Mose ’e te pū ’aihere auahi, nā Harry Anderson

21–27 nō Māti

Exodo 1-6

« ’E ’ua mana’o ho’i au i taua faufa’a nā’u ra »

’A ha’amata i tā ’oe fa’aineinera’a nō te ha’api’i nā roto i te tai’ora’a i te Exodo 1–6. E nehenehe te arata’i nō teie hepetoma i roto i te Mai, pe’e mai—nō te ta’ata hō’ē ’e te ’utuāfare e tauturu ia ’oe ’ia hāro’aro’a i teie mau pene, ’e e nehenehe teie arata’i e hōro’a mai ia ’oe i te mau mana’o nō te ha’api’ira’a.

Pāpa’i i te mau mana’o e tae mai

Tītau i te mana’o

’A fa’a’ite e rave rahi mau tao’a e tū’ati i te mau ’ā’amu i roto i teie mau pene—’ei hi’ora’a, hō’ē pānie rahi ’aore rā hō’ē pēpe ha’avare. E ani i te mau tamari’i ’ia fa’a’ohipa i teie mau tao’a nō te fa’a’ite mai i tā rātou tuha’a au roa a’e nō te ’ā’amu o Mose.

Ha’api’i i te ha’api’ira’a tumu : Te mau tamari’i ’āpī a’e

Exodo 1–2

E nehenehe te Atua e ’ohipa nā roto iā’u nō te fa’atupu i tāna mau ’ōpuara’a.

E ’ohipa rahi tā Mose i rave i roto i te fa’aorara’a ia ’Īsera’ela i te fa’atītīra’a. Terā rā, ’aita e ti’a iāna ’ia fa’atupu i te reira ’āhiri ’aita tōna metua vahine, tōna tuahine, te tamāhine a Phara’o, ’e te tahi atu mau vahine ha’apa’o maita’i i pāruru ’e i aupuru iāna.

Mau ’ohipara’a e nehenehe e rave

• E fa’a’ohipa i te ’api ’ohipara’a nō teie hepetoma ’e « Miriama » (i roto Te mau ’ā’amu o te Faufa’a Tahito) nō te fa’a’ite i te mau tamari’i e mea nāhea tō Jochebed (te metua vahine o Mose), tō Miriama (tōna tuahine), ’e tō te tamāhine a Pahara’o aupurura’a ia Mose. E ha’apāpū ē, maoti teie ’e te tahi atu mau vahine ha’apa’o maita’i, ’ua pāruruhia Mose, ’e i te hō’ē mahana, e arata’i ’oia i te mau tamari’i nō ’Īserā’ela i te vāhi pāpū. E ani i te mau tamari’i ’ia pāpa’i i te hō’ē hōho’a nō te mau ta’ata tei aupuru ia rātou.

  

  Mose i roto i te ’ōpaero, © Providence Collection/licensed from goodsalt.com

• E hīmene ’āmui i te hō’ē hīmene nō ni’a i te tāvinira’a, mai te « ‘Donne’ dit le ruisseau » (Chants pour les enfants, 116). Tauturu i te mau tamari’i ’ia feruri i te mau ’ohipa ’ōhie ’o tā rātou e nehenehe e rave nō te tauturu ia vetahi ’ē i te fare, i te fare purera’a, ’e i te fare ha’api’ira’a.

Exodo 3

E tauturu Iesu iā’u ’ia rave i te mau ’ohipa maita’i.

’Ua uiui Mose iāna iho e nehenehe ānei tāna e fa’aora i te ’ati ’Īsera’ela ia Aiphiti. ’Ua fafau rā te Fatu ē, e tauturu ’oia ia Mose. Tauturu i te mau tamari’i ’ia roa’a te fa’aro’o ē, e tauturu ato’a te Fa’aora ia rātou.

