Fa’ahōho’ara’a nō Mose ’e ’o Aarona i roto i te aora’i o Phara’o, nā Robert T. Barrett

28 nō Māti–3 nō ’Ēperēra

Exodo 7–13

« Ha’amana’o i teie mahana i tae mai ai ’outou mai te fenua mai ra mai Aiphiti »

’A tai’o ai ’oe i te Exodo 7–13, a feruri e nāhea te mau parau mau i roto i teie mau pene i te ha’apūai i tō ’oe fa’aro’o ia Iesu Mesia. Nāhea e ti’a ai ia ’oe ’ia tauturu i te mau tamari’i tā ’oe e ha’api’i ra ’ia fāri’i i te hō’ē ā ’itera’a ?

Pāpa’i i te mau mana’o e tae mai

Tītau i te mana’o

E tu’u e rave rahi mau hōho’a e fa’ahōho’a ra i te mau mea i roto i te Exodo 7–13 (mai te hō’ē rana, te mau ra’o ’e hō’ē arenio) i raro a’e i te hō’ē ’ahu i ni’a i te hō’ē ’amura’a mā’a. E ani e rave rahi tamari’i ’ia rave mai i te hō’ē hōho’a i raro a’e i te ’ahu, ’e e ani i te piha ha’api’ira’a ’ia fa’a’ite mai e aha tā rātou i ’apo mai nō ni’a i teie hōho’a i te fare i teie hepetoma.

Ha’api’i i te ha’api’ira’a tumu : Te mau tamari’i ’āpī a’e

Exodo 7–11

E mana tō te Fatu i ni’a i te mau mea ato’a.

Tei roto te ’āti ’Īsera’ela i te fa’atītīra’a ’e ’aita tā rātou e rāve’a nō te fa’aora ia rātou iho, ’ua fa’a’ite mai rā te Fatu i tōna mana ’e ’ua fa’aora ia rātou. Nāhea ’oe e nehenehe ai e fa’a’ohipa i teie ’ā’amu nō te tauturu i te mau tamari’i ’ia ti’aturi i te Fatu ’e i tōna mana ?

Mau ’ohipara’a e nehenehe e rave

• ’A tai’o i te mau ’īrava tei mā’itihia nō roto mai i te Exodo 7–11 nō te ha’api’i i te mau tamari’i nō ni’a i nā ’ati hō’ē ’ahuru tā te Fatu i tu’u mai i ni’a i te mau ta’ata nō Aiphiti (hi’o ato’a « Mose te peropheta », i roto Te mau ’ā’amu o te Faufa’a Tahito). E ani i te mau tamari’i ’ia pāpa’i hōho’a e fa’ahōho’a ra i te tahi o te mau ’ati. E ani i te mau tamari’i ’ia ’āfa’i i tā rātou hōho’a i ni’a ’a hi’o fa’ahou ai ’oe i te mau ’ati. Tai’o i te mau pereota i roto i te Exodo 7:5 ’e 9:14 nō te fa’ata’a ē, nō te aha te Fatu i tu’u mai ai i te ’ati i Aiphiti.

• E fa’a’ite i te mau tamari’i e mea nāhea tō te Fatu fa’a’itera’a ia ’oe ē, « ’aore [’oia] e fāito i te ao ato’a nei » (Exodo 9:14). E vaiiho i te mau tamari’i ’ia fa’a’ite mai e mea nāhea tō rātou ’itera’a ē, e mana rahi tō te Fatu.

Exodo 12:1–13 ; 13:10

E nehenehe te ’ōro’a mo’a e tauturu iā’u ’ia ha’amana’o ia Iesu.

’Ua ha’api’i te Pāsa i te ’āti ’Īsera’ela nō ni’a i te Fa’aora ’e te tusia tāna e rave nō tātou i te hō’ē mahana. I teie mahana, e rave tātou i te ’ōro’a mo’a nō te ha’amana’o i te tusia a Iesu.

E tauturu te ’ōro’a mo’a ia tātou ’ia ha’amana’o ia Iesu Mesia.

Mau ’ohipara’a e nehenehe e rave

• Ma te fa’a’ohipa i te Exodo 12:1–13, e parau i te mau tamari’i e aha tā te Fatu i parau i te ’āti ’Īsera’ela ’ia rave, e ti’a ai ia rātou ’ia fa’aorahia i te ’ati hope’a (hi’o ato’a « Pāsa », i roto Te mau ’ā’amu o te Faufa’a Tahito). E fa’a’ite i te hōho’a o Iesu e amo ra i te hō’ē ’ārenio mo’e (Buka hōho’a o te ’evanelia, n° 64), ’e ’a fa’a’ite atu i te mau tū’atira’a i rotopū i te ’ārenio i fa’a’ohipahia nō te Pāsa ’e o Iesu Mesia, te ’ārenio a te Atua.

