Te miti ’ute’ute

4–10 nō ’Ēperēra

Exodo 14-17

« E pārahi noa, e hi’o i te ora a Iehova »

’Ua fa’aue te Atua ia Mose ’ia pāpa’i i tōna mau ’itera’a « i roto i te hō’ē buka ’ei mana’ora’a, ’e e tai’o atu » ia Iosua (Exodo 17:14). ’Oia ato’a te pāpa’ira’a i tō ’outou mau ’itera’a pae vārua, e tauturu te reira ia ’outou ’e i tei herehia e ’outou ’ia ha’amana’o i te maita’i o te Fatu.

Pāpa’i i tō ’outou mau mana’o

’Ua topa te ’āti ’Īsera’ela i roto i te herepata. Tei te tahi pae te miti ’ute’ute, ’e tē haere mai ra te nu’u a Phara’o i te tahi pae. E au ra ē, e taime poto roa tō rātou matarara’a mai mai Aiphiti mai. Terā rā, e parau poro’i tā te Atua nō te ’āti ’Īsera’ela ’o tāna i hina’aro ’ia ha’amana’o rātou i te roara’a o te mau u’i : « ’Eiaha ’outou e matā’u… Nā Iehova ho’i e aro i tā ’outou tama’i » (Exodo 14:13–14).

Mai taua taime ra, ’ia hina’aro ana’e te nūna’a o te Atua i te fa’aro’o ’e te itoito, e fāriu pinepine rātou i ni’a i teie ’ā’amu o te fa’aorara’a temeio o ’Īsera’ela. I tō Nephi hina’arora’a e fa’auru i tōna mau taea’e, ’ua parau ’oia, « e ’ia itoito tātou mai ia Mose ra ; nāna ho’i i parau atu i te moana o te Miti ’Ute’ute ra, ’e ’ua ta’a ’ē atura te miti i terā pae i terā pae ; ’e ’ua haere mai ra tō tātou mau metua mai te tītīra’a mai nā ni’a i te repo marō ra » (1 Nephi 4:2). I tō te Ari’i Limehi hina’arora’a i tōna mau ta’ata ’ia « fa’ateitei… i tō [rātou] upo’o ma te ’oa’oa », ’ua fa’aha’amana’o ato’a atu ’oia ia rātou i teie ’ā’amu (Mosia 7:19). I tō Alama hina’arora’a e fa’a’ite pāpū i tāna tamaiti i te mana o te Atua, ’ua fa’a’ite ato’a ’oia i teie ’ā’amu (hi’o Alama 36:28). ’E ’ia hina’aro tātou i te fa’aorara’a—’ia hina’aro ana’e tātou ma’a vāhi iti atu ā te fa’aro’o, ’ia hina’aro ana’e tātou « e pārahi noa, e hi’o i te ora a Iehova »—e nehenehe tātou e ha’amana’o e mea nāhea tō te Fatu fa’aorara’a ia « ’Īsera’ela… i taua mahana ra i te rima o tō Aiphiti ra » (Exodo 14:13, 30).

Mau mana’o nō te tuatāpapara’a pāpa’ira’a mo’a a te ta’ata hō’ē

Exodo 14

E mana tō te Atua nō te fa’aora iā’u.

’A tai’o ai ’oe i te Exodo 14:1–10, ’a feruri na e aha tā te ’āti ’Īsera’ela i fāri’i ’a ’ite atu ai rātou i te nu’u o Phara’o i te fātatara’a mai. Penei a’e e hina’aro paha ’oe i te hō’ē temeio nō te fa’aora ia ’oe mai roto mai i te hō’ē tāmatara’a fifi tā ’oe e fa’aruru nei. E aha tā ’oe e ha’api’i mai i roto i te Exodo 14:13–31 ’o tē nehenehe e tauturu ia ’oe ’ia ’imi i te fa’aorara’a a te Atua i roto i tō ’oe orara’a ? E aha tā ’oe e ha’api’i mai nō ni’a i te mau rāve’a a te Atua nō tē hōro’a mai i te fa’aorara’a nā roto mai i te ’ati ? ’A feruri e mea nāhea ’oe i te ’itera’a i tōna mana fa’aora i roto i tō ’oe orara’a.

Hi’o ato’a Te Parau Ha’api’ira’a ’e te mau Parau Fafau 8:2–3 ; L. Tom Perry, « Te mana nō te fa’aorara’a », Liahona, Mē 2012, 94–97 ; Te mau hōho’a fenua o te Bibilia, no. 2, « Te fa’aru’era’a ’Īsera’ela ia Aiphiti ’e te tomora’a i roto ia Cana’ana ».

