“Mga Dapat Tandaan: Ang Panimalay sang Israel,” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)

“Mga Dapat Tandaan: Ang Panimalay sang Israel,” Dali, Magsunod sa Akon—Para sa Mga Indibidwal kag Mga Pamilya: 2022

Litrato

icon sang panghunahuna

Mga Dapat Tandaan

Ang Panimalay sang Israel

Sa isa ka bahin sang kamingawan sa nasidlangan sang Canaan, ginakulbaan nga ginhulat ni Jacob ang pagkit-anay nila sang iya kapid, nga si Esau. Ang ulihi nga nakita ni Jacob si Esau, mga 20 ka tuig na ang nagligad, ginahingabot sia ni Esau nga patyon. Nagpaligad si Jacob sang bilog nga gab-i nga nagpakigdumog sa kamingawan, nga nagapangayo sang bendisyon halin sa Dios. Bilang resulta sang pagtuo ni Jacob, pagkapursigido, kag determinasyon, ginsabat sang Dios ang iya mga pangamuyo. Sina nga gab-i gin-islan ang ngalan ni Jacob sa Israel, ngalan nga buot silingon “sia nga nagpadayon upod sa Dios” (Genesis 32:28, tan-awa man sa Genesis 32:24–32).¹

Malapit sa Suba sang Jaboc, nabaton ni Jacob ang ngalan nga Israel.

Ini ang una nga tion nga ang ngalan nga Israel makit-an sa Biblia, kag isa ini ka ngalan nga nagapadayon sa bilog nga libro kag sa bilog nga kasaysayan. Ang ngalan sang ulihi nagatumod sa masobra sangsa isa lang ka tawo. Si Israel may 12 ka mga anak nga lalaki, kag ang ila mga kaliwat sa kabilugan ginkilala nga “panimalay sang Israel,” ang “mga tribo sang Israel,” ang “mga anak sang Israel,” ukon ang “mga Israelnon.”

Sa kasaysayan, ang mga anak sang Israel nag-angot sang dako nga bili sa ila ginhalinan bilang isa sa dose ka mga tribo sang Israel. Ang ila kaliwatan importante nga bahin sang ila pagkakilala sa kasugtanan. Si Apostoles Pablo nagpakilala nga sia halin “sa tribo ni Benjamin” (Mga Taga-Roma 11:1). Sang ginpabalik ni Lehi ang iya mga anak nga lalaki sa Jerusalem para kuhaon ang mga lamina nga saway, isa sa rason amo nga ang mga lamina nagaunod sang “lista sang kaliwatan sang iya mga katigulangan” (1 Nefi 5:14; tan-awa man sa 1 Nefi 3:3). Nadiskubrehan ni Lehi nga kaliwat sia ni Jose, kag ang paghibalo sang iya kaliwat sang ila koneksyon sa panimalay sang Israel nangin importante sa ila sa tinuig nga magaabot (tan-awa sa Alma 26:36; 3 Nefi 20:25).

Sa Simbahan sa karon, mahimo nga mabatian mo ang Israel sa mga pahayag pareho sang “pagtipon sang Israel.” Nagakanta kita parte sa “Manunubos sang Israel,”² Sa sining mga halimbawa, wala lang kita nagahambal ukon nagakanta parte sa dumaan nga ginharian sang Israel ukon sang moderno nga nasyon nga ginatawag Israel. Kundi, ginatumod naton ang mga ginpangtipon halin sa mga nasyon sang kalibutan pasulod sa Simbahan ni Jesucristo. Ginatumod naton ang mga tawo nga nagpakigbato upod sa Dios, nga sinsero nga nagapangita sang Iya mga bugay, kag nga paagi sa bunyag, nangin Iya katawhan sa kasugtanan.

Ang imo bendisyon sang patriarka nagapahayag sang imo koneksyon sa isa sa mga tribo sa panimalay sang Israel. Mas masobra ina sangsa isa ka makawiwili nga tinipik sang impormasyon sa family history. Ang mangin bahin sang panimalay sang Israel nagakahulugan nga may ara ka sang kaangtanan sa kasugtanan upod sa Amay nga Langitnon kag kay Jesucristo. Nagakahulugan ini nga ikaw, pareho kay Abraham, gintigana nga “mangin pagpakamaayo” sa mga anak sang Dios (Genesis 12:2; Abraham 2:9–11). Nagakahulugan ini, sa mga pulong ni Pedro, nga “[ikaw] pinili nga kaliwatan, harianon nga pagkapari, balaan nga pungsod, katawhan nga iya sang Dios; agud nga mapakita [mo] ang gamhanan nga mga buhat sang nagtawag sa [imo] gikan sa kadudulman pakadto sa iya kalatingalahan nga kapawa” (1 Pedro 2:9). Nagakahulugan ini nga ikaw isa nga “nagapadayon upod sa Dios” samtang imo ginatahod ang imo mga kasugtanan upod sa Iya.