“Enero 31–Pebrero 6. Genesis 6–11; Moises 8: ‘Si Noe Nakaangkon sang Kahamuot sa mga Mata sang Ginuo,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)

“Enero 31–Pebrero 6. Genesis 6–11; Moises 8,” Dali, Magsunod sa Akon—Para sa Mga Indibidwal kag Mga Pamilya: 2022

Litrato

Si Noe, ang iya panimalay, mga kasapatan, ang arka, kag ang balangaw

Larawan ni Noe nga nagabiya sa arka, ni Sam Lawlor

Enero 31–Pebrero 6

Genesis 6–11; Moises 8

“Si Noe Nakaangkon sang Kahamuot sa mga Mata sang Ginuo”

Ang mga istorya sa balaan nga mga kasulatan masami nagatudlo sa aton sang madamo nga espirituhanon nga leksyon. Samtang imo ginabasa ang parte sa Dakong Baha kag Tore sang Babel, magpangayo sang inspirasyon kon paano ining mga hitabo makonekta sa imo.

Isulat Ang Imo Mga Panghunahuna

Mga henerasyon sang mga manugbasa sang Biblia ang nainspirar sang istorya ni Noe kag sang Baha. Pero kita nga nagakabuhi sa ulihing mga adlaw may espesyal nga rason sa pagtutok sini sing maayo. Sang gintudlo ni Jesucristo kon paano naton dapat bantayan ang Iya Ika-duhang Pagkari, Sia nagsiling, “Pareho sa mga adlaw ni Noe, mangin amo man sa pag-abot sang Anak sang Tawo” (Joseph Smith—Mateo 1:41). Dugang pa diri, ang mga dinalan nga nagalaragway sang panahon ni Noe, pareho sang “dunot” kag “napun-an sing pagpanglugos,” mahimo nga amo man ang malaragway sa aton panahon (Genesis 6:12–13; Moises 8:28). Ang istorya sang Tore sang Babel daw magamit man sa aton panahon, upod ang paglaragway sang bugal sini nga ginasundan sang kagamo kag pagbinahin-bahin sa tunga sang mga anak sang Dios.

Ining dumaan nga mga sinulatan mapuslanon indi lamang tungod ginapakita sini sa aton nga ang kalainan nagasulit-sulit sa bilog nga kasaysayan. Labing importante, ginatudloan kita sini kon ano ang himuon naton diri. Si Noe “nakaangkon sang kahamuot sa mga mata sang Ginuo” (Moises 8:27) wala sapayan sang kalainan sa iya palibot. Kag ang mga panimalay ni Jared kag sang iya utod nga lalaki nagdangop sa Ginuo kag gindala palayo sa kalainan sa Babel (tan-awa sa Eter 1:33–43). Kon nagapanghunahuna kita kon paano naton amligan ang aton mga kaugalingon kag ang aton mga pamilya sa aton panahon nga puno sang kagarukan kag kapintas, madamo ang matudlo sa aton sang pamilyar nga mga istorya sa sining mga kapitulo.

Litrato

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Genesis 6; Moises 8

May espirituhanon nga kaluwasan sa pagsunod sa propeta sang Ginuo.

Salamat sa ginpanumbalik nga ebanghelyo, mas madamo kita sang mahibal-an parte kay Noe sangsa makit-an sa Daan nga Katipan. Ang inspirado nga paglubad ni Joseph Smith sang Genesis 6, nga makit-an sa Moises 8, nagapahayag nga si Noe isa sa dungganon nga mga propeta sang Dios. Gin-ordinan sia kag ginpadala sa pagwali sang ebanghelyo ni Jesucristo, naglakat sia kag nakighambal sa Dios, kag ginpili sia agud ipahamtang liwat ang mga anak sang Dios sa duta pagkatapos sang Baha (tan-awa man sa Teachings of Presidents of the Church: Joseph Smith [2007], 104, 201). Ano ang imo matun-an parte sa mga propeta sa mga eksperiyensya ni Noe?

Samtang imo ginabasa ang parte sa panahon ni Noe, mahimo nga natalupangdan mo ang mga pagpalareho sa aton panahon. Halimbawa:

Moises 8:18, 20–21, 23–24 (pagsikway sang mga alagad sang Dios)
Moises 8:21 (pagpawala kag pagkakalibutanon)
Moises 8:22 (malain sang imahinasyon kag panghunahuna)
Moises 8:28 (kagarukan kag kapintas)

Ano ang mga ginatudlo sang mga propeta sa karon parte sa ebanghelyo ni Jesucristo nga makaamlig sa imo sa kalibutan sa karon? Samtang imo ginabasa ang mga eksperiyensya ni Noe, ano ang nagainspirar sa imo nga sundon ang mga propeta sang Ginuo sa karon?

Tan-awa man sa Mosias 13:33; Doktrina kag mga Kasugtanan 21:4–7.

