“Hulyo 18–24. Esdras 1; 3–7; Nehemias 2; 4–6; 8: ‘Ako Nagahimo sang Dakong Buluhaton’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)

“Hulyo 18–24. Esdras 1; 3–7; Nehemias 2; 4–6; 8,” Dali, Magsunod sa Akon—Para sa Mga Indibidwal kag Mga Pamilya: 2022

Litrato

templo ni Zorobabel

Litrato sang templo ni Zorobabel, ni Sam Lawlor

Hulyo 18–24

Esdras 1; 3–7; Nehemias 2; 4–6; 8

“Ako Nagahimo sang Isa ka Dakong Buluhaton”

Si Pangulong Ezra Taft Benson nagtudlo, “Ang pulong sang Dios … may gahum nga pabakuron ang mga Santos kag armasan sila sang Espiritu para mapakigbatuan nila ang malain, huptan ang maayo, kag makita ang kalipay sa sining kabuhi” (Teachings of Presidents of the Church: Ezra Taft Benson [2014], 118).

Isulat Ang Imo Mga Panghunahuna

Ang Judio nga katawhan nangin bihag sang Babilonia sing mga 70 katuig. Nadula sa ila ang Jerusalem kag ang templo, kag nalipat na ang madamo sang ila pangako sa layi sang Dios. Pero wala sila ginkalimtan sang Dios. Ang matuod, Iya gindeklarar paagi sa Iya propeta, “Duawon ko kamo, kag magahimo sa inyo sang akon maayo nga pulong, sa pagpabalik sa inyo” (Jeremias 29:10). Bilang katumanan sining propesiya, naghimo ang Ginuo sing paagi nga makabalik ang mga Judio, kag nagbangon Sia sang mga alagad nga naghimo sang “dakong buluhaton” para sa Iya katawhan (Nehemias 6:3). Ining mga alagad naglakip sang gobernador nga ginhingadlan nga Zorobabel, nga nagdumala sang pagpatukod liwat sang balay sang Ginuo; kay Esdras, isa ka pari kag eskriba nga nagliso sang mga tagipusuon sang mga tawo pabalik sa layi sang Ginuo; kag kay Nehemias, ang gobernador sang ulihi sa Juda nga nagpanguna sang pagtukod liwat sang nagaprotekta nga pader sa palibot sang Jerusalem. Nangatubang sila sang oposisyon, siyempre, pero nakabaton man sila sang bulig sa wala ginapaabot nga mga ginhalinan. Makatudlo kag makainspirar ang ila mga eksperiyensya sa aton, tungod kita man nagahimo sang dakong buluhaton. Kag pareho sa ila, ang aton buluhaton dako kaayo ang kahilabtanan sa balay sang Ginuo, sa layi sang Ginuo, kag sa espirituhanon nga proteksyon nga aton makita sa Iya.

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Esdras 1

Ginainspirar sang Ginuo ang mga tawo para ipahanabo ang Iya mga katuyuan.

Pagkatapos nga mapierde ang Babilonia, ang Persianhon nga hari, si Ciro, gin-inspirar sang Ginuo nga magpadala sang grupo sang mga Judio pa-Jerusalem para tukuron liwat ang templo. Samtang imo ginabasa ang Esdras 1, tandai kon ano ang handa nga himuon ni Ciro para suportahan ang mga Judio sa sining importante nga buluhaton. Paano mo nakita ang Ginuo nga nagatrabaho paagi sa mga lalaki kag babayi sa imo palibot, lakip na sa mga indi miyembro sang Iya Simbahan? Ano ang ginapanugyan sini sa imo parte sa Ginuo kag sa Iya buluhaton?

Tan-awa man sa Isaias 44:24–28.

Esdras 3:8–13; 6:16–22

Ang mga templo makahatag sa akon sing kalipay.

Sang ginsulong sang mga taga-Babilonia ang Jerusalem, ginkawatan nila ang templo kag ginsunog (tan-awa sa 2 Mga Hari 25:1–10; 2 Mga Cronica 36:17–19). Ano ayhan ang imo batyagon kon isa ka sa mga Judio nga nakasaksi sini? (tan-awa sa Salmo 137). Tandai kon ano ang nabatyagan sang mga Judio, mga dekada ang nakaligad, sang gintugtan sila nga magbalik kag tukuron liwat ang templo (tan-awa sa Esdras 3:8–13; 6:16–22). Binagbinaga ang imo kaugalingon nga mga balatyagon parte sa templo. Ngaa ang mga templo ginhalinan sang kalipay? Paano mo mapakita ang imo kapasalamatan sa Ginuo bangud sa mga templo?

Ang templo sarang nga mangin ginhalinan sang kalipay sa aton mga kabuhi.

Esdras 4–6; Nehemias 2; 4; 6

Makabulig ako sa pagpaabante sang buluhaton sang Dios wala sapayan sang oposisyon.

