Fa’ahōho’ara’a nō Mose ’e o Aarona i roto i te aora’i o Phara’o, nā Robert T. Barrett

28 nō Māti–3 nō ’Ēperēra

Exodo 7–13

« Ha’amana’o ’outou i teie mahana i tae mai ai ’outou mai te fenua mai ra mai Aiphiti »

’A tai’o ai ’outou ’e ’a feruri ai i ni’a i te Exodo 7–13, ’a papa’i i te mau mana’o e tae mai ia ’outou. ’A rave tāmau ai ’outou i te reira, e tupu mai i te rahi tō ’outou ’aravihi ’ia ’ite i te muhumuhu a te Vārua Maita’i.

Pāpa’i i tō ’outou mau mana’o

’Ua ha’afifi te ’ati i muri iho i te ’ati ia Aiphiti, terā rā, ’ua tāmau noa ’o Phara’o i te pāto’i ’ia tu’u i te ’āti ’Īsera’ela. ’E noa atu rā i te reira, ’ua tāmau noa te Atua i te fa’a’ite i tōna mana ’e i te hōro’a ia Phara’o i te mau rāve’a nō te fāri’i « ē, ’o vau ’o Iehova » ’e « ’aore ō’u e fāito i te ao ato’a nei » (Exodo 7:5 ; 9:14). I te reira taime, ’ua hi’o paha o Mose ’e te ’āti ’Īsera’ela ma te matā’u i te reira mau fa’a’itera’a o te mana o te Atua ’ei maita’i nō rātou. E mea pāpū maita’i ē, ’ua ha’apāpū teie mau tāpa’o tāmau i tō rātou fa’aro’o i te Atua ’e ’ua ha’apūai i tō rātou hina’aro ’ia pe’e i te peropheta a te Atua. ’E i muri a’e e iva ’ati pohe ri’ari’a i tupu ’aita i manuia te fa’aorara’a i te ’āti ’Īsera’ela, tei te ’ahuru noa o te ’ati pohe—te pohe o te matahiapo, tae noa atu i te matahiapo a Phara’o—nā te reira i fa’ahope i te fa’atītīra’a. Mai te mea ra ē, ’ua tano maita’i te reira nō te huru tāta’itahi o te fa’atītīra’a pae vārua, hō’ē ana’e rāve’a e ora ai i te reira. Noa atu te mau huru tāmatara’a tā tātou i rave i mūta’a ra, hō’ē ā huru i ni’a ia tātou mai tei tupu i ni’a i te mau tamari’i o ’Īsera’ela. ’O te tusia ana’e a Iesu Mesia, te fānau tahi—te toto ’ino ’ore o te arenio—’o tē fa’aora ia tātou.

Mau mana’o nō te tuatāpapara’a pāpa’ira’a mo’a a te ta’ata hō’ē

Exodo 7–11

E nehenehe au e mā’iti e tāmarū i tō’u ’ā’au.

Maita’i pa’i ē, e ’ere tō ’oe hina’aro i te mea pāto’i ’ū’ana i te hina’aro o te Atua mai tō Phara’o. Noa atu ē, tē vai rā tō tātou pā’āto’a te mau taime e ’ere tō tātou ’ā’au i te mea marū mai te au i tei tītauhia, tē vai nei ra te tahi mau mea nō roto mai i te mau ’ohipa a Phara’o e ti’a ’ia ’apo mai, tei pāpa’ihia i roto i te Exodo 7–10. ’A tai’o ai ’oe nō ni’a i te mau ’ati i roto i teie mau pene, e aha tō ’oe mana’o i te mau pāhonora’a a Phara’o ? Tē ’ite ato’a ānei ’oe i te reira mau hina’aro ’ā’au ’eta’eta i roto ia ’oe iho ? ’A feruri i te mea tā ’oe e ha’api’i mai nā roto mai i teie mau pene nō ni’a i te aura’a ’ia vai te ’ā’au marū.

’Ia ’ite mai ē, tē ha’apāpū nei te ’īritira’a a Iosepha Semita i te Exodo 7:3, 13 ; 9:12 ; 10:1, 20, 27 ; 11:10, ē, ’aita te Fatu i fa’a’eta’eta i te ’ā’au o Phara’o—’ua fa’a’eta’eta o Phara’o i tōna iho ’ā’au (hi’o te mau fa’ata’ara’a i raro i te ’api nō te ’īrava tāta’itahi).

