“Pebrero 7–13. Genesis 12–17; Abraham 1–2: ‘Mangin Mas Matutum nga Sumulunod sang Pagkamatarong,’” Dali, Magsunod sa Akon—Para sa Mga Indibidwal kag Mga Pamilya: Daan nga Katipan 2022 (2021)
“Pebrero 7–13. Genesis 12–17; Abraham 1–2,” Dali, Magsunod sa Akon—Para sa Mga Indibidwal kag Mga Pamilya: 2022
Larawan ni Abraham kag Sara, ni Dilleen Marsh
Pebrero 7–13
Genesis 12–17; Abraham 1–2
“Mangin Mas Matutum nga Sumulunod sang Pagkamatarong”
Samtang imo ginabasa ang parte kay Abram kag Sarai (nga gintawag sang ulihi nga Abraham kag Sara) kag sang ila panimalay, binagbinaga kon paano ka ginainspirar sang ila mga ehemplo. Isulat ang mga pagpabatyag parte sa kon paano ka “mangin mas matutum nga sumulunod sang pagkamatarong” (Abraham 1:2).
Isulat Ang Imo Mga Panghunahuna
Bangud sang kasugtanan nga ginhimo sang Dios sa iya, gintawag si Abraham nga “ang amay sang mga tampad” (Doktrina kag mga Kasugtanan 138:41) kag “ang Abyan sang Dios” (Santiago 2:23). Minilyon sa karon ang nagatahod sa iya bilang ila direkta nga katigulangan, kag ang iban gin-adoptar sa iya pamilya paagi sa pagkahaylo sa ebanghelyo ni Jesucristo. Pero si Abraham mismo naghalin sa problemado nga pamilya—ang iya nga tatay, nga nagtalikod sa matuod nga pagsimba sa Dios, nagtinguha nga ihalad si Abraham sa mga dios-dios. Sa pihak sini, ang handum ni Abraham nga “mangin mas matutum nga sumulunod sang pagkamatarong” (Abraham 1:2), kag ang kasaysayan sang iya kabuhi nagapakita nga gintahod sang Dios ang iya handum. Ang kabuhi ni Abraham nagatindog bilang testimonya nga bisan ano ang kasaysayan sang pamilya sang isa ka tawo, ang palaabuton sarang gid mapun-an sang paglaum.
Mga Ideya para sa Personal nga Pagtuon sang Balaan nga mga Kasulatan
Bugayan ako sang Dios bangud sang akon pagtuo kag matarong nga mga handum.
Pareho sa madamo sa aton, nagkabuhi si Abraham nga ginapalibutan sang malain, pero naghandum sia nga mangin matarong. Si Pangulong Dallin H. Oaks nagtudlo sang importansya sang pag-angkon sang matarong nga mga handum: “Bisan nga importante ang pagdula sang tanan nga paghandum sang sala, ang kabuhi nga wala katapusan nagapangayo sang mas labaw pa dira. Agud mabaton ang aton wala katapusan nga kapalaran, handumon naton kag pangabudlayan ang mga kalidad nga kinahanglanon agud mangin tinuga nga dayon. … Kon daw mabudlay gid ini—kag sigurado indi ini mahapos para sa bisan sin-o sa aton—dapat naton sugdan sa paghandum sinang mga kalidad kag magtawag sa aton mapinalanggaon nga Amay nga Langitnon para buligan kita sa aton mga balatyagon [tan-awa sa Moroni 7:48]” (“Desire,” Liahona, Mayo 2011, 44–45). Samtang imo ginabasa ang Abraham 1:1–19, pamensara kon paano ining mga bersikulo nagapakita sang gintudlo ni Pangulong Oaks. Mahimo nga makabulig ang mga pamangkot pareho sini:
-
Ano ang ginhandum kag ginpangayo ni Abraham? Ano ang iya ginhimo para ipakita ang iya pagtuo?
-
Ano ang imo mga handum? May nabatyagan ka bala nga dapat mo himuon para matinloan ang imo mga handum?
-
Ano nga mga hangkat ang gin-atubang ni Abraham bangud sang iya matarong nga mga handum? Ginbuligan bala sia sang Dios?
-
Ano ang mensahe sining mga bersikulo sa may mga miyembro sang pamilya nga wala nagahandum sang pagkamatarong?
Tan-awa man sa Mateo 7:7.
Sin-o ang nalakip sa Kasugtanan kay Abraham?
Sang ginhimo sang Ginuo ang Iya kasugtanan kay Abraham, ginpromisa Niya nga ining kasugtanan magapadayon sa kabataan ni Abraham, ukon “kaliwatan,” kag nga “ang tanan nga magbaton sining Ebanghelyo paga … kabigon nga imo kaliwatan” (Abraham 2:10–11). Buot silingon sini nga ang mga promisa sang kasugtanan kay Abraham magamit sa mga miyembro sang Simbahan sa karon, bisan literal sila nga mga himata ni Abraham ukon gin-adoptar sa iya pamilya paagi sa bunyag kag pagkahaylo sa ebanghelyo ni Jesucristo (tan-awa sa Mga Taga-Galacia 3:26–29; Doktrina kag mga Kasugtanan 132:30–32). Para makabig nga himata ni Abraham, kinahanglan sang indibidwal nga magtuman sang mga kasugoan kag mga ordinansa sang ebanghelyo.
