Pebrero 28–Marso 6

Genesis 28–33

“Sa Pagkamatuod ang Ginuo Yari sa Sining Duog”

Samtang imo ginabasa ang Genesis 28–33, binagbinaga ang imo matun-an sa mga ehemplo ni Jacob kag sang iya pamilya. Isulat ang bisan ano nga mga panghunahuna nga imo mabaton.

Isulat Ang Imo Mga Panghunahuna

Ang mga kapitulo 28 kag 32 sang Genesis nagasugid sang duha ka espirituhanon nga mga eksperiyensya sang propeta nga si Jacob. Pareho ini nga natabo sa kamingawan pero sa nagkalainlain kaayo nga mga sirkumstansya. Sa una nga eksperiyensya, nagapanglakaton si Jacob pakadto sa banwa sang iya iloy para mangita sang palangasaw-on kag, sa dalanon, nagpaligad sang gab-i nga nagaulon sa mga bato. Mahimo nga wala niya ginpaabot nga makita ang Ginuo sa amo kaligwin nga lugar, pero ginpahayag sang Dios ang Iya Kaugalingon kay Jacob sa makabag-o-sang-kabuhi nga damgo, kag si Jacob nagsiling, “Sa pagkamatuod ang Ginuo yari sa sining duog; kag wala ako makahibalo sini” (Genesis 28:16). Pila ka tuig ang nagligad, nasalapuan liwat ni Jacob ang iya kaugalingon sa kamingawan. Sa sini nga hugada, pabalik na sia sa Canaan, nga posible nagapangatubang sang delikado nga pagkit-anay sa iya akig nga utod, nga si Esau. Pero nahibal-an ni Jacob nga kon kinahanglan niya sang bendisyon, pwede niya pangitaon ang Ginuo, bisan pa sa kamingawan (tan-awa sa Genesis 32).

Mahimo nga masalapuan mo man ang imo kaugalingon sa imo kaugalingon nga kamingawan nga nagapangayo sang bendisyon halin sa Dios. Basi ang imo kamingawan amo ang mabudlay nga kaangtanan sa pamilya, pareho sang iya ni Jacob. Basi pamatyag mo malayo ka sa Dios ukon pamatyag mo kinahanglan mo sang bendisyon. Kon kaisa ang bugay nagaabot nga wala ginapaabot; sa iban nga tion ginaunahan ini sang pagpakigdumog. Kon ano ang imo kinahanglan, madiskubrehan mo nga bisan sa imo kamingawan, “ang Ginuo yari sa sining duog.”

Mga Ideya para sa Personal nga Pagtuon sang Balaan nga mga Kasulatan

Genesis 28; 29:1–18

Ginpromisa sa akon ang mga bugay ni Abraham sa templo.

Sa dalanon pakadto sa Haran agud magpangita sang asawa, nagdamgo si Jacob sang hagdan nga nagauntay halin sa duta palangit, nga ang Dios nagatindog sa ibabaw sini. Sa damgo, ginpabaskog sang Dios kay Jacob ang pareho nga mga kasugtanan nga Iya ginhimo kanday Abraham kag Isaac (tan-awa sa Genesis 28:10–17; tan-awa man sa Genesis 12:2–3; 26:1–4). Si Pangulong Marion G. Romney nagpaambit sining panghunahuna kon ano ang posible nga ginasimbolo sang hagdan: “Narealisar ni Jacob nga ang mga kasugtanan nga iya ginhimo upod sa Ginuo may mga halintang nga kinahanglan niya mismo sakaon para malab-ot ang ginpromisa nga mga bugay—mga bugay nga magatugot sa iya nga magsulod sa langit kag makig-upod sa Ginuo. … Ang mga templo para sa aton tanan amo ang Bet-el para kay Jacob” (“Temples—The Gates to Heaven,” Ensign, Mar. 1971, 16).

Ano ang iban nga mga tinaga kag mga dinalan sa Genesis 28:10–22 nga nagapahangop sa imo sang koneksyon sang eksperiyensya ni Jacob kag sang mga bugay sang templo? Samtang imo ginabasa ining mga bersikulo, pamensara ang mga kasugtanan nga imo ginhimo; ano nga mga panghunahuna ang nagaabot sa imo?

Samtang imo ginabasa ang Genesis 29:1–18, binagbinaga kon ano kaimportante ang kasal ni Jacob kay Raquel sa kasugtanan nga ginpabaskog sang Dios kay Jacob sa Bet-el (“balay sang Dios”; tan-awa sa Genesis 28:10–19). Tandai ining eksperiyensya samtang padayon mo nga ginabasa ang parte sa kabuhi ni Jacob sa Genesis 29–33. Paano ka ginapalapit pa gid sa Dios sang balay sang Ginuo?

