Esther [Si Ester], ni James Johnson

Hulyo 25–31

Ester

“Nag-abot Ka … sa Tion nga Subong Sini”

Samtang imo ginabasa ang Ester, magpangayo halin sa Espiritu sang inspirasyon nga nabagay gid sa imo, kag isulat ang mga pagpabatyag nga imo mabaton.

Isulat Ang Imo Mga Panghunahuna

Madamo nga mga hitabo sa libro nga Ester ang daw makabig swerte ukon natabuan lang. Paano mo abi mapaathag kon ngaa nangin rayna sang Persia ang ilo nga dalagita nga Judio sa husto lang gid nga tion para salbaron ang iya katawhan sa pagpamatay? Ano man nga tsansa nga matabuan gid nga mabatian sang pakaisa ni Ester nga si Mardoqueo ang plano nga patyon ang hari? Natabuan lang bala ang mga ini, ukon parte ang mga ini sang diosnon nga plano? Si Elder Ronald A. Rasband nagsiling: “Ang butang nga kon tulukon daw tsamba lang, sa pagkamatuod, ginapangunahan sang mapinalanggaon nga Amay sa Langit. … Ang Ginuo yara sa magagmay nga mga detalye sang aton mga kabuhi” (“By Divine Design,” Liahona, Nob. 2017, 56). Mahimo nga indi naton pirme matalupangdan ang impluwensya sang Ginuo sa sining “magagmay nga mga detalye.” Pero matun-an naton sa eksperiyensya ni Ester nga sarang Niya giyahan ang aton dalanon kag ihanda kita “sa tion nga subong sini” (Ester 4:14) sa diin sarang kita nga mangin mga instrumento sa Iya mga kamot para ipahanabo ang Iya mga katuyuan.

Mga Ideya para sa Personal nga Pagtuon sang Balaan nga mga Kasulatan

Ester

Sarang ako himuon sang Ginuo nga instrumento para bugayan ang iban.

Gintudlo ni Sister Anne C. Pingree: “Ang mangin instrumento sa mga kamot sang Dios isa ka dako nga pribelihiyo kag sagrado nga responsibilidad. Sa diin man kita nagapuyo, kon ano man ang aton mga sirkumstansya, wala sapayan sa aton estado sa pag-asawahay ukon edad, kinahanglan sang Ginuo ang kada isa sa aton agud tumanon ang [aton] pinasahi nga bahin sa pagtukod sang Iya ginharian sa sining katapusan nga dispensasyon” (“Knowing the Lord’s Will for You,” Liahona, Nob. 2005, 112).

Samtang imo ginabasa ang istorya ni Ester, binagbinaga kon paano magamit ining pahayag sa iya. Pangitaa ang mga paagi nga ginpatigayon sang Ginuo agud iya maluwas ang mga Judio (tan-awa, halimbawa sa, Ester 2:21–23; 3:10–14; 4:14–16). Dayon binagbinaga kon paano Niya gingiyahan ang imo kabuhi sa mga paagi nga mabugayan mo ang iban. Ano ang pila sa mga sirkumstansya ukon mga kaangtanan nga sa pamatyag mo gingiyahan ka Niya para sa “tion nga subong sini”? (Ester 4:14). Kon may bendisyon ka sang patriarka (patriarchal blessing), pamensara nga basahon ini para mas matun-an pa ang parte sa buluhaton nga ginapahimo sa imo sang Ginuo.

Ester 3; 5:9–14; 7

Ang bugal kag kaakig nagadala sang kalaglagan.

Sa libro nga Ester, may matun-an kita sa katutom ni Ester kag Mardoqueo amo man sa bugal kag kaakig ni Haman. Samtang imo ginabasa ang Ester 3; 5:9–14, pamensara nga pat-inan ang mga balatyagon, mga tinaga, kag mga aksyon ni Haman. Ano ang ginapakita sini sa aton parte sa iya kag sa iya mga motibo? Ano ang mga konsikwensya nga iya nabaton? (tan-awa sa Ester 7). Ang pagbasa parte kay Haman mahimo nga magtulod sa imo nga binagbinagon kon ano ang motibo sang imo mga balatyagon kag mga aksyon. Nangin inspirado ka bala nga maghimo sang mga pagbag-o? Paano ka magliso sa Amay nga Langitnon para mangayo sang bulig?

Tan-awa man sa Mga Huluhaton 16:32; Alma 5:28.

Ester 3–4; 5:2–3; 8:11–12

Ang pagpuasa nagapakita sang akon panginahanglan sa Ginuo.

