Si Adan kag si Eva nga upod nga nagalakat

Adam and Eve [Si Adan kag si Eva], ni Douglas M. Fryer

Enero 10–16

Genesis 3–4; Moises 4–5

Ang Pagkahulog sa Sala ni Adan kag Eva

Samtang imo ginatun-an ang Genesis 3–4 kag Moises 4–5, binagbinaga kon ano ang ginatinguhaan nga itudlo sa imo sang Ginuo. Isulat ining mga kamatuoran kag ang imo espirituhanon nga mga panghunahuna, kag pamensara ini sing maayo sa bilog nga semana.

Isulat Ang Imo Mga Panghunahuna

Sang primero, ang istorya sang Pagkahulog sa Sala ni Adan kag Eva daw makabig nga isa ka trahedya. Gintabog sanday Adan kag Eva pagwa sa matahum nga Hardin sang Eden. Gintapok sila sa kalibutan kon sa diin ang kasakit, kasubo, kag kamatayon ara pirme (tan-awa sa Genesis 3:16–19). Kag naseparar sila sa ila Amay nga Langitnon. Pero bangud sang mga kamatuoran nga ginpanumbalik paagi kay Propetang Joseph Smith sa libro ni Moises, nahibal-an naton nga ang istorya ni Adan kag Eva sa matuod istorya sang paglaum—kag importante nga bahin sang plano sang Dios para sa Iya mga kabataan.

Matahum ang Hardin sang Eden. Pero kinahanglan ni Adan kag Eva sang masobra pa sangsa matahum nga mga palibot. Kinahanglan nila—kag kinahanglan naton tanan—sang oportunidad sa pagtubo. Ang pagbiya sang Hardin sang Eden amo ang kinahanglanon nga una nga tikang padulong sa pagbalik sa Dios kag sa ulihi mangin pareho sa Iya. Nagakahulugan ina sang pag-atubang sang oposisyon, paghimo sang mga kasaypanan, pagtuon sa paghinulsol, kag pagsalig sa Manluluwas, nga ang Pagbayad-Sala naghimo sang pag-uswag kag sang “kalipay sang pagtubos sa aton” nga posible (Moises 5:11). Gani sa imo pagbasa parte sa Pagkahulog sa Sala ni Adan kag Eva, indi lang pagtutoki ang dawsa hayag nga trahedya kundi ang mga posibilidad—indi ang paraiso nga nadula sa ila ni Adan kag Eva kundi ang himaya nga ginatugot sang ila pagpili nga aton mabaton.

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Genesis 3:1–7; Moises 4; 5:4–12

Ang Pagkahulog sa Sala kinahanglanon nga bahin sang plano sang Dios sa pagtubos sang Iya mga anak.

Ang Pagkahulog ni Adan kag Eva sa sala nagdala sang pisikal kag espirituhanon nga kamatayon sa kalibutan. Nagdala man ini sang kabudlayan, kasubo, kag sala. Ini tanan daw mga rason agud manugonan nga natabo ang Pagkahulog sa Sala. Apang ang Pagkahulog bahin sang plano sang Amay nga Langitnon para tubuson kag ipahitaas ang Iya mga anak paagi sa “sakripisyo sang Bugtong nga Anak sang Amay” (Moises 5:7). Samtang imo ginatun-an ang Genesis 3:1–7; Moises 4; 5:4–12, ano nga mga kamatuoran ang imo makita nga makabulig sa imo nga maintiendihan ang Pagkahulog sa Sala kag kon paano ini ginalampuwasan sang Pagbayad-Sala ni Cristo? Mahimo nga makabulig ang mga pamangkot pareho sini:

• Ano ang epekto sang Pagkahulog sa Sala sa ila ni Adan kag Eva? Ano ang epekto sini sa akon?

• Ngaa nga naghatag sanday Adan kag Eva sang mga halad? Ano ang simbolo sining mga halad? Ano ang aton matun-an sa mga pulong sang anghel sa sining mga bersikulo?

• Ngaa nga “nagkasadya” sila ni Adan kag Eva pagkatapos sang ila Pagkahulog sa Sala? Ano ang akon matun-an sa sining panaysayon parte sa plano sang Dios nga luwason ako paagi kay Jesucristo?

Bangud sa Libro ni Mormon kag sa iban pa nga mga rebelasyon sa ulihing mga adlaw, may pinasahi kita nga perspektibo parte sa Pagkahulog sa Sala. Halimbawa, pamensara ang gintudlo sang propeta nga si Lehi sa iya pamilya parte kay Adan kag Eva sa 2 Nefi 2:15–27. Paano ginklaro sang mga pinanudlo ni Lehi ang natabo sa Hardin sang Eden kag ginabuligan kita nga maintiendihan kon ngaa importante ini?

Tan-awa man sa 1 Mga Taga-Corinto 15:20–22; Mosias 3:19; Alma 12:21–37; Doktrina kag mga Kasugtanan 29:39–43; Mga Artikulo sang Pagtuo 1:3.

Si Eva nga nagauyat sang prutas

Leaving Eden [Ang Pagbiya sang Eden], ni Annie Henrie Nader

Genesis 3:16; Moises 4:22

Ano ang buot silingon sang si Adan “magagahum” kay Eva?

Ining dinalan sa balaan nga kasulatan kon kaisa nagakasal-an nga ang bana husto sa pagmaltrato sang iya asawa. Sa aton panahon, ang mga propeta sang Ginuo nagatudlo nga bisan pa nga ang bana ang dapat magpamuno sa puluy-an sa pagkamatarong, dapat niya kabigon ang iya asawa bilang pareho nga katuwang (tan-awa sa “Ang Panimalay: Isa ka Proklamasyon sa Kalibutan” [ChurchofJesusChrist.org]). Si Elder Dale G. Renlund kag si Sister Ruth Lybbert Renlund nagpaathag nga ang matarong nga bana “magatinguha sa pag-alagad; magabaton sang iya sayop kag magapangayo sang kapatawaran; mangin maabtik sa pagdayaw; may pasunaid sa mga luyag sang mga miyembro sang pamilya; magabatyag sang dako nga responsibilidad sa paghatag sang ‘mga kinahanglanon sa kabuhi kag pag-amlig’ para sa iya pamilya; magatratar sang iya asawa nga may labi nga respeto kag pagtahod. … Pagabugayan niya ang iya pamilya” (The Melchizedek Priesthood: Understanding the Doctrine, Living the Principles [2018], 23).

Moises 5:4–9, 16–26

Batunon sang Dios ang akon mga halad kon itanyag ko ini nga may handa kag masinulundon nga tagipusuon.

Natun-an ni Adan kag Eva nga ang halad nga mga sapat nagasimbolo sang nagabayad sala nga sakripisyo ni Cristo, kag “ginpahayag nila [ini] sa ila mga anak nga lalaki kag mga anak nga babayi” (Moises 5:12). Sa imo pagtuon sang Moises 5:4–9, 16–26, binagbinaga ang lainlain nga mga pamatasan sang duha sa ila mga anak nga lalaki, nga sanday Cain kag Abel, sa sining mga halad. Ngaa nga ginbaton sang Ginuo ang halad ni Abel pero ang kay Cain wala?

Ano nga klase sang mga halad ang ginapangayo sang Ginuo sa imo? May ara bala sa Moises 5:4–9, 16–26 nga nagaliwat sang imo panghunahuna sa sinang mga halad?

Tan-awa man sa Salmo 4:5; 2 Mga Taga-Corinto 9:7; Omni 1:26; 3 Nefi 9:19–20; Moroni 7:6–11; Doktrina kag mga Kasugtanan 97:8.

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Genesis 3; Moises 4.Ano ang sarang mo himuon para buligan ang imo pamilya nga mas maintiendihan ang Pagkahulog sa Sala ni Adan kag Eva? Pwede mo kopyahon ang mga litrato nga “Si Adan kag si Eva” (sa Mga Sugilanon sa Daan nga Katipan) kag pangguntingon ang mga ini. Dayon pwede ninyo nga bululigan ini sa pagpasunod samtang inyo ginahambalan ang mga eksperiyensya nanday Adan kag Eva.

Moises 4:1–4.Ano ang aton matun-an parte sa Dios, kay Jesucristo, kag kay Satanas sa sining mga bersikulo? Ngaa ang pagbuot tama kaimportante sa plano sang Dios nga gusto ini gub-on ni Satanas?

Moises 5:5–9.Ano ang ginsugo sang Dios nga himuon ni Adan kag Eva para mabuligan sila nga panumdumon ang Manluluwas? Ano ang ginhatag sang Dios sa aton para buligan kita nga panumdumon ang Manluluwas?

Moises 5:16–34.Ano ang buot silingon sang mangin “manugbantay sang [aton] utod”? Paano naton mas maatipan ang kada isa bilang pamilya?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Pagpauswag sang Personal nga Pagtuon

Maggamit sang mga bulig sa pagtuon sang balaan nga mga kasulatan. Samtang imo ginatun-an ang balaan nga mga kasulatan, gamita ang mga tanda sa idalom, Topical Guide, Bible Dictionary, kag iban pa nga mga bulig sa pagtuon para makaangkon sang dugang nga ihibalo.

anghel nga nagabisita kanday Adan kag Eva

Similitude [Kaangay], ni Walter Rane