Fa’ahōho’ara’a Iosepha nō ’Aiphiti i roto i te fare tāpe’ara’a, nā Jeff Ward

7–13 nō Māti

Genese 37–41

« E tei ia Iosepha ra Iehova »

’A tai’o ai ’outou i te Genese 37–41, ’a pure ’ia tauturu mai te Vārua Maita’i ia ’outou ’ia ’ite ē, nāhea te mau tuha’a pāpa’ira’a mo’a i te tū’ati i tō ’outou orara’a. Pāpa’i i te mau mana’o tā ’outou e fāri’i.

Pāpa’i i tō ’outou mau mana’o

I te tahi taime e tupu mai te mau ’ohipa ’ī’ino i ni’a i te mau ta’ata maita’i. Tē ha’api’i nei te orara’a ia tātou i te reira ha’api’ira’a ma te māramarama, ’e mai te reira ato’a te orara’a o Iosepha, te tamaiti a Iakoba. ’Ua riro ’oia ’ei ta’ata tufa’a nō te fafaura’a tā te Atua i rave ’e tōna mau metua, terā rā, ’ua ririhia ’oia e tōna mau taea’e ’e ’ua ho’ohia i te fa’atītīra’a. ’Ua pāto’i ’oia e ’ōfati i tōna parauti’a ’a fa’ahina’aro ai te vahine a Potiphara iāna, ’e nō reira ’ua hurihia ’oia i roto i te fare tāpe’ara’a. E au ra ē, rahi noa atu tōna ha’apa’o maita’i, rahi noa ato’a atu te fifi tāna i fārerei. Terā rā, e ’ere teie mau ’ati ato’a i te hō’ē tāpa’o nō te fāri’i ’ore o te Atua. Nā roto rā i te reira mau mea tā’āto’a, « tei iāna ra Iehova » (Genese 39:3). ’Ua riro te orara’a o Iosepha ’ei fa’a’itera’a nō teie parau mau faufa’a roa : E’ita te Atua e fa’aru’e ia tātou. « E’ita te pe’era’a i te Fa’aora e tātara i tō tātou mau tāmatara’a tā’āto’a » Te ha’api’ira’a ïa a te peresideni Dieter F. Uchtdorf. « E ’īriti rā te reira i te mau pāruru i rotopū ia ’outou ’e te tauturu tā tō ’outou Metua i te ao ra e hina’aro nei e hōro’a mai ia ’outou. E vai te Atua i pīha’i iho ia ’outou » (« Hō’ē tītaura’a nō te fare », Liahona, Novema 2017, 22).

Mau mana’o nō te tuatāpapara’a pāpa’ira’a mo’a a te ta’ata hō’ē

Genese 37:1–28 ; 39 ; 41:9–45

« E tei ia Iosepha ra Iehova » i roto i tōna ’ati.

E rave rahi taime, e au ra ē, ’ua fa’aru’e te faufa’a maita’i ia Iosepha, ’āre’a rā te Fatu ’aita roa ïa i nā reira. ’Ia tai’o ’oe i te ’ā’amu o Iosepha, ’a feruri i te mau uira’a mai teie : E aha tā Iosepha i rave nō te vai piri noa i te Fatu i roto i tōna mau taime tāmatara’a ? E aha te huru o te Fatu « i ni’a iho iāna » ? (Genese 39:2–3, 21, 23).

E nehenehe ato’a ’oe e ui i te mau uira’a mai te reira nō ni’a i tō ’oe orara’a. E aha te fa’a’itera’a tā ’oe i ’ite ’aita te Fatu i fa’aru’e ia ’oe i roto i tō ’oe mau taime tāmatara’a ? ’A feruri e nāhea ’oe e nehenehe ai e fa’a’ite i tō ’oe mau ’itera’a i te mau melo o te ’utuāfare ’e i te mau u’i a muri a’e (hi’o 1 Nephi 5:14). E aha tā ’oe e nehenehe e rave nō te fa’aineine ia ’oe iho ’ia vai ha’apa’o maita’i noa i te taime e fa’aruru ai ’oe i te mau tāmatara’a a muri a’e ?

Hi’o ato’a Ioane 14:18 ; Roma 8:28 ; Alama 36:3 ; Te Parau Ha’api’ira’a ’e te mau Parau Fafau 121:7–8 ; D. Todd Christofferson, « Te ’oa’oa o te feiā mo’a », Liahona, Novema 2019, 15–18.