Pat-ini ang mga kondisyon nga nagtulod kay Ester kag sa tanan nga mga Judio nga magpuasa (tan-awa sa Ester 3:13; 4:1–3, 10–17). Paano nangin bugay sa ila ang pagpuasa? (tan-awa sa Ester 5:2–3; 8:11–12). Ngaa nga ginapangayo sang Ginuo nga magpuasa kita? Pamensara ang sarang mo himuon para mangin mas dako nga bugay ang pagpuasa sa imo kabuhi.

Tan-awa man sa Isaias 58:6–12; Mateo 4:1–4; 17:14–21.

Ester 3:1–11; 4:10–17; 5:1–4

Ang paghimo sang husto masami nagakinahanglan sang dako nga kaisog.

Sang ginpakigbato ni Mardoqueo kag Ester ang ila ginapatihan, ginbutang nila ang ila mga kabuhi sa peligro. Mahimo nga indi amo sina kalala ang mga konsikwensya sang aton mga pagpili, pero ang paghimo sang husto nga butang nagakinahanglan sa gihapon sang kaisog. Ano ang imo matun-an sa Ester 3:1–4; 4:10–17 parte sa pag-angkon sing kaisog agud himuon ang husto nga butang? Tandai ang lainlain nga mga konsikwensya nga naeksperiyensyahan nanday Mardoqueo kag Ester pagkatapos nga magpakita sing kaisog (tan-awa sa Ester 3:5–11; 5:1–4). Ano ang kinahanglan mahibaluan sang isa ka tawo parte sa Dios para makahimo sang mga pagpili nga ginhimo nanday Ester kag Mardoqueo—nga himuon ang husto bisan ano pa ang mangin konsikwensya?

Sa madason nga hunahunaon mo ang mga konsikwensya sang paghimo sang husto, pwede mo gamiton ang maisog nga mga tinaga ni Ester sa Ester 4:16 sa imo kaugalingon nga sitwasyon. Halimbawa, pwede mo isiling sa imo kaugalingon, “Kon pilion ko ang husto, kon [mawad-an ako sang mga abyan], [mawad-an ako sang mga abyan].”

Esther before the King [Si Ester sa atubang sang Hari], ni Minerva K. Teichert

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Ester 1–10.Pagkatapos nga rebyuhon ang istorya ni Ester, mahimo nga masadyahan ang imo pamilya sa paghimo sang simple nga mga tawo-tawo sang pila sa mga karakter. Dayon pwede ninyo ini gamiton para isugid liwat ang istorya. Pwede man kamo magkanta sang kanta parte sa pagkamaisog kag tampad, pareho sang “Dare to Do Right [Magmaisog]” (Mga Himno kag mga Ambahanon sang Kabataan, 64–65). Ano nga mga tinaga sa kanta ang nagapadumdom sa aton kay Ester?

Ester 2:5–7.Ano ang aton matun-an sa ehemplo ni Mardoqueo parte sa pagbulig sa mga miyembro sang pamilya sa tion sang mga pagtilaw? Sin-o sa aton pamilya ang nagakinahanglan sang aton suporta? Maghimo sang plano para buligan sila.

Ester 4:15–17.Ang kaisog ni Ester mahimo nga makainspirar sang imo pamilya nga hambalan kon paano magpatubo sang kaisog nga magtindog para sa kamatuoran sa mga sitwasyon nga ila ginaatubang. Ano ang buot silingon ni Ester sa “Kon mawala ako, mawala ako”? Paano naton magamit ang iya mga tinaga kon kinahanglan naton nga mangin maisog?  

Ester 9:26–32.Ang Judio nga pista sang Purim gintukod agud dumdumon ang istorya ni Ester. Sa oras nga inugkaon sa sining semana, pamensara ang pagpaambit sang mga istorya sang mga miyembro sang inyo pamilya, lakip na ang mga katigulangan, sang ila ginbugayan ang iban paagi sa pagtindog sa husto pareho sa ginhimo ni Ester.

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Dare to Do Right [Magmaisog],” Mga Himno kag mga Ambahanon sang Kabataan, 64–65.

Pagpauswag sang Aton Pagpanudlo

Sunda ang kabuhi sang Manluluwas. “Ang gahum sang Manluluwas sa pagtudlo kag pagbayaw sang iban naghalin sa pamaagi sang Iya pagpangabuhi kag sa klase sang Iya pagkatawo. Kon mas matutom ka nga nagatinguha nga magkabuhi pareho kay Jesucristo, mas magadugang ang imo ikasarang nga magtudlo pareho sa Iya” (Teaching in the Savior’s Way, 13).

Queen Esther [Si Rayna Ester], ni Minerva K. Teichert, © William and Betty Stokes