“Enero 17–23. Genesis 5; Moises 6: ‘Itudlo Ninyo Ining mga Butang sing Hilway sa Inyo mga Anak,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)
“Enero 17–23. Genesis 5; Moses 6,” Dali, Magsunod sa Akon—Para sa Mga Indibidwal kag Mga Pamilya: 2022
Better than Paradise [Mas Maayo Pa Sangsa Paraiso], ni Kendal Ray Johnson
Enero 17–23
Genesis 5; Moises 6
“Itudlo Ninyo Ining mga Butang sing Hilway sa Inyo mga Anak”
Samtang imo ginabasa kag ginapamensar sing maayo ang Genesis 5 kag Moises 6, isulat ang espirituhanon nga mga pagpabatyag nga imo mabaton. Ano nga mga mensahe ang imo nakita nga may bili sa imo kag sa imo pamilya?
Isulat Ang Imo Mga Panghunahuna
Halos ang kabug-osan sang Genesis 5 lista sang mga henerasyon halin kay Adan kag Eva pakadto kay Noe. Madamo kita sang mabasahan nga ngalan, pero wala kita kaayo sang ihibalo parte sa ila. Dayon mabasahan naton ang parte kay Enoc, anom ka henerasyon halin kay Adan, nga ginlaragway sa sining makalilibog pero indi mapaathag nga linya: “Si Enoc naglakat upod sa Dios: kag wala na sia; kay ginkuha sia sang Dios” (Genesis 5:24). Sigurado nga may istorya sa likod sina. Ugaling wala sing dugang nga paathag, nagpadayon ang listahan sang mga henerasyon.
Maayo lang, ang Moises 6 nagpahayag sang mga detayle sang istorya ni Enoc—kag isa ini ka manami nga istorya. Matun-an naton ang pagkamapainubuson ni Enoc, ang iya mga kahuyang, ang potensyal nga nakita sa iya sang Dios, kag ang dako nga buluhaton nga iya ginhikot bilang propeta sang Dios. Makita man naton ang mas maathag nga larawan sang pamilya ni Adan kag Eva samtang nagapadayon ini sa mga henerasyon. Mabasa naton ang “dako nga gahum” ni Satanas pati man ang mga ginikanan nga nagtudlo sa ila kabataan sang mga “dalanon sang Dios” kag sang mga “manugwali sang pagkamatarong” nga “nagbantala kag nagpropesiya” (Moises 6:15, 21, 23). Labi nga malahalon amo ang aton matun-an parte sa doktrina nga gintudlo sining mga ginikanan kag mga manugwali: pagtuo, paghinulsol, bunyag, kag pagbaton sang Balaan nga Espiritu (tan-awa sa Moises 6:50–52). Inang doktrina, pareho sang priesthood nga kaupod sini, “halin sang ginsuguran [kag] mangin sa katapusan man sang kalibutan” (Moises 6:7).
Mga Ideya para sa Personal nga Pagtuon sang Balaan nga mga Kasulatan
Ang propeta isa ka manugpanan-aw.
Samtang imo ginatun-an ang Moises 6:26–36, ano ang imo matun-an parte sa mga mata, kadulom, kag pagtan-aw? Sang tiyempo ni Enoc, sin-o ang indi “makakita sa malayo”? Ngaa bala nga indi makita sining katawhan ang kamatuoran? Ano ang makita ni Enoc? Ano ang nagpatubo sang imo pagtuo nga ang moderno nga mga propeta mga manugpanan-aw? (tan-awa sa bersikulo 36).
Ginatawag kita sang Dios para himuon ang Iya buluhaton wala sapayan sang aton mga kakulangan.
Indi pinasahi ang makabatyag nga gindaog sang kadamuon sang ginapaobra sa aton sang Ginuo. Bisan si Enoc nakabatyag sang amo sina sang gintawag sia sang Ginuo nga mangin propeta. Samtang imo ginabasa ang Moises 6:26–36, pangitaa kon ngaa nakabatyag si Enoc nga gindaog kag kon ano ang ginhambal sang Ginuo para hatagan sia sang kaisog. Sa mga bersikulo 37–47, pangitaa ang mga paagi nga ginsuportahan sang Ginuo si Enoc kag ginhatagan sing gahum para himuon ang Iya buluhaton (tan-awa sa Moises 7:13). Mahimo mo man ikumparar ang eksperiyensya ni Enoc sa iya sang iban nga mga propeta nga nakabatyag sang kakulangan, pareho kay Moises (tan-awa sa Exodo 4:10–16), Jeremias (tan-awa sa Jeremias 1:4–10), Nefi (tan-awa sa 2 Nefi 33:1–4), kag Moroni (tan-awa sa Eter 12:23–29). Ano sa pamatyag mo ang gusto sang Ginuo nga imo matun-an sa sining balaan nga mga kasulatan parte sa buluhaton nga Iya ginhatag sa imo?
Tan-awa man sa Jacob 4:6–8.
Ang doktrina ni Cristo sentro sa plano sang kaluwasan sang Dios.
Tungod may ara kita sang libro ni Moises, nahibal-an naton nga ginatudloan sang Dios ang Iya mga anak kon paano makakita sang kapatawaran kag pagtubos halin pa sa ginsuguran. Sa balaan nga mga kasulatan, ining mga pinanudlo kon kaisa ginatawag nga doktrina ni Cristo 2 Nefi 31:13–21). Samtang imo ginatun-an ang Moises 6:48–68, pangitaa ang kinahanglan naton mahibal-an kag himuon para matubos. Mahimo nga makabulig ang pagsulat sang imo kaugalingon nga pagpalip-ot sang gintudlo ni Enoc. Ngaa importante nga mahibal-an ining mga kamatuoran nga ginpanudlo halin sang panahon ni Adan kag Eva? Ano ang ginapabatyag sa imo nga imo himuon bilang resulta sang pagtuon sining mga pinanudlo?
“Itudlo ninyo ining mga butang sing hilway sa inyo mga anak.”
Gintudloan sanday Adan kag Eva sang malahalon nga mga kamatuoran sang ebanghelyo ni Jesucristo. Pero ginklaro sang mga pulong sang Ginuo sa Moises 6:27–28 nga sa mga henerasyon antes kay Enoc, madamo nga mga tawo ang wala na nagapangabuhi sinang mga kamatuoran. Gusto sang Ginuo nga ipanumbalik ni Enoc ang mga kamatuoran nga nagkaladula—lakip na ang kasuguan nga orihinal nga ginhatag kay Adan: “Itudlo ninyo ining mga butang sing hilway sa inyo mga anak” (Moises 6:58). Samtang imo ginabasa ang Moises 6:51–62, ano ang imo matun-an parte kay Jesucristo? Ano ang imo makita nga mas mangin bilidhon sa mga ulihing tubo? Ano ang pwede mo himuon para ipasa ining mga kamatuoran sa palaabuton nga mga henerasyon?
Dapat nga tudloan sang mga ginikanan ang ila kabataan sang ebanghelyo.
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Genesis 5; Moises 6:5–25, 46.Ang pagbasa parte sa “libro sang handumanan” nga gintipigan sang pamilya ni Adan kag Eva mahimo nga makainspirar sang imo pamilya nga maghimo man sang inyo nga libro sang handumanan. Hambali bilang pamilya kon ano ang inyo ilakip. Basi may mga litrato kamo, mga istorya, ukon mga dokumento halin sa kasaysayan sang inyo pamilya. Pwede kamo magpili nga dalhon ang mga butang nga nagakatabo sa inyo pamilya sa karon. Ano ang mangin may bili sa palaabuton nga mga henerasyon? Pwede man ninyo hambalan kon paano magiyahan ang inyo mga pagpaninguha sang mga dinalan nga “paagi sa espiritu sang inspirasyon” (Moises 6:5) kag “sa sulundan nga ginhatag paagi sa tudlo sang Dios” (Moises 6:46).
-
Moises 6:53–62.Paano naton sabton ang pamangkot ni Adan nga makita sa Moises 6:53? Ano nga mga sabat ang aton makita sa mga bersikulo 57–62?
-
Moises 6:59.Ano ang buot silingon sang “mabun-ag kamo liwat sa ginharian sang langit”? Ano ang pwede naton padayunon sa paghimo para mabun-ag liwat sa bilog naton nga mga kabuhi? Para sa bulig, tan-awa sa Alma 5:7–14, 26.
-
Moises 6:61.Ano ang aton matun-an parte sa Balaan nga Espiritu sa sining bersikulo?
-
Moises 6:63.Ano ang pila sa mga butang nga “nagasaksi [kay Cristo]”? (tan-awa man sa 2 Nefi 11:4). Pamensara ang pag-agda sang mga miyembro sang pamilya sa pag-istorya sang ila makita sa “kalangitan sa ibabaw” ukon “sa ibabaw sang duta” nga nagabulig sa ila nga magtuon parte kay Jesucristo. Halimbawa, paano kita ginapahanumdom sang mga kahoy, mga bato, ukon sang adlaw parte sa Manluluwas? Ano ang ginatudlo sa aton sang mga titulo nga “tubig nga buhi” kag “tinapay nga nagahatag sing kabuhi” parte sa Iya? (Juan 4:10–14; 6:35).
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Ginapanugyan nga kanta: “Indi sa Kataas sang Bukid [I’ll Go Where You Want Me to Go],” Mga Himno kag mga Ambahanon sang Kabataan, no. 46.
Pagpauswag sang Personal nga Pagtuon
Pangitaa ang mga simbolo. Sa balaan nga mga kasulatan, ang mga bagay ukon mga hitabo masami nga nagatiglawas ukon nagasimbolo sang espirituhanon nga mga kamatuoran. Ining mga simbolo mahimo magdugang sang imo pag-intiendi sang doktrina. Halimbawa, ano ang imo matun-an sa mga simbolo sang mata kag daga sa Moises 6:35?
Adam and Eve Teaching Their Children [Si Adan kag Eva nga Nagatudlo sang Ila Kabataan], ni Del Parson