Genese 37:5–11 ; 40 ; 41:1–38

Mai te mea e vai ha’apa’o maita’i noa vau, e arata’i ’e e fa’auru te Fatu iā’u.

’Ua ha’api’i Elder David A. Bednar ē, « E hōro’ahia mai te mau heheura’a nā roto i te mau rāve’a rau, tae noa atu, ’ei hi’ora’a, te mau moemoeā, te mau ’ōrama, te mau ’āparaura’a i te mau ve’a nō te ra’i, ’e te te fa’aurura’a » (« Te Vārua o te heheura’a », Liahona, Mē 2011, 88). ’Ua fa’a’ohipa te Fatu i te mau moemoeā nō te heheu mai i te mau parau mau ia Iosepha, i te tāvini fa’atere ’e i te ta’ata tunu faraoa o Phara’o, ’e ia Phara’o. ’Ua heheu ato’a mai te Fatu ia Iosepha nāhea ’ia tātara i teie mau moemoeā. E aha tā ’oe e nehenehe e ha’api’i mai nā roto mai i te Genese 37:5–11 ; 40:5–8 ; 41:14–25, 37–38 nō ni’a i te fāri’ira’a ’e te hāro’aro’ara’a i te heheura’a nō ’ō mai i te Fatu ra ? ’Ei hi’ora’a, e aha tā ’oe e ha’api’i mai nā roto mai i te hi’ora’a o Iosepha i te mau taime e ’ere i te mea ’ōhie ’ia hāro’aro’a i te hō’ē heheura’a ? (hi’o Genese 40:8 ; 41:16).

Te tātarara’a Iosepha i te mau moemoeā o te tāvini ’e o te ta’ata tunu faraoa, nā François Gerard

’A feruri e nāhea te Fatu i te heheu mai i tōna hina’aro ia ’oe. E aha tā ’oe e rave nō te ’ohipa i ni’a i te heheura’a tā te Fatu i hōro’a mai ia ’oe ? Nāhea ’oe i te ’imi i te arata’ira’a hau atu nō roto mai iāna ?

Hi’o ato’a Russell M. Nelson, « Heheura’a nō te ’Ēkālesia, heheura’a nō tō tātou orara’a », Liahona, Mē 2018, 93–96 ; Michelle Craig, « ’Aravihi pae vārua », Liahona, Novema 2019, 19–21.

Genese 38 ; 39:7–20

Nā roto i te tauturu a te Fatu, e nehenehe au e horo ’ē i te fa’ahemara’a.

’Ia fa’ahema-ana’e-hia ’oe, e nehenehe te hi’ora’a o Iosepha e hōro’a ia ’oe i te fa’aitoitora’a ’e te pūai. ’A tai’o ai ’oe nō ni’a i tōna ’itera’a i roto i te Genese 39, e tāpa’o i te mau mea tā Iosepha i rave nō te pāto’i i te fa’ahemara’a. ’Ei hi’ora’a :

• « ’Ua pāto’i ’oia » i te mau fa’ahina’arora’a a te vahine a Potiphara (’īrava 8).

• ’Ua ’ite ’oia ē, e riro te ravera’a i te hara ’ei fa’a’ino’inora’a i te Atua ’e ia vetahi ’ē (mau irava 8–9).

• ’Aita ’oia « i fa’aro’o atu » i te fa’ahemara’a, noa atu ’ua tāmau noa te reira i terā mahana, i terā mahana » (’īrava 10).

• « ’Ua fa’aru’e atura rā ’oia i te ’ahu… ’e horo mai ra, ’e tae mai ra i rāpae’au » (’īrava 12).

Ma te hi’ora’a o Iosepha i roto i te ferurira’a, ’a feruri e hāmani i te hō’ē fa’anahora’a nō te ’ape ’e nō te pāto’i i te fa’ahemara’a. ’Ei hi’ora’a, e nehenehe ’oe e feruri i te hō’ē fa’ahemara’a tā ’oe e fārerei nei, ’a pāpa’i i te mau huru tupura’a nō te ’ape, ’e ’a hāmani i te hō’ē fa’anahora’a nō te ti’aturi i ni’a i te Metua i te ao ra ’ia tupu mai te fa’ahemara’a (hi’o 2 Nephi 4:18, 27–33).

Fa’ahemara’a :

Te mau huru tupura’a e ’ape :

Te fa’anahora’a nō te pāhono atu :

Nā mua atu i teie ’ā’amu nō ni’a i te pūai o Iosepha i te taime a fārerei ai ’oia i te fa’ahemara’a, tē vai ra te tahi atu ’ā’amu ta’a ’ē roa nō ni’a i tōna tua’ana o Iuda, o tē ’itehia i roto i te Genese 38. E aha tā te mau pene 37, 38, ’e te 39, ’ia ’āmuihia rātou, e ha’api’i mai nei ia tātou nō ni’a i te vi’ivi’i ’ore ?

