Love One Another [Magpalanggaanay], ni Emma Donaldson Taylor

Enero 24–30

Moises 7

“Gintawag sang Ginuo ang Iya Katawhan nga Sion”

Samtang imo ginabasa kag ginabinagbinag ang Moises 7, isulat ang imo espirituhanon nga mga panghunahuna. Sa paghimo sini, imo ginapakita nga ginahatagan mo sing bili ang giya halin sa Ginuo kag gusto mo nga makabaton sang dugang pa Niya nga giya.

Isulat Ang Imo Mga Panghunahuna

Sa bilog nga kasaysayan, gintinguhaan sang mga tawo nga malab-ot ang nalab-ot ni Enoc kag sang iya katawhan: ang magtukod sang modelo nga sosyedad sa diin wala sing kaimulon ukon kasingki. Bilang katawhan sang Dios, amo man sini ang aton gusto. Ginatawag naton ini nga pagtukod sang Sion, kag nagalakip ini—magluwas sa pag-atipan sang mga imol kag pagpauswag sang kalinong—sang paghimo sang mga kasugtanan, pagpangabuhi sing ululupod sa pagkamatarong, kag pag-isa sa kada isa kag kay Jesucristo, “ang Hari sang Sion” (Moises 7:53). Bangud kay ang buluhaton sang pagtukod sang Sion nagapadayon sa aton panahon, makabulig ang magpamangkot, Paano ini nahimo ni Enoc kag sang iya katawhan? Paano sila nangin “isa sing tagipusuon kag isa sing panghunahuna” (Moises 7:18) sa pihak sang kalainan sa ila palibot? Sa madamo nga detalye nga ginahatag sang Moises 7 sa aton parte sa Sion, ang isa nga bilidhon gid sa mga Santos sa Ulihing mga Adlaw amo ini: ang Sion indi lamang isa ka siyudad—isa ini ka kahimtangan sang tagipusuon kag espiritu. Ang Sion, suno sa gintudlo sang Ginuo, amo ang “putli sing tagipusuon” (Doktrina kag mga Kasugtanan 97:21). Gani basi ang pinakamaayo nga paagi sa pagtukod sang Sion amo ang magsugod sa aton mismo mga tagipusuon kag mga puluy-an.

Mga Ideya para sa Personal nga Pagtuon sang Balaan nga mga Kasulatan

Moises 7:16–21, 27, 53, 62–69

Ang mga pagpaninguha ni Enoc isa ka sulundan sa pagtukod sang Sion sa aton mismo mga kabuhi.

Tungod ang Moises 7 isa ka kasulatan sang kon paano madinalag-on nga natukod sang mga sumulunod sang Dios ang Sion, makatudlo ini kag makainspirar sa aton sa karon samtang nagatinguha kita nga himuon ang amo man. Pamensara ang paggamit sang tsart pareho sini para isulat ang imo natun-an parte sa Sion sa Moises 7:16–21, 27, 53, 62–69.

Bersikulo	Ano ang imo natun-an parte sa Sion?	Ano ang ginapanugyan sini sa imo parte sa imo pagpaninguha nga magtukod sang Sion?
Bersikulo Moises 7:18	Ano ang imo natun-an parte sa Sion? Ang katawhan sang Sion “isa sing tagipusuon kag isa sing panghunahuna.”	Ano ang ginapanugyan sini sa imo parte sa imo pagpaninguha nga magtukod sang Sion? Kinahanglan naton nga mag-isa bilang mga pamilya kag bilang Simbahan.
Bersikulo Moises 7:21	Ano ang imo natun-an parte sa Sion? “Sa pagligad sang panahon, [ang Sion] ginsabnit palangit.”	Ano ang ginapanugyan sini sa imo parte sa imo pagpaninguha nga magtukod sang Sion? Ang pagtukod sang Sion amat-amat nga proseso.
Bersikulo	Ano ang imo natun-an parte sa Sion?	Ano ang ginapanugyan sini sa imo parte sa imo pagpaninguha nga magtukod sang Sion?
Bersikulo	Ano ang imo natun-an parte sa Sion?	Ano ang ginapanugyan sini sa imo parte sa imo pagpaninguha nga magtukod sang Sion?

Moises 7:18–19, 53

Ang katawhan sang Dios dapat magtinguha nga mangin “isa sing tagipusuon kag isa sing panghunahuna.”

Ang Moises 7:18–19 nagalista sang importante nga mga kinaiya sang katawhan nga ginatawag sang Ginuo nga Sion. Ngaa sa banta mo kinahanglan ining mga kinaiya sa pagtukod sang Sion? Sa ano ang Sion, suno sa paglaragway sa sining kapitulo, nangin lain sa iban pa nga nagaisa nga mga grupo ukon mga organisasyon sa kalibutan? Samtang imo ginabinagbinag ining pamangkot, pwede mo pamensaron ining mga pulong ni Jesucristo sa bersikulo 53: “Ako ang Mesias, ang Hari sang Sion.” Ano ang buot silingon sang si Jesucristo amo ang aton mangin Hari? Paano bala Niya kita ginabuligan nga magpatubo sang mga kinaiya sang Sion?

Tan-awa man sa Mga Taga-Filipos 2:1–5; 4 Nefi 1:15–18; Doktrina kag mga Kasugtanan 97:21; 105:5.

Dapat naton tinguhaan nga mangin “isa sing tagipusuon kag isa sing panghunahuna” (Moises 7:18).