Mau ’ohipara’a e nehenehe e rave

• E fa’ata’a i te mau tamari’i ē, e mea nāhea tō te Fatu hōro’ara’a ia Mose i te hō’ē ’ohipa faufa’a mau ’ia rave. E tai’o i te mau ’īrava tei mā’itihia nō roto mai i te Exodo 3, ’aore rā, e tai’o « Mose te peropheta » (i roto Te mau ’ā’amu o te Faufa’a Tahito). E fa’a’ite e aha te mana’o o Mose (hi’o Exodo 3:6, 11) ’e e aha tā te Fatu i parau iāna (hi’o mau ’īrava 12 ’e te 14). E ani i te mau tamari’i ’ia fa’ahiti nā muri ia ’oe i te pereota « Pāpū roa ē, ’ei pīha’i iho vau ia ’oe », ’e ’a fa’a’ite i te hō’ē taime ’a vai ai te Fatu i pīha’i iho ia ’oe i te taime e ’ohipa faufa’a roa tā ’oe e rave nāna.

• Tauturu i te mau tamari’i ’ia feruri i te mau huru tupura’a ’a anihia ai ia rātou ’ia rave i te hō’ē mea pa’ari ’ia hi’ohia atu. E fa’ata’a ē, mai ia Iesu i tauturu ia Mose, e tauturu ato’a Iesu ia rātou. E hīmene i te hō’ē hīmene nō ni’a e nāhea Iesu i te tauturu ia tātou, mai te « Je marche avec Jesus » (ChurchofJesusChrist.org). E fa’a’ite pāpū ē, e tauturu te Fa’aora ia tātou i te mau taime e ha’ape’ape’a tātou ’aore rā e mata’u tātou.

• E tāpūpū i te mau māfatu papie ’e e pāpa’i i ni’a iho i te reira i te mau rāve’a e tauturu ai te Fatu i te mau tamari’i. E tu’u i te mau māfatu i ni’a i te tahua ma te huri i te pāpa’ira’a i raro. E ani i te mau tamari’i, te tahi i muri mai i te tahi, ’ia mā’iti i te hō’ē māfatu, ’e e tauturu ia rātou ’ia tai’o i te mea i pāpa’ihia i ni’a iho.

Exodo 3:1–5

E nehenehe au e fa’a’ite i te fa’atura i te mau vāhi mo’a.

E fa’a’ohipa i te ’ā’amu o Mose ’e te pū ’aihere auahi nō te tauturu i te mau tamari’i ’ia hāro’aro’a nō te aha tātou e fa’a’ite ai i te fa’atura i te mau mea mo’a.

Mau ’ohipara’a e nehenehe e rave

• Tai’o i te Exodo 3:1–5, ’e ’a fa’ata’a ē, ’ua fa’a’ite Mose i te fa’atura nā roto i te ’īritira’a i tōna tīa’a. E aha tā tātou e rave nō te fa’a’ite i te fa’atura i te fare purera’a ? E hīmene i te hō’ē hīmene nō ni’a i te fa’atura, mai te « Le recueillement, c’est l’amour » (Chants pour les enfants, 12). E tauturu i te mau tamari’i ’ia ’imi mai i te mau ta’o i roto i te hīmene e ha’api’i nei ia tātou e nāhea ’ia fa’a’ite i te fa’atura. Nō te aha te Fatu e hina’aro ai ’ia fa’a’ite tātou i te fa’atura ?

• E fa’a’ite i te tahi mau hōho’a o te mau huru tupura’a i reira e tītauhia ai ia tātou ’ia fa’atura ’e te tahi mau huru tupura’a ’aita e tītauhia ia tātou ’ia fa’atura, mai te hō’ē purera’a ’ōro’a, hō’ē pure, hō’ē ’āua ha’utira’a, ’e hō’ē fa’a’oa’oara’a nō te mahana fānaura’a. E ani i te mau tamari’i ’ia fa’ata’a i te mau hōho’a i reira e tītauhia ai ia tātou ’ia fa’a’ite i te fa’atura.

