“Pebrero 21–27. Genesis 24–27: Ang Kasugtanan Ginpabaskog,” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)

“Pebrero 21–27. Genesis 24–27,” Dali, Magsunod sa Akon—Para sa Mga Indibidwal kag Mga Pamilya: 2022

Litrato

Si Rebeca

Larawan ni Rebeca ni Dilleen Marsh

Pebrero 21–27

Genesis 24–27

Ang Kasugtanan Ginpabaskog

Samtang imo ginabasa ang Genesis 24–27, tutoki ang espirituhanon nga mga panghunahuna nga imo mabaton. Magpangamuyo para mahibal-an kon paano mangin mapuslanon sa imo kabuhi ang mga prinsipyo nga imo makita.

Isulat Ang Imo Mga Panghunahuna

Ang kasugtanan sang Dios kay Abraham naglakip sang promisa nga paagi kay Abraham kag sa iya kaliwatan “ang tanan nga mga panimalay sang duta pakamaayohon” (Abraham 2:11). Indi ina promisa nga sarang tumanon sa isa ka henerasyon: sa madamo nga paagi, ang Biblia amo ang istorya sang padayon nga pagtuman sang Dios sang Iya promisa. Kag ginsugdan Niya paagi sa pagpabaskog sang kasugtanan sa pamilya ni Isaac kag Rebeca. Paagi sa ila mga eksperiyensya, may matun-an kita parte sa pagkamay-bahin sa kasugtanan. Ang ila mga ehemplo nagatudlo sa aton parte sa kaayo, pagkapasensyoso, kag pagsalig sa ginpromisa nga mga bugay sang Dios. Kag matun-an naton nga may maayo nga balik ang pagsikway sang kalibutanon nga “linaga” (Genesis 25:30) para masiguro ang mga bugay sang Dios para sa aton kaugalingon kag sa aton mga kabataan sa mga henerasyon nga maabot.

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Genesis 24

Ang pag-asawahay importante sa wala katapusan nga plano sang Dios.

Sa karon nga panahon madamo nga mga tawo ang nagahatag sang manubo nga prayoridad sa pag-asawahay ukon nagakabig pa gani sini nga pabug-at. Lain ang perspektibo ni Abraham—para sa iya, ang kasal sang iya anak nga si Isaac labing mataas ang importansya. Ngaa sa banta mo nga tama ini ka importante sa iya? Samtang imo ginabasa ang Genesis 24, hunahunaa ang importansya sang pag-asawahay sa plano sang kaluwasan sang Dios. Pamensara kon ngaa “ang pamilya nga gintukod sa pag-asawahay sa tunga sang lalaki kag babayi nagahatag sang pinakanami nga kahimtangan para mag-uswag ang plano sang Dios” (D. Todd Christofferson, “Why Marriage, Why Family” (Liahona, Mayo 2005, 52).

Ang mga pamangkot pareho sa masunod mahimo nga makabulig sa imo sa pagpamensar sang iban pa nga importante nga mga prinsipyo sa sining kapitulo:

Genesis 24:1–14. Ano ang ginhimo ni Abraham kag sang iya suluguon para ilakip ang Ginuo sa ila mga pagpaninguha sa pagpangita sang asawa para kay Isaac?

Genesis 24:15–28, 55–60. Ano nga mga kalidad ang imo nakita kay Rebeca nga gusto mo sundon?

Ano pa nga paghangop ang imo nakita?

Tan-awa man sa Doktrina kag mga Kasugtanan 131:1–4; “Ang Panimalay: Isa ka Proklamasyon sa Kalibutan,” ChurchofJesusChrist.org.

Genesis 25:29–34

Sarang ako magpili sa tunga sang insigida nga kalipayan kag sa mga butang nga may mas dako nga balor.

Sa kultura ni Abraham, ang kamagulangan nga anak nga lalaki sa pamilya ang masami nagabaton sang posisyon sang liderato kag pribelihiyo, nga ginatawag ang pagkapanganay. Ang ining anak nagabaton sang mas dako nga palanublion sa iya mga ginikanan, upod ang mas dako nga responsibilidad sang pag-atipan sang bilog nga panimalay.

Samtang imo ginabasa ang Genesis 25:29–34, pamensara kon ngaa ayhan nga handa si Esau nga ibaylo ang iya pagkapanganay sa pagkaon. Ano nga mga leksyon ang imo makita para sa imo kaugalingon sa sining sinulatan? Halimbawa, may “linaga” bala nga nagapalayo sa imo sa mga bugay nga may dako nga bili para sa imo? Ano ang imo ginahimo para matutokan kag maapresyar ining mga bugay?

Tan-awa man sa Mateo 6:19–33; 2 Nefi 9:51.

Genesis 26:1–5

Ang kasugtanan kay Abraham ginpabaskog paagi kay Isaac.

Ang kasugtanan nga ginhimo sang Dios kay Abraham gintuyo nga magpadayon sa madamo nga mga henerasyon, gani ang legasiya ni Abraham kag Sara sang pagtipig sang kasugtanan kinahanglan nga mapasa kay Isaac, Jacob, kag sa iban pa nga matutom nga mga babayi kag lalaki sa ila kaliwatan. Samtang imo ginabasa Genesis 26:1–5, pangitaa ang pila sa mga bugay sang kasugtanan nga ginmitlang sang Dios. Ano ang imo matun-an parte sa Dios sa sining mga bersikulo?

Genesis 26:18–25, 32–33

Si Jesucristo ang bubon sang tubig nga buhi.

Matalupangdan mo nga ang mga bubon kag mga tuburan kag iban pa nga ginhalinan sang tubig may importante nga mga papel sa madamo nga mga istorya sa Daan nga Katipan. Indi ini katingalahan, tungod kay kalabanan sining mga istorya natabo sa tama ka mala nga mga lugar. Samtang imo ginabasa sa Genesis 26 ang parte sa mga bubon ni Isaac, binagbinaga kon ano ayhan ang ginasimbolo sini sa balaan nga mga kasulatan. Ano nga mga paghangop ang imo makita parte sa espirituhanon nga mga buhon sang “tubig nga buhi”? (tan-awa sa Juan 4:10–15). Paano ka nagakutkot sang espirituhanon nga mga bubon sa imo kabuhi? Paano nangin pareho sa tubig nga buhi ang Manluluwas sa imo? Tandai nga “gintampukan” sang mga Filistinhon ang mga bubon (tan-awa sa Genesis 26:18). May ara bala nga nagakatabo sa imo kabuhi nga nagatampok sang imo mga bubon sang tubig nga buhi?

Bubon sa dumaan nga Beer-seba, sa diin nagkutkot sila ni Abraham kag Isaac sang mga bubon.

Genesis 27

Sayop bala nga gin-into ni Rebeca kag Jacob si Isaac?

Wala kita makahibalo sang mga rason sang pamaagi nga gingamit ni Rebeca kag Jacob para makabaton sang bugay si Jacob. Makabulig nga tandaan nga ang Daan nga Katipan nga ara sa aton karon indi kompleto (tan-awa sa Moises 1:23, 41). Mahimo nga may mga impormasyon nga nadula sa orihinal nga mga rekord nga magapaathag sang daw nagapalibog sa aton. Ugaling, nahibal-an naton nga pagbuot ini sang Dios nga si Jacob ang makabaton sang bendisyon halin kay Isaac tungod may panan-awon si Rebeca nga si Jacob ang magapamuno kay Esau (tan-awa sa Genesis 25:23). Sang mahibal-an ni Isaac nga si Jacob ang iya nabendisyunan imbes nga si Esau, ginpabakod niya nga si Jacob “mangin-pinakamaayo” (Genesis 27:33)—nga nagapakita nga natuman na ang pagbuot sang Dios.

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Genesis 24:2–4, 32–48.Ginpangabay ni Abraham ang isa ka sinaligan nga suluguon nga pangitaan si Isaac sang asawa, kag ang suluguon nagkigsugot kay Abraham nga himuon niya ini. Paano ginpakita sang suluguon ni Abraham ang iya katutom sa pagtuman sang iya kasugtanan? Paano naton sundon ang iya ehemplo?

Genesis 24:15–28, 55–60.Pwede nga pangitaon sang imo pamilya sa sining mga bersikulo ang mga kinaiya nga naghimo kay Rebeca nga bagay nga mangin kaupod ni Isaac sa wala katapusan. Paisoga ang mga miyembro sang pamilya sa pagpili sang isa sining mga kinaiya nga sa ila pamatyag dapat nila patubuon.

Genesis 25:19–34; 27.Agud rebyuhon ang mga istorya kon paano nagkadto kay Jacob ang pagkapanganay kag pagpakamaayo ni Esau, pwede ninyo isulat ang mga tinaga halin sa “Si Jacob kag si Esau” (sa Mga Sugilanon sa Daan nga Katipan) sa separado nga ginunting nga papel. Pwede nga bululigan sang mga miyembro sang pamilya nga pasunuron ang mga dinalan.

Samtang inyo ginahambalan ang pagbaligya ni Esau sang iya pagkapanganay, pwede man ninyo hambalan kon ano ang importante para sa inyo pamilya, pareho sang inyo mga relasyon sa Amay nga Langitnon kag kay Jesucristo. Ayhan pwede magpangita ang mga miyembro sang pamilya sang mga bagay ukon mga butang nga nagarepresentar sang ginakabig nila nga may balor sa katubtuban. Ipaeksplikar sa ila kon ngaa ginpili nila inang mga butang.

Genesis 26:3–5.Para buligan ang imo pamilya nga maintiendihan ang kasugtanan kay Abraham, pwede mo sila agdahon sa pagpangita sang mga promisa nga ginlaragway sa sining mga bersikulo. Ngaa importante nga mahibal-an naton ang parte sining mga promisa sa karon? (tan-awa sa “Mga Dapat Tandaan: Ang Kasugtanan,” sa sining manwal).

Genesis 26:18–25, 32–33.Ngaa importante ang mga bubon? Paano nangin pareho si Jesucristo sa bubon sang tubig?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Himoa ang Husto [Do What Is Right],” Mga Himno kag mga Ambahanon sang Kabataan, no. 34.

Pagpauswag sang Personal nga Pagtuon

Magsaulo sang balaan nga kasulatan. Si Elder Richard G. Scott nagpanudlo, “Ang saulado nga balaan nga kasulatan mangin isa ka nagapadayon nga abyan nga wala nagaluya sa pagligad sang panahon” (“The Power of Scripture,” Liahona, Nob. 2011, 6).