Genesis 9:8–17

Mga tanda ukon mga simbolo nga nagabulig sa aton nga madumduman ang aton mga kasugtanan sa Ginuo.

Ang mga kasugtanan sang ebanghelyo mahimo nga ginarepresentar sang isa ka patimaan, simbolo, ukon “tanda” (Genesis 9:12). Halimbawa, pamensara kon paano ka ginapadumdom sang tinapay kag tubig sang sakramento ukon sang mga tubig sang pagbunyag sang sagrado nga mga kamatuoran mahiangot sa imo mga kasugtanan. Suno sa Genesis 9:8–17, ano ang mahimo ipadumdom sa imo sang balangaw? Ngaa nga gusto sang Ginuo nga dumdumon mo Sia kag ang mga kasugtanan nga imo ginhimo?

Tan-awa man sa Gerrit W. Gong, “Always Remember Him,” Liahona, Mayo 2016, 108–11.

Genesis 11:1–9

Ang solo nga paagi agud malab-ot ang langit amo ang pagsunod kay Jesucristo.

Ang dumaan nga Babel, ukon Babilonia, madugay na nga ginagamit bilang simbolo sang kalainan kag pagkakalibutanon (tan-awa sa Bugna 18:1–10; Doktrina kag mga Kasugtanan 133:14). Samtang imo ginatun-an ang Genesis 11:1–9, binagbinaga ang mga panghunahuna nga ginhatag sang propeta nga si Mormon, nga nagsulat nga si Satanas ang “nagbutang sa mga tagipusuon sang katawhan sa pagpatindog sang isa ka tore nga may igo nga kataason agud mahimo sila nga makaabot sa langit.” (Helaman 6:28; tan-awa man sa mga bersikulo 26–27). Ano ang ginapaandam sa imo sang istorya sang Tore sang Babel?

Tan-awa man sa Salmo 127:1.

Larawan sang Tore sang Babel, ni David Green

Litrato

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Genesis 6–8.Paano mo ayhan gamiton ang istorya ni Noe para tudloan ang imo pamilya kon paano kita ginaamligan sa espirituhanon sang pagsunod sa propeta? (tan-awa sa “Si Noe kag ang Iya Pamilya,” sa Mga Sugilanon sa Daan nga Katipan). Basi pwede magbuligay ang imo pamilya sa paghimo sang simple nga bulubaruto nga papel ukon kahoy. Samtang inyo ginabasa ang Genesis 6–7, pwede ninyo ikumparar ang proteksyon nga ginahatag sang baruto sa proteksyon nga aton makita sa pagsunod sa propeta. Pwede ninyo hambalan ang bag-o lang nga laygay sang propeta ukon isulat ang iya mga pulong sang paglaygay sa inyo baruto.

Ano pa ang ginhatag sa aton sang Dios nga makumparar sa arka nga nagluwas sa pamilya ni Noe? Ang 2 Nefi 9:7–13; kag Doktrina kag mga Kasugtanan 115:5–6 nagapanugyan sang pila ka mga sabat, pero may madamo pa nga iban.

Moises 8:17.Ano ang buot silingon sang ang Espiritu sang Ginuo “magaimpluwensya” sa aton? (tan-awa sa 1 Nefi 7:14; Doktrina kag mga Kasugtanan 1:33). Sang san-o naton naeksperiyensyahan ang Espiritu nga nagaimpluwensya sa aton?

Genesis 9:8–17.Basi masadyahan ang magagmay nga kabataan nga magdrowing ukon magkolor sang balangaw samtang ginahambal mo kon ano ang ginarepresentar sini. Mahimo man ninyo hambalan ang mga butang nga nagabulig sa aton nga madumduman ang aton mga kasugtanan, pareho sang sakramento, nga nagabulig padumdom sa aton sang aton kasugtanan sa bunyag nga sundon si Jesucristo (tan-awa sa Doktrina kag mga Kasugtanan 20:75–79).

Genesis 11:1–9.Mahimo nga makabulig ang pagbasa sang Eter 1:33–43 samtang ginatun-an sang imo pamilya ang Genesis 11 kag ginatun-an ang parte sa Tore sang Babel. Ano ang aton matun-an sa mga panimalay ni Jared kag sa iya utod nga lalaki nga makabulig sa aton pamilya nga makakita sang espirituhanon nga proteksyon wala sapayan sang kalainan sa kalibutan? Ano ang dugang nga mga leksyon nga aton matun-an kay Noe kag sa iya pamilya sang nagpangatubang sila sang pareho nga hangkat? (tan-awa sa Moises 8:13, 16–30).

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Magpaambit sang imo panghunahuna. Kon imo ginapaambit ang imo natun-an sa balaan nga mga kasulatan, wala mo lamang ginabugayan ang iban kundi ginapasangkad mo man ang imo kaugalingon nga pag-intiendi. Ano ang ginapabatyag sa imo nga ipaambit sa imo pamilya, mga abyan, ukon mga miyembro sa ward halin sa balaan nga mga kasulatan?