“Abril 11–17. Paskwa sang Pagkabanhaw (Easter): “Ginlamon Niya sing Dayon ang Kamatayon,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)

“Abril 11–17. Paskwa sang Pagkabanhaw (Easter),” Dali, Magsunod sa Akon—Para sa Mga Indibidwal kag Mga Pamilya: 2022

Litrato

lulubngan nga ginpahigad na ang bato sa pwertahan

Larawan sang bakante nga lulubngan ni Maryna Kriuchenko

Abril 11–17

Paskwa sang Pagkabanhaw (Easter)

“Ginlamon Niya sing Dayon ang Kamatayon”

Samtang imo ginabasa kag ginabinagbinag ang Pagbayad-Sala sang Manluluwas sining semana, pamensara nga isulat ang imo mga panghunahuna kag mga balatyayon parte sa Iya sakripisyo sa imo journal ukon sa espasyo nga gintigana sa sining outline.

Isulat Ang Imo Mga Panghunahuna

Ang kabuhi ni Jesucristo “amo ang sentro sang tanan nga maragtas sang tawo” (“Ang Buhi nga Cristo: Ang Panaksihon sang mga Apostoles,” ChurchofJesusChrist.org). Ano ang kahulugan sina? Sa isa ka bahin, sigurado nga nagakahulugan ini nga ang kabuhi sang Manluluwas nagaimpluwensya sang wala katapusan nga kapalaran sang tagsa ka tawo nga nagkabuhi ukon magakabuhi pa. Mahimo nga masiling mo man nga ang kabuhi kag ang misyon ni Jesucristo, nga nagtapos sa Iya Pagkabanhaw sa sinang una nga Domingo sang Paskwa sang Pagkabanhaw, nagakonekta sang tanan nga katawhan sang Dios sa bilog nga kasaysayan: Ang mga natawo antes kay Cristo nagahulat sa Iya nga may pagtuo (tan-awa sa Jacob 4:4), kag ang mga natawo pagkatapos nagadumdom sa Iya nga may pagtuo. Samtang aton ginabasa ang mga panaysayon kag mga propesiya sa Daan nga Katipan, indi naton makita ang ngalan nga Jesucristo, pero makita naton ang ebidensya sang pagtuo sang dumaan nga tumuluo kag ang ila paghulat sa ila Mesias kag Manunubos. Gani kita nga ginaagda sa pagdumdom sa Iya makabatyag sang koneksyon sa ila nga naghulat sa Iya. Kay matuod gid nga ginpas-an ni Jesucristo “ang kalautan naton nga tanan” (Isaias 53:6; italics gindugang), kag “kay Cristo ang tanan buhion” (1 Mga Taga-Corinto 15:22; italics gindugang).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Ang Daan nga Katipan nagapamatuod sang nagabayad-sala nga sakripisyo ni Jesucristo.

Madamo nga mga dinalan sa Daan nga Katipan ang nagatudlo sa pag-alagad kag nagabayad-sala nga sakripisyo sang Manluluwas. Ang tsart sa dalom nagalista sang pila sining mga dinalan. Samtang imo ginabasa ining mga bersikulo, ano nga mga panghunahuna ang nagaabot sa imo parte sa Manluluwas?

Daan nga Katipan	Bag-ong Katipan
Daan nga Katipan Zacarias 9:9	Bag-ong Katipan Mateo 21:1–11
Daan nga Katipan Zacarias 11:12–13	Bag-ong Katipan Mateo 26:14–16
Daan nga Katipan Isaias 53:4	Bag-ong Katipan Mateo 8:16–17; 26:36–39
Daan nga Katipan Isaias 53:7	Bag-ong Katipan Marcos 14:60–61
Daan nga Katipan Salmo 22:16	Bag-ong Katipan Juan 19:17–18; 20:25–27
Daan nga Katipan Salmo 22:18	Bag-ong Katipan Mateo 27:35
Daan nga Katipan Salmo 69:21	Bag-ong Katipan Mateo 27:34, 48
Daan nga Katipan Salmo 118:22	Bag-ong Katipan Mateo 21:42
Daan nga Katipan Isaias 53:9, 12	Bag-ong Katipan Mateo 27:57–60; Marcos 15:27–28
Daan nga Katipan Isaias 25:8	Bag-ong Katipan Marcos 16:1–6; Lucas 24:6
Daan nga Katipan Daniel 12:2	Bag-ong Katipan Mateo 27:52–53

Mas madamo pa gid kag klaro ang mga propesiya kag mga pinanudlo parte sa Manluluwas sa Libro ni Mormon. Pamensara kon paano ginpabakod ang imo pagtuo sang mga dinalan pareho sini: 1 Nefi 11:31–33; 2 Nefi 25:13; Mosias 3:2–11.