Exodo 15:22–27

E nehenehe te Fatu e fa’ariro i te mau mea maramara ’ei mau mea monamona.

’A tai’o ai ’oe i roto i te Exodo 15:22–27 nō ni’a i te mau rāterera’a o ’Īsera’ela nō te haere i te fenua i parauhia ra, ’a feruri i te mau mea i roto i tō ’oe orara’a tei huru « maramara » mai te pape nō Mara. ’A feruri i te mau uira’a i muri nei ’a feruri ai ’oe i teie mau ’īrava : Nāhea e ti’a ai i te Fatu ’ia fa’ariro i te mau mea maramara i roto i tō ’oe orara’a ’ei mau mea monamona ? E aha te faufa’a o teie mau ’itera’a i roto i tō ’oe orara’a ? E aha tā te mau ’īrava 26 ’e te 27 e parau nei nō ni’a i te huru e ha’amaita’i ai te Fatu ia tātou ’ia fa’aro’o ana’e tātou i tōna reo ?

Exodo 15:23–27 ; 16:1–15 ; 17:1–7

E nehenehe au e ti’aturi i te Fatu, noa atu i roto i te mau taime fifi.

E nehenehe tātou e tūra’ihia ’ia fa’ahapa i te ’āti ’Īsera’ela nō te mea ’ua amuamu ’aore rā ’ua māniania rātou i te fifira’a tō rātou orara’a, noa atu te mau mea ato’a tā te Atua i rave nō rātou. Terā rā, ’a tai’o ai ’oe i te Exodo 15:23–27 ; 16:1–15 ; 17:1–7, ’a feruri na ē, ’aita ānei ’oe i rave ato’a i te reira huru ’ohipa. E aha tā ’oe e ha’api’i mai nā roto mai i te mau ’itera’a o te ’āti ’Īsera’ela ’o tē nehenehe e tauturu ia ’oe ’ia fa’aiti te amuamu ’e ’ia ti’aturi hope hau atu i te Atua ? ’Ei hi’ora’a, e aha te ta’a’-ē-ra’a tā ’oe e ’ite nei nō ni’a i te huru pāhonora’a a te ’āti ’Īsera’ela i te mau fifi ’e te huru pāhonora’a a Mose ? E aha tā teie mau ’īrava e haʼapiʼi nei ia ’oe nō niʼa i te Atua ?

Hi’o ato’a i te 1 Nephi 2:11–12 ; « Sin of Murmuring [Te hara o te amuamura’a] » (video), ChurchofJesusChrist.org.

Nā te māna nō ’ō mai i te Atua ra i fa’a’amu i te ’āti ’Īsera’ela i te pae tino ; e hina’aro ato’a tātou i te mā’a vārua i te mau mahana ato’a. Fresco nā Leopold Bruckner

Exodo 16

E ’imi au i te mā’a vārua i te mau mahana ato’a.

E rave rahi ha’api’ira’a pae vārua tā tātou e nehenehe e ha’api’i mai nā roto mai i te temeio nō te māna, ’o tē ’itehia i roto i te Exodo 16. Hi’o i te mau arata’ira’a pāpū i hōro’ahia i te ’āti ’Īsera’ela nō ni’a e nāhea te ha’aputura’a, te fa’a’ohipara’a ’e fa’ahereherera’a i te māna (hi’o Exodo 16:16, 19, 22–26). E aha tā ’oe i ’ite mai i roto i teie mau arata’ira’a e tano i ni’a ia ’oe ’a ’imi ai ’oe i te mā’a vārua i te mau mahana ato’a ?

Hi’o ato’a Ioane 6:31–35, 48–58 ’e te mau video « Daily Bread: Pattern [Faraoa nō te mau mahana ato’a : hōho’a] », « Daily Bread: Experience [Faraoa nō te mau mahana ato’a : ’Itera’a] », ’e « Daily Bread: Change [Faraoa nō te mau mahana ato’a : Tauira’a] » (ChurchofJesusChrist.org).

Exodo 17:1–7

’O Iesu Mesia tō’u papa vārua ’e te pape ora.

’A feruri na i te Fa’aora ’a tai’o ai ’oe i te Exodo 17:1–7. Nāhea Iesu e riro ai mai te hō’ē papa nō ’oe ? (hi’o Salamo 62:6–7 ; Helamana 5:12). Nāhea ’oia e riro ai mai te pape ? (hi’o Ioane 4:10–14 ; 1 Korinetia 10:1–4 ; 1 Nephi 11:25).

