Si Moises, Aaron, kag Faraon

Larawan ni Moises kag Aaron sa templo ni Faraon, ni Robert T. Barrett

Marso 28–Abril 3

Exodo 7–13

“Dumdoma Ninyo Ining Adlaw, nga Naggwa Kamo sa Egipto”

Samtang imo ginabasa kag ginabinagbinag ang Exodo 7–13, isulat ang mga panghunahuna nga nagaabot sa imo. Kon regular mo ini nga himuon, magatubo ang imo ikasarang sa pagkilala sang mga paghutik sang Balaan nga Espiritu.

Isulat Ang Imo Mga Panghunahuna

Sunod-sunod nga kalalat-an ang naghalit sa Egipto, pero nagpamalibad gihapon si Faraon nga buy-an ang mga Israelnon. Pero padayon sa gihapon nga ginpakita sang Dios ang Iya gahum kag ginhatagan si Faraon sang mga oportunidad nga batunon “nga Ako ang Ginuo” kag “wala na gid sing iban nga kaangay sa akon sa bug-os nga duta” (Exodo 7:5; 9:14). Sa pihak nga bahin, ayhan si Moises kag ang mga Israelnon naglantaw nga nahalawhaw sa sining pagpakita sang gahum sang Dios para sa ila. Sigurado ining padayon nga mga tanda nagkumpirma sang ila pagtuo sa Dios kag nagpabakod sang ila kahanda sa pagsunod sa propeta sang Dios. Dayon, sang mapaslawan nga hilwayon sang siyam ka makahaladlok nga mga kalalat-an ang mga Israelnon, ang ikapulo nga kalalat-an—ang kamatayon sang panganay, lakip na ang panganay ni Faraon—sa ulihi ang nagtapos sang pagkabihag. Daw nagakabagay lang ini kay sa tagsa ka kaso sang espirituhanon nga pagkabihag, may isa lang matuod ka paagi para makapalagyo. Bisan ano pa ang gintilawan naton sang nagliligad, pareho gid ini sa aton ang iya sang mga anak sang Israel. Ang sakripisyo lamang ni Jesucristo, ang Panganay—ang dugo sang Cordero nga wala sing kasawayan—ang magaluwas sa aton.

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Exodo 7–11

Sarang ko pilion nga maghumok ang akon tagipusuon.

Tani ang imo pagbuot indi pareho ka supak sa pagbuot sang Dios sang sa iya ni Faraon. Sa gihapon, tanan kita may mga tiyempo nga ang aton mga tagipusuon indi pareho kahumok sangsa ginapaabot, gani may matun-an gid kita sa mga aksyon ni Faraon nga nasulat sa Exodo 7–10. Sa imo pagbasa parte sa mga kalalat-an sa sining mga bersikulo, ano ang nagtatak gid sa imo sa mga sabat ni Faraon? May natalupangdan ka bala nga pag-anggid-anggid sa katig-a sang imo tagipusuon? Binagbinaga ang imo matun-an sa sining mga kapitulo parte sa kahulugan sang pag-angkon sang mahumok nga tagipusuon.

Tandai nga ang Paglubad ni Joseph Smith sang Exodo 7:3, 13; 9:12; 10:1, 20, 27; 11:10 nagaklaro nga wala ginpatig-a sang Ginuo ang tagipusuon ni Faraon—si Faraon mismo ang nagpatig-a sang iya tagipusuon.

Ano ang imo matun-an sa masunod nga balaan nga mga kasulatan parte sa pagpatubo sang mahumok nga tagipusuon? 1 Nefi 2:16; Mosias 3:19; Alma 24:7–8; 62:41; Eter 12:27.

Exodo 12:1–42

Ang Pascua (Passover) nagasimbolo sang Pagbayad-Sala ni Jesucristo.

Ang solo nga paagi para maluwas ang mga Israelnon sa ikapulo nga kalalat-an, nga ginlaragway sa Exodo 11:4–5, amo ang insakto nga pagsunod sang mga instruksyon nga ginhatag sang Ginuo kay Moises sa Exodo 12, isa ka ritwal nga ginkilala nga Pascua. Ginatudlo sang Pascua sa aton paagi sa mga simbolo nga pareho sang paghilway sang Ginuo sa mga Israelnon sa pagkabihag sa Egipto, sarang man Niya kita hilwayon sa pagkabihag sa sala. Ano ang imo nakita sa mga instruksyon kag mga simbolo sang Pascua nga nagapadumdom sa imo kay Jesucristo kag sa Iya Pagbayad-Sala? Ano ang ginapanugyan sa imo sining mga simbolo kag mga instruksyon kon paano magbaton sang mga bugay sang Iya Pagbayad-Sala? Halimbawa, ano ayhan ang ginasimbolo sang pagbutang sang dugo sang carnero sa pwertahan? (bersikulo 7). Ano ang kahulugan sa imo sang “ang inyo mga sapin sa inyo mga tiil, kag ang inyo sungkod sa inyo kamot”? (bersikulo 11).