• E ani i te mau tamari’i ’ia pāpa’i hōho’a ia rātou iho, ’e e fa’atoro i ni’a i tā rātou hōho’a ’ia ’āparau ana’e ’oe i te mau rāve’a e nehenehe ai ia rātou e fa’a’ite i te fa’atura i te mau tuha’a rau o tō rātou tino, mai tō rātou nā mata, nā tari’a, te vaha, nā rima ’e nā ’āvae.

Ha’api’i i te ha’api’ira’a tumu : Te mau tamari’i pa’ari

Exodo 1–2

E ’ohipa te Atua nā roto ia tātou tāta’itahi nō te fa’atupu i tāna mau ’ōpuara’a.

E rave rahi ta’ata tei tauturu ’ia fa’atupu i te mau ’ōpuara’a a te Atua nā roto i te fa’ahereherera’a i te ora o Mose te tamaiti. Nāhea ’oe e nehenehe ai e tauturu i te mau tamari’i tā ’oe e ha’api’i ra ’ia hāro’aro’a i te ’ohipa faufa’a roa tā tātou pā’āto’a e rave nei nō te fa’atupu i te hina’aro o te Atua ?

Mau ’ohipara’a e nehenehe e rave

• E ani i te mau tamari’i ’ia fa’a’ite mai e aha tā rātou i ’ite nō ni’a ia Mose i tōna ’aiūra’a. E fa’a’ohipa i te ’api ’ohipara’a nō teie hepetoma ’e te Exodo 1:22 ; 2:1–10 nō te ha’apoto i te ’ā’amu nō te tamari’ira’a o Mose. E tai’o i te mau fa’ahorora’a pāpa’ira’a mo’a i ni’a i te ’api ’ohipara’a, ’e e ani i te mau tamari’i e aha tā te mau vahine tāta’itahi i rave nō te pāruru i te ora o Mose.

• ’A parau i te mau tamari’i nō ni’a i te mau ta’ata tā ’oe e ha’afa’ahiahia nei nō tō rātou ha’apa’o maita’i i roto i te tāvinira’a i te Atua, ’e i te ta’ata ’ati a’e ia rātou, noa atu ē, e mea ha’iha’i roa te tāvinira’a i ravehia e rātou. E ani i te mau tamari’i ’ia paraparau mai nō ni’a i te mau ta’ata tā rātou i ’ite ’o tei tāvini ha’apa’o maita’i i te Atua ’e ia vetahi ’ē. E aha tā tātou tuha’a i roto i te ’ohipa a te Atua ?

Exodo 3–4

E tauturu mai te Fatu iā’u ’ia fa’atupu i tōna hina’aro.

’Ua feruri o Mose ē, e’ita e tano iāna tōna pi’ira’a, ’ua fafau mai rā te Fatu ē, e vai ’oia i pīha’i iho ia Mose ’e e tauturu iāna. Nāhea teie ’ā’amu i te fa’auru i te mau tamari’i tā ’oe e ha’api’i ra ?

Mau ’ohipara’a e nehenehe e rave

• Ma te fa’a’ohipa i te ’ā’amu i roto i te Exodo 3 ; 4:1–17, ’a vaiiho i te mau tamari’i, te tahi i muri mai i te tahi, ’ia fa’ahua ’o Mose rātou. Mai te mea e nehenehe, e hōpoi mai i te mau tauiha’a ’ia fa’a’ohipa rātou, mai te hō’ē moripata ’e hō’ē tumu rā’au iti nō te fa’ahōho’a i te pū ’aihere e ’ama ra i te auahi.