• E ani i te mau tamari’i ’ia fa’a’ite mai i te mau mea tā tātou e rave nō te ha’amana’o i te mau ’ohipa faufa’a i tupu, mai te mahana fānaura’a ’e te mau pu’e tau fa’afa’aeara’a. Tai’o i te Exodo 13:10, ’e e fa’ata’a atu ē, ’ua ani te Fatu i te mau tamari’i ’Īsera’ela ’ia fa’ahanahana i te Pāsa i te matahiti tāta’itahi nō te tauturu ia rātou ’ia ha’amana’o ē, ’ua fa’aora ’oia ia rātou mai roto mai i te mau ta’ata nō Aiphiti. E aha te tahi mau rāve’a e ti’a ai ia tātou ’ia ha’amana’o ē, ’ua fa’aora Iesu ia tātou i te hara ’e i te pohe ?

• Mai te mea e nehenehe, ’a haere i te ’amura’a mā’a o te ’ōro’a mo’a ’e te mau tamari’i, ’e e ’āparau e mea nāhea te ’ōro’a mo’a i te tauturu ia tātou ’ia ha’amana’o ia Iesu Mesia. E hīmene ’āmui « The Sacrament » (Children’s Songbook, 72) ’aore rā, i te tahi atu hīmene tura nō ni’a ia Iesu Mesia. Tauturu i te mau tamari’i ’ia ’ite mai i te mana’o hau e tupu mai, ’ia mana’o ana’e rātou i te Fa’aora, ’e e ani ia rātou ’ia ’imi i te reira mana’o i te taime ’a rave ai rātou i te ’ōro’a mo’a.

• Hōro’a i te mau tamari’i i te mau ’api parau ma te pāpa’ihia i teie mau parau i te pae i ni’a « e nehenehe au e ha’amana’o ia Iesu Mesia i te taime nō te ’ōro’a mo’a nā roto i… » E ani ia rātou ’ia pāpa’i i te mau hōho’a ’o tā rātou e nehenehe e hi’o i te taime nō te ’ōro’a mo’a nō te tauturu ia rātou ’ia ha’amana’o ia Iesu.

Ha’api’i i te ha’api’ira’a tumu : Te mau tamari’i pa’ari

Exodo 7–11

E mana tō te Fatu nō te fa’aora iā’u.

E fa’aruru te mau tamari’i i te mau tāmatara’a ’e e hina’aro rātou i te Fatu nō te tauturu ia rātou. E nehenehe te ’ā’amu nō nā ’ati pohe tā te Fatu i tu’u mai nō te fa’aora i te ’āti ’Īsera’ela, e tauturu i te mau tamari’i ’ia māramarama ē, e mana ato’a tōna nō te tauturu ia rātou.

Mau ’ohipara’a e nehenehe e rave

• E hōro’a i te mau tamari’i i te hō’ē ’api parau tei tātuha’ahia e ’ahuru tuha’a, ’e e ani i te mau tamari’i ’ia pāpa’i i te mau hōho’a o te mau ’ati pohe i fa’a’itehia i roto i teie mau ’īrava : Exodo 7:17–18 ; 8:1–4 ; 8:16–17 ; 8:20–22 ; 9:1–6 ; 9:8–9 ; 9:22–23 ; 10:4–5 ; 10:21–22 ; 11:4–7. E aha tā te mau ’ati e ha’api’i nei ia tātou nō ni’a i te mana o te Atua ? Nō te aha e mea faufa’a ’ia ’ite nō ni’a i tōna mana ?

• E ui i te mau tamari’i nō ni’a i te mau taime ’a ’ite ai rātou ē, e hina’aro rātou i te tauturu a te Fatu. Nāhea e nehenehe ai iāna e tauturu ia tātou i roto i teie mau huru tupura’a ? E fa’aitoito ia rātou ’ia paraparau nō ni’a i te mau taime ’a fāri’i ai rātou ’aore rā tō rātou ’utuāfare i te mana o te Fatu i roto i tō rātou orara’a. ’A fa’a’ite i tō ’oe ’itera’a pāpū ē, e mana tō te Fatu nō te tauturu ia tātou.

Exodo 8:28–32 ; 9:7

E nehenehe te Fatu e tauturu iā’u ’ia fāri’i i te hō’ē ’ā’au marū.

’Ua mā’iti o Phara’o ’ia fa’a’eta’eta i tōna ’ā’au i te taime ’a parau ai te Fatu iāna ’ia tu’u i te mau tamari’i nō ’Īsera’ela. Nāhea e ti’a ai ia ’oe ’ia fa’auru i te mau tamari’i tā ’oe e ha’api’i ra ’ia mā’iti i te fāri’i i te ’ā’au marū ’ia ti’a ia rātou ’ia ineine nō te tāvini i te Fatu ’e ’ia rave i tōna hina’aro ?

Mau ’ohipara’a e nehenehe e rave

• Hōpoi mai i roto i te piha ha’api’ira’a i te hō’ē tao’a pa’ari, mai te hō’ē ’ōfa’i, ’e te tahi tao’a marū, mai te hō’ē faretōau. E tai’o ’e te mau tamari’i i te tahi mau ’īrava e fa’a’ite ra e mea nāhea tō Phara’o pāhonora’a i te mau ’ati pohe tā te Fatu i tu’u mai (hi’o Exodo 8:28–32 ; 9:7), ’e e ani i te mau tamari’i tei hea te tao’a ’o tē fa’ahōho’a maita’i a’e i te ’ā’au ’aore rā i te peu a Phara’o. E aha te auraʼa ’ia roa’a te ʼāʼau marū ? (hi’o Mosia 3:17).

