“Marso 21–27. Exodo 1–6: ‘Ako Nakadumdom sang Akon Kasugtanan,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)

“Marso 21–27. Exodo 1–6,” Dali, Magsunod sa Akon—Para sa Mga Indibidwal kag Mga Pamilya: 2022

Litrato

Si Moises kag ang sapinit nga nagadabdab sing kalayo

Moses and the Burning Bush [Si Moises kag ang Sampinit nga Nagadabdab sing Kalayo], ni Harry Anderson

Marso 21–27

Exodo 1–6

“Ako Nakadumdom sang Akon Kasugtanan”

Sugdi ang imo pagtuon sa pangamuyo, kag magpangayo sang bulig nga makita ang mga mensahe sa Exodus 1–6 nga magamit sa imo kabuhi kag sa imo pagserbisyo sa ginharian sang Dios.

Isulat Ang Imo Mga Panghunahuna

Ang imbitasyon nga mag-istar sa Egipto literal nga nagluwas sang panimalay ni Jacob. Pero pagligad sang ginatos ka tuig, ang ila mga kaliwatan gin-ulipon kag ginpangpahog sang bag-o nga faraon nga “wala makakilala kay Jose” (Exodo 1:8). Mangin natural lang sa mga Israelnon nga manghunahuna kon ngaa gintugtan sang Dios nga matabo ini sa ila, nga Iya katawhan sa kasugtanan. Nadumduman bala Niya ang kasugtanan nga Iya ginhimo sa ila? Mga katawhan pa bala Niya sila sa gihapon? Makita bala Niya kon daw ano kadako sang ila pag-antos?

Mahimo nga may mga tiyempo nga daw gusto mo magpamangkot sang pareho man nga mga pamangkot. Siguro nagapanumdom ka, Nakahibalo bala ang Dios kon ano ang akon ginaagyan? Mabatian bala Niya ang akon mga pagpangayo sing bulig? Ang istorya sa Exodo sang paghilway sang Israel sa Egipto maathag nga nagasabat sinang mga pamangkot: Ang Dios wala nagakalipat sa Iya katawhan. Ginadumdom Niya ang Iya mga kasugtanan sa aton kag pagatumanon ang mga ini sa Iya kaugalingon nga panahon kag pamaagi (tan-awa sa Doktrina kag mga Kasugtanan 88:68). “Tubson ko kamo sa butkon nga inuntay,” siling Niya. “Ako ang Ginuo nga inyo Dios, nga nagpagwa sa inyo gikan sa idalom sang [inyo] mga lulan” (Exodo 6:6–7).

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Exodo 1–2

Si Jesucristo amo ang akon Manughilway.

Isa sang mayor nga mga tema sa libro nga Exodo amo nga ang Dios may gahum agud hilwayon ang Iya katawhan sa pagpamigos. Ang pag-ulipon sang mga Israelnon nga ginlaragway sa Exodo 1 ginakabig nga simbolo sang pagkabihag nga ginaatubang naton tanan bangud sang sala kag kamatayon (tan-awa sa 2 Nefi 2:26–27; 9:10; Alma 36:28). Kag si Moises, nga manughilway sang mga Israelnon, ginakabig nga tipo, ukon representasyon, ni Jesucristo (tan-awa sa Deuteronomio 18:18–19; 1 Nefi 22:20–21). Basaha ang Exodo 1–2 nga ginatandaan ining mga pagpaanggid. Mahimo nga imo natalupangdan, halimbawa, nga si Moises kag Jesus pareho nga ginsalbar sa kamatayon sang magagmay pa sila nga kabataan (tan-awa sa Exodo 1:22–2:10; Mateo 2:13–16) kag pareho nga nagtiner sa kamingawan antes magsugod sa ila pag-alagad (tan-awa sa Exodo 2:15–22; Mateo 4:1–2). Ano pa nga mga panghangop ang imo matun-an sa Exodo parte sa espirituhanon nga pagkabihag? parte sa pagpanghilway sang Manluluwas?

Moses in the Bulrushes [Si Moises sa Takupis nga Papiro], © Providence Collection/lisensyado sa goodsalt.com

Exodo 3–4

Ginahatagan sang Dios sang gahum ang Iya mga ginatawag sa paghimo sang Iya buluhaton.

Sa karon ginakilala naton si Moises bilang bantog nga propeta kag lider. Pero indi amo sina ang pagkabig ni Moises sa iya kaugalingon sang una sia nga gintawag sang Ginuo. “Sin-o bala ako,” siling ni Moises, “nga magkadto ako kay Faraon?” (Exodo 3:11). Ugaling, ang Ginuo nakahibalo kon si sin-o gid si Moises—kag kon mangin sin-o sia. Samtang imo ginabasa ang Exodo 3–4, pat-ini kon paano ginpaisog sang Ginuo si Moises kag ginsabat ang iya mga kabalaka. Ano ang imo makita sa sining mga kapitulo nga makainspirar sa imo kon pamatyag mo daw indi ka makasarang? Paano ginabugayan sang Ginuo ang Iya mga alagad sang dugang nga gahum sa paghimo sang Iya pagbuot? (tan-awa sa Moises 1:1–10, 24–39; 6:31–39, 47). Sang san-o mo nakita nga ginhimo sang Dios ang Iya buluhaton paagi sa imo ukon sa iban?

