imahe sang mga bituon sa kahawaan

Disyembre 27–Enero 2

Moises 1; Abraham 3

“Ini ang Akon Buluhaton kag Akon Himaya”

Samtang imo ginabasa ang ginhambal sang Dios kay Moises kag Abraham, binagbinaga kon ano man ang mahimo Niya nga ihambal sa imo.

Isulat Ang Imo Mga Panghunahuna

Ang Biblia nagasugod sa mga tinaga nga “sa ginsuguran gintuga sang Dios ang mga langit kag ang duta” (Genesis 1:1). Pero ano ang ara antes pa sining “ginsuguran”? Kag ngaa gintuga ini tanan sang Dios? Paagi sa Propeta nga si Joseph Smith, ang Ginuo naghatag sang paathag sa sining mga pamangkot.

Halimbawa, ginhatagan Niya kita sang rekord sang panan-awon sa diin nakita ni Abraham ang aton pagkabuhi bilang mga espiritu “antes ginhimo ang kalibutan” (tan-awa sa Abraham 3:22–28). Ginhatagan man kita sang Ginuo sang inspirado nga paglubad ukon rebisyon sang una nga anum ka mga kapitulo sang Genesis, nga ginatawag nga libro ni Moises—nga wala nagasugod sa “sa ginsuguran.” Sa baylo, nagasugod ini sa eksperiyensya ni Moises nga nagahatag sang konteksto sa kilala nga istorya sang Pagtuga. Ululupod, ining balaan nga mga kasulatan sa ulihing mga adlaw maayo nga panugod sa aton pagtuon sang Daan nga Katipan tungod ginasabat sang mga ini ang pila ka pundasyon nga mga pamangkot nga magabulig sa aton pagbasa: Sin-o ang Dios? Sin-o kita? Ano ang buluhaton sang Dios, kag ano ang aton bahin sa sini? Ang pangbukas nga mga kapitulo sang Genesis makabig nga sabat sang Ginuo sa pangabay ni Moises: “Kaluoyi ang imo alagad, O Dios, kag sugiri ako parte sining duta, kag sang mga pumuluyo sini, kag amo man sang kalangitan” (Moises 1:36).

Learn More image

icon sang personal nga pagtuon

Mga Ideya para sa Personal nga Pagtuon sang Balaan nga mga Kasulatan

Moises 1

Bilang anak sang Dios, may diosnon ako nga kapalaran.

Si Pangulong Dieter F. Uchtdorf nagtudlo, “Kalabanan sa kagamo nga naeksperiyensyahan naton sa sining kabuhi nagahalin sa simple nga indi paghangop kon sin-o kita” (“The Reflection in the Water” [Church Educational System fireside para sa mga lamharon nga hamtong, Nob. 1, 2009], ChurchofJesusChrist.org). Nahibal-an ini sang Amay nga Langitnon, kag amo man ni Satanas. Ang una nga mensahe sang Dios kay Moises nagalakip sang mga kamatuoran nga “ikaw akon anak” kag “kaangay ka sa akon Bugtong nga Anak” (Moises 1:4, 6). Sa kabaliskaran, gintawag ni Satanas si Moises bilang ahaw “anak sang tawo” (Moises 1:12). Sa ano mangin lain ang imo kabuhi kag mga desisyon kon kabigon mo ang imo kaugalingon pareho sang gusto ni Satanas, bilang “anak [nga lalaki ukon babayi] sang tawo”? Paano mabugayan ang imo kabuhi sang paghibalo kag pagdumdom nga ikaw anak sang Dios?

Ano nga mga bersikulo ukon mga dinalan sa Moises 1 ang nagahatag sa imo sang paghangop sang imo diosnon nga bili?

Si Jesucristo upod sang mga bituon

Christ and the Creation [Si Cristo kag ang Pagtuga], ni Robert T. Barrett

Moises 1:12–26

Sarang ko nga pakigbatuan ang impluwensya ni Satanas.

Sa ginapakita sa Moises 1 sing maathag, ang mabaskog nga mga espirituhanon nga mga eksperiyensya wala nagapugong sa aton nga matentar. Ang matuod, isa sa mga taktika ni Satanas amo nga tentaron kita nga dudahan inang mga eksperiyensya ukon ang aton mga natun-an halin sa mga ini. Samtang imo ginabasa ang sabat ni Moises kay Satanas sa mga bersikulo 12–26, ano ang imo matun-an nga makabulig sa imo nga magpabilin nga tampad sa testimonya nga imo nabaton? Ano ang nagabulig sa imo nga mapakigbatuan ang iban pa nga mga tentasyon ni Satanas? (tan-awa, halimbawa, sa mga bersikulo 15 kag 18).

Base sa imo natun-an, pwede ka maghimo sang plano para mapakigbatuan ang tentasyon. Halimbawa, pwede mo kompletuhon ang dinalan nga “Kon ginatentar ako nga , ako maga .”

Tan-awa man sa Mateo 4:1–11; Helaman 5:12.

