imahe sang kalibutan kag bulan

Enero 3–9

Genesis 1–2; Moises 2–3; Abraham 4–5

“Sa Ginsuguran Gintuga sang Dios ang mga Langit kag ang Duta”

Bisan pa nga nabasa mo na sadto ang parte sa Pagtuga, may dugang gid pirme nga matun-an sa balaan nga mga kasulatan. Magpangamuyo sang giya halin sa Balaan nga Espiritu agud mabuligan ka nga makakita sang bag-o nga paghangop.

Isulat Ang Imo Mga Panghunahuna

Bangud tama katahum kag kadalayawon sang kalibutan sa aton palibot, mabudlay hunahunaon ang kalibutan sang ini “wala sing kahusayan kag wala sing sulod,” “wala sing sulod kag mamingaw” (Genesis 1:2; Abraham 4:2). Isa nga ginatudlo sa aton sang istorya sang Pagtuga amo nga ang Dios sarang maghimo sang butang nga matahum halin sa wala sing kahusayan. Makabulig ina nga panumdumon kon ang kabuhi daw magamo. Ang Amay nga Langitnon kag si Jesucristo mga Tagtuga, kag ang Ila buluhaton sang pagtuga upod sa aton wala pa matapos. Sarang nila pasilakon ang kasanag sa madulom nga tinion sang aton mga kabuhi. Sarang nila kita buligan nga makakita sang kapag-on sa tunga sang mga unos sang kabuhi. Masugo nila ang mga elemento, kag kon tumanon naton ang Ila pulong pareho sang mga elemento, sarang Nila kita bag-uhon sa matahum nga mga tinuga nga dapat kita mangin. Kabahin ina sang kahulugan sang mangin tinuga sa imahe sa Dios, sunod sa Iya dagway (tan-awa sa Genesis 1:26). May potensyal kita nga mangin pareho sa Iya: ginpahitaas, ginhimaya, selestiyal nga mga tinuga.

Para sa kabilugan nga ideya parte sa libro nga Genesis, tan-awa sa “Genesis” sa Guide to the Scriptures.

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Genesis 1:1–25; Moises 2:1–25; Abraham 4:1–25

Sa idalom sang direksyon sang Amay nga Langitnon, gintuga ni Jesucristo ang duta.

Si Elder D. Todd Christofferson nagsiling, “Bisan ano man ang detalye sang proseso sang pagtuga, nahibal-an naton nga indi ini aksidente kundi nga ini sa direksyon sang Dios nga Amay nga ginpatuman ni Jesucristo” (“Why Marriage, Why Family,” Liahona, Mayo 2015, 51). Bisan madamo pa ang wala naton mahibal-an sa kon paano gid gintuga ang kalibutan, binagbinaga ang imo matun-an parte sa Pagtuga sa ginpahayag sang Dios sa Genesis 1:1–25; Moises 2:1–25; kag Abraham 4:1–25. Ano ang imo natalupangdan nga palareho sa sining mga panaysayon? Ano ang imo natalupangdan nga lain? Ano ang imo mga panghunahuna parte sa Amay nga Langitnon kag kay Jesucristo samtang imo ginabasa ang parte sa Pagtuga?

Tan-awa man sa Doktrina kag mga Kasugtanan 101:32–34.

kubrekama nga nagapakita sang lainlain nga halintang sang pagtuga

Creation [Pagtuga], ni Joan Hibbert Durtschi

Genesis 1:27–28; 2:18–25; Moises 3:18, 21–25; Abraham 5:14–19

Ang kasal sa tunga sang lalaki kag babayi gin-ordin sang Dios.

“Sanday Adan kag Eva ginhugpong sa kasal para sa katuigan kag wala’y katapusan paagi sa gahum [sang] wala’y katubtuban nga pagkapari” (Russell M. Nelson, “Lessons from Eve,” Ensign, Nob. 1987, 87). Ngaa importante nga mahibal-an ining kamatuoran? Binagbinaga ini samtang imo ginabasa ang Genesis 1:27–28; 2:18–25; Moises 3:18, 21–25; kag Abraham 5:14–19. Kon gusto mo pa nga magtuon parte sa kasal sa sulod sang plano sang Dios, basaha kag binagbinaga ang mga balasahon nga nalista sa idalom. Ano ang ginapabatyag sa imo sining mga balasahon nga himuon para panamion ang inyo pag-asawahay ukon para maghanda para sa pagpakasal sa ulihi?

Tan-awa man sa Mateo 19:4–6; 1 Mga Taga-Corinto 11:11; “Ang Panimalay: Isa ka Proklamasyon sa Kalibutan,” ChurchofJesusChrist.org.

Genesis 2:2–3; Moises 3:2–3; Abraham 5:2–3

Ginpakamaayo kag ginpakabalaan sang Dios ang Adlaw nga Inugpahuway.