Genesis 12:1–3; 13:15–16; 15:1–6; 17:1–8, 15–22; Abraham 2:8–11
Ginabugayan ako kag ang akon pamilya sang kasugtanan kay Abraham.
Tungod kay ang tanan nga mga miyembro sang Simbahan nalakip sa kasugtanan kay Abraham, mahimo nga gusto mo maghatag sang oras sa pagbinagbinag kon ngaa ang ining kasugtanan may kahulugan sa imo kabuhi. Irekord ang imo mga panghunahuna parte sa masunod nga mga pamangkot:
Paano ang mga promisa nga makita sa Abraham 2:8–11 magabugay sa akon kag sa akon pamilya? (tan-awa man sa Genesis 12:1–3; 13:15–16).
Ano ang akon matun-an parte sa kasugtanan kay Abraham sa Genesis 15:1–6; 17:1–8, 15–22?
Ano ang nabatyagan ko nga himuon para makabulig sa pagtuman sang promisa nga “ang tanan nga mga panimalay sang duta pakamaayohon”? (Abraham 2:11).
Mahimo mo pamensaron nga pila sa dutan-on nga mga bugay nga ginpromisa kay Abraham kag Sara, pareho sang pagpanubli sang duta nga ginpromisa kag mangin mga ginikanan sang dako nga pamilya, may pag-alalanggid sa wala katubtuban. Nagalakip ini sang palanublion sa selestiyal nga ginharian (tan-awa sa Doktrina kag mga Kasugtanan 132:29) kag wala katapusan nga pag-asawahay nga may wala katapusan nga kaliwatan (tan-awa sa Doktrina kag mga Kasugtanan 131:1–4; 132:20–24, 28–32). Sa “sulod sang templo,” gintudlo ni Pangulong Russell M. Nelson, nga “aton mabaton ang aton pinakamataas nga mga bugay, bilang mga kaliwat ni Abraham, Isaac, kag Jacob” (“The Gathering of Scattered Israel,” Liahona, Nob. 2006, 80).
Tan-awa man sa “Mga Dapat Tandaan: Ang Kasugtanan,” sa sining manwal.
Mga Ideya para sa Pang-pamilya nga Pagtuon sang Balaan nga mga Kasulatan kag Home Evening
-
Genesis 13:5–12.Ano ang ginhimo ni Abraham para magtuga sang kalinong sa iya pamilya? Ayhan pwede nga himuon sang mga miyembro sang imo pamilya ang mangin tagpaluntad sang kalinong pareho kay Abraham paagi sa pagdrama-drama kon paano resolbahon ang mga ginamo nga posible magtuhaw sa inyo pamilya.
-
Genesis 13:16; 15:2–6; 17:15–19.Paano mo buligan ang imo pamilya nga maintiendihan ang promisa sang Ginuo sa sining mga bersikulo—nga bisan wala pa sang kabataan si Abraham kag Sara, ang ila kaliwatan mangin daw pareho kadamo sa yab-ok sang duta, mga bituon sa langit, ukon balas sa baybayon? (tan-awa man sa Genesis 22:17). Basi pwede ka magpakita sa mga miyembro sang pamilya sang suludlan nga may balas, magtan-aw sa mga bituon, ukon maggamit sang litrato nga kaupod sining outline. Paano naton saligan ang mga promisa sang Ginuo bisan pa nga daw imposible ang mga ini?
-
Genesis 14:18–20. Paano naton “[mapahamtang ang] pagkamatarong” pareho sa ginhimo ni Melquisedec? (bersikulo 36). Ano pa ang nagainspirar sa aton parte sa pag-alagad ni Melquisedec?
Melchizedek Blesses Abram [Si Melquisedec nga Ginabendisyunan si Abram], ni Walter Rane
-
Genesis 16.Ang pagbasa parte kay Hagar mahimo nga mangin oportunidad agud hambalan kon paano kita ginabuligan sang Ginuo kon pamatyag naton gin-agrabyo kita. Basi pwede mo man sambiton nga ang “Ismael” nagakahulugan nga “ang Dios nagapamati.” Sang san-o naton nabatyagan nga ginpamatian kita kag ginbuligan sang Ginuo sang nabatyagan naton nga gin-agrabyo kita? (tan-awa sa Genesis 16:11).
Para sa dugang nga mga ideya sa pagtudlo sang kabataan, tan-awa sa outline sining semana sa Dali, Magsunod sa Akon—Para sa Primary.
Pagpauswag sang Aton Pagpanudlo
Mangin yara kag madali palapitan. Pila sa pinakanami nga tion sang pagtudlo nagasugod sa pamangkot ukon palaligban sa tagipusuon sang isa ka miyembro sang pamilya. Ipahibalo sa mga miyembro sang pamilya paagi sa imo mga pulong kag mga aksyon nga handa ka nga mamati sa ila. (Tan-awa sa Teaching in the Savior’s Way, 16.)
Ginpromisa sang Dios nga ang kaliwatan ni Abraham kag Sara magadamo “subong sang kabituonan sang langit” (Genesis 22:17). Pondering God’s Promise [Nagabinagbinag sang Promisa sang Dios], ni Courtney Matz.