Genesis 29:31–35; 30:1–24

Ginadumdom ako sang Ginuo sa akon mga pagtilaw.

Bisan pa nga nagpuyo si Raquel kag Lea sa tiyempo kag kultura nga lain sangsa aton, maintiendihan naton tanan ang pila sang ila mga balatyagon. Samtang imo ginabasa ang Genesis 29:31–35 kag 30:1–24, pangitaa ang mga tinaga kag mga dinalan nga nagalaragway sang kaluoy sang Dios kay Raquel kag Lea. Binagbinaga kon paano “gintulok sang [Dios] ang [imo] kapipit-an” kag “nagdumdom” sa imo (Genesis 29:32; 30:22).

Importante man nga tandaan nga bisan pa nga ginapamatian kita sang Dios, sa Iya kaalam wala Niya pirme ginahatag ang mismong butang nga aton ginapangayo. Pamensara ang lainlain nga mga pamaagi nga ginsabat sang Ginuo ang imo mga pangamuyo, lakip na ang pagsabat nga “indi.”

Larawan ni Jacob kag Esau nga nagahaksanay, ni Robert T. Barrett

Genesis 32–33

Ang Manluluwas makabulig sa aton nga malampuwasan ang indi pag-intiendihanay sa aton mga pamilya.

Sang magbalik si Jacob sa Canaan, “hinadlukan [sia] sing dako kag nalisang” sa kon paano sia batunon ni Esau (Genesis 32:7). Samtang imo ginabasa sa Genesis 32–33 ang pag-atubangay ni Jacob kag Esau kag ang iya nga mga balatyagon antes sini, pwede mo binagbinagon ang imo kaugalingon nga mga kaangtanan sa pamilya—ayhan inang nagakinahanglan sang pag-ayo. Basi mainspirar ka sining istorya nga magdab-ot sa isa ka tawo. Mahimo nga makabulig giya sang imo pagbasa ang mga pamangkot pareho sini:

• Paano ginhandaan ni Jacob ang pag-atubang kay Esau?

• Ano ang nagtatak sa imo parte sa pangamuyo ni Jacob nga makita sa Genesis 32:9–12?

• Ano ang imo matun-an parte sa kapatawaran sa ehemplo ni Esau?

• Paano kita mabuligan sang Manluluwas nga mag-ayo ang mga kaangtanan sa pamilya?

Tan-awa man sa Lucas 15:11–32.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Genesis 28–33.Gamita ang “Si Jacob kag ang Iya Pamilya” (sa Mga Sugilanon sa Daan nga Katipan) para buligan ang mga kabataan nga maintiendihan ang mga hitabo sa sining mga kapitulo. Basi pwede nga magpundo ang mga miyembro sang pamilya sa kada litrato kag hibaluon kon ano ang ginatudlo, pareho sang importansya sang pag-asawahay, mga kasugtanan, pagtrabaho, kag pagpatawad.

Genesis 28:10–22.Pwede ka maggamit sang hagdan (ukon litrato sang hagdan) para hambalan kon paano ang aton mga kasugtanan daw pareho sa hagdan. Ano nga mga kasugtanan ang aton ginhimo, kag paano kita sini mas ginapalapit sa Dios? Basi masadyahan ang mga miyembro sang pamilya sa pagdrowing sang damgo ni Jacob, nga ginlaragway sa Genesis 28:10–22.

Genesis 32:24–32.Basi may mga miyembro sang inyo pamilya nga nanamian magdumogay. Ngaa ang “pagpakigdumog” isa ka maayo nga paagi para ilaragway ang pagpangayo sang mga bugay sa Ginuo? Ano ang ginapahangop sang Enos 1:1–5; Alma 8:9–10 nga kahulugan sang “pagpakigdumog … sa atubang sang Dios”?

Genesis 33:1–12.Pagkatapos sang madamo nga tinuig sang aligutgot, nag-uliay sanday Jacob kag Esau. Kon makahambal sa aton karon si Jacob kag Esau, ano ayhan ang ila ihambal para mabuligan kita kon may pagbinaisay sa aton pamilya?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Pangitaa si Jesucristo. Ang Daan nga Katipan nagapamatuod kay Jesucristo paagi sa iya mga istorya kag mga simbolo. Pamensara ang pagbutang sang tanda ukon marka sa mga bersikulo nga nagatudlo sa Manluluwas kag labing makahulugan sa imo.

Jacob’s Dream at Bethel [Ang Damgo ni Jacob sa Bet-el], ni J. Ken Spencer