• E hāmani ’e te piha ha’api’ira’a i te hō’ē tāpura nō te tahi mau ’ohipa ’o te nehenehe e fa’a’ite ē, e ’ā’au pa’ari tō tātou (’ei hi’ora’a, te ’arora’a ’e te hō’ē taea’e, ’aore rā ’aita e hina’aro e pure). Nāhea tātou ’ia fa’a’ite i te Fatu ē, e hina’aro tātou ’ia roa’a te ’ā’au marū ?

Exodo 11:5–6 ; 12:1–13

E tāpa’o te Pāsa nō te mana tāra’ehara o Iesu Mesia.

’Ua ha’api’i te Pāsa i te mau tamari’i ’Īserā’ela ē, ’ua fa’aora te Fatu ia rātou mai Aiphiti mai. E tāpa’o ato’a te Pāsa nō te tusia tāra’ehara a Iesu Mesia, ’o tē fa’aora ia tātou i te hara ’e te pohe. I teie mahana, tē tauturu nei te ’ōro’a mo’a ia tātou ’ia ha’amana’o i te tusia a Iesu Mesia nō tātou. E nehenehe te ha’api’ira’a i te mau tamari’i nō ni’a i te Pāsa e tauturu ia rātou ’ia ora i te hō’ē ’itera’a faufa’a atu ā nō te ’ōro’a mo’a.

Mau ’ohipara’a e nehenehe e rave

• E ani i te tahi o te mau tamari’i ’ia tai’o i te Exodo 11:5–6 nō te ha’api’i mai nō ni’a i te ’ati hope’a tā te Fatu i tu’u i ni’a i tō Aiphiti. E ani i te tahi atu mau tamari’i ’ia tai’o i te Exodo 12:3, 5–7, 13 nō te ha’api’i mai nō ni’a e nāhea te mau tamari’i ’Īserā’ela i te fa’aorara’ahia i te reira ’ati.

• Nō te tauturu i te mau tamari’i ’ia hāro’aro’a ē, ’o te Fa’aora te ’ārenio tei fa’aora ia tātou, ’a fa’a’ite i te hō’ē hōho’a o te hō’ē ’ārenio. E ani i te mau tamari’i ’ia tai’o i te Exodo 12:3–7 nō te ’ite mai ē, e aha te huru o te ’ārenio tā te Atua i hina’aro ’ia fa’a’ohipa te ta’ata nō te tāmā’ara’a i te Pāsa. Nāhea teie ’ārenio e riro ai mai ia Iesu Mesia ? (’Ei hi’ora’a, e mea pōra’o ’ore Iesu, ’e ’ua ha’amani’i Iesu i tōna toto nō te fa’aora ia tātou.) E aha te tahi atu mau tāpa’o e tauturu ia tātou ’ia ha’amana’o ia Iesu Mesia ?

• E tai’o ’āmui i te mau pure nō te ’ōro’a (hi’o Te Parau Ha’api’ira’a ’e te mau Parau Fafau 20:77, 79), ’e e māta’ita’i i te video « Always Remember Him [Ha’amana’o noa iāna] » (ChurchofJesusChrist.org). Nāhea te ’ōro’a mo’a e tū’ati ai i te Pāsa ? E aha tā tātou e nehenehe e rave nō te ha’amana’o ia Iesu i roto i te ’ōro’a mo’a ?

• ’A fa’a’ite i te mau tamari’i i te hō’ē o tā ’oe mau hīmene au roa nō te ’ōro’a mo’a (hi’o Te mau hīmene, n° 98–114), ’e e paraparau e nāhea te reira i te tauturu ia ’oe ’ia ha’amana’o i te tusia a te Fa’aora. E ani i te mau tamari’i ’ia fa’a’ite mai i te hō’ē hīmene o tē fa’atupu ato’a i te reira huru i roto ia rātou.

Fa’aitoito i te ’apora’a mai i te fare

E ani i te mau tamari’i ’ia fa’a’ite i tō rātou ’utuāfare e aha tā rātou i ’apo mai nō ni’a ia Iesu Mesia i roto i te Paraimere i teie mahana.

Ha’amaita’i i tā tātou ha’api’ira’a

Tauturu i te mau tamari’i ’ia hi’o haere i te ’ā’amu. Mai te mea e hi’ohi’o te mau tamari’i i te mea tā rātou e ’apo ra, e mea pāpū a’e nō rātou ’ia ha’amana’o i te reira. ’A ’imi i te mau rāve’a nō te tauturu i te mau tamari’i ’ia hi’ohi’o i te mau ’ā’amu i roto i te mau pāpa’ira’a mo’a ma te fa’a’ohipa i te mau tauturu hi’o, mai te mau hōho’a, te mau hōho’a pāpa’i, te mau video, te mau pēpe hurio, ’aore rā te mau ha’utira’a teata ta’ata ora.