“Marso 14–20. Genesis 42–50: ‘Gintuyo Ini sang Dios sa Kaayohan,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)
“Marso 14–20. Genesis 42–50,” Dali, Magsunod sa Akon—Para sa Mga Indibidwal kag Mga Pamilya: 2022
Larawan ni Jose sang Egipto, ni Robert T. Barrett
Marso 14–20
Genesis 42–50
“Gintuyo Ini sang Dios sa Kaayohan”
Ang pagbasa sang balaan nga mga kasulatan nagaimbitar sang Espiritu. Pamatii ang Iya mga pagpabatyag samtang nagabasa ka, bisan pa nga daw wala ini sing direkta nga kaangtanan sa imo ginabasa.
Isulat Ang Imo Mga Panghunahuna
May 22 ka tuig na nga naglabay sang ginbaligya si Jose sa Egipto sang iya mga kauturan. Nag-antos sia sang madamo nga mga pagtilaw, lakip na ang butang-butangan kag pagkapriso. Sang ulihi nga nakita niya liwat ang iya mga kauturan, si Jose amo na ang gobernador sang bilog nga Egipto, ikaduha lamang kay faraon. Mahapos lang kuntani niya sila nga matimalusan, kag kon hunahunaon ang ila ginhimo kay Jose, daw maintiendihan gid ini. Pero ginpatawad ni Jose ang iya mga kauturan. Indi lamang ina, ginbuligan niya sila nga makita ang diosnon nga katuyuan sang iya pag-antos. “Gintuyo ini sang Dios sa kaayohan” (Genesis 50:20), ginsiling niya sa ila, kay ginbutang sia sini sa posisyon nga maluwas “ang bug-os nga panimalay sang iya amay” (Genesis 47:12) sa tiggulutom.
Sa madamo nga paagi, ang kabuhi ni Jose may pagkaanggid sang iya ni Jesucristo. Bisan pa nga ang aton mga sala naghatag sa Iya sang dako nga pag-antos, nagatanyag ang Manluluwas sang kapatawaran, nga ginaluwas kita tanan sa kapalaran nga mas malala pa sangsa tiggulutom. Kon kinahanglan naton nga magbaton sang kapatawaran ukon maghatag sini—sa isa ka punto kinahanglan naton tanan nga himuon ang duha—ang ehemplo ni Jose nagatudlo sa aton sa Manluluwas, ang matuod nga ginhalinan sang pagpang-ayo kag pag-uliay.
Mga Ideya para sa Personal nga Pagtuon sang Balaan nga mga Kasulatan
“Ang Dios nagpadala sa akon sing una sa inyo sa pagtipig sa inyo.”
Samtang imo ginabasa ang parte kay Jose, may natalupangdan ka bala nga mga pagpalareho sa iya istorya kag sa nagabayad-sala nga misyon ni Jesucristo? Mahimo mo nga binagbinagon kon sa ano nag-anggid ang papel ni Jose sa iya panimalay sa papel sang Manluluwas sa panimalay sang Dios. Ano nga pag-alalanggid ang imo nakita sa mga eksperiyensya ni Jose kag sa misyon sang Manluluwas, nga ginpadala sa “pagbuhi sa [aton] sang madamo nga naluwas”? (Genesis 45:7).
Ang pagpatawad nagadala sing pag-ayo.
Ang pagbasa sang pagpatawad ni Jose sa iya kauturan sa malaw-ay nga ginpanghimo nila sa iya mahimo nga nakapahunahuna sa imo sang tawo nga ginabudlayan ka sa karon nga patawaron. Ukon basi may mabudlay nga pagtilaw sang pagpatawad nga nagahulat sa imo palaabuton. Bisan diin man diri, mahimo nga makabulig ang pagbinagbinag kon ngaa nahimo ni Jose nga magpatawad. Ano nga mga patimaan sa karakter kag pamatasan ni Jose ang imo makita sa Genesis 45; 50:15–21? Paano nakaimpluwensya sa iya ang iya mga eksperiyensya nga mangin mas mapinatawaron? Ano ang ginapahangop sang ehemplo ni Jose parte sa kon paano ka mangin mas mapinatawaron upod ang bulig sang Manluluwas?
Pat-ini man ang mga bugay nga nag-abot sa pamilya ni Jose bangud sang iya pagpatawad. Ano nga mga bugay ang imo nakita halin sa pagpatawad? Nakabatyag ka bala sang inspirasyon nga maglab-ot sa tawo nga nag-agrabyo sa imo?