Moises 7:21, 23–24, 27, 69

Ano ang natabo sa siyudad ni Enoc?

Ang mga dinalan nga “ginsabnit” (Moises 7:21, 23), “nabayaw” (Moises 7:24), “ginsabnit” (Moises 7:27), kag “nadula” (Moises 7:69) nagatumod sa Sion kag sa katawhan ni Enoc nga nagbalhin ang dagway kag gindala palangit. Ang mga tawo nga nagbalhin ang dagway “ginbag-o agud indi nila maeksperiyensyahan ang kasakit ukon kamatayon” bilang mga mortal (Guide to the Scriptures, “Translated Beings,”tan-awa man sa3 Nefi 28:4–9, 15–18, 39–40).

Moises 7:28–69

Ang Dios nagahibi para sa Iya mga anak.

May mga tawo nga nagakabig nga ang Dios malayo nga persona nga indi apektado ang balatyagon sang mga nagakatabo sa aton. Pero nakakita si Enoc sang panan-awon sa diin naghibi ang Dios para sa Iya kabataan. Samtang imo ginabasa ang Moises 7:28–40, pangitaa ang mga rason nga naghibi ang Dios. Sa nabilin sa panan-awon ni Enoc, nga ginlaragway sa Moises 7:41–69, ano ang ebidensya nga imo makita nga ang Dios “maluluy-on kag maayo tubtob sa wala’y katapusan”? (Moises 7:30; tan-awa sa mga bersikulo 43, 47, kag 62 para sa mga halimbawa).

Moises 7:62

Sa ulihing mga adlaw pagatipunon sang Dios ang Iya pinili.

Ang bersikulo 62 nagalaragway sang mga hitabo sa katapusan nga inadlaw. Pamensara kon ano ayhan ang buot silingon sang mga dinalan pareho sini: “pagkamatarong ang ipadala ko halin sa langit,” “kamatuoran ang ipalapnag ko sa duta,” “ang pagkamatarong kag kamatuoran maghagunos sa duta nga daw pareho sang baha.” Ano ang ginatudlo sa imo sining mga dinalan parte sa buluhaton sang Dios sa ulihing mga adlaw?

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Moises 7:18–19.Agud buligan ang mga miyembro sang pamilya nga mapanan-aw kon ano ang buot silingon sang “isa sing tagipusuon,” basi pwede kamo maghimo sang papel nga korte tagipusuon kag guntingon ini sa puzzle, igo lang nga may isa ka parte ang tagsa ka miyembro sang pamilya. Pwede nga isulat sang mga miyembro sang pamilya ang ila ngalan sa ila parte kag dayon magbuligay para sugpunon liwat ang tagipusuon. Samtang ginaobra ang puzzle mahimo ninyo nga hambalan ang mga butang nga inyo nanamian sa tagsa ka miyembro sang pamilya.

Moises 7:28–31, 35.Ano ang aton matun-an parte sa Dios sa sining mga bersikulo?

Moises 7:32.Ngaa ginhatagan kita sang Dios sang kahilwayan sa pagpili? Ano ang pwede naton ihambal sa tawo nga pamatyag niya ang mga kasuguan sang Dios nagapugong sang aton kahilwayan sa pagpili? Ang pagbasa sang 2 Nefi 2:25–27 mahimo nga makadugang sa sining paghinambalanay.

Moises 7:59–67.Samtang ginabasa sang inyo pamilya ang Moises 7:59–67, tilawi nga markahan ukon pat-inan ang mga butang nga ginhambal sang Ginuo kay Enoc parte sa ulihing mga adlaw—halimbawa, nga ang Dios “magatipon sang [Iya] pinili” (bersikulo 62) kag may “dalagko nga mga pag-antos sa tunga sang mga malain” (bersikulo 66). Paano kita makaangkon sang pagtuo kag paglaum wala sapayan sang kalainan sa ulihing mga adlaw? Bilang bahin sining paghinambalanay, pamensara nga basahon ining mga tinaga halin kay Elder Ronald A. Rasband: “Magpakabakod, mga kauturan. Huo, nagakabuhi kita sa peligroso nga panahon, pero samtang nagapabilin kita sa dalan sang kasugtanan, indi naton kinahanglan nga mahadlok. Ginabendisyunan ko kamo nga samtang ginahimo ninyo ini, indi kamo matublag sang panahon sa diin kita nagakabuhi ukon sang mga problema nga magaabot sa inyo. Ginabendisyunan ko kamo nga inyo pilion nga magtindog sa balaan nga mga lugar kag indi malingkang. Ginabendisyunan ko kamo nga magtuo sa mga promisa ni Jesucristo, nga Sia buhi kag Iya kita ginabantayan, nga nagaulikid sa aton kag nagatindog sa aton tupad” (“Be Not Troubled,” Liahona, Nob. 2018, 21).

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Gugma sa Balay [Love atHome],” Mga Himno kag mga Ambahanon sang Kabataan, no. 44.

Pagpauswag sang Aton Pagpanudlo

Magpanilag. Kon hatagan ninyo sing atensyon ang nagakatabo sa mga kabuhi sang inyo kabataan, makakita kamo sang manami nga mga oportunidad sa pagtudlo. Ang mga komento kag mga pamangkot sang inyo kabataan sa bilog nga adlaw mahimo nga senyales man sang posible nga tinion sa pagtudlo. (Tan-awa sa Teaching in the Savior’s Way, 16.)

City of Zion Translated [Siyudad sang Sion nga Ginbag-o], ni Del Parson