Larawan ni Jose sang Egipto sa bilanggoan, ni Jeff Ward

Marso 7–13

Genesis 37–41

“Ang Ginuo Nag-upod kay Jose”

Samtang imo ginabasa ang Genesis 37–41, magpangamuyo nga buligan ka sang Balaan nga Espiritu nga makita kon paano maangot ang mga dinalan sa balaan nga mga kasulatan sa imo kabuhi. Isulat ang mga paghangop nga imo mabaton.

Isulat Ang Imo Mga Panghunahuna

Kon kaisa nagakatabo ang malain sa maayo nga mga tawo. Ang kabuhi nagatudlo sa aton sinang leksyon sing maathag, kag amo man ang kabuhi ni Jose, ang anak ni Jacob. Manunubli sia sang kasugtanan nga ginhimo sang Dios sa iya mga amay, pero ginkaugtan sia sang iya kauturan kag ginbaligya sa pagkaulipon. Namalibad sia nga ikompromiso ang iya integridad sang ginpalapitan sia sang asawa ni Potifar kag gani gintapok sia sa prisohan. Atong kon diin nga mas matinuohon sia, mas dako nga kabudlayan ang iya ginaatubang. Pero ining tanan nga kabudlayan indi senyales sang pagkadisgusto sang Dios. Ang matuod, sa tunga sini tanan, “ang Ginuo upod sa iya” (Genesis 39:3). Ang kabuhi ni Jose isa ka ebidensya sining importante nga kamatuoran: ang Dios indi magtalikod sa aton. “Ang pagsunod sa Manluluwas indi magakakas sang tanan ninyo nga mga pagtilaw,” gintudlo ni Pangulong Dieter F. Uchtdorf. “Ugaling, kakason sini ang mga sablag sa tunga ninyo kag sang bulig nga gusto ihatag sang Amay nga Langitnon sa inyo. Ang Dios mangin kaupod ninyo” (“A Yearning for Home,” Liahona, Nob. 2017, 22).

Mga Ideya para sa Personal nga Pagtuon sang Balaan nga mga Kasulatan

Genesis 37:1–28; 39; 41:9–45

“Ang Ginuo nag-upod kay Jose” sa iya kabudlayan.

Sa liwat-liwat, daw gintalikdan na si Jose sang maayo nga kapalaran, pero ang Ginuo wala gid. Samtang imo ginabasa ang istorya ni Jose, binagbinaga ang mga pamangkot nga pareho sini: Ano ang ginhimo ni Jose para magpabilin nga malapit sa Ginuo sa tion sang iya mga pagtilaw? Paano ang Ginuo “nag-upod sa iya”? (Genesis 39:2–3, 21, 23).

Mahimo ka man magpamangkot sing pareho nga mga pamangkot parte sa imo kabuhi. Ano ang nakita mo nga ebidensya nga wala ka gintalikdan sang Ginuo sa tion sang imo nga pagtilaw? Pamensara kon paano mo ipaambit ang imo mga eksperiyensya sa mga miyembro sang pamilya kag sa palaabuton nga mga henerasyon (tan-awa sa 1 Nefi 5:14). Ano ang sarang mo himuon karon para ihanda ang imo kaugalingon nga magpabilin nga tampad sa imo pag-atubang sang mga pagtilaw sa palaabuton?

Tan-awa man sa Juan 14:18; Mga Taga-Roma 8:28; Alma 36:3; Doktrina kag mga Kasugtanan 121:7–8.

Genesis 37:5–11; 40; 41:1–38

Kon matinuohon ako, giyahan ako kag igainspirar sang Ginuo.

Gintudlo ni Elder David A. Bednar, “Ang mga rebelasyon ginapahayag sa lainlain nga mga paagi, lakip na, halimbawa, sa mga damgo, mga panan-awon, mga pagsugilanonay sa langitnon nga mga mensahero, kag inspirasyon” (“The Spirit of Revelation,” Liahona, Mayo 2011, 88). Gingamit sang Ginuo ang mga damgo para ipahayag ang mga kamatuoran kay Jose, sa puno nga mayordomo kag panadero ni Faraon, kag kay Faraon. Ginpahayag man sang Ginuo kay Jose kon paano badbaron ining mga damgo. Ano ang imo matun-an sa Genesis 37:5–11; 40:5–8; 41:14–25, 37–38 parte sa pagbaton kag pag-intiendi sang rebelasyon halin sa Ginuo? Halimbawa, ano ang imo matun-an sa ehemplo ni Jose sang daw mabudlay intiendihon ang rebelasyon? (tan-awa sa Genesis 40:8; 41:16).