• E ani i te mau tamari’i ’ia tai’o Exodo 3:11 ; 4:1, 10 ’e ’ia ’ite mai e aha te mana’o o Mose i te anira’a ’oia ia Phara’o ’ia vaiiho i te mau ’āti ’Īserā’ela ’ia haere. E aha te taime i fāri’i ai rātou i te reira mau huru mana’o ? E aha tā te mau tamari’i e parau ia Mose nō te tauturu iāna ? Tauturu ia rātou ’ia ’ite mai e mea nāhea tō te Fatu fa’aitoitora’a ia Mose (hi’o Exodo 3:12 ; 4:2–9, 11–12).

• ’A fa’a’ite i te hō’ē ’ohipa tei tupu ’a ’ite ai ’oe ē, ’ua tauturu te Atua ia ’oe ’ia fa’aoti i te hō’ē pi’ira’a ’aore rā ’ia tāvini iāna nā roto i te huru ravera’a. E ani i te mau tamari’i ’ia fa’a’ite mai i te hō’ē taime ’a tauturu ai te Fatu ia rātou.

Exodo 3:1–5

E nehenehe au e fa’a’ite i te fa’atura i te mau vāhi mo’a.

’Ua ani te Fatu ia Mose ’ia ’īriti i tōna tia’a i mua i te pū ’auahi ’ei tāpa’o nō te auraro ’e te fa’atura. Nāhea ’oe i te fa’a’ohipa i teie ’ā’amu nō te ha’api’i i te mau tamari’i nō ni’a i te fa’atura.

Mau ’ohipara’a e nehenehe e rave

• Tai’o i te Exodo 3:1–5, ’e e ani i te mau tamari’i ’ia ha’apoto mai i teie mau ’īrava nā roto i tā rātou iho mau parau. E aha tā tātou e nehenehe e rave nō te fa’a’ite i te fa’atura i te mau vāhi mo’a, mai te fare purera’a ’aore rā i te hiero ? Tauturu i te mau tamari’i ’ia hāmani i « te mau pūtē fa’atura » nō te hōpoi i te fare, tei roto te mau tuha’a ’api parau ’e te mau mana’o nō ni’a i te huru nō te fa’aturara’a. E ani ia rātou ’ia fa’a’ite i teie mau mana’o i tō rātou ’utuāfare.

• E hīmene ’āmui i te hō’ē hīmene nō ni’a i te fa’atura, mai te Le recueillement, c’est l’amour » (Chants pour les enfants, 12), ’e e ani i te tamari’i tāta’itahi ’ia pāpa’i ’e ’ia fa’a’ite i te hō’ē tātarara’a nō te fa’atura tei niuhia i ni’a i te mau parau.

• Fa’a’ohipa i te hōho’a nō Iesu i te tāmāra’a i te hiero (Buka hōho’a o te ’evanelia, n° 51) nō te fa’ati’a i te ’ā’amu i roto i te Mataio 21:12–13. E aha te ta’a-’ē-ra’a te peu a Mose i roto i te Exodo 3:1–5 i tā te feiā ho’o tao’a ? Nō te aha te Fa’aora e hina’aro ai ’ia fa’a’ite tātou i te fa’atura nō te mau mea mo’a ?

Fa’aitoito i te ’apora’a mai i te fare

Nō te tauturu i te mau tamari’i ’ia fa’a’ite mai e aha tā rātou i ha’api’i mai i roto i te Exodo 1–6, e fa’aitoito ia rātou ’ia pāpa’i i te hō’ē hōho’a o te hō’ē o te mau ta’ata tā rātou i ha’api’i mai i roto i te piha ha’api’ira’a nō te fa’a’ite i tō rātou ’utuāfare.

Ha’amaita’ira’a i tā tātou ha’api’ira’a

E fāna’o te mau tamari’i nā roto i te tāpiti-noa-ra’a. ’Eiaha e mata’u i te nā ni’a-fa’ahou-noa-ra’a i te mau ’ohipara’a e rave rahi taime, nō te mau tamari’i ’āpī iho ā rā. E tauturu te reira i te mau tamari’i ’ia ha’amana’o i te mea tā ’oe i ha’api’i.