Mose ’e te pū ’aihere auahi

Mose ’e te pū ’aihere auahi, nā Harry Anderson

21–27 nō Māti

Exodo 1-6

« E ’ua mana’o ho’i au i taua faufa’a nā’u ra »

E ha’amata i tā ’outou tuatāpapara’a nā roto i te hō’ē pure, ’e e ani i te tauturu nō te ’ite mai i te mau parau poro’i i roto i te Exodo 1–6 e tano nō tō ’outou orara’a ’e nō tā ’outou tāvinira’a i roto i te bāsileia o te Atua.

Pāpa’i i tō ’outou mau mana’o

’Ua fa’aora pāpū te anira’a ’ia ora i ’Aiphiti i te ’utuāfare o Iakoba. Terā rā, i muri a’e e rave rahi hānere matahiti te maoro, ’ua fa’atītīhia ’e ’ua ri’ari’a tō rātou mau huā’ai i te hō’ē phara’o ’āpī « ’aore ïa i ’ite mai ia Iosepha » (Exodo 1:8). E’ita e māerehia ’ia uiui te ’āti ’Īsera’ela ē, nō te aha te Atua i fa’ati’a ai ’ia tupu te reira i ni’a ia rātou, tōna nūna’a fafauhia. ’Ua ha’amana’o ānei ’oia i te fafaura’a tāna i rave ’e ’o rātou ? E mau ta’ata noa ānei rātou nōna ? E nehenehe ānei ’oia e ’ite i tō rātou māuiui rahi ?

E nehenehe e tupu mai te hina’aro i roto ia ’outou ’ia ui ato’a i te mau uira’a mai teie. E uiui paha ’outou ē : Tē ’ite ra ānei te Atua i te mea tā’u e fa’aruru nei ? Tē fa’aro’o mai rā ānei ’oia i tā’u mau tāparura’a nō te tauturu ? E pāhono te ’ā’amu nō te fa’aorara’a o ’Īsera’ela i roto i te Exodo, i te reira mau huru uira’a ma te māramarama : E’ita te Atua e ha’amo’e i tōna mau ta’ata. E ha’amana’o ’oia i tāna mau fafaura’a ia tātou ’e e fa’atupu ’oia i te reira i tōna ra taime ’e ’ia au i tāna ravera’a (hi’o Te Parau Ha’api’ira’a ’e te mau Parau Fafau 88:68). « E fa’aorahia ’outou e au i tā’u rima e fa’atorohia nei », tē nā reira ra ’oia. « ’O Iehova vau tō ’outou Atua га, ’o tei arata’i ’ē mai ia ’outou i [tā ’outou] mau hōpoi’a ra » (Exodo 6:6–7).

Nō te hō’ē hi’ora’a nō te buka a Exodo, hi’o « Exodo, te buka a » i roto i te Bible Dictionary [Fa’atoro parau Bibilia].

’ītona tuatāpapara’a a te ta’ata hō’ē

Mau mana’o nō te tuatāpapara’a pāpa’ira’a mo’a a te ta’ata hō’ē

Exodo 1–2

’O Iesu Mesia tō’u ora.

Hō’ē o te mau tumu parau rahi i roto i te buka a Exodo ’oia ho’i, e mana tō te Atua nō te fa’aora i tōna mau ta’ata i te ha’avīra’a. E nehenehe te fa’atītīra’a o te ’āti ’Īsera’ela mai tei fa’a’itehia i roto i te Exodo 1 ’ia hi’ohia ’ei tāpa’o nō te tītīra’a tā tātou pā’āto’a e fārerei nei nō te hara ’e te pohe (hi’o 2 Nephi 2:26–27 ; 9:10 ; Alama 36:28). ’E e nehenehe ’o Mose, te ta’ata fa’aora o te ’āti ’Īsera’ela, e hi’ohia mai te hō’ē taipe, ’aore rā hō’ē fa’ahōho’ara’a nō Iesu Mesia (hi’o Deuteronomi 18:18–19 ; 1 Nephi 22:20–21). ’A tai’o i te Exodo 1–2 ma te ha’amana’o i teie mau fa’aaura’a. ’Ei hi’ora’a, e nehenehe ’oe e ’ite ē, ’ua pāruruhia ’o Mose ’e ’o Iesu i te pohe mai te mau tamari’i ri’i (hi’o Exodo 1:22–2:10 ; Mataio 2:13–16.) ’e ’ua vai rāua to’opiti i roto i te medebara hou te ha’amatara’a o tā rāua tau ’ohipara’a (hi’o Exodo 2:15–22 ; Mataio 4:1–2). E aha te tahi atu mau hi’ora’a tā ’oe i ha’api’i mai i roto i te Exodo nō ni’a i te tītīra’a pae vārua ? nō ni’a i te fa’aorara’a o te Fa’aora ?

