7). Pagkatapos nga basahon ining mga bersikulo, pwede mo pamangkuton ang mga miyembro sang pamilya nga maglawag sang mga butang nga ginsaligan sila. Paano kita mangin masaligan pareho sa mga trabahador sa sining mga bersikulo?

2 Mga Hari 22:8–11, 19; 23:1–3.Anong nanamian naton parte sa sabat ni Oseas kag sang iya katawhan sa pulong sang Dios? Paano naton ginaaksyonan ang pulong sang Dios sa balaan nga mga kasulatan? Mahimo nga magpaambit ang imo pamilya sang mga dinalan ukon mga istorya sa balaan nga mga kasulatan nga nagpatubo sang ila handum nga sundon ang Amay nga Langitnon kag si Jesucristo.

2 Mga Hari 23:25.Ano ang nagapangibabaw sa aton parte sa paglaragway kay Oseas sa sining bersikulo? Mahimo nga drowingon sang imo pamilya sa papel nga korte tagipusuon ang mga butang nga pwede nila himuon sining semana para magliso sa Ginuo sa bug-os nila nga tagipusuon.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Magpangita sang nagainspirar nga mga tinaga kag mga dinalan. Samtang nagabasa ka, mahimo nga may dalhon ang Espiritu sa imo atensyon nga mga tinaga ukon dinalan. Mahimo ini nga makapapagsik kag makapaisog sa imo; mahimo gani nga daw ginsulat gid ini para sa imo.

Litrato sang eskriba nga nagadala sang linukot nga kasulatan kay Haring Oseas, ni Robert T. Barrett