E aha tā ’oe i ha’api’i mai nā roto mai i te mau pāpa’ira’a mo’a i muri nei nō ni’a i te fa’atupura’a i te ’ā’au marū ? 1 Nephi 2:16 ; Mosia 3:19 ; Alama 24:7–8 ; 62:41 ; Etera 12:27,.

Hi’o ato’a Michael T. Ringwood, « Te ’ōhie ’e te hina’aro ’ia ti’aturi », Liahona, Novema 2009, 100–102.

Exodo 12:1–42

E tāpa’o te Pāsa nō te tāra’ehara a Iesu Mesia.

Te rāve’a hō’ē roa nō te ’āti ’Īsera’ela ’ia pāruruhia i te ’ahuru o te ’ati pohe, tei fa’a’itehia i roto i te Exodo 11:4–5, o te pe’e-pāpū-ra’a ïa i te mau arata’ira’a tā te Fatu i hōro’a ia Mose i roto i te Exodo 12, hō’ē peu tei parauhia te Pāsa. Tē ha’api’i nei te Pāsa ia tātou nā roto i te mau tāpa’o ē, mai te Fatu i fa’aora i te ’āti ’Īsera’ela i te tītīra’a i Aiphiti, e nehenehe ato’a ’oia e fa’aora ia tātou i te tītīra’a o te hara. E aha tā ’oe e ’ite nei i roto i te mau arata’ira’a ’e te mau tāpa’o o te Pāsa ’o tē fa’aha’amana’o ia ’oe ia Iesu Mesia ’e tāna tāra’ehara ? E aha tā teie mau tāpa’o ’e te mau arata’ira’a e parau nei ia ’oe nō ni’a e nāhea ’ia fāri’i i te mau ha’amaita’ira’a o tāna tāra’ehara ? ’Ei hi’ora’a, e aha te fa’ahōho’ara’a nō te toto o te ’ārenio i ni’a i te mau pou ’ūputa ? (’īrava 7). E aha te aura’a nō ’oe « ma te tama’a i ni’a i tō ’outou ’āvae, ’e tā ’outou turuto’oto’o i roto i tō ’outou rima » ? (’īrava 11).

Hi’o ato’a Te Parau Ha’api’ira’a ’e te mau Parau Fafau 89:21.

E tauturu te ’ōro’a mo’a ia tātou ’ia ha’amana’o i tō tātou ta’ata Fa’aora, ’o Iesu Mesia.

Exodo 12:14–17, 24–27 ; 13:1–16

E tauturu te ’ōro’a mo’a iā’u ’ia ha’amana’o i tō’u fa’aorara’a nā roto ia Iesu Mesia.

’Ua hina’aro te Fa’aora ’ia ha’amana’o noa te ’āti ’Īsera’ela ē, ’ua fa’aora ’oia ia rātou, noa atu ē, ’aita rātou e ha’amana’o fa’ahou ra i tō rātou tītīra’a. Teie te tumu i fa’aue ai ’oia ia rātou ’ia ha’apa’o i te ’ōro’a Pāsa i te matahiti tāta’itahi. ’Ia tai’o ’oe i tāna mau arata’ira’a i roto i te Exodo 12:14–17, 24–27 ; 13:1–16, ’a feruri i te mea tā ’oe e rave nei nō te ha’amana’o i te mau ha’amaita’ira’a a te Atua ia ’oe. Nāhea e nehenehe ai ia ’oe ’ia fa’aherehere i te reira ha’amana’ora’a « e hope roa a’e tō ’outou mau u’i ato’a ra » ? (hi’o Exodo 12:14, 26–27).

E aha te tū’atira’a tā ’oe e ’ite nei i rotopū i te ’ōpuara’a o te ’ōro’a nō te Pāsa ’e te ’ōro’a mo’a ? Nāhea te tai’ora’a nō ni’a i te Pāsa i te fa’aha’amana’o ia ’oe i te ’ōro’a mo’a ’e i tē hōro’a mai i te aura’a hau atu nō tāua ’ōro’a ra ? ’A feruri i te mea tā ’oe e nehenehe e rave nō te « ha’amana’o noa » ia Iesu Mesia (Moroni 4:3 ; 5:2 ; hi’o ato’a Luka 22:7–8, 19–20).

E nehenehe ato’a ’oe e feruri i te tahi atu mau mea tā te Fatu e hina’aro ’ia ha’amana’o ’oe ; hi’o, ’ei hi’ora’a Helamana 5:6–12 ; Moroni 10:3 ; Te Parau Ha’api’ira’a ’e te mau Parau Fafau 3:3–5, 10 ; 18:10 ; 52:40.