Hi’o ato’a D. Todd Christofferson, « Fa’aorara’a », Liahona, Mē 2013, 109–12.

te ’aiū Mose i roto i te ’ete

Mose i roto i te mau ’ōpaero, © Providence Collection/parau nō roto mai i te goodsalt.com

Exodo 3–4

E hōro’a te Atua i te mana i te feiā tāna e pi’i nō te rave i tāna ’ohipa.

I teie mahana, tē ’ite nei tātou ia Mose ’ei peropheta ’e ’ei ti’a fa’atere rahi. ’Aita rā Mose i hi’o iāna iho mai te reira te huru i te taime mātāmua ’a pi’i ai te Fatu iāna. « ’O vai ho’i au » te uira’a ïa a Mose ma te māere, « ’a tae ai au ia Phara’o ra ? » (Exodo 3:11). ’Āre’a rā, ’ua ’ite te Fatu ē, ’o vai mau ’o Mose—’e ’o vai tāna e riro mai. ’A tai’o ai ’oe i te Exodo 3–4, ’a hi’o maita’i e mea nāhea tō te Fatu ha’apāpūra’a ia Mose ’e i te pāhonora’a i tōna mau māna’ona’ora’a. E aha tā ’oe e ’ite mai i roto i teie mau pene ’o tē nehenehe e fa’auru ia ’oe i te taime e mana’o ai ’oe ē, e’ita e ti’a ia ’oe ? Nāhea te Fatu i te ha’amaita’i i tōna mau tāvini i te mana rahi nō te rave i tāna ’ohipa ? (hi’o Mose 1:1–10, 24–39 ; 6:31–39, 47). E aha te taime ’a ’ite ai ’oe i te Atua i te ravera’a i tāna ’ohipa nā roto ia ’oe ’aore rā nā roto ia vetahi ’ē ?

Nō te tahi atu mau parau nō ni’a i te orara’a ’e te misiōni a Mose, ’a hi’o i te « Mose » i roto i te Bible Dictionary [Fa’atorora’a parau Bibilia] ’aore rā, i Guide des écritures [Te arata’i nō te mau pāpa’ira’a mo’a].

Exodo 5–6

E tupu te mau ’ōpuara’a a te Fatu i roto i tōnq iho taime.

Noa atu ē, ’ua haere ’o Mose ma te itoito i mua ia Phara’o, mai tā te Atua i fa’aue, ’e ’ua parau iāna ’ia tu’u i te ’āti ’Īsera’ela, ’ua pāto’i o Phara’o. ’Ua fa’a’eta’eta atu ā ’oia i te orara’a o te ’āti ’Īsera’ela. ’Ua māere ri’i paha o Mose ’e te ’āti ’Īsera’ela i te mea ē ’aita i tupu te mau ’ohipa, noa atu ē ’ua rave Mose i te mau mea tā te Atua i ani iāna ’ia rave (hi’o Exodo 5:22–23).

’Ua ’ite a’ena ānei ’oe ia ’oe i te ravera’a i te hina’aro o te Atua, ’aita rā ’oe i ’ite i te manuia tā ’oe e tīa’i ra ? ’A tai’o fa’ahou i te Exodo 6:1–8, ma te ’imi mai i te mea tā te Fatu i parau nō te tauturu ia Mose ’ia rave tāmau noa. E mea nāhea tō te Fatu tauturura’a ia ’oe ’ia tāmau noa i te rave i tōna hina’aro ?

Exodo 6:3

’O vai ’o Iehova ?

Iehova ’o te hō’ē ïa o te mau i’oa o Iesu Mesia ’e tē fa’ahiti ra nō ni’a i te Fa’aora hou te tāhuti nei. Tē ha’apāpū nei te ’īritira’a a Iosepha Semita ē, te mau peropheta Aberahama, Isaaka ’e Iakoba, ’ua mātau rātou i te Fatu i teie i’oa (hi’o Exodo 6:3, fa’ata’ara’a c). I te rahira’a o te taime, ’ia ’ite-ana’e-hia te parau « te Fatu » i roto i te Faufa’a Tahito, e fa’ahiti ra ïa te reira ia Iehova. I roto i te Exodo 3:13–15, te ti’ara’a « ’O VAU » e fa’ahitira’a ato’a te reira nō Iehova (hi’o Te Parau Ha’api’ira’a ’e te mau Parau Fafau 38:1 ; 39:1).