Ginhimo sang Dios ang Adlaw nga Inugpahuway nga balaan, kag ginapangayo Niya sa aton nga padayon ini nga pakabalaanon. Si Elder David A. Bednar nagtudlo, “Ang Adlaw nga Inugpahuway tiyempo sang Dios, isa ka sagrado nga tiyempo partikular nga ginpain para sa pagsimba sa Iya kag sa pagbaton kag pagdumdom sang Iya dalagko kag malahalon nga mga promisa” (“Exceeding Great and Precious Promises,” Liahona, Nob. 2017, 92). Paano mo gamiton ining pahayag kag ang Genesis 2:2–3; Moises 3:2–3; ukon Abraham 5:2–3 para ipaathag sa isa ka tawo kon ngaa ginapili mo nga tahuron ang Adlaw nga Inugpahuway? Paano ka ginbendisyunan sang Ginuo sa pagtipig sang Iya adlaw nga balaan?

Tan-awa man sa Isaias 58:13–14; Doktrina kag mga Kasugtanan 59:9–13.

family study icon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Genesis 1:1–25; Moises 2:1–25; Abraham 4:1–25.Paano mo himuon nga masadya ang pagtuon parte sa Pagtuga para sa imo pamilya? Pwede mo dalhon ang imo pamilya sa gwa sa pagpangita sang mga klase sang butang nga ginhimo sa tagsa ka tion sa istorya sang Pagtuga, pareho sang mga bituon, mga kahoy, ukon kasapatan. Pwede ka man magpakita sang mga litrato sang mga butang nga gintuga sa tagsa ka tion kag hagaron ang mga miyembro sang pamilya nga pasunuron ang mga litrato pagkatapos nga basahon sing ululupod ang isa sa mga panaysayon parte sa Pagtuga. Ano ang ginatudlo sa aton sining mga gintuga parte sa Amay nga Langitnon kag kay Jesucristo?

Genesis 1; Moises 2; Abraham 4.Isa ka paagi agud tun-an ang istorya sang Pagtuga amo ang paghagad sa imo pamilya nga pangitaon sa Genesis 1 ukon Moises 2 kon pila ka beses gintawag sang Dios ang iya mga gintuga nga “maayo.” Ano ang ginapanugyan sini sa kon paano naton trataron ang mga gintuga sang Dios—lakip na ang aton mga kaugalingon? Ano ang aton matun-an sa paagi nga ginsambit ining mga hitabo sa Abraham 4?

Genesis 1:26–27; Moises 2:26–27; Abraham 4:26–27.Ngaa importante nga mahibal-an nga gintuga kita sa imahe sang Dios? Paano sini maapektuhan ang aton pagkabig sa aton kaugalingon, sa iban, kag sa Dios?

Kon may magagmay ka nga kabataan, basi gusto ninyo nga basahon sing ululupod ang Moises 2:27 kag maghampang sang simple nga hampang: Ipakita ang litrato nga nagapakita sa Amay nga Langitnon kag kay Jesucristo, pareho sang litrato 90 sa Libro sang mga Larawan nga Pang-Ebanghelyo (2009), kag pabulus-bulosa ang mga miyembro sang pamilya sa pagtudlo sang isa ka parte sang lawas sang Amay nga Langitnon kag ni Jesus. Dayon ang iban nga mga miyembro sang pamilya magtudlo man sa pareho nga parte sang ila lawas.

Genesis 1:28; Moises 2:28; Abraham 4:28.“Ang kasuguan sang Dios para sa Iya mga kabataan sa pagmuad kag pagpuno sang duta nagapabilin gihapon nga may puersa” (“Ang Panimalay: Isa ka Proklamasyon sa Kalibutan,” ChurchofJesusChrist.org). Ang mga miyembro sang pamilya pwede mag-role play kon paano ipaathag ang aton mga ginapatihan parte sa sining kasuguan sa mga wala nakahibalo sining kamatuoran ukon lain ang ginapatihan.

Genesis 1:28; Moises 2:28; Abraham 4:28.Ano ang buot silingon sang “maggahum … sang tagsa ka buhi nga butang nga nagagiho sa duta”? (tan-awa man sa Doktrina kag mga Kasugtanan 59:16–21). Paano matuman sang aton pamilya ang aton responsibilidad nga atipanon ang kalibutan?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Aton Pagpanudlo

Gamita ang balaan nga mga kasulatan sa aton mga kabuhi. Pagkatapos magbasa sang isa ka dinalan sa balaan nga kasulatan, agdaha ang mga miyembro sang pamilya nga gamiton ini sa ila mga kabuhi. Halimbawa, paano magamit ang Moises 3:1–3 sa aton pag-obserba sang Adlaw nga Inugpahuway sa kada semana? (Tan-awa sa Teaching in the Savior’s Way, 21.)

Si Jesucristo nga nagatindog sa mga panganod

The Creation [Ang Pagtuga], ni Annie Henrie Nader