Hi’o ato’a 1 Korinetia 10:13 ; 1 Nephi 15:23–24 ; 3 Nephi 18:17–18.

Mau mana’o nō te tuatāpapara’a pāpa’ira’a mo’a a te ’utuāfare ’e te purera’a pō ’utuāfare

Genese 37.’Āhiri ’outou i riro ’ei hō’ē o te mau taea’e nō Iosepha, e aha tā ’outou e rave nō te pāto’i i te pohehae ’eiaha ’ia ha’aparuparu i tō ’outou auta’atira’a ’e ’ōna ? Nāhea te reira i te tauturu ia tātou ’ia « paraparau ma te hau » te tahi ’e te tahi ? (’īrava 4).

Genese 39.I roto i te mau video « The Refiner’s Fire » ’e « After the Storm » (ChurchofJesusChrist.org) tē fa’a’ite ra te mau ’itera’a o te mau ta’ata tei ’itehia ia rātou te pūai nā roto i te fāriura’a i ni’a i te Fatu i roto i tō rātou mau tāmatara’a. Penei a’e e nehenehe ’outou e māta’ita’i hō’ē o te reira ’e ’ia paraparau nō ni’a i te mea tā Iosepha e parau ’āhani ē, e tītauhia iāna ’ia hāmani i te hō’ē video nō ni’a i tōna mau ’itera’a. E nehenehe ’outou e hīmene ’āmui « Jésus-Christ est mon modèle » (Chants pour les enfants, 40–41) ’e ’e ’imi mai i te mau parau a’o ’o tā tō ’outou ’utuāfare e fa’a’ite atu ia Iosepha ’a fārerei ai ’oia i tōna mau tāmatara’a.

Genese 39:7–12.E nehenehe te tai’ora’a i teie mau ’īrava e hōro’a mai i te hō’ē rāve’a nō te ’āparau i te ture nō te vi’ivi’i ’ore i tō ’outou ’utuāfare. Teie te tahi mau rāve’a o te nehenehe e tauturu i teie tau’ara’a parau : Iakoba 2:28 ; Alama 39:3–9 ; « Te vi’ivi’i ’ore » (i roto Nō te Pūai o te Feiā ’Āpī [2011], 35–37) ; « E mea mo’a te ’āpenira’a ’e te nehenehe » (i roto Tauturu i te mau metua [2019], AddressingPornography.ChurchofJesusChrist.org).

Genese 41:15–57.E aha tā tātou e ha’api’i mai nā roto mai i teie mau ’īrava nō ni’a e nāhea tō te Fatu ha’amaita’ira’a i te mau ta’ata nō Aiphiti nā roto ia Iosepha ? E aha tā tātou e nehenehe e ha’api’i mai nō ni’a i te fa’aineinera’a nō te mau taime rū i muri nei ? E ’āparau e aha te ti’a ia ’outou ’ia rave ’ia ineine maita’i a’e ’ei ’utuāfare. Nō te mau mana’o, hi’o Gospel Topics [mau tumu parau nō te ’evanelia], « Fa’aineinera’a nō te ’ati rū », topics.ChurchofJesusChrist.org.

Nō te mau mana’o hau atu nō te ha’api’ira’a i te mau tamari’i, hi’o te arata’i nō teie hepetoma i roto Mai, pe’e mai—nō te Paraimere

Hīmene tei mana’ohia : « Jesus est notre ami », Chants pour les enfants, 37.

Ha’amaita’i i tā ’oe iho tuatāpapara’a pāpa’ira’a mo’a

Fa’aau i te mau pāpa’ira’a mo’a i tō ’oe orara’a. ’Ia tai’o ’oe, ’a feruri e nāhea te mau ’ā’amu ’e te mau ha’api’ira’a i roto i te mau pāpa’ira’a mo’a e tano ai i tō ’oe orara’a. ’Ei hi’ora’a, nāhea tē ha’apa’o maita’i o Iosepha nō Aiphiti i te fa’auru ia ’oe ’ia vai ha’apa’o noa i te Fatu noa atu te ’ati ?

Fa’ahōho’ara’a nō te mau tua’ana o Iosepha i te ’īritira’a i tōna pereue, nā Sam Lawlor