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Exodo 14:13–22.Penei a’e e au te mau melo o tō ’outou ’utuāfare ’ia tāmata i te « vāhi » i te pape i roto i te hō’ē ’āu’a, ’aore rā i roto i te hō’ē fa’ari’i hopura’a pape, mai ia Mose i vāhi i te miti ’ute’ute. ’A tauturu ia rātou ’ia ’ite ē, e’ita e nehenehe e vāhi i te miti ’ute’ute ma te ’ore te mana o te Atua. Nāhea tātou i te ’itera’a i te mana o te Atua i roto i tō tātou orara’a ’e i te orara’a o tō tātou mau tupuna ?

Exodo 15:1–21.I muri a’e i tō rātou rāterera’a nā roto i te miti ’ute’ute ma te rāve’a temeio, ’ua hīmene te ’āti ’Īsera’ela i te hō’ē hīmene ’āruera’a tei parauhia te hīmene a Mose, ’o tē ’itehia i roto i te Exodo 15:1–21. ’Ei ’utuāfare, ’a ’imi i roto i teie mau ’īrava i te mau fa’ahitira’a parau ’o tē fa’a’ite pāpū ra i te mea tā te Atua i rave nō te ’āti ’Īsera’ela, ’e te tahi atu mau pereota faufa’a roa. I muri iho e nehenehe ’outou e hīmene i te hō’ē hīmene ’o tē fa’aha’amana’o i tō ’outou ’utuāfare i te mau mea tā te Atua i rave nō ’outou.

Exodo 16:1–5 ; 17:1–7.E nehenehe te tai’ora’a i te Exodo 16:1–5 ’e te 17:1–7 e fa’atupu i te hō’ē ’āparaura’a nō ni’a i te Fa’aora ’ei pane nō te ora, ’ei pape nō te ora, ’e ’ei papa nō tātou. Nāhea teie mau ’ā’amu i te fa’aha’amana’o ia tātou i te mau mea tā Iesu Mesia i rave nō tātou ? ’Ei tuha’a nō tā ’outou ’āparaura’a, e nehenehe ’outou e tai’o i te Ioane 4:10–14 ; 6:29–35, 48–51 ; Helamana 5:12 ; Te Parau Ha’api’ira’a ’e te mau Parau Fafau 20:77, 79.

Exodo 17:8–16.E nehenehe ’outou e ha’uti i te ’ā’amu o Aarona ’e o Hura i te amora’a i te rima o Mose ’e ’ia ’āparau ē, e nāhea te reira e riro ai ’ei fa’ahōho’ara’a nō tō tātou pāturura’a i te feiā tā te Atua i pi’i nō te arata’i ia tātou. E nehenehe ato’a ’outou e pāto’i i te hi’ora’a o Aarona ’e o Hura i te amuamura’a ’e te ’āti ’Īsera’ela ia Mose (tei fa’a’itehia i roto i te mau pene 15–17). E aha te tahi mau rāve’a e nehenehe ai tātou e tauturu ’e e pāturu i tō tātou feiā fa’atere ? E aha te mau ha’amaita’ira’a tā tātou ’e tā tō tātou feiā fa’atere e fāri’i ’ia nā reira ana’e tātou ?

Nō te mau mana’o hau atu nō te ha’api’ira’a i te mau tamari’i, hi’o te arata’i nō teie hepetoma i roto Mai, pe’e mai—nō te Paraimere

Hīmene tei mana’ohia : « E te fa’aora o ’Īsera’ela », Te mau Hīmene, n 6.

Ha’amaita’ira’a i te tuatāpapara’a pāpa’ira’a mo’a a te ta’ata iho

’Imi i te mea tā ’oe iho e nehenehe e ’apo mai i te pae vārua. I roto i tā ’oe tuatāpapara’a ta’ata hō’ē ’e te ’utuāfare, ’eiaha e tā’ōti’a noa ia ’oe i ni’a i te mau ’īrava i ha’apāpūhia i roto i teie arata’i ha’api’ira’a. E mea pāpū ē, tē vai ato’a ra tā te Fatu poro’i nō ’oe i roto i teie mau pene tei ’ore i paraparauhia i’ō nei. ’A tītau i te fa’aurura’a nā roto i te pure.

Fa’ahōho’ara’a nō Mose i te vāhira’a i te miti ’ute’ute, nā Robert T. Barrett.