Sarang ako makakita sang paghidaet kag kalipay paagi sa Pagbayad-Sala sang Manluluwas.

Sa bug-os nga panahon, si Jesucristo, paagi sa Iya nagabayad-sala nga sakripisyo, nagatanyag sang paghidaet kag kalipay sa tanan nga magapalapit sa Iya (tan-awa sa Moises 5:9–12). Pamensara nga tun-an ang masunod nga balaan nga mga kasulatan nga nagapamatuod sang paghidaet kag kalipay nga Iya ginatanyag, kag samtang ginahimo mo ini, hunahunaa kon paano mo mabaton ang kalinong kag kalipay nga Iya ginadala: Mga Salmo 16:8–11; 30:2–5; Isaias 12; 25:8–9; 40:28–31; Juan 14:27; 16:33; Alma 26:11–22.

Tan-awa man sa “Ako Nahalawhaw Gid [I Stand All Amazed],” Mga Himno kag mga Ambahanon sang Kabataan, no. 22–23.

Grey Day Golgotha [Maguomon nga Adlaw sa Golgota], ni J. Kirk Richards

Paagi sa Iya Pagbayad-Sala, may gahum si Jesucristo nga buligan ako nga malampuwasan ang sala, kamatayon, mga pagtilaw, kag mga kahuyang.

Sa bilog nga balaan nga mga kasulatan, nagpamatuod ang mga propeta sang gahum ni Jesucristo sa paghilway sa aton sa sala kag kamatayon kag sa pagbulig sa aton nga malampuwasan ang aton mga pagtilaw kag mga kahuyang. Sa ano naghimo sang kinalain si Cristo sa imo kabuhi? Ngaa importante Sia sa imo? Binagbinaga ining mga pamangkot samtang imo ginabasa ining mga bersikulo, kag isulat ang imo nga panghunahuna kag mga balatyagon parte sa Manluluwas:

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Exodo 12:1–28.Samtang inyo ginaselebrar ang Paskwa sang Pagkabanhaw, pwede rebyuhon sang imo pamilya ang inyo natun-an parte sa Pascua (Passover) sang temprano sining bulan. Ngaa importante nga ang sakripisyo sang Manluluwas natabo sa pareho nga tion sang Pascua (Passover)?

Para sa pagpalip-ot sang natabo sa katapusan nga semana sa kabuhi sang Manluluwas, tan-awa sa “Holy Week” at ComeuntoChrist.org/2016/easter/easter-week.

Isaias 53.Ang pagbasa sang mga propesiya parte kay Jesucristo sa Isaias 53 makabulig sa mga miyembro sang pamilya nga maintiendihan ang nagabayad-sala nga sakripisyo sang Manluluwas. Diin nga mga bersikulo ukon mga dinalan ang nakita sang imo pamilya nga labi nga mabaskog? Pamensara ang paghiwat sang miting sang testimonya sa pamilya sa diin inyo ipaambit ang personal ninyo nga mga testimonya sang Pagbayad-Sala sang Manluluwas.

“Espesyal nga mga Saksi ni Cristo.” Bilang pamilya, hambali ang mga paagi nga inyo mapaambit ang inyo saksi kay Cristo. Halimbawa, pwede kamo maghagad sang isa ka tawo nga magsimba upod sa inyo sining Domingo sang Adlaw sang Pagkabanhaw.

Mga himno kag mga kanta.Ang musika isa ka mabaskog nga paagi sa pagdumdom sang Manluluwas kag pag-agda sang Espiritu sa aton mga puluy-an. Pwede magpaambit ang mga pamilya kag magkanta sing ululupod sang mga himno ukon mga kanta parte sa Paskwa sang Pagkabanhaw ukon parte kay Jesucristo, pareho sang “Nabanhaw ang Ginuo [Christ the Lord Is Risen Today]” (Mga Himno kag mga Ambahanon sang Kabataan, no. 54).

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Ipangabuhi ang ebanghelyo ni Jesucristo. “Agud mangin Cristohanon nga manunudlo [sa inyo puluy-an], ayhan ang pinakaimportante nga inyo mahimo amo ang … ipangabuhi ang ebanghelyo sa inyo bug-os nga tagipusuon. … Amo ini ang mayor nga paagi para mangin kalipikado para sa pagpakig-upod sang Balaan nga Espiritu. Indi ninyo kinahanglan nga mangin perpekto, kundi matutom lamang nga nagatinguha—kag nagapangayo sang kapatawaran paagi sa Pagbayad-Sala sang Manluluwas kon kamo masandad” (Teaching in the Savior’s Way, 13).