“Pebrero 14–20. Genesis 18–23: ‘May Butang Bala nga Tama Kabudlay sa Ginuo?’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)
“Pebrero 14–20. Genesis 18–23,” Dali, Magsunod sa Akon—Para sa Mga Indibidwal kag Mga Pamilya: 2022
Sarah and Isaac [Si Sara kag Isaac], ni Scott Snow
Pebrero 14–20
Genesis 18–23
“May Butang Bala nga Tama Kabudlay sa Ginuo?”
Basaha kag binagbinaga ang Genesis 18–23, kag isulat ang imo mga panghunahuna. Magamit mo ang mga ideya sa sining outline para mabuligan ka sa pagtuon sining mga kapitulo, kag mahimo ka man nga mainspirar sa pagpangita sang iban pa nga mga mensahe sa balaan nga mga kasulatan nga gintigana gid sang Ginuo para sa imo.
Isulat Ang Imo Mga Panghunahuna
Ang kabuhi ni Abraham, nga puno sang mga hitabo nga pareho masubo kag makainspirar, ebidensya sang kamatuoran nga natun-an ni Abraham sa panan-awon—nga ari kita sa kalibutan para tilawan, “agud mahibaloan kon himuon [naton] ang tanan nga butang nga isugo sang Ginuo nga [aton] Dios” (Abraham 3:25). Mapamatud-an bala ni Abraham nga tampad sia? Magapadayon bala sia nga nagatuo sa promisa sang Dios nga isa ka dako nga panimalay, bisan pa nga sia kag si Sara wala pa sing bata sa ila katigulangon? Kag sang natawo si Isaac, malampuwasan bala sang pagtuo ni Abraham ang indi mahunahuna—ang sugo nga ihalad ang mismong anak nga ginpromisa sang Dios nga magatuman sinang kasugtanan? Napamatud-an gid ni Abraham nga tampad sia. Nagsalig si Abraham sa Dios, kag ang Dios nagsalig kay Abraham. Sa Genesis 18–23, makit-an naton ang mga istorya sa kabuhi ni Abraham kag sang iban pa nga magatandog sa aton nga hunahunaon ang aton kaugalingon nga ikasarang sa pagtuo sa mga promisa sang Dios, sa pagpalagyo sa kalainan kag indi na magbalik, kag magsalig sa Dios wala sapayan sang sakripisyo.
Mga Ideya para sa Personal nga Pagtuon sang Balaan nga mga Kasulatan
Ginatuman sang Ginuo ang Iya mga promisa sa Iya kaugalingon nga tion.
Naghimo ang Ginuo sang mahimayaon nga mga promisa sa mga matinuohon, pero kon kaisa ang mga sirkumstansya sa aton mga kabuhi nagatulod sa aton nga manghunahuna kon paano ayhan ining mga promisa matuman. Siguro amo man sina ang nabatyagan ni Abraham kag Sara kon kis-a. Ano ang imo matun-an sa ila mga eksperiyensya? Basi makabulig ang pagsugod sang imo pagtuon paagi sa pagrebyu sang ginpromisa sang Ginuo kay Abraham sa Genesis 17:4, 15–22. Ano ang reaksyon ni Abraham kag Sara? (tan-awa man sa Genesis 18:9–12). Paano nagsabat ang Ginuo para buligan sila nga mag-angkon sang mas dako nga pagtuo sa Iya mga promisa? (tan-awa sa Genesis 18:14).
Ano ang imo makita sa sining mga bersikulo nga nagapatubo sang imo pagtuo? Ano pa nga mga eksperiyensya—sa imo kabuhi ukon sa iya sang iban—ang nagpabakod sang imo pagtuo nga ang Ginuo magatuman sang Iya mga promisa sa imo sa Iya kaugalingon nga tion kag paagi?
Tan-awa man sa Doktrina kag mga Kasugtanan 88:68.
Ginasugo kita sang Ginuo nga magpalagyo sa kalainan.
Ano nga mga leksyon ang imo matun-an parte sa pagpalagyo sa kalainan samtang imo ginabasa ang parte kay Lot kag sa iya pamilya? Halimbawa, ano ang nanamian mo sa ginhambal kag ginhimo sang mga anghel para buligan si Lot kag ang iya pamilya nga makapalagyo sa kalaglagan? (tan-awa sa Genesis 19:12–17). Paano ang Ginuo nagabulig sa imo kag sa imo pamilya nga makapalagyo ukon makakita sang proteksyon batok sa malain nga mga impluwensya sang kalibutan?
Sa dugang nga impormasyon parte sa mga sala sang Sodoma kag Gomorra, tan-awa sa Ezequiel 16:49–50 kag Judas 1:7–8.
Fleeing Sodom and Gomorrah [Pagpalagyo sa Sodoma kag Gomorra], ni Julius Schnorr von Carolsfeld
Ano ang sayop nga ginhimo sang asawa ni Lot?