Masami gid nga may nagakontra sa buluhaton sang Ginuo, kag matuod gid ini sa mga pagpaninguha nga ginpangunahan nanday Zorobabel kag Nehemias. Sa pareho nga mga kaso, ang “mga kasumpong sang Juda” (Esdras 4:1) amo ang mga Samariahanon—mga kaliwatan sang mga Israelnon nga nakigsimpon sa mga Gentil. Ang pagbasa parte sa ila oposisyon sa pagpatindog sang templo (tan-awa sa Esdras 4–6) mahimo nga makapabinagbinag sa imo sang oposisyon nga ginapangatubang sang buluhaton sang Dios sa karon nga panahon kag kon ano ayhan ang imo himuon kon mag-abot ang oposisyon.

Sa amo man, ang pagbasa parte sa buluhaton ni Nehemias sang pagkay-o sang mga pader sang Jerusalem (tan-awa sa Nehemias 2; 4; 6) mahimo nga makapahunahuna sa imo kon ano ang gusto sang Dios nga imo buhaton. Ano ang imo matun-an sa ehemplo ni Nehemias?

Esdras 7; Nehemias 8

Ginabugayan ako kon magtuon ako sang balaan nga mga kasulatan.

Bisan nga natukod na liwat ang templo, ginbudlayan sa gihapon ang katawhan sa Jerusalem sa espirituhanon, sa isa ka bahin tungod, sa madamo nga henerasyon, limitado ang ila paggamit sang “[libro] sang kasugoan ni Moises” (Nehemias 8:1). Si Esdras nga eskriba nakabaton sang pahanugot halin sa hari sang Persia nga magkadto sa Jerusalem, kon sa diin sia “nagdala sang kasugoan sa atubangan sang pagtilipon” (Nehemias 8:2). Paano mo sundon ang ehemplo ni Esdras nga ginlaragway sa Esdras 7:10? Samtang imo ginabasa ang Nehemias 8, nga nagaunod sang rekord parte kay Esdras nga nagabasa sang layi sa katawhan, ano ang imo mga panghunahuna parte sa gahum sang pulong sang Dios sa imo kabuhi?

Tan-awa man sa Teachings: Ezra Taft Benson, 115–24.

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Esdras 3:8–13; 6:16–22.Paano ginpakita sang mga Judio ang ila kalipay tungod sa templo samtang ginatukod ini liwat kag dayon samtang ginadedikar ini? Ano ang aton ginahimo para ipakita ang aton kalipay tungod sa templo? Basi pwede nga magtan-aw ang imo pamilya sang mga litrato sang mga templo kag hambalan kon paano nagadala ang mga templo sang kalipay sa inyo.

Esdras 7:6, 9–10, 27–28.Pila ka beses sa sining mga bersikulo, ginsulat ni Esdras nga ara sa iya ibabaw ang kamot sang Ginuo samtang nagabiyahe sia pa-Jerusalem. Ano ayhan ang buot silingon sining dinalan? Paano naton nabatyagan ang kamot sang Ginuo sa aton? Basi pwede mag-istorya ang mga miyembro sang pamilya sang mga halimbawa halin sa ila mga kabuhi.

Nehemias 2; 4; 6.Ang istorya ni Nehemias makainspirar sa mga miyembro sang pamilya kon nagapangatubang sila sang oposisyon samtang nagahimo sila sang “dakong buluhaton” (Nehemias 6:3). Pwede nga magtukod ang mga miyembro sang pamilya sang pader gamit ang mga bagay nga ara sa inyo balay samtang inyo ginabasa sing ululupod ang importante nga nga dinalan (pareho sang Nehemias 2:17–20; 4:13–18; 6:1–3). Ano ang aton matun-an kay Nehemias parte sa pagpangatubang sang oposisyon? Ano ang dakong buluhaton nga gusto ipahimo sang Ginuo sa aton? Paano kita ginpabakod sang Ginuo para malampuwasan ang oposisyon sa sining buluhaton?

Nehemias 8:1–12.Sa Nehemias 8, ginbasa ni Esdras ang layi ni Moises sa mga tawo nga handa magpamati sa pulong sang Dios. Ang pagbasa sang mga bersikulo 1–12 makabulig sa inyo nga padalumon ang kapasalamatan sang imo pamilya sa pulong sang Dios. Ano ang nabatyagan sang katawhan parte sa layi sang Dios? Paano naton mabuligan ang kada isa nga “mahangop ang pagbasa”? (bersikulo 8).

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Magpaambitanay sang balaan nga mga kasulatan bilang pamilya. Sa inyo pang-pamilya nga pagtuon sang balaan nga mga kasulatan, tugoti ang mga miyembro sang pamilya nga mag-istorya sang mga dinalan halin sa ila personal nga pagtuon nga nangin makahulugan gid para sa ila.