’ītona tuatāpapara’a a te ’utuāfare

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Exodo 1–2.E rave rahi vahine tei rave i te mau ti’ara’a faufa’a roa i roto i te fa’anahora’a a te Atua nō te fa’atupu i te hō’ē ta’ata fa’aora nō te ’āti ’Īsera’ela. ’Ei ’utuāfare, e nehenehe ’outou e tai’o nō ni’a i nā vahine fa’afānau ’o Sipera ’e ’o Pua (Exodo 1:15–20) ; Te metua vahine o Mose, Iakabeda ’e tōna tuahine ’o Miriama (Exodo 2:2–9 ; Numera 26:59) ; Te tamahine a Phara’o (Exodo 2:5–6, 10) ; ’e te vahine a Mose ’o Zipora (Exodo 2:16–21). Nāhea teie mau vahine i te fa’ahaerera’a i te fa’anahora’a a te Atua i mua ? Nāhea tō rātou mau ’itera’a i te fa’aha’amana’o ia tātou i te misiōni a Iesu Mesia ? E nehenehe ato’a ’outou e ha’aputuputu i te mau hōho’a o te mau fēti’i vahine ’e te mau tupuna ’e ’ia fa’a’ite i te mau ’ā’amu nō ni’a ia rātou. Nahea tātou i te ha’amaita’ira’ahia e te mau vahine parauti’a ? E nehenehe te parau poro’i a te peresideni Russell M. Nelson « E tāparura’a i tō’u mau tuahine » (Liahona, Novema 2015, 95–98) e tauturu i tā ’outou ’āparaura’a.

Exodo 3 :1–6.I te ha’afātatara’a atu ’o Mose i te pū ’aihere auahi, ’ua parau mai ra te Fatu iāna ’ia ’īriti i tōna mau tīa’a ’ei tāpa’o nō te fa’atura. Nāhea e nehenehe ai ia tātou ’ia fa’a’ite i te fa’atura i te mau vāhi mo’a ? ’Ei hi’ora’a, e aha tā tātou e nehenehe e rave nō te fa’ariro i tō tātou fare ’ei vāhi mo’a i reira te Vārua o te Fatu e nehenehe ai e pārahi ? Nāhea e nehenehe ai ia tātou ’ia fa’a’ite hau atu i te fa’atura i roto i te tahi atu mau vāhi mo’a ?

Exodo 4:1–9.’Ua hōro’a te Fatu ia Mose i te mana nō te rave e toru temeio, ’ei mau tāpa’o fa’a’ite i te mau tamari’i nō ’Īsera’ela ē, ’ua tono mai ’oia ia Mose. E aha tā teie mau tāpa’o e ha’api’i nei ia tātou nō ni’a ia Iesu Mesia ?

Exodo 5:2.E aha te aura’a nō tātou ’ia « mātau » i te Fatu ? Nāhea tātou e mātau ai iāna ? (’ei hi’ora’a, hi’o Alama 22:15–18). Nāhea tō tātou aura’a ’e ’ōna i te fa’atupu i tō tātou hina’aro ’ia ha’apa’o i tāna parau ? (hi’o ato’a Ioane 17:3 ; Mosia 5:13).

Nō te mau mana’o hau atu nō te ha’api’ira’a i te mau tamari’i, hi’o te arata’i nō teie hepetoma i roto i te Mai, pe’e mai—nō te Paraimere

Hīmene tei mana’ohia : « Le recueillement, c’est l’amour », Chants pour les enfants, 12.

Ha’amaita’i i tā tātou ’apora’a mai

Tāpe‘a i te hō’ē buka ’ā’amu tuatāpapara’a. E mea maita’i nō ’outou ’ia fa’a’ohipa i te hō’ē buka ’ā’amu ’aore rā, hō’ē buka fa’ata’ara’a nō te pāpa’i i te mau mana’o, te mau uira’a, ’aore rā, te mau ferurira’a e tupu mai ’a tuatāpapa ai ’outou.

Te tamāhine a Phara’o i te ’itera’a i te ’aiū ia Mose

Mose i te ’itera’ahia i roto i te ’ōpaero nā te tamāhine a Phara’o, nā George Soper.