Tan-awa man sa Genesis 33:1–4; Doktrina kag mga Kasugtanan 64:9–11.
Ano ang kahulugan sang simbolismo sang mga bendisyon ni Jacob?
Ang mga bendisyon ni Jacob sa iya kabataan nagaunod sang maathag nga mga imahe, pero may pila man ka mga manugbasa nga nabudlayan sini mag-intiendi. Maayo lang, ang ginpanumbalik nga ebanghelyo nagahatag sa aton sang pila ka dugang nga paghangop. Kon imo basahon ang bendisyon kay Jose sa Genesis 49:22–26, basaha man ang masunod nga mga bersikulo, kag tan-awa kon ano nga mga paghangop ang ginahatag sini: 1 Nefi 15:12; 2 Nefi 3:4–5; Jacob 2:25; Doktrina kag mga Kasugtanan 50:44.
Samtang imo ginabasa ang bendisyon kay Juda sa Genesis 49:8–12, tandai nga si Haring David kag Jesucristo pareho nga mga kaliwat ni Juda. Ano nga mga tinaga kag mga dinalan sa sining mga bersikulo ang nagapadumdom sa imo sang Manluluwas? Kon imo tun-an ang bendisyon kay Juda, mahimo nga makabulig man nga basahon ang Bugna 5:5–6, 9; 1 Nefi 15:14–15; Doktrina kag mga Kasugtanan 45:59; 133:46–50.
Larawan ni Jose sang Egipto, ni Paul Mann
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Genesis 42–46.Basi masadyahan ang imo pamilya nga drama-dramahon ang istorya ni Jose nga nakapakig-upod liwat sa iya mga kauturan. Sadyaha ini—maggamit sang mga bayo kag mga kasangkapan kon gusto ninyo. Paisoga ang mga miyembro sang pamilya nga tilawan nga intiendihon ang mga emosyon kag perspektibo sang mga karakter. Pwede ninyo tutokan ilabi na ang mga balatyagon ni Jose sa iya kauturan kag kon ano ayhan ang ila nabatyagan sang ginpatawad niya sila. Mahimo nga magpadulong ini sa diskusyon kon paano ang pagpatawad magapakamaayo sa inyo pamilya.
Sang makita liwat ni Jose ang iya mga kauturan pagligad sang madamo nga tinuig, paano nila ginpakita nga nagbag-o na sila halin sang ulihi niya nga pagkakita sa ila? Ano ang aton matun-an parte sa paghinulsol halin sa ila mga eksperiyensya?
-
Genesis 45:3–11; 50:19–21.Ginkilala ni Jose nga bisan mabudlay ang iya eksperiyensya sa Egipto, “gintuyo ini sang Dios sa kaayohan” (Genesis 50:20). Nakaeksperiyensya bala ang inyo pamilya sang mga pagtilaw nga ginbaylohan sang Dios sang mga bugay?
Ang himno parte sa kaayo sang Dios sa tinion sang pagtilaw (pareho sang “Kamong mga Santos [How Firm a Foundation]” [Mga Himno kag mga Ambahanon sang Kabataan, no. 6–7]) makabulig panami sining paghinambalanay. Ano nga mga detalye sa eksperiyensya ni Jose ang nagapakita sang ginatudlo sa himno?
-
Genesis 49:9–11, 24–25.Ano ang aton makita sa sining mga bersikulo nga nagatudlo sa aton parte sa mga papel kag misyon ni Jesucristo? (Para sa bulig agud maintiendihan ang mga dinalan sa sining mga bersikulo, tan-awa ang materyal parte sa Genesis 49 sa “Mga Ideya para sa Personal nga Pagtuon sang Balaan nga mga Kasulatan.”)
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Ginpanugyan nga kanta: “Kamong mga Santos [How Firm a Foundation],” Mga Himno kag mga Ambahanon sang Kabataan, no. 6–7.
Pagpauswag sang Aton Pagpanudlo
Maggamit sang musika. Buligi ang mga miyembro sang pamilya nga magpangita sang mga kamatuoran sang ebanghelyo sa mga tinaga sa himno kag mga kanta sa Primary. Magpangita sang mga paagi agud himuon ang sagrado nga musika nga regular nga bahin sang inyo pagtuon sang ebanghelyo.
Jacob Blessing His Sons [Si Jacob nga Nagabendisyon sang Iya mga Anak nga Lalaki], ni Harry Anderson