Tan-awa man sa Doktrina kag mga Kasugtanan 89:21.

mga tawo nga nagaambit sang sakramento

Ang sakramento nagabulig sa aton sa pagdumdom sang aton Manughilway, si Jesucristo.

Exodo 12:14–17, 24–27; 13:1–16

Ang sakramento nagabulig sa akon nga madumduman ang paghilway sa akon paagi kay Jesucristo.

Gusto sang Manluluwas nga madumduman pirme sang mga Israelnon nga Iya sila ginhilway, bisan sang nangin malayo na nga handurawan ang ila pagkabihag. Amo ini kon ngaa ginsugo Niya sila nga saulugon ang pista sang Pascua kada tuig. Samtang imo ginabasa ang Iya mga instruksyon sa Exodo 12:14–17, 24–27; 13:1–16, hunahunaa kon ano ang imo ginahimo para panumdumon ang mga bugay sang Dios sa imo. Paano mo matipigan inang handumanan “sa bug-os ninyong mga kaliwatan”? (tan-awa sa Exodo 12:14, 26–27).

Ano ang pagpalareho nga imo makita sa mga katuyuan sang pista sang Pascua kag sang sakramento? Paano ang pagbasa parte sa Pascua nagapadumdom sa imo sang sakramento kag nagahatag sang mas madalom nga kahulugan sa sinang ordinansa? Pamensara kon ano ang pwede mo himuon para “dalayon nga magdumdom” kay Jesucristo (Moroni 4:3; 5:2; tan-awa man sa Lucas 22:7–8, 19–20).

Mahimo mo man binagbinagon ang iban nga gusto sang Ginuo nga imo dumdumon; tan-awa, halimbawa sa, Helaman 5:6–12; Moroni 10:3; Doktrina kag mga Kasugtanan 3:3–5, 10; 18:10; 52:40.

Tan-awa man sa Juan 6:54.

family study icon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Exodo 7–12.Ayhan pagkatapos nga basahon ang parte sa mga kalalat-an nga ginpadala sang Ginuo sa mga Egiptohanon bilang mga tanda sang Iya gahum, pwede istoryahan sang inyo pamilya ang mga paagi nga ginapakita sang Ginuo ang Iya gahum sa karon.

Exodo 8:28, 32; 9:27–28, 34–35.Pwede magamit ining mga bersikulo para sugdan ang diskusyon parte sa importansya sang pagtuman sang aton hinambalan (mga promisa). Mahimo nga mag-istorya ang mga miyembro sang pamilya sang mga eksperiyensya sang nakita nila ang iban nga ginatuman ang ila ginkasugtan.

Exodo 12:1–42.Pagkatapos nga basahon ang Exodo 12:1–42 sing ululupod, isulat sa ginunting nga mga papel ang pwede ninyo himuon bilang pamilya para dumdumon ang Pagbayad-Sala ni Jesucristo. Tungod ang dugo sang cordero sa pwertahan (tan-awa sa bersikulo 23) nagasimbolo sa Manluluwas, pwede ninyo ibutang ining mga papel sa palibot sang pwertahan sa inyo balay. Pwede man kamo magkaon sang pila sa mga pagkaon sa Pascua, pareho sang wala nag-alsa nga tinapay (mga biskwit ukon tortilyas) ukon mapait nga mga utan (margoso ukon balunggay), kag hambali kon paano kita ginabuligan sang Pascua nga madumduman kon paano ginhilway sang Dios ang Iya katawhan. Halimbawa, ang wala nag-alsa nga tinapay nagapadumdom sa ila nga wala na sang tiyempo nga mag-alsa ang ila tinapay antes sila magpalagyo sa pagkabihag. Ang mapait nga mga utan nagpadumdom sa ila sang kapait sang pagkabihag.

Exodo 12:14, 24–27.Ayhan pwede ninyo rebyuhon ining mga bersikulo bilang pamilya antes sang inyo madason nga miting sang sakramento. Paano maangot ining mga bersikulo sa sakramento? Paano naton mas himuon ang sakramento nga “handumanan” sang ginhimo sang Manluluwas para sa aton?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Dakong Kaalam kag Gugma [How Great the Wisom and the Love],” Mga Himno kag mga Ambahanon sang Kabataan, no. 19.

Pagpauswag sang Aton Pagpanudlo

Magpaambit sang mga leksyon gamit ang isa ka bagay. Agdaha ang mga miyembro sang pamilya nga magpangita sang mga bagay nga makabulig sa ila nga maintiendihan ang mga prinsipyo sa balaan nga mga kasulatan nga inyo ginabasa. Halimbawa, ang mahumok kag matig-a nga mga bagay mahimo nga makabulig sa mga miyembro sang pamilya nga hambalan ang kinalain sang pag-angkon sang mahumok nga tagipusuon kag matig-a nga tagipusuon.

Pamilya nga Hebreo nga may pagkaon sang Pascua

Larawan sang panyapon sa Pascua (Passover), ni Brian Call