Joseph Interpreting the Butler and Baker’s Dreams [Si Jose nga Nagabadbad sang mga Damgo sang Mayordomo Kag Panadero], ni François Gérard

Binagbinaga kon paano ginapahayag sang Ginuo ang Iya pagbuot sa imo. Ano ang imo ginahimo para aksyunan ang rebelasyon nga ginhatag sang Ginuo sa imo? Paano ka nagapangayo sang dugang nga giya sa Iya?

Genesis 38; 39:7–20

Upod ang bulig sang Ginuo, sarang ako magpalagyo sa tentasyon.

Kon ginatentar ka, ang ehemplo ni Jose makahatag sa imo sang pagpaisog kag kusog. Samtang imo ginabasa ang iya eksperiyensya sa Genesis 39, pat-ini ang mga butang nga ginhimo ni Jose para mapakigbatuan ang tentasyon. Halimbawa:

• Iya “gindumilian” ang pagtentar sang asawa ni Potifar (bersikulo 8).

• Ginkilala niya nga ang paghimo sang sala magapaakig sa Dios kag sa iban (mga bersikulo 8–9).

• “Wala [niya] pagpamatii” ang tentasyon, bisan pa nga nagpadayon ini “adlaw-adlaw” (bersikulo 10).

• Iya “ginbayaan ang iya bayo … kag nagpalagyo, kag naggwa sia” (bersikulo 12).

Nga ginapanumdom ang ehemplo ni Jose, pamensara ang paghimo sang plano para malikawan kag mapakigbatuan ang tentasyon. Halimbawa, pwede mo hunahunaon ang isa ka tentasyon nga imo ginaatubang, isulat ang mga sitwasyon nga dapat likawan, kag maghimo sang plano nga magsandig sa Amay nga Langitnon kon mag-abot ang tentasyon (tan-awa sa 2 Nefi 4:18, 27–33).

Tentasyon:

Mga sitwasyon nga dapat likawan:

Plano para magresponde:

Ining sugilanon sang kusog ni Jose sang nagpangatubang sang tentasyon gin-unahan sang lain katama nga sugilanon parte sa iya magulang nga si Juda, nga makita sa Genesis 38. Ano ang ginatudlo sa imo sang mga kapitulo 37, 38, kag 39, kon upuron, parte sa kaputli?

Tan-awa man sa 1 Mga Taga-Corinto 10:13; 1 Nefi 15:23–24; 3 Nefi 18:17–18.

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Genesis 37.Kon nangin isa kamo sa kauturan ni Jose, ano ayhan ang inyo himuon para malikawan nga pahuyangon sang kaimon ang inyo relasyon sa iya? Paano kita mabuligan sang “paghambal sing madaiton” sa kada isa? (bersikulo 4).

Genesis 39.  Samtang inyo ginahambalan ang mga pagtilaw ni Jose sa puluy-an ni Potifar, pwede mo pamangkuton ang mga miyembro sang pamilya kon ano nga laygay ang ila ihatag kay Jose samtang ginaatubang niya ang iya mga pagtilaw.

Genesis 39:7–12.Ang pagbasa sining mga bersikulo makahatag sang oportunidad para hambalan ang layi sang kaputli upod sa inyo pamilya. Ari ang pila ka mga balasahon nga mahimo makabulig sa sining diskusyon: Jacob 2:28; Alma 39:3–9; “Sekswal nga Kaputli” (sa Para sa Kusog sang mga Lamharon [2011], 35–37).

Genesis 41:15–57.Ano ang aton matun-an sa sining mga bersikulo parte sa kon paano ginabugayan sang Ginuo ang katawhan sang Egipto paagi kay Jose? Ano ang aton matun-an parte sa paghanda para sa palaabuton nga mga emerhensya? Hambali kon ano ang sarang ninyo himuon para mangin mas preparado bilang pamilya.  

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Ipaanggid ang balaan nga mga kasulatan sa imo kabuhi. Samtang nagabasa ka, pamensara kon paano magamit ang mga istorya kag mga pinanudlo sa balaan nga mga kasulatan sa imo kabuhi. Halimbawa, paano nakainspirar sa imo ang pagkamatinuohon ni Jose sa Egipto nga magpabilin nga tampad sa Ginuo wala sapayan sang kabudlayan?

Larawan sang mga kauturan ni Jose nga ginakuha ang iya kunop, ni Sam Lawlor