Exodo 5–6

Ang mga katuyuan sang Ginuo pagatumanon sa Iya kaugalingon nga panahon.

Bisan pa nga maisog ni Moises nga gin-atubang si Faraon, pareho sang ginsugo sang Dios, kag ginsilingan sia nga buy-an ang mga Israelnon, nagpamalibad si Faraon. Ang matuod, ginpabudlay pa gid niya ang kabuhi sang mga Israelnon. Mahimo nga natingala si Moises kag ang mga Israelnon kon ngaa wala nagakatabo ang mga butang bisan pa nga ginahimo ni Moises ang ginapangayo sang Dios sa iya (tan-awa sa Exodo 5:22–23).

Nakabatyag ka na bala nga ginahimo mo ang pagbuot sang Dios pero indi mo makita ang kadalag-an nga imo ginapaabot? Rebyuha ang Exodo 6:1–8, nga ginapangita ang ginsiling sang Ginuo kay Moises para buligan sia nga magpadayon. Paano ka ginbuligan sang Ginuo nga magpadayon sa paghimo sang Iya pagbuot?

Exodo 6:3

Sin-o si Jehova?

Ang Jehova isa sa mga ngalan ni Jesucristo kag nagatumod sa Manluluwas antes matawo. Ang Paglubad ni Joseph Smith sang Exodo 6:3 nagaklaro nga sanday propetang Abraham, Isaac, kag Jacob nakakilala sa Ginuo sa sini nga ngalan. Masami, kon maggwa ang dinalan nga “ang Ginuo” sa Daan nga Katipan, nagatumod ini kay Jehova. Sa Exodo 3:13–15, ang titulo nga “AKO AMO AKO” isa man nga pagtumod kay Jehova (tan-awa man sa Doktrina kag mga Kasugtanan 38:1; 39:1).

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Exodo 1–2.Pila ka mga babayi ang nag-uyat sang importante kaayo nga mga papel sa plano sang Dios sa pagpadako sang manughilway sang mga Israelnon. Bilang pamilya, pwede ninyo basahon ang parte sa mga paltera nga sanday Sifra kag Pua (Exodus 1:15–20); ang iloy ni Moises, nga si Jocabed, kag ang iya utod nga babayi, nga si Miriam (Exodo 2:2–9; Numeros 26:59); anak nga babayi ni Faraon (Exodo 2:5–6, 10); kag ang asawa ni Moises nga si Zipora (Exodo 2:16–21). Paano ginbuligan sining kababayin-an nga mag-uswag ang plano sang Dios? Paano kita ginapadumdom sang ila mga eksperiyensya sang misyon ni Jesucristo? Pwede man kamo magtipon sang mga litrato sang babayi nga mga himata kag katigulangan kag magpaambit sang mga istorya parte sa ila. Paano bala kita ginabugayan sang matarong nga mga babayi?

Exodo 3:1–6.Sang ginpalapitan ni Moises ang nagadabdab nga sapinit, ginsilingan sia sang Ginuo nga hukson ang iya sapatos bilang tanda sang pagtahod. Paano naton mapakita ang pagtahod sa sagrado nga mga lugar? Halimbawa, ano ang pwede naton himuon para himuon ang aton balay nga isa ka sagrado nga lugar kon sa diin pwede magtiner ang Espiritu sang Ginuo? Paano naton ipakita ang dugang nga pagtahod sa iban pa nga sagrado nga mga lugar?

Exodo 4:1–9.Ginhatagan sang Ginuo si Moises sang gahum sa paghikot sang tatlo ka mga milagro bilang tanda agud ipakita sa mga anak ni Israel nga Iya ginpadala si Moises. Ano ang ginatudlo sa aton sining mga tanda parte kay Jesucristo?

Exodo 5:2.Ano ayhan ang buot silingon sang aton nga “kilalahon” ang Ginuo? Paano naton Sia makilala? (halimbawa, tan-awa sa Alma 22:15–18). Paano maapektuhan sang aton relasyon sa Iya ang aton handum nga tumanon Sia? (tan-awa man sa Juan 17:3; Mosias 5:13).

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Magtipig sang sululatan sang mga tinun-an. Mahimo nga makabulig ang paggamit sang journal ukon notbuk para sulatan sang mga panghunahuna, mga ideya, mga pamangkot, ukon mga pagpabatyag nga nagaabot samtang nagatuon ka.