Hi’o ato’a Ioane 6:54 ; « Always Remember Him [Ha’amana’o noa iāna] » (video), ChurchofJesusChrist.org ; « Te ’ōro’a mo’a nō te tāmā’ara’a a te Fatu », i roto i Te mau Ha’api’ira’a a te mau Peresideni o te ’Ēkālesia : Howard W. Hunter (2015), 197–206.

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Exodo 7–12.Penei a’e i muri a’e i te tai’ora’a i te mau ’ati pohe tā te Fatu i tu’u mai i ni’a i te mau ta’ata nō Aiphiti ’ei mau tāpa’o nō tōna mana, e nehenehe tō ’outou ’utuāfare e fa’a’ite mai i te mau rāve’a a te Fatu nō te fa’a’ite i tōna mana i teie mahana.

Exodo 8:28,32 ; 9:27–28, 34–35.E nehenehe e fa’a’ohipa i teie mau ’īrava nō te ha’amata i te hō’ē ’āparaura’a nō ni’a i te faufa’a rahi nō te ha’apa’ora’a i tā tātou parau. Penei a’e e nehenehe te mau melo o te ’utuāfare e fa’a’ite i te mau ’itera’a ’a ’ite ai rātou ia vetahi ’ē i te ravera’a i te mea tā rātou i fāri’i e rave.

Exodo 12:1–42.I muri a’e i te tai’o-’āmui-ra’a i te Exodo 12:1–42, e nehenehe ’outou e pāpa’i i ni’a i te mau tuha’a ’api parau i te mau mea tā ’outou e nehenehe e rave ’ei ’utuāfare nō te ha’amana’o i te tāra’ehara a Iesu Mesia. Nō te mea ’ua riro te toto o te ’ārenio i ni’a i te mau pou ’ūputa (hi’o ’īrava 23) ’ei fa’ahōho’ara’a i te Fa’aora, e nehenehe ’outou e tu’u i teie mau tuha’a ’api parau ’ati a’e te ’ūputa fare i roto i tō ’outou fare. E nehenehe ato’a ’outou e ’amu i te tahi o te mau mā’a o te Pāsa, mai te faraoa hopue ’ore (faraoa pa’apa’a ’aore rā te tortillas) ’aore rā te mau ’aihere maramara (te persil ’aore rā te radis), ’e e ’āparau nāhea te Pāsa i te tauturu ia tātou ’ia ha’amana’o e mea nāhea tō te Atua fa’aorara’a i tōna mau ta’ata. ’Ei hi’ora’a, ’ua fa’aha’amana’o te faraoa hopue ’ore ia rātou ē, ’aita i taimehia nō tā rātou faraoa ’ia mara’a hou ’a horo ’ē ai rātou i te tītīra’a. ’Ua fa’aha’amana’o te mau ’aihere maramara ia rātou i te māramara o te tītīra’a.

Exodo 12:14, 24–27.Penei a’e e nehenehe ’outou e hi’o fa’ahou i teie mau ’īrava ’ei ’utuāfare hou tā ’outou purera’a ’ōro’a i muri nei. Nāhea teie mau ’īrava i te tū’ati i ni’a i te ’ōro’a mo’a ? Nāhea e nehenehe ai ia tātou ’ia fa’ariro hope hau atu i te ’ōro’a mo’a ’ei « ha’amana’ora’a » nō te mau mea tā te Fa’aora i rave nō tātou ?

Nō te mau mana’o hau atu nō te ha’api’ira’a i te mau tamari’i, hi’o te arata’i nō teie hepetoma i roto Mai, pe’e mai—nō te Paraimere

Hīmene tei mana’ohia : « ’Ei mana’ora’a teie », Te mau Hīmene, n 106.

Ha’amaita’i i tā tātou ha’api’ira’a

Fa’a’ohipa i te mau ha’api’ira’a tao’a ’A ani i te mau melo o te ’utuāfare ’ia ’imi i te mau tao’a ’o tē tauturu ia rātou ’ia hāro’aro’a i te mau parau tumu i roto i te mau pāpa’ira’a mo’a tā ’outou e tai’o ra. ’Ei hi’ora’a, e nehenehe te mau tao’a marū ’e te pa’ari e tauturu i te mau melo o te ’utuāfare ’ia ’āparau i te ta’a’-ē-ra’a i rotopū i te ’ā’au marū ’e te hō’ē ’ā’au ’eta’eta.

Fa’ahōho’ara’a nō te hō’ē tāmā’ara’a Pāsa, nā Brian Call