Gintudlo ni Elder Jeffrey R. Holland:
“Maathag, ang sayop sang asawa ni Lot amo nga wala lamang sia magbalikid; sa iya tagipusuon gusto niya nga magbalik. Makita nga wala pa gani sia maglampuwas sa dulonan sang siyudad, nahidlaw na sia sa gintanyag sang Sodoma kag Gomorra sa iya. … Wala sia sing pagtuo. Nagduhaduha sia sa ikasarang sang Ginuo nga mahatagan sia sang mas maayo sangsa ara na nga daan sa iya. …
“Sa tanan nga [katawhan] sang tanan nga henerasyon, ginapanawagan ko, ‘Dumduma ang asawa ni Lot’ [Lucas 17:32]. Ang pagtuo para sa palaabuton. Ang pagtuo nagatukod sa nagligad pero wala ini nagahandum nga magpabilin didto. Ang pagtuo nagasalig nga ang Dios may dalagko nga mga butang nga ginhanda para sa kada isa sa aton kag si Cristo amo matuod ang ‘pinakamataas nga pari sang maayong mga butang nga [maabot pa]’ (Mga Hebreo 9:11)” (“The Best Is Yet to Be,” Ensign, Ene. 2010, 24, 27).
Ang kahanda ni Abraham sa paghalad kay Isaac isa ka simbolo sang Dios kag sang Iya Anak.
Wala naton mahibal-i ang tanan nga rason nga ginsugo sang Dios si Abraham nga ihalad si Isaac; ang nahibal-an naton amo nga isa ato ka pagtilaw sang iya pagtuo sa Dios (tan-awa sa Genesis 22:12–19). Samtang imo ginabasa ang Genesis 22:1–19, ano ang imo matun-an sa eksperiyensya ni Abraham?
Ang kahanda ni Abraham sa paghalad sang iya anak “isa ka simbolo sang Dios kag sang iya Bugtong nga Inanak” (Jacob 4:5). Samtang imo ginabinagbinag ang mga pagpalareho sa pagtilaw kay Abraham kag paghatag sang Dios nga Amay sang Iya Anak bilang halad para sa aton, ano ang imo nabatyagan para sa imo Amay nga Langitnon?
May mga palareho man kay Isaac kag sa Manluluwas. Pamensara nga basahon liwat ang Genesis 22:1–19, nga ginapangita ining mga pag-alalanggid.
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Genesis 18:14.May mga istorya bala sa balaan nga mga kasulatan, sa kasaysayan sang imo pamilya, ukon sa imo kaugalingon nga kabuhi nga pwede mo ipaambit nga nagtudlo sa imo nga wala sing tama kabudlay para sa Ginuo?
-
Genesis 18:16–33.Ano ang aton matun-an sa karakter ni Abraham sa sining mga bersikulo? Paano naton sundon ang iya ehemplo? (Tan-awa man sa Alma 10:22–23.)
-
Genesis 19:15–17.Ang ining mga bersikulo makabulig sa mga miyembro sang imo pamilya nga handaan ang tinion nga kinahanglan nila magpalagyo sa malain nga mga sitwasyon. Ano ayhan ang pila sining mga sitwasyon? Halimbawa, pwede ninyo hambalan ang indi nagakabagay nga media ukon ang tentasyon nga magkutso-kutso. Paano naton mapalagyuhan ang amo nga mga sitwasyon?
-
Genesis 21:9–20.Ano ang nanamian sang imo pamilya sa paagi nga gintratar sang Dios si Agar kag Ismael pagkatapos nga gintabog sila ni Sara kag Abraham?
-
Genesis 22:1–14.Paano mo buligan ang imo pamilya nga makita ang koneksyon sang istorya sang Dios nga ginasugo si Abraham nga ihalad si Isaac kag sang nagabayad-sala nga sakripisyo sang Manluluwas? Pwede ka magpakita sang mga litrato ni Abraham kag Isaac kag sang Paglansang sa Krus (tan-awa sa “Si Abraham kag si Isaac,” sa Mga Sugilanon sa Daan nga Katipan) samtang ginahambalan sang mga miyembro sang pamilya ang mga pag-alalanggid nga ila makita sa sining mga hitabo. Pwede man kamo magkanta sang himno ukon kanta parte sa sakripisyo sang Manluluwas, pareho sang “I Stand All Amazed [Ako Nahalawhaw Gid]” (Mga Himno kag mga Ambahanon sang Kabataan, 22), kag pangitaa ang mga dinalan nga nagalaragway sang sakripisyo sang Manluluwas.
Ano ang ginpangayo sa aton nga isakripisyo bilang pamilya? Paano ining mga sakripisyo mas naghilapit sa aton sa Dios?
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Ginapanugyan nga kanta: “How Great the Wisdom and the Love [Dakong Kaalam kag Gugma],” Mga Himno kag mga Ambahanon sang Kabataan, no. 19.
Pagpauswag sang Personal nga Pagtuon
Pamatii ang Espiritu. Samtang nagatuon ka, bantayi ang imo mga panghunahuna kag mga balatyagon, bisan pa nga wala ini sing kaangtanan sa imo ginabasa. Basi inang mga pagpabatyag amo mismo ang mga butang nga gusto sang Dios nga imo mahibal-an.
Larawan ni Abraham kag Isaac, ni Jeff Ward