Moises 1:27–39; Abraham 3

Ang buluhaton kag himaya sang Dios amo ang buligan ako nga makaangkon sang kabuhi nga wala katapusan.

Pagkatapos nga makakita sang panan-awon sang mga tinuga sang Dios, nagpangabay si Moises sa Ginuo: “Sugiri ako … sang rason ngaa amo sini” (Moises 1:30). Ano ang nanamian mo sa sabat sang Ginuo sa Moises 1:31–39?

May naeksperiyensyahan man si Abraham nga panan-awon, nga narekord sa Abraham 3. Ano ang imo makita sa mga bersikulo 22–26 nga makabulig sabat sang pangabay ni Moises?

Pamensara nga ilista ang iban pa nga mga kamatuoran nga natun-an nanday Moises kag Abraham sa ila mga panan-awon: mga kamatuoran parte sa Dios, parte sa ila mismo kaugalingon, kag parte sa mga katuyuan sang mga gintuga sang Dios. Paano maapektuhan sining mga kamatuoran ang imo paglantaw sang imo kaugalingon kag sang kalibutan sa imo palibot?

Abraham 3:22–23

May iban pa bala magluwas kay Abraham nga “pinili antes [sila] matawo”?

“Sa kalibutan sang mga espiritu antes sa duta, nagpili ang Dios sang pila ka mga espiritu para tumanon ang partikular nga mga misyon sa mortal nila nga mga kabuhi. Ginatawag ini nga foreordination [ginpili na nga daan].… Ang doktrina sang pagpili na nga daan magamit sa tanan nga mga miyembro sang Simbahan, indi lamang sa Manluluwas kag sa Iya mga propeta” (Gospel Topics, “Foreordination,” topics.ChurchofJesusChrist.org).

Paano naton nakuha ang mga libro ni Moises kag Abraham?

Ang libro ni Moises amo ang una nga bahin sang inspirado nga paglubad ni Joseph Smith sang Biblia. Ang libro ni Abraham ginpahayag kay Joseph Smith sa tion sang iya trabaho sa Egiptohanon nga mga papiro. Ining mga libro, nga makita sa karon sa Perlas nga Bilidhon, nagahatag sang madamo nga impormasyon parte kanday Moises, Abraham, kag sa iban pa nga mga propeta nga indi makita sa Daan nga Katipan.  

icon sang pang-pamilya nga pagtuon

Mga Ideya para sa Pang-pamilya nga Pagtuon sang Balaan nga mga Kasulatan kag Home Evening

Moises 1:2–6; Abraham 3:11–12.Pwede mo hagaron ang mga miyembro sang pamilya nga magpangita sang mga dinalan sa kanta nga “Ako Anak sang Dios” (Mga Himno kag mga Ambahanon sang Kabataan, 58) nga may kaangtanan sa mga kamatuoran nga ginatudlo sa sining balaan nga mga kasulatan.

Moises 1:4, 30–39.Masadyahan ayhan ang imo pamilya sa pagtan-aw sang pila ka “hinimo sang mga kamot sang [Dios]”? (bersikulo 4). Basi pwede ninyo basahon ining mga bersikulo sa isa ka parke ukon sa idalom sang mga bituon sa gab-i. Dayon pwede ninyo hambalan kon ngaa gintuga sang Dios ang kalibutan kag kon paano kita magpartisipar sa Iya “buluhaton kag [Iya] himaya” (bersikulo 39).

Moises 1:18.Ano nga laygay ang pwede naton ihatag para mabuligan ang kada isa nga “maghukom sa tunga” sang Dios kag ni Satanas? (Tan-awa man sa Moroni 7:12–18; Doktrina kag mga Kasugtanan 50:23–24.)

Abraham 3:24–26.Pwede mo hatagan ang mga miyembro sang pamilya sang masadya pero makahalangkat nga buluhaton nga mahimo nila ipakita nga sarang sila magsunod sang mga instruksyon, pareho sang pagpilo sang papel nga eroplano ukon pagsunod sang recipe. Sa ano nangin pareho ang ining aktibidades sa katuyuan sang aton mortal nga kabuhi nga ginlaragway sa sining mga bersikulo?

Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.

Ginapanugyan nga kanta: “Ako Anak sang Dios,” Mga Himno kag mga Ambahanon sang Kabataan, 58.

Pagpauswag sang Personal nga Pagtuon

Pangitaa ang mga kamatuoran sang ebanghelyo. Sa balaan nga mga kasulatan, kon kaisa ang mga kamatuoran sang ebanghelyo ginahambal sing direkta; kon kaisa ginapahangop paagi sa halimbawa ukon istorya. Pamangkuta ang imo kaugalingon, “Ano nga wala katapusan nga kamatuoran ang gintudlo sa sining mga bersikulo?”

Si Moises nga ginasugo si Satanas nga maghalin

Moses Overcomes Satan [Gindaog ni Moises